Wan Kwestin

?Tok ya “kasem paoa blong speret,” we i kamaot long 1 Korin 14:37, i minim se wan man i kasem tabu speret finis olsem we i makemaot hem, no i minim se hem i kasem paoa blong speret olsem wan merikel?

Long New World Translation of the Holy Scriptures, vas ya i rid olsem: “Sipos eni man i ting se hem i wan profet no i kasem paoa blong speret, letem hem i save samting ya we mi mi raetem long yu, from we oli ol loa blong Masta.”​—1 Korin 14:37.

Man we i ridim samting ya i save tekem “paoa blong speret” olsem se olgeta Kristin long faswan handred yia tabu speret i makemaot olgeta mo oli kam ol speret pikinini blong God. No oli save kasem save tok ya se i go long wan nomo we i kasem wan spesel paoa blong tabu speret. Ating laswan mining ya nao i moa stret, olsem ol narafala poen we oli joen long bisnes ya oli soemaot.

Long ples ya aposol Pol i yusum Grik tok ya pneu·ma·ti·kos’, stampa mining blong hem se “joen i go long speret, long saed blong speret.” Mining ya i stap insaed long tok olsem ‘bodi long saed blong speret,’ ‘blesing blong speret,’ “speret i mekem yufala i waes,” mo ‘haos blong speret.’​—1 Korin 15:44; Efesas 1:3; Kolosi 1:9; 1 Pita 2:5.

Long ol rod ya, Baebol i makemaot wanem samting (bodi blesing, waes, haos) we “speret” i joen wetem. Be long sam narafala vas, mining blong stret tok blong soem “speret” i dipen long ol vas raonabaot. Eksampel, 1 Korin 2:14, 15 i soemaot defren fasin blong wan man long saed blong bodi wetem blong ho pneu·ma·ti·kos’, we i minim “man ya blong speret.”

Wan Korin japta 12 go kasem 14 i tokbaot paoa blong mekem merikel. God i givim long sam Kristin blong bifo blong soem se hem i no moa yusum ol prapa man Isrel be naoia i blesem ol Kristin “Isrel blong God.” (Galesia 6:16) Long saed blong ol paoa ya, Pol i raetem: “I gat ol defrenkaen paoa ya long yumi, be i gat wan Speret ya nomo blong God we i stap givimaot olgeta.” (1 Korin 12:4) Spesel waes, save, mo bilif hemia sam long ol paoa we tabu speret i givim, olsem paoa blong talemaot profet tok, toktok long narafala lanwis, mo eksplenem mining blong toktok long narafala lanwis.​—1 Korin 12:8-11.

Olgeta Kristin long Korin we Pol i raet long olgeta tabu speret blong God i makemaot olgeta. Pol i talem: “Be nao, God i wasemaot ol sin blong yufala blong mekem yufala i klin. Hem i mekem yufala i tabu, yufala i man blong hem. Mo hem i mekem yufala i stret man long fes blong hem, from nem blong Jisas Kraes, Masta blong yumi, mo from Speret blong God blong yumi.” (1 Korin 6:11; 12:13) Yes, oli kasem finis ‘tabu speret ya blong hem, we hem i olsem saen blong soemaot we ol promes blong speret ya blong hem bambae oli kamtru.’ (2 Korin 5:5) Be, i no evriwan oli kasem wan spesel paoa long tabu speret. Mo i luk olsem se plante oli laekem fasin ya blong toktok long narafala lanwis, oli ting se paoa ya i impoten tumas. Pol i raet blong stretem tingting blong olgeta mo poenemaot se paoa blong talemaot profet tok i save mekem i moa gud long plante man bitim toktok long narafala lanwis. Long en blong japta 12, Pol i givim advaes long ol man Korin se: “Yufala i mas putum tingting blong yufala i strong moa blong kasem ol paoa ya we oli gudfala moa.”​—1 Korin 12:28-31.

Nao, long stat blong japta 14, hem i talem strong: “Fasin ya we man i stap laekem ol man tumas, yufala i mas traehad blong folem. Be yufala i mas putum tingting blong yufala long ol paoa ya tu we God i stap givim, blong kasem olgeta [ta pneu·ma·ti·ka’]. Mo nambawan long ol paoa ya, i paoa blong talemaot ol tok we God i givim.” ?Putum tingting i stap long wanem? Ol Kristin ya oli no nid blong lukaot speret blong makemaot olgeta, from oli gat finis. Pol i minim ol “paoa” blong speret, we long en blong japta 12, hem i pulum olgeta blong lukaotem. Taswe New World Translation of the Holy Scriptures i tanem 1 Korin 14:1 olsem: “Gohed moa blong lukaot ol paoa long saed blong speret.” Sam narafala Baebol oli tanem ta pneu·ma·ti·ka’ i kam “ol paoa ya long saed blong speret” no “ol paoa ya blong Speret.”

Tingbaot ol narafala poen ya, nao yumi luk se kolosap long en blong japta 14, Pol i joenem fasin blong talemaot ol profet tok wetem pneu·ma·ti·kos’. Olsem long vas 1, ol vas raonabaot oli soem se i minim we man i kasem paoa blong speret olsem wan presen. The New Testament in Modern Speech, we Richard. F. Weymouth i raetem, i tanem olsem: “Sipos eni man i ting se hem i wan profet no wan man wetem ol paoa blong speret, letem hem i luksave ol samting we mi stap raetem naoia olsem loa blong Masta.”

Yes, olgeta Kristin, nating we oli bin gat paoa blong talemaot ol toktok no ol narafala paoa blong speret, oli nidim blong akseptem mo folem tok we Pol i raetem olsem wanem ol samting oli mas gohed insaed long kongregesen.