Taem We Mesaea i Stap Bakegen Mo Rul Blong Hem

“Jisas ya we God i tekemaot long yufala blong i go antap long heven, hem bambae i mas kambak bakegen long sem fasin ya we yufala i luk, taem hem i go antap long heven.”​—⁠OL WOK 1:⁠11.

1, 2. (a) ?Olsem wanem tu enjel i leftemap tingting blong ol aposol blong Jisas taem Jisas i stap gobak long heven? (b) ?Wanem sam kwestin we yumi save askem long saed blong fasin blong Jisas blong kambak?

LONG saed i go long is blong Hil ya blong ol Oliftri eleven man oli stap stanap, oli stap lukluk i go antap long skae. Jisas i lego olgeta sam menet bifo nomo, hem i go antap, bodi blong hem i no moa saen gogo wan klaod i kavremap hem. Hem i givim plante pruf long olgeta se hem i Mesaea long ol yia we oli stap tugeta. Olgeta oli stap laef long taem ya we ded blong Jisas i mekem olgeta oli harem nogud mo taem ya we oli glad tumas from hem i laef bakegen. Naoia hem i gobak finis.

² Kwiktaem nomo tu enjel i kamaot mo tufala i talemaot ol tok ya we i save leftemap tingting se: “!E, ol man Galili! ?Yufala i stap stanap, yufala i stap lukluk go antap long skae olsem blong wanem? Jisas ya we God i tekemaot long yufala blong i go antap long heven, hem bambae i mas kambak bakegen long sem fasin ya we yufala i luk, taem hem i go antap long heven.” (Ol Wok 1:11) !Samting ya i mekem yumi haremgud​—⁠taem Jisas i gobak long heven i no min se hem i no moa intres long wol mo ol man! Defren nao, Jisas bambae i kambak. I tru nomo se ol tok ya oli givim hop long ol aposol. Tede tu plante milyan man oli putum tingting blong olgeta i stap strong long promes ya se bambae Kraes i kambak. Sam man oli tokbaot taem ya olsem “kambak bakegen” no “kamtru.” Be i luk olsem se plante man tingting blong olgeta i no rili klia se taem Kraes bambae i kambak i minim wanem. ?Kraes bambae i kambak long wanem fasin? ?Wetaem? ?Mo tede olsem wanem samting ya i gat paoa long laef blong yumi?

Fasin We Kraes Bambae i Kambak

3. ?Plante man oli bilif olsem wanem long saed blong fasin blong Jisas blong kambak?

³ Buk ya An Evangelical Christology, i talem se: “Taem Jisas i kambak bakegen no taem hem i kambak (parousia), i klia nomo, bambae kingdom blong God i stanap, mo blong olwe.” Plante man oli bilif se taem bambae Kraes i kambak ol man oli save luk long prapa ae blong olgeta, evri man long wol bambae oli luk bodi blong hem. Blong sapotem tingting ya plante man oli soemaot Revelesen 1:7 we yumi ridim olsem se: “Yufala i luk. Naoia nomo, bambae Jisas i kam long klaod. Olgeta man bambae oli luk hem, stret long ae blong olgeta. Ol man ya we bifo oli sperem hem bambae oli luk hem.” ?Be olsem wanem, vas ya i stap minim long saed blong bodi?

4, 5. (a) ?Olsem wanem yumi save se Revelesen 1:7 hem i wan pijatok nomo? (b) ?Olsem wanem ol prapa tok blong Jisas oli pruvum save ya?

⁴ Yumi mas tingbaot se buk blong Revelesen i stap tokbaot ol “saen.” (Revelesen 1:⁠1, NW) Olsemia nao, haf ya i mas wan pijatok. Traem tingbaot, ?olsem wanem olgeta we “oli sperem hem” bambae oli luk Jisas i kambak? !Olgeta ya oli ded kolosap tu taosen yia finis! Antap bakegen, ol enjel oli talem se Kraes bambae i kambak “long sem fasin” olsem we hem i bin go long heven. ?Be, hem i go long heven long wanem fasin? ?Plante milyan man oli stap lukluk hem? No gat, sam gudfala man blong bilif nomo oli stap long taem ya. ?Mo taem ol enjel oli toktok long olgeta, ol aposol oli stap luk bodi blong Jisas i stap go long rod blong hem long heven? No gat, wan klaod i kavremap Jisas mekem se ae i no save luk. Samtaem biaen, hem i mas go long heven, ples blong ol speret man, olsem wan speret man, we ol ae blong man i no save luk. (1 Korin 15:50) From samting ya, ol aposol oli luk stat nomo we Jisas i stap go long heven. Taem hem i gobak olgeta oli no save luk ples we bambae Jisas i go long hem, long ples ya we Papa blong hem, Jeova, hem i stap long hem. Oli save luk ples ya long ae blong bilif blong olgeta nomo.​—⁠Jon 20:⁠17.

