Bambae Jisas i Kambak No i Stap Finis​—⁠?Weswan?

‘?Wanem saen we bambae i soemaot se yu yu stap finis mo se wol ya i kasem en blong hem?’​—MATYU 24:​3.

1. ?Ol kwestin we Jisas i yusum long minista wok blong hem, oli mekem wanem long ol man?

OL GUDFALA kwestin we Jisas i yusum oli mekem ol man we oli lesin long hem, oli tingtinggud, mo oli luk ol samting wetem wan tingting we i defren. (Mak 12:35-​37; Luk 6:9; 9:​20; 20:3, 4) Yumi save gat tangkyu from we hem i ansarem ol kwestin tu. Ol ansa blong hem oli soemaot sam trutok we maet yumi no bin harem bifo, no we maet yumi no bin kasem save long olgeta.​—Mak 7:​17-​23; 9:​11-​13; 10:10-​12; 12:18-​27.

2. ?Naoia bambae yumi tokbaot wanem kwestin?

² Long Matyu 24:3, yumi save ridim wan kwestin we Jisas i bin ansarem, we i impoten moa i bitim ol narafala kwestin we hem i bin ansarem. Long taem ya, laef blong Jisas long wol kolosap i finis. Nao hem i givim wan woning se haos prea blong Jerusalem bambae i lus, mo samting ya bambae i makem en blong taem blong ol man Jyu. Buk blong Matyu i talem se: ‘Jisas, hem i stap sidaon long hil ya, nem blong hem Hil blong ol Oliftri. Nao taem i no gat ol narafala man i stap, ol man blong hem oli kam long hem, oli askem long hem se “Plis yu talemaot long mifala. ?Bambae ol samting ya oli kamtru wetaem? ?Mo wanem saen we bambae i soemaot se yu yu stap finis [“bambae yu kambak,” King James Version] mo se wol ya i kasem en blong hem?” ’​—Matyu 24:3.

3, 4. ?Wanem samting i defren long plante Baebol taem oli tanem wan impoten tok we i stap long Matyu 24:3?

³ Plante milyan man we oli ridim Baebol oli tingting se, ‘?From wanem ol disaepol oli askem kwestin ya, mo olsem wanem ansa blong Jisas i impoten long mi?’ Long ansa blong Jisas, hem i givim wan pijatok long saed blong ol tri, se taem oli stap putum lif blong olgeta, samting ya i soemaot se hot taem i kam “kolosap.” (Matyu 24: 32, 33, NW) Taswe, plante jyos oli tijim se ol aposol oli bin askem Jisas blong i talemaot long olgeta wan saen we bambae i soemaot se hem i “kambak,” wan saen we i pruvum se kolosap nao hem i kamtru bakegen. Oli bilif se long taem ya we hem i “kambak,” bambae hemia stret taem tu blong hem i tekem ol Kristin oli go long heven, mo biaen bambae hem i mekem en blong wol ya i kamtru. ?Yu yu bilif se samting ya i stret?

⁴ Samfala Baebol, olsem New World Translation of the Holy Scriptures, oli no putum tok ya “kambak,” be oli yusum tok ya “stap finis.” ?Olsem wanem? ?Samting we ol disaepol oli askem mo ansa we Jisas i givim, i defren olgeta long samting we ol jyos oli stap tijim? ?Wanem samting stret we oli bin askem? ?Mo, wanem ansa we Jisas i bin givim long olgeta?

?Oli Stap Askem Wanem Samting?

5, 6. ?Yumi save talem se ol aposol oli gat wanem tingting taem oli askem kwestin we yumi ridim long Matyu 24:3?

⁵ From samting we Jisas i bin talem long saed blong haos prea, ating ol disaepol oli stap tingbaot ol man Jyu taem oli askem Jisas blong i givim ‘wan saen we i soemaot se hem i stap finis [no, “bambae i kambak”] mo se wol ya [prapa mining se “taem ya”] bambae i kasem en blong hem.’​—Skelem wetem tok ya “wol” long 1 Korin 10:11 mo Galesia 1:4, KJ.

