?God i Agri Long Merikel?

“MAN, tede yumi luk ol samting we i narafala olgeta.” Yes, ol man we oli stap lukluk oli sapraes. Wan man we haf bodi blong hem i ded naoia hem i save wokbaot bakegen fored long olgeta. Man we i mekem merikel ya i talem long man ya i se: “Mi mi talem long yu, yu stanap, yu tekem bed blong yu, yu wokbaot, yu gohom.” !Mo man ya i mekem olsem! Hem i no moa stap olsem wan man we haf bodi blong hem i ded. !Olgeta we oli stap long taem ya oli stat blong “leftemap nem blong God”! (Luk 5:​18-26) I klia se God i agri long merikel ya, we Kraes i wokem kolosap 2,000 yia finis.

?Be tede i olsem wanem? ?Merikel i gud yet long ol man we oli no save faenem meresin blong winim sik blong olgeta long haospetal? Jisas i stap wokem ol merikel. Tede i gat sam man we oli talem se oli stap mekem merikel olsem Jisas. ?Olsem wanem yumi save tingbaot olgeta ya?

Merikel blong tede i olsem “fasin blong winim ol sik long prea mo soemaot bilif long God.” Buk ya Encyclopædia Britannica i talem se: “Histri blong merikel blong ol Kristin i stat wetem bigfala minista wok blong Jisas mo ol aposol.” Yes, Jisas i mekem ol bigbigfala merikel. ?Tede ol man blong merikel oli mekem olsem hem?

?Man i Mas Bilif?

Buk ya, Black’s Bible Dictionary i talem se Jisas i “tokbaot [bilif] olsem wan samting we man i mas gat bifo hem i wokem merikel.” ?Be i tru olsem? ?Jisas i stap askem man we i sik blong i mas bilif bifo we hem i mekem hem i kamgud bakegen? No gat. Man we i mekem merikel hem i mas bilif be i no man we i sik. Long wan taem ol disaepol blong Jisas oli no save mekem wan boe we tingting blong hem i lus i kamgud bakegen. Jisas i mekem boe ya i kamgud bakegen mo biaen i talem long ol disaepol blong hem from wanem oli no save mekem boe ya i kamgud bakegen. “Jisas i talem long olgeta, i se ‘From we bilif blong yufala i no naf.’ ”​—⁠Matyu 17:​14-20.

Matyu 8:​16, 17 i se, Jisas “i mekem olgeta sikman oli gud bakegen tu.” Yes, ol man ya oli gat smol bilif long Jisas blong oli kam long hem. (Matyu 8:13; 9:​22, 29) Long plante taem oli mas kam askem hem blong mekem olgeta oli kamgud bakegen. Be, oli no nidim blong talemaot long hem fastaem se oli bilif blong hem i mekem merikel. Wan taem Jisas i mekem wan man we i no save wokbaot i kamgud bakegen, man ya i neva save Jisas. (Jon 5:​5-9, 13) Long naet ya we ol man oli kam holem hem, Jisas i putum han blong hem long sora blong wan man blong hae pris nao i kamgud bakegen, nating se man ya i wan long ol enemi blong Jisas we oli kam blong holem hem. (Luk 22:​50, 51) !Tru ya, long wan taem, Jisas i mekem man we i ded finis i laef bakegen!​—⁠Luk 8:​54, 55; Jon 11:​43, 44.

?Olsem wanem Jisas i save wokem ol merikel ya? From tabu speret, no paoa blong God nomo. Samting ya nao i mekem ol man oli kamgud bakegen, i no bilif blong ol man we oli sik. Sipos yu ridim ol store insaed long ol Gospel, bambae yu luksave se Jisas i no askem plante man blong oli stap taem hem i wokem ol merikel. Hem i no mekem samting ya blong pulum tingting no filing blong olgeta mo blong mekem flas long fored blong ol man. Mo tu, nating we sik ya i olsem wanem, Jisas i save mekem i kamgud bakegen. Oltaem hem i save mekem merikel, mo hem i neva askem ol man blong oli pem hem from.​—⁠Matyu 15:​30, 31.

?Ol Merikel Blong Tede Oli Olsem Blong Jisas?

Sik i wan nogud trabol, taem i kasem yumi, yumi wantem kamgud bakegen. ?Olsem wanem, sipos yumi stap long wan ples we “ol dokta oli no stap lukaotgud long ol man we oli no gat nem”? Wan dokta i luk samting ya i kamaot long wan kantri long Saot Amerika. ?Mo olsem wanem sipos yumi laef long wan ples we ‘40% long ol dokta nomo oli naf blong mekemgud wok blong olgeta’?

Yumi no sapraes blong luk se plante man, taem oli no faenem rod blong winim sik blong olgeta, oli traem wokem merikel. Be ol merikel we oli wokem blong tekemaot sik long ol man oli no tru. Eksampel, samwe long 70,000 man oli go long wan miting long Sao Polo, Brasil, long taem ya tu man i ‘brebrekem plante glas blong ae we ol man oli sakem, tufala i talem se bambae ae blong ol man ya oli kamgud bakegen.’ Wan long tufala man ya i talemaot stret, taem oli askem kwestin long hem i se: “Mi no save talem se bambae olgeta man we oli sik oli save kamgud bakegen. Hem i stap long bilif blong olgeta nomo. Sipos man i bilif, bambae hem i kamgud bakegen.” Hem i talem se i fol blong man we i sik sipos merikel i no kamaot from we hem i no gat bilif. !Tingbaot, Jisas i talem se ol man blong wokem merikel oli no winim sik, olgeta nao oli nogat bilif.

Wan narafala man blong wokem merikel i talem se hem i save mekem kansa mo ol man we oli no save wokbaot oli kamgud bakegen. ?Wanem samting i kamaot? Magasin ya Veja i talem se, “i klia se promes blong hem i no kamtru.” Mo tingbaot fasin ya blong hem: “Kolosap tu haoa hem i stap prij, i prea, i stap krae, mo i singsing​—⁠mo tu i saksakem han blong hem blong ronemaot ol devel long ol man we oli bilif. Biaen, hem i sakem nektae mo angkejif blong hem long ol man we hem i bos long filing blong olgeta finis mo i givim plet blong tekem ‘mane we ol man oli wantem givim.’ ” Jisas mo ol aposol blong hem oli neva askem mane from ol merikel we oli stap mekem, mo neva oli stap mekem ol samting olsemia blong ol man oli stap lukluk.

I klia se tede ol man we oli stap wokem merikel oli no mekem olsem Jisas i mekem. I no gat risen blong ting se God bambae i agri long olgeta. ?Be, tede hem i stap agri yet long ol merikel? ?I gat rod we bilif blong yumi i save givhan long yumi taem yumi no ol fren blong yumi oli sik?