⁵ Baebol i tijim se Jisas i kambak long sem fasin. Smol taem bifo long ded blong hem Jisas i talemaot hem wan se: “Bambae i no longtaem, ol man blong wol ya oli no moa save luk mi.” (Jon 14:19) Hem i talem olsemia tu se: “Fasin we God i stap kam king blong ol man blong hem, hemia i no wan samting we ol man oli save luk long ae blong olgeta.” (Luk 17:20) ?Be, long wanem fasin nao “olgeta man bambae oli luk hem, stret long ae blong olgeta”? Blong ansa long kwestin ya fastaem yumi nidim blong kasem klia save long tok we Jisas mo ol man blong hem oli yusum we i laenap wetem taem ya we bambae hem i kambak.

6. (a) ?From wanem ol tok ya olsem “kambak bakegen,” “kambak,” “kam,” mo “kamtru” oli no laenap wetem mining blong Grik tok ya pa·rou·siʹa? (b) ?Wanem i soemaot se pa·rou·siʹa, no “stap finis,” i stap longtaem moa bitim ol samting we oli save hapen smoltaem?

⁶ Kraes i no “kambak bakegen” nomo, hem i mekem moa samting. Tok ya, olsem “kambak,” “kam,” no “kamtru,” i soemaot wan samting blong sot taem nomo. Be Grik wod ya we Jisas mo ol man blong hem oli yusum, mining blong hem i go moa. Wod ya hem i pa·rou·siʹa, we i min se “stap kolosap” no wan samting we i “stap finis.” Plante man we oli stadigud oli agri se tok ya i no joen nomo wetem tok ya ‘kamtru’ be i joen tu wetem ‘stap’​—⁠olsem wan spesel visit we man blong king i mekem long sam man. Fasin ya blong stap i no save hapen smoltaem nomo. Hem i wan spesel taem, wan taem we oli makemaot finis. Long Matyu 24:​37-39, Jisas i talem se taem ‘Pikinini blong Man bambae i [stap finis, NW] [pa·rou·siʹa]’ bambae i olsem “long taem blong Noa” we wora i kavremap olgeta ples. Noa i stap bildim ak mo i stap givim woning long ol man nogud plante yia bifo we wora i ron bigfala mo i karemaot rabis fasin blong wol long taem ya. Sem mak bakegen, fasin blong Kraes blong stap finis we yumi no save luk i stat plante yia bifo mo i ron gogo i finis long bigfala trabol we bambae i spolem ol rabis fasin long wol.

7. (a) ?Wanem i pruvum se tok ya pa·rou·siʹa i min se ol man oli no save luk wetem prapa ae blong olgeta? (b) ?Olsem wanem mo wetaem bambae ol profet tok we oli tokbaot fasin blong Jisas blong kambak we “olgeta man bambae oli luk hem, stret long ae blong olgeta” i save kamtru?

⁷ Tru ya, wod ya pa·rou·siʹa i min se ol man oli no save luk wetem ol prapa ae blong olgeta. ?Sipos i olsem, from wanem Jisas i tekem tumas taem, olsem we yumi save luk, blong givim wan saen long ol man blong hem blong halpem olgeta blong luksave taem we bambae hem i stap finis?a Be, taem Kraes i kambak blong spolem fasin blong wol blong Setan, fasin ya blong hem blong stap bambae i gat strong paoa long evri man. Long taem ya nao we “olgeta man bambae oli luk hem, stret long ae blong olgeta.” Olgeta we oli agensem Jisas tu bambae oli luksave se rul blong Kraes i tru, gogo paoa blong olgeta i finis.​—⁠Lukluk Matyu 24:30; 2 Tesalonaeka 2:8; Revelesen 1:​5, 6.