⁶ Long taem ya, ol aposol oli no kasem save fulwan yet long ol tijing blong Jisas. Samtaem bifo finis, oli gat tingting ya se ‘kingdom blong God bambae i kamtru naoia nomo.’ (Luk 19:11; Matyu 16:21-​23; Mak 10:35-​40) Mo biaen bakegen, afta long storeyan antap long Hil blong ol Oliftri, be bifo long taem ya we oli kasem tabu speret, oli askem long Jisas sipos hem bambae i stanemap Kingdom bakegen long Isrel long taem ya.​—Ol Wok 1:6.

7. ?From wanem ol aposol oli wantem save wanem samting we Jisas bambae i mekem long fyuja?

⁷ Be, oli save finis se bambae hem i mas go, from we hem i bin talem long olgeta i no longtaem, se: “Delaet ya i save stap wetem yufala smol moa yet. Mo taem we delaet ya i stap wetem yufala, yufala i mas wokbaot.” (Jon 12:35; Luk 19:12-​27) Taswe, maet oli bin gat tingting ya se, ‘Sipos Jisas bambae i go, ?olsem wanem bambae yumi luksave taem ya we hem i kambak bakegen?’ Taem hem i kamtru olsem Mesaea, bighaf blong ol man oli no luksave hem. Mo bitim wan yia biaen, sam man oli gat hafhaf tingting yet se maet bambae hem i no mekem olgeta samting we Mesaea i mas mekem. (Matyu 11:​2, 3) Taswe, ol aposol oli gat gudfala risen blong askem kwestin long saed blong fyuja. Be, bakegen, ?oli stap askem hem blong givim wan saen we i soemaot se bambae hem i kamtru i no longtaem, no oli stap askem wan narafala samting?

8. ?Ating ol aposol oli yusum wanem lanwis taem oli stap storeyan wetem Jisas?

⁸ Tingbaot sipos yu yu wan pijin we i stap antap long Hil blong ol Oliftri, nao yu stap lesin long toktok blong Jisas mo ol aposol blong hem. (Skelem wetem Eklesiastis 10:20.) Ating bambae yu harem olgeta oli stap storeyan long lanwis Hibru. (Mak 14:70; Jon 5:2; 19:17, 20; Ol Wok 21:40) Be, ating olgeta ya oli save lanwis Grik tu.

Samting We Matyu i Raetem​—Long Grik

9. ?Bighaf blong ol hanraet blong Matyu tede, oli stanap long wanem?

⁹ Sam hanraet blong ol yia 100 K.T.a oli soemaot se Matyu i bin raetem Gospel blong hem fastaem long lanwis Hibru. Biaen, hem i raetem long lanwis Grik tu. Plante narafala hanraet long lanwis Grik oli stapgud kam kasem tede, nao oli givhan long ol man blong tanem Gospel blong Matyu i kam long lanwis blong yumi tede. ?Matyu i raetem wanem long lanwis Grik long saed blong storeyan ya antap long Hil blong ol Oliftri? ?Hem i raetem wanem long saed blong ol tok ya “kambak” no “stap finis” we ol disaepol oli askem kwestin long hem mo we Jisas i givim ansa long hem?

10. (a) ?Plante taem Matyu i yusum wanem Grik tok blong talem “kam,” mo wanem ol mining blong tok ya? (b) ?Wanem wan narafala Grik tok we yumi intres long hem?

¹⁰ Long japta 1 kasem japta 23 blong Matyu, wan Grik veb we i blong talem “kam,” erʹkho·mai, i kamaot bitim 80 taem. Plante taem tok ya i minim wan samting we i stap kam no we i kam kolosap, olsem Jon 1⁠:47 i talem se: ‘Jisas i luk we Nataniel i stap kam.’ I dipen long fasin we oli yusum, be tok ya erʹkho·mai i save minim “kamtru,” “go,” “kam kasem,” “kasem,” no “stap go.” (Matyu 2:​8, 11; 8:​28; Jon 4:​25, 27, 45; 20:​4, 8; Ol Wok 8:​40; 13:51) Be long Matyu 24:​3, 27, 37, 39, Matyu i yusum wan defren tok, hemia: pa·rou·siʹa, wan tok we i no stap long ol narafala Gospel. From we God nao i sanem tabu speret blong hem blong pusum ol man blong raetem Baebol, ?from wanem hem i pusum Matyu blong raetem Grik tok ya long ol vas ya taem hem i raetem Gospel blong hem long lanwis Grik? ?Tok ya i minim wanem, mo from wanem yumi wantem save samting ya?

