?Ol Merikel Blong Tekemaot Sik Oli Stap Hapen Yet?

“!BILIF long Jisas mo bambae yu kamgud bakegen!” Ol tok olsem oli pulum Alexandre, memba blong wan jyos blong ol Evanjelis, blong tingting se sipos hem i dring wan meresin blong traem mekem sik blong hem i kamgud, hem i no gat bilif. Hem i sua se bilif nomo bambae i mekem merikel ya we hem i nidim i kamaot. Benedita, wan woman we i strong long skul Katolik, i harem nyus se ol merikel blong tekemaot sik oli stap kamaot long tabu haos blong Aparasida do Nort, long Sao Polo, Brasil. Nao samting ya i pulum filing blong hem. Ale hem i yusum sam tok blong majik we anti blong hem i tijim long hem, blong prea long Woman blong Aparasida, long tabu Antony, mo long sam narafala “tabu man,” blong oli givim paoa long hem blong mekem ol sikman oli kamgud bakegen.

I luk olsem se, long taem blong yumi tu, plante man oli bilif yet long ol merikel blong tekemaot sik. ?From wanem? Ating, samfala oli harem nogud taem oli luk we ol famle blong olgeta, antap moa ol pikinini blong olgeta, oli sik, oli soa, mo oli safa, be ol dokta oli no naf blong winim sik blong olgeta. Mo tu, ol dokta mo meresin long taem blong yumi oli sas tumas, taswe maet samfala we oli stap sik blong longtaem oli harem se i gud nomo blong lukaot wan man blong mekem merikel long olgeta. Samfala oli luk plante jyos mo man long televisen we oli talem se oli naf blong tekemaot ol sik olsem AIDS, tingting i foldaon, kansa, hed i krangke, hae bladpresa, mo plante narafala sik. Nating se ol man oli bilif long olgeta no nogat, maet oli go luk olgeta from we i no moa gat wan narafala rod blong folem. I gat sam narafala we oli bilif se ol rabis speret nao oli givim sik long olgeta. From samting ya, oli ting se meresin we dokta i givim i no save givhan long olgeta.

Be, i gat samfala tu, we oli no bilif nating mo oli agensem strong ol tingting ya se ol “tabu man” we oli ded, no ol man we oli laef, oli save mekem merikel blong tekemaot sik. Nyuspepa ya Jornal da Tarde, i tokbaot Dráusio Varella, wan dokta we i stadi long rod blong blokem ol sik. Dokta ya i ting se bilif long ol merikel “i spolem bilif blong ol man we i isi nomo blong trikim olgeta, mo we oli no moa save wanem rod blong folem.” Hem i gohed i se: “From we plante oli putum tingting blong olgeta i stap strong long ol merikel, oli no moa karem ol meresin we oli nidim blong stretem sik blong olgeta. Oli lesin long ol man ya blong gyaman nomo.” The New Encyclopædia Britannica tu i eksplenem se: “Long ol yia we oli pas, ol merikel oli joen wetem ol tabu ples mo ol kastom blong skul. Ol dokta oli talem se taem man i sik, ol samting ya oli save gat bigfala paoa long tingting blong hem, nao hem i save ting se oli mekem hem i kamgud bakegen.” Nating se i olsem, plante man oli bilif yet se sik blong olgeta i bin kamgud from wan merikel. !Long tingting blong olgeta, merikel ya i rili wok!

Olgeta we oli savegud Baebol oli save se Jisas Kraes i mekem plante sikman oli kamgud bakegen, from “paoa blong God.” (Luk 9:​42, 43) Taswe, maet oli askem se, ‘?Paoa blong God i stap wok yet mo i stap mekem ol merikel oli kamaot yet long taem blong yumi?’ Sipos yes, ?from wanem ol traehad blong mekem merikel oli no gat ol gudfala risal olsem ol man blong mekem merikel oli promes? ?Hemia from we sikman i no gat naf bilif, mo from we hem i no givim naf mane? ?Taem wan Kristin i stap harem nogud from wan sik we maet i no gat meresin blong hem, i stret se hem i lukaot wan man blong mekem merikel? ?Mo ol kaen merikel olsem Jisas i mekem we oli wokgud evritaem, bambae oli kamaot bakegen samtaem? Yu save faenem ansa long ol impoten kwestin ya long haf we i kam biaen.