?Wetaem Saen Ya i Stat?

8. ?Wanem samting i soemaot stat blong fasin ya blong Kraes we i stap finis, mo samting ya i hapen wea?

⁸ Taem ya we Mesaea i stap i stat taem wan samting i kamtru, samting we i stap insaed long plante profet tok long saed blong Mesaea. Hem i tekem paoa olsem King long heven. (2 Samuel 7:​12-16; Aesea 9:​6, 7; Esikel 21:​26, 27) Jisas hem wan i soemaot se fasin blong hem blong stap bambae i joen wetem fasin blong hem blong rul olsem King. Hem i soemaot hem wan long plante pijatok olsem wan masta we i lego famle mo ol slef blong hem i wokbaot longtaem long wan “narafala kantri longwe” we hem i save kasem “paoa blong kam king.” Wan pijatok olsem we hem i givim i olsem wan haf blong ansa blong kwestin blong ol aposol blong hem long saed blong wetaem pa·rou·siʹa blong hem bambae i stat. Hem i givim wan narafala pijatok from se “olgeta oli stap tingbaot se naoia nomo, nyufala wol ya we God i king long hem bambae i kamtru.” (Luk 19:​11, 12, 15; Matyu 24:3; 25:​14, 19) Taswe taem hem i stap long wol ya olsem wan man, fasin blong hem blong kam king i longtaem yet, olsem we i save hapen long “wan narafala kantri longwe” hemia heven. ?Wetaem samting ya i hapen?

9, 10. ?Wanem pruf i soemaot se Kraes hem i stap rul naoia long heven, mo wetaem hem i statem rul blong hem?

⁹ Taem ol disaepol blong Jisas oli askem long hem se: “?Wanem saen bambae i soemaot we yu yu stap finis mo we fasin ya blong wol i kasem en blong hem?” (NW) Jisas i ansa long olgeta long plante samting we bambae oli kamtru long fyuja. (Matyu, japta 24; Mak, japta 13; Luk japta 21; lukluk tu 2 Timote 3:​1-5; Revelesen, japta 6.) Saen ya i soemaot klia wan taem blong trabol. Hemia wan taem we i gat ol faet long wol, fasin blong brekem loa i kam antap, laef long famle i nogud, ol strong sik we oli save kilim man i ded, kakae i sot, mo graon i seksek​—⁠ol trabol ya oli no hapen long wan ples nomo be oli kavremap olgeta ples long wol. ?Olsem wanem, samting ya i tru? Taem ol dei oli stap pas oli soemaot se taem blong yumi i stret nomo long ol samting we Jisas i talem.

¹⁰ Ol man blong raetem histri oli agri se 1914 i wan yia we i jenisim laef blong olgeta man long histri. Hem i wan stat blong taem ya we plante long ol trabol olsem oli stat blong kam antap long olgeta ples long wol we man i no moa save kontrolem. Yes, ol samting we oli hapen long wol oli stret long profet tok blong Baebol we i makemaot 1914 olsem yia we Jisas i statem rul blong hem olsem King long heven. Antap moa, wan profet tok long Daniel japta 4 i soemaot ol pruf long saed blong ol stret yia we ol samting oli hapen long histri, nao pruf ya tu i lidim yumi long yia ya​—⁠1914​—⁠olsem taem ya we King we Jeova i putumap bambae i statem rul blong hem.b

?From Wanem Wan Taem Blong Ol Trabol?

11, 12. (a) ?From wanem i had blong sam man blong bilif se Kraes i stap rul long heven naoia? (b) ?Olsem wanem yumi save yusum wan pijatok blong soemaot wanem i hapen afta we Jisas i statem wok blong hem olsem King?