11. (a) ?Wanem mining blong tok ya pa·rou·siʹa? (b) ?Olsem wanem ol hanraet blong Josephus oli agri long mining we yumi kasem blong tok ya pa·rou·siʹa? (Lukluk futnot.)

¹¹ Blong talem klia, tok ya pa·rou·siʹa i minim “stap finis.” Buk ya Expository Dictionary of New Testament Words we man ya Vine i raetem, i talem se: “PAROUSIA, . . . i rili minim, wan samting no wan man we i stap, para i minim wetem, mo ousia i minim stap (we i kamaot long eimi, we i minim blong stap), mo i soemaot se wan samting i kamtru, mo biaen i stap. Eksampel, long wan olfala leta blong bifo, wan woman i tokbaot se hem i nidim blong parousia long wan ples blong stretem sam bisnes long saed blong graon blong hem.” Sam narafala diksonari oli eksplenem se pa·rou·siʹa i minim ‘wan haeman i kam visit.’ Taswe, hemia i no jes taem ya we hem i kamtru, be hemia fulwan taem we bambae hem i gohed blong stap afta we hem i kamtru. Yumi intres blong luk se, Josephus, man Jyu blong raetem histri we i laef semtaem wetem ol aposol, i yusum tok ya pa·rou·siʹa blong minim olsemia.b

12. ?Olsem wanem Baebol hem wan i givhan long yumi blong pruvum stret mining blong tok ya pa·rou·siʹa?

¹² Ol buk blong bifo oli tokbaot mining blong tok ya “stap finis,” be ol Kristin oli intres moa blong luk olsem wanem Tok blong God i yusum tok ya pa·rou·siʹa. Hem i yusum tok ya long sem fasin nomo we i minim stap finis. Yumi luk samting ya long ol leta blong Pol. Eksampel, hem i raet i go long ol man Filipae se: “Olsem we yufala i stap obei long mi bifo, long taem ya we mi stap yet wetem yufala, ale, naoia we mi no stap wetem yufala, i gud moa blong yufala i obei long mi.” Mo tu, hem i tokbaot se bambae hem i laef smoltaem wetem olgeta blong bambae oli glad from we “[hem i] kam stap [pa·rou·siʹa] wetem [olgeta] bakegen.” (Filipae 1:​25, 26; 2:​12) Sam narafala Baebol oli putum se “taem mi mi stap wetem yufala bakegen” (Weymouth; New International Version); “taem mi stap wetem yufala bakegen” (Jerusalem Bible; New English Bible); mo “taem yufala i kampani wetem mi bakegen.” (Twentieth Century New Testament) Long 2 Korin 10:10, 11, Pol i tokbaot ‘taem ya we hem i stap wetem olgeta’ se i defren long ‘taem we hem i no stap.’ Long ol eksampel ya, i klia se hem i no stap tokbaot taem we hem i stap kam no i jes kamtru long olgeta. Hem i yusum tok ya pa·rou·siʹa blong tokbaot taem we hem i stap finis wetem olgeta.c (Skelem wetem 1 Korin 16:17.) ?Be, olsem wanem long pa·rou·siʹa blong Jisas we Baebol i tokbaot? ?Hem i minim taem we bambae hem i “kambak” no i minim wan taem we bambae hem i stap blong longtaem lelebet?

13, 14. (a) ?From wanem yumi save talem se pa·rou·siʹa i minim wan taem we i longfala? (b) ?Yumi mas talem wanem long saed blong longfala blong pa·rou·siʹa blong Jisas?

¹³ Ol Kristin we tabu speret i makemaot olgeta long taem blong Pol, oli intres long pa·rou·siʹa blong