Olsem Wanem Bilif i Save Givhan Long Ol Sikman

OL STORE blong ol merikel long Baebol oli makem se God i stap tingbaot laef blong yumi, mo ol merikel ya oli soemaot se God i gat paoa blong mekem man we i sik i kamgud bakegen. From we ol merikel ya oli mekem se ol man oli leftemap nem blong God mo oli haremgud from, taswe yumi save askem se, ?Wok blong merikel we tabu speret i givim i stap yet?

Ansa blong kwestin ya se no​—⁠mo maet sam man oli sapraes from wanem i olsem. Ol merikel long faswan handred yia oli finisim wok blong olgeta. Buk ya The Illustrated Bible Dictionary i talem stret nomo, i se: “Merikel i haf blong wosip, i no wan samting olsem meresin.” ?Long saed blong wosip from wanem i gat ol merikel ya?

Wan samting se, ol merikel blong Jisas oli makemaot hem olsem Mesaea. Mo biaen long ded blong hem, ol merikel ya oli pruvum se God i stap blesem nyufala Kristin kongregesen. (Matyu 11:​2-6; Hibrus 2:​3, 4) Mo tu, ol merikel ya oli soemaot se promes blong God blong mekem ol man oli kamgud bakegen long nyufala wol bambae i save kamtru. Ol merikel ya oli mekem bilif blong yumi i strong se i gat taem i stap kam we bambae “i no gat wan man ples we i save talem se: ‘Mi mi sik.’ Ol man we oli stap long ples ya, bambae God i tekemaot rong blong olgeta.” (Aesea 33:24) Taem ol merikel ya oli finisim plan ya blong God long faswan handred yia, yumi no moa nidim olgeta.

I gud blong makem se ol disaepol blong Jisas long faswan handred yia oli gat sam sik we oli no wokem merikel from. Hemia i wan pruf blong soemaot se wok ya blong ol merikel blong Jisas mo ol aposol hem i blong tijim ol impoten trutok, oli no meresin blong mekem ol man oli haremgud. Pol i askem Timote blong yusum smol waen from sik we hem i gat, be i no merikel. Pol we i stap wokem ol merikel blong mekem ol man oli kamgud bakegen i harem nogud from “nil blong aranis, we i stap stikim” hem mo i stap “kilim” hem.​—⁠2 Korin 12:7; 1 Timote 5:⁠23.

Taem ol aposol oli ded, presen blong wokem merikel i finis. Pol i soemaot se samting ya bambae i kamtru. Hem i tokbaot Kristin kongregesen olsem wan smol pikinini, hem i se: “Taem we mi pikinini yet, mi stap tok olsem pikinini, mi gat save olsem pikinini, mo tingting blong mi i tingting blong pikinini nomo. Be biaen, taem we mi kam man, mi livim ol fasin blong pikinini.” Mining blong pijatok blong hem se ol wok blong merikel oli haf blong Kristin kongregesen we i olsem pikinini. Ol merikel ya oli olsem “tingting blong pikinini nomo.” Taswe, hem i talem se: “Mi livim ol fasin blong pikinini [wokem merikel].”​—⁠1 Korin 13:​8-11.

?Bilif i Save Givhan Long Yumi Taem Yumi Sik?

Nating sipos yumi no tingbaot ol merikel, be i stret blong yumi prea long God blong givhan long yumi taem yumi sik. Mo i no gat samting i rong taem ol narafala man oli prea long saed blong yumi. Be ol prea ya oli mas tru mo oli mas laenap wetem wil blong God. (1 Jon 5:​14, 15) Baebol i no askem yumi blong prea from merikel.a Be, yumi prea long Jeova blong hem i givhan long yumi long lav blong hem taem yumi kasem ol traem we oli kamaot from sik.