¹¹ Be maet samfala oli askem se, ‘?From wanem wol ya i trabol tumas sipos Mesaea i stap rul long heven? ?Rul blong hem bambae i no gat frut?’ Ating wan pijatok i save halpem yumi. I gat wan kantri we wan nogud presiden i stap rul long hem. Hem i stanemap wan fasin nogud blong kontrolem evri samting long evri ples long kantri ya. Be naoia i gat wan eleksen, ale wan gudfala man i win. ?Bambae wanem i hapen naoia? Yumi save olsem fasin blong sam demokratik kantri, i mas gat sam manis i pas fastaem bifo we oli putumap nyufala presiden. ?Bambae tufala man ya i save wok olsem wanem long taem ya? ?Yu ting se gudfala man ya bambae i sakemaot kwiktaem mo finisim ol rabis fasin we nogud man ya i mekem long olgeta ples long kantri ya? ?Yu ting se bambae hem i no stat fastaem long taon blong putumap wan nyufala kaonsel blong ol minista mo blong wok strong agens long ol kruked fren blong presiden blong fastaem mo ol man nogud we oli sapotem hem? Long fasin ya taem hem i kam long ful paoa, hem i save wok long wan klin mo gudfala ples blong rul. ?Yu ting se long sot taem ya we i stap, nogud presiden ya bambae hem i no tekem evri jans blong winim ol samting blong hem wan we hem i wantem long kantri ya bifo we hem i lusum paoa blong hem?

¹² Samting ya i sem mak long pa·rou·siʹa blong Kraes. Revelesen 12:​7-12 i soemaot se taem Kraes i kam King long heven, faswan samting we hem i mekem, hem i sakemaot Setan mo ol nogud enjel oli aot long heven, olsemia nao Jisas i klinim ples we gavman blong Hem bambae i stap long hem. Setan i harem nogud tumas from hem i lus long faet ya we i wet long hem longtaem finis, ?nao from samting ya, bambae hem i mekem wanem long “smol taem nomo blong hem i stap yet” bifo we Kraes i rul fulwan long wol ya? Hem i traem blong kasem evri samting we hem i wantem long olfala fasin ya blong naoia olsem nogud presiden ya. Hem i no wantem mane, be hem i wantem ol man oli folem hem. Setan i stap traehad blong pulum plante man oli ronwe long Jeova mo King blong Hem we i stap rul.

13. ?Olsem wanem Baebol i soemaot se taem Kraes i statem rul blong hem bambae i gat bigfala trabol long wol ya?

¹³ Taswe yumi no sapraes, se stat blong rul blong Mesaea i minim wan taem blong ‘sore tumas long graon.’ (Revelesen 12:12) Sem mak bakegen long Ol Sam 110:​1, 2, 6 i soemaot se Mesaea ya i statem rul blong hem ‘long medel blong ol enemi blong hem.’ (NW) !Biaen nomo bambae i smasem fulwan “ol nesen,” (NW) wetem ol fasin nogud blong Setan, nao yumi save fogetem olgeta!

Taem Mesaea Bambae i Rulum Wol

14. ?Mesaea bambae i mekem wanem afta we hem i finisim fasin nogud ya blong Setan?

¹⁴ King mo Mesaea, Jisas Kraes afta we hem i spolem fasin nogud ya blong Setan mo olgeta we oli sapotem hem, bambae hem i kasem mak blong hem blong mekem ol gudfala profet tok long Baebol oli kamtru we oli tokbaot Rul blong hem blong Wan Taosen Yia. Blong save se Mesaea bambae i wanem kaen rula Aesea 11:​1-10 i halpem yumi. Long vas 2 i soemaot long yumi se bambae hem i gat “speret blong Jeova . . . , speret blong waes mo dip save, speret blong gudfala plan mo bigfala paoa.”

15. ?‘Speret blong bigfala paoa’ i minim wanem long saed blong rul blong Mesaea?

¹⁵ Yumi traem lukluk se ‘speret blong bigfala paoa’ bambae i minim wanem long rul blong Jisas. Taem hem i bin stap long wol hem i kasem paoa blong Jeova we i givhan long hem blong mekem ol merikel. Mo hem i soemaot se hem i gat tingting blong halpem ol man, i se: “Mi mi wantem.” (Matyu 8:⁠3) Be long taem ya ol merikel blong hem oli saen nomo blong soemaot wanem we bambae hem i mekem taem bambae hem i rul long heven. !Long fulwol bambae Jisas i mekem ol merikel! Ol sikman, blaenman, olgeta we sora blong olgeta i fas, olgeta we haf bodi blong olgeta i nogud, olgeta we leg blong olgeta i nogud bambae oli kamgud bakegen blong olwe. (Aesea 35:​5, 6) Bambae i gat plante kakae mo fasin blong seraot kakae bambae i stret mekem se hanggri bambae i finis blong olwe. (Ol Sam 72:16) ?Olsem wanem long ol milyan man we oli stap long gref we God i glad blong tingbaot olgeta? !Blong givim jans long olgeta wanwan blong laef foreva long Paradaes, Jisas i gat “paoa” ya we bambae i mekem olgeta oli laef bakegen long ded! (Jon 5:​28, 29) Be, King ya mo Mesaea bambae hem i gat tingting daon we i dip, nating se hem i gat bigfala paoa ya. Hem i “haremgud . . . taem hem i fraet long Jeova.”​—⁠Aesea 11:⁠3.

