Kwestin Blong Olgeta We Oli Ridim Magasin Ya

?Olgeta Merikel We Oli Mekem Sikman i Kam Gud Bakegen Oli Kamaot Long God?

Yumi sua fulwan se Jeova God i gat paoa blong hilim man. Mo yumi sua se hem i save givim paoa ya long ol man we oli wosipim hem. Long taem blong ol aposol, paoa ya blong hilim man i wan spesel presen we oli kasem from tabu spirit blong God. Aposol Pol i raetem se: ‘God i givim spirit blong hem long yumi wanwan, blong yumi evriwan i save givgivhan long yumi. Long sam man, spirit ya i stap givim tok blong waes, mo long sam narafala man, i stap givim paoa blong oli mekem ol sikman oli gud bakegen. Long sam narafala man, hem i stap givim paoa blong talemaot ol tok we God i givim, mo long sam narafala man bakegen, i stap givim paoa blong tok long ol narafala lanwis.’—1 Korin 12:4-11.

Be long semfala leta ya we Pol i raetem long ol man Korin, hem i talem se ol merikel ya we oli ol presen blong tabu spirit blong God bambae oli finis. Hem i se: “Maet sam man oli gat paoa blong talemaot ol tok we God i givim, be fasin ya bambae i finis. Maet sam man oli gat paoa blong tok long ol narafala lanwis, be ol lanwis ya bambae i no moa gat. Maet sam man oli save evri samting, be save ya bambae i lus.”—1 Korin 13:8.

Long faswan handred yia, Jisas Kraes mo ol aposol blong hem oli mekem ol merikel blong hilim ol sikman. Long taem ya we Kristin kongregesen i jes stat nomo, ol presen blong tabu spirit, olsem paoa ya blong hilim man, oli blong soemaot paoa blong God, mo oli soemaot tu we God i glad long Kristin kongregesen ya we i jes stanap, mo hem i stap blesem kongregesen ya. Be taem Kristin kongregesen i gru mo i gohed gud, ol spesel presen blong tabu spirit oli finis tu. Ol man blong God oli no moa yusum ol spesel presen no paoa blong tabu spirit blong soemaot we God i glad long olgeta. Hemia from we strong bilif, hop mo lav blong olgeta i soemaot we God i stap blesem olgeta. (Jon 13:35; 1 Korin 13:13) From samting ya, samwe long yia 100 K.T., God i no moa givim paoa long man blong oli mekem ol merikel blong sikman i kam gud bakegen.a

Be maet, yu stap tingting se, ?From wanem mi stap harem ol stori blong ol merikel we oli mekem sikman i gud bakegen?’ Tingbaot stori we wan niuspepa i talem long saed blong wan man we i talem se hem i kasem sik ya kansa. Ol lam oli gru long hed blong man ya, long kidni blong hem, mo insaed long bun blong hem. I luk olsem se fiuja blong man ya i nogud tumas. Be man ya i talem long niuspepa se wan dei God i “toktok” long hem. Ale sam dei i pas, mo kansa blong hem i finis.

Taem yu harem wan stori olsem, i gud yu askem long yu wan se: ‘?Stori ya i tru? ?I gat ol pepa blong ol tes we dokta i mekem blong pruvum se toktok blong man ya i tru? ?Mo sipos i tru we man ya i kam gud, Baebol i tijim se God nao i stap biaen long olgeta merikel we oli mekem sikman i gud bakegen?’

Ansa blong laswan kwestin ya i impoten tumas. Jisas i givim woning long ol man blong hem se: “Yufala i mas lukaot long ol giaman profet. . . . Long Lasdei, bambae plante man oli save singaot long mi se, ‘Masta, Masta. Long nem blong yu, mifala i talemaot ol tok we God i givim long mifala. Mo long nem blong yu, mifala i ronemaot plante devel. Mo long nem blong yu, mifala i mekem plante merikel. ?Olsem wanem long mifala?’ Be bambae mi talem stret long fes blong olgeta se, ‘Neva mi mi save yufala. Yufala i man blong mekem ol rabis fasin, yufala i gowe long mi.’”—Matiu 7:15, 21-23.

Long vas ya blong Baebol, i klia nomo we i gat wan narafala paoa we ol man oli yusum blong mekem merikel we oli talem se i hilim man. Be narafala paoa ya i no kamaot long God. Taswe, blong blokem ol man blong oli no giaman long yumi se oli mekem ol merikel long nem blong God, yumi mas kasem stret save long saed blong God, yumi mas yusumgud tingting we God i givim long yumi blong skelem samting, mo yumi mas lanem olsem wanem blong luksave olgeta we oli stap mekem ol samting we God i wantem.—Matiu 7:16-19; Jon 17:3; Rom 12:1, 2.

[Futnot]