Baebol i soemaot se ol man blong holemstrong bilif oli save prea taem oli sik blong: “[Jeova, NW] bambae i givhan long olgeta taem oli sik, mo bambae i mekem olgeta oli oraet bakegen.” (Ol Sam 41:⁠3) Fasin blong tingting dip long Tok blong God bambae i givhan long olgeta we oli harem se oli sik long tingting. Man blong raetem Ol Sam i se: “From we oltaem yu yu laekem mi tumas. Taem we mi mi wari, mi stap tingting tumas, oltaem yu yu mekem tingting blong mi i kamgud bakegen, yu stap mekem mi mi glad.”​—⁠Ol Sam 94:​18, 19; lukluk tu 63⁠:​6-8.

Mo tu, yumi mas lukaotgud long bodi blong yumi, Baebol i givim advaes long samting ya. I gud moa blong obei long ol rul blong Baebol bitim we yumi tekem ol drag, smok, dring tumas, no yumi bitim mak long kakae mo biaen taem yumi kasem sik, yumi go from merikel. Fasin blong prea from wan merikel taem wan man i sik i no tekem ples blong waes fasin blong blokem sik olsem kakae ol gudfala kakae sipos i gat no go long haospetal.

Tok blong God i givhan long yumi blong gat tingting we i klin blong givhan long yumi long saed blong bodi. Buk blong Proveb i givim advaes ya, i se: “Hat blong man we i kwaet, hem i givim laef long bodi blong hem. Be fasin blong jelas i mekem hem i harem nogud long bun blong hem.” “Hat we i glad, i mekem i gud long man, i olsem wan meresin. Be tingting we i foldaon i mekem ol bun oli drae.” (Proveb 14:30; 17:22) Yumi save prea from tabu speret blong givim kwaet tingting mo glad long yumi blong givhan long bodi blong yumi.​—⁠Filipae 4:​6, 7.

?Olsem Wanem Long Merikel?

Nating sipos bodi blong wan man i stap gud olsem wanem, be sik i save kasem hem yet. ?Olsem wanem nao? ?I stret blong go long ol man blong mekem merikel, blong yumi kamgud bakegen? No gat, i no stret blong mekem olsem. Ol man blong wokem merikel tede, oli stap askem mane from. Mo fasin blong pem mane long wan man we i stap wokem merikel i sas tumas, i gud yumi go long haospetal. ?Mo tu, yu ting se i stret blong givim mane long ol man we oli stap wantem kasem sam samting long ol narafala man?

Sam man maet oli no save agri: ‘Tru, merikel i save gat paoa blong mekem man i kamgud bakegen nating se smol namba blong ol man nomo we oli stap go long “ol man we oli stap mekem merikel” oli kamgud bakegen.’ Be yu save tingbaot sipos ol man ya we oli stap mekem merikel oli rili mekem man i kamgud bakegen blong olwe, no no gat. Buk ya Encyclopædia Britannica i soemaot se: “Oli mekem smol stadi nomo long ol samting we oli no klia long saed blong fasin blong mekem merikel.”

Nating sipos i gat smol namba blong ol man we oli kamgud bakegen from ol merikel ya, samting ya i no pruvum se tabu speret i stap wok. Long tok blong hem antap long Hil, Jisas i talem se: “Plante man oli save singaot long mi se ‘Masta, Masta, long nem blong yu, mifala i talemaot ol tok we God i givim long mifala. Mo long nem blong yu, mifala i ronemaot plante devel. Mo long nem blong yu, mifala i mekem plante merikel. ?Olsem wanem long mifala?’ Be bambae mi mi save talem stret long fes blong olgeta, se ‘Neva mi mi save yufala. Yufala i man blong mekem i nogud, yufala i gowe long mi.’ ” (Matyu 7:​22, 23) Jisas i talem tu se i gat sam man, nating se God i no laekem olgeta, bambae oli pulum tingting blong ol man wetem ol saen: “From we bambae plante gyaman Mesaea mo plante gyaman profet oli save girap, oli save mekem ol bigbigfala saen mo ol samting blong sapraes. Bambae oli mekem olsem blong traem gyaman long olgeta man, mo sipos oli gat rod, bambae oli save traem blong gyaman long ol man ya we God i jusumaot olgeta finis se oli man blong hem.” (Matyu 24:24) Tru ya, tede ol man blong wokem merikel oli haf blong ol man ya we Jisas i tokbaot, from we oli stap mekem bigbigfala saen, mo oltaem oli stap askem mane mo oli stap talem se oli wokem ol merikel.