16. ?King ya long saed blong Mesaea hem i wanem kaen Jaj, mo olsem wanem samting ya i defren long ol jaj long saed blong man?

¹⁶ King ya bambae hem i wan stret Jaj tu. Hem “bambae i no save jajem man nomo from ol samting we i luk long ae blong hem, mo bambae hem i no stretem man nomo from ol samting we hem i harem long sora blong hem.” ?Olsem wanem long ol man we oli jajem ol narafala, long taem bifo mo naoia, yumi save talem se oli olsem? Mo tu ating wan gudfala man blong loa hem i save yusum waes no fasin luksave blong hem nomo blong jajem man long wanem we hem i luk mo hem i harem. Taswe ating ol jaj mo ol man we oli sapotem olgeta long wol blong naoia oli save letem ol waes fasin blong ol flas man, no ol trik we ol man oli save mekem long kot, no ol pruf we i no klia, oli gat paoa long olgeta no oli mekem tingting blong olgeta i fasfas. Plante taem ol rijman mo ol haeman nomo oli gat inaf mane blong pem wan gudfala man blong stanap long saed blong olgeta long kot, fasin ya i olsem we oli pem stret fasin. !Jaj mo Mesaea ya i no save mekem olsemia! Hem i stap skelem ol hat. I no gat wan samting nating we hem i no luk. Stret fasin, we i joen wetem lav mo fasin sore, man bambae i no save pem. Oltaem nomo bambae samting ya i stap.​—⁠Aesea 11:​3-5.

Olsem Wanem Rul Blong Hem i Gat Paoa Long Yu

17, 18. (a) ?Wanem pija long saed blong fyuja blong ol man we Aesea 11:​6-9 i tokbaot? (b) ?Profet tok ya hem i go stret long hu, mo from wanem? (c) ?Olsem wanem profet tok ya bambae i kamtru long saed blong bodi?

¹⁷ Yumi no sapraes se rul blong Mesaea i gat bigfala paoa long ol man we oli stap aninit long hem. Paoa ya i save jenisim man. Aesea 11:​6-9 i soemaot se jenis ya i bigwan olsem wanem. Profet tok ya i soemaot wan pija blong ol nogud anamol we oli save kakae man​—⁠ol bea, wael dog, lepad, laeon, snek​—⁠we oli stap kolosap long ol anamol blong haos we oli no save kakae man mo ol pikinini tu. !Be ol anamol ya blong kakae man oli no mekem wan trabol! ?From wanem? Long vas 9 i ansa olsem se: “Bambae oli no mekem nogud nating, mo oli no mekem trabol nating long olgeta ples long tabu hil ya blong mi, from we bambae wol ya i fulap tru long save blong Jeova olsem we ol wora oli kavremap solwora.”

¹⁸ Yes, i tru se “save blong Jeova” i no save gat paoa long ol prapa anamol. Taswe ating ol vas ya oli go stret long ol man. Rul blong Mesaea i givimaot wan program long saed blong edukesen long olgeta ples long wol blong tijim ol man long saed blong Jeova mo ol rod blong hem, blong tijim evriwan blong mekem i gud long ol narafala man wetem lav, respek, mo fasin blong tinghae long olgeta. Long Paradaes we bambae i kamtru, Mesaea bambae i mekem ol man oli kam stret olgeta long saed blong bodi mo fasin. Ol fasin blong ol sinman we oli olsem ol wael anamol, bambae oli finis. !Ol man bambae oli stap long pis tu wetem ol anamol​—⁠longtaem ya!​—⁠Skelem Jenesis 1:28.

19. ?Olsem wanem rul blong Mesaea i gat paoa long laef blong olgeta man long ol las dei ya?

¹⁹ Be, yu mas rimemba se Mesaea i stap rul naoia. Naoia olgeta we oli kam sabjek blong Kingdom blong hem oli lanem blong stap long pis tugeta blong mekem Aesea 11:​6-9 i kamtru long wan fasin. Antap moa long hemia, Jisas i bin mekem Aesea 11⁠:10 i kamtru kolosap 80 yia finis se: “Mo bambae wan samting i mas hapen long dei ya. Rus blong Jese bambae i stanap olsem wan saen long olgeta man. Ol nesen tu bambae oli tanem olgeta i kam long hem, oli wet long hem. Mo bambae ples blong spel blong hem i kasem haenem.” Ol man blong olgeta nesen oli stap tanem tingting blong olgeta i go long Mesaea. ?From wanem? From we hem i bin “stanap olsem wan saen” long taem ya we hem i stat blong rul kasem naoia. Hem i bin mekem se ol man oli save se hem i stap tru long program ya long saed blong edukesen we yumi tokbaot antap. Yes, Jisas i talem bifo finis se wok blong prij long olgeta ples long wol bambae i wan impoten saen blong soemaot se hem i stap finis bifo we fasin blong naoia i finis.​—⁠Matyu 24:⁠14.

20. ?Wanem fasin olgeta we oli sabjek blong Mesaea oli mas blokem mo from wanem?

²⁰ Taswe fasin blong Kraes blong stap finis long Kingdom paoa i no wan samting we i stap longwe, hem i no toktok nomo, hem i no wan bisnes we ol waes man blong wol we oli stadi long saed blong God oli storeyan long hem nomo. Rul blong hem i gat paoa mo hem i stap jenisim laef blong plante man long wol ya, olsem we Aesea i bin talem. Jisas i lidim plante milyan man we oli kam sabjek blong Kingdom blong hem oli aot long fasin nogud ya blong wol. ?Yu yu wan long ol sabjek ya? !Ale yu mas glad blong mekem evri samting we Rula blong yumi i wantem! Lukaot, yumi evriwan i save kam taed, nao maet yumi joen long krae blong ol man blong wol ya we oli no gat bilif se: “?Hem i promes finis blong kam, be hem i stap wea?” (2 Pita 3:⁠4) Be olsem we Jisas hem wan i talem, se: “Be man we i stanap strong gogo olgeta samting ya i finis, bambae God i sevem hem.”​—⁠Matyu 24:⁠13.

21. ?Olsem wanem yumi save soemaot se yumi glad long hop blong yumi long Mesaea?

²¹ Taem ol dei oli pas oli stap lidim yumi i go kolosap moa long bigfala dei ya we Jeova bambae i lidim Pikinini blong Hem blong soemaot fasin blong hem blong stap finis i klia moa long evri ples long wol. Yu no mas letem hop blong yu long dei ya i kam kolkol. Yu mas tingting dip long fasin blong Jisas olsem Mesaea mo ol fasin blong hem olsem King we i stap rul. Yu mas tingting dip tu, long saed blong Jeova God, Man ya we hem i stampa mo bigfala waes insaed long bigfala hop long saed blong Mesaea we Baebol i tokbaot. I tru se sipos yu mekem olsem bambae yu filim moa bakegen olsem aposol Pol taem hem i raetem se: “Man, fasin blong God blong givhan long ol man i gud tumas. Waes blong hem, mo save blong hem i bigfala tumas, i bitim mak.”​—⁠Rom 11:⁠33.

[Ol futnot]

?Yu Yu Save Ansa?

◻ ?Kraes bambae i kambak long wanem fasin?

◻ ?Olsem wanem yumi save se pa·rou·siʹa blong Kraes ol man oli no save luk mo i save stap longtaem?

◻ ?Wetaem fasin blong Kraes blong stap i stat, mo olsem wanem yumi save samting ya?

◻ ?Mesaea long heven i wanem kaen Rula?

◻ ?Long wanem fasin rul blong Kraes i gat paoa long laef blong olgeta man we oli sabjek blong hem?

[Tok Blong Pija Long Pej 15]

Ol strong disaepol blong Jisas oli bilif strong long hop ya se Jisas bambae i kambak bakegen

[Tok Blong Pija Long Pej 17]

Taem hem i rul long heven, Jisas bambae i mekem ol merikel long olgeta ples long wol

[Credit Line]

Earth: Based on NASA photo