Ol man olsem oli no stap folem rod blong Jisas. ?Be, olgeta oli stap folem hu? Aposol Pol i soemaot long yumi, i se: “Setan, be hem i save tanem fasin blong hem, blong mekem ol man oli luk hem olsem we hem i wan enjel blong laet. From samting ya, bambae i no samting blong sapraes, sipos ol man blong Setan oli stap tanem fasin blong olgeta, blong mekem ol man oli luk olgeta olsem we oli man blong wokem stret fasin. Bambae long Lasdei oli save kasem pei we i stret nomo blong olgeta.” (2 Korin 11:​14, 15) Sipos ol man blong wokem merikel tede oli no mekem man i haremgud bakegen olsem we oli stap talem, olgeta ya oli man blong gyaman nomo, oli folem rod blong Setan we, “hem i gyaman long olgeta man long wol finis, i lidim olgeta oli go krangke.” (Revelesen 12:⁠9) ?Be olsem wanem sipos samtaem oli winim sam sik? ?I stret blong talem se “plante merikel” blong olgeta i kamaot long paoa blong Setan mo ol rabis enjel blong hem? !Yes, hem i mas olsemia nao!

Taem Blong Trufala Merikel

Ol merikel blong Jisas oli kamaot from tabu speret blong God. Oli soemaot plan blong hem blong winim ol sik long prapa taem blong hem. Jeova i givim promes ya “blong tekemaot sik blong ol man blong ol kantri long wol.” (Revelesen 22:⁠2) Mo hem bambae i no finisim sik nomo be hem i save finisim ded tu. Jon i eksplenem se Jisas i kam ‘blong olgeta man we oli bilif long hem bambae oli no save lus, oli gat laef we i no save finis.’ (Jon 3:16) !Hemia i wan nambawan merikel! Mo tu Jisas bambae i wokem ol merikel blong mekem ol man oli kamgud bakegen olsem ol store blong Baebol i soemaot, be hem i bigwan moa. !Bambae hem i mekem ol man we oli ded finis, oli laef bakegen long ded! (Jon 5:​28, 29) ?Wetaem samting ya bambae i kamtru?

Long nyufala wol blong God, mo ol samting we oli stap hapen oli pruvum se, i no longwe nating. Nyufala wol we bambae i kamaot biaen long taem ya we ol rabis fasin blong wol ya oli finis blong olwe, bambae i wan trufala blesing long ol man we oli gat gud hat. Bambae hem i wan wol we ol man oli save haremgud long hem. “[God] bambae i ravemaot wora blong ae blong olgeta. Nao bambae i no moa gat man i ded mo man we i krae from ded. Bambae i no moa gat man i krae, mo man i harem nogud long bodi blong hem. Ol samting ya blong bifo oli lus olgeta.” (Revelesen 21:⁠4) !Samting ya i defren long ol samting we yumi stap luk raonabaot long yumi tede!

Taswe, long saed blong ol sik, yumi save prea long God blong givhan long yumi. Mo nating se yumi sik no yumi stap strong long bodi, yumi save lanem olsem wanem laef blong olwe we i no gat sik long hem i save kamtru. Bildimap bilif blong yu long promes ya we God i givim taem yu stadi long plante tok we i stap long Baebol. Lanem olsem wanem plan ya blong God i no longtaem bambae i kamtru long stret taem blong hem. Yu no mas slakem bilif blong yu, from we Tok blong God i talem long yumi, i se: “Bambae hem i finisim ded blong olwe, mo Hae God Jeova bambae i ravemaot wora blong ae long fes blong olgeta man.”​—⁠Aesea 25:⁠8.

[Futnot]

[Tok Blong Pija Long Pej 7]

Ol merikel blong Jisas oli finisim wok blong olgeta

[Tok Blong Pija Long Pej 8]

Jisas bambae i wokem ol merikel bakegen mo bambae hem i wokem plante merikel blong mekem ol man oli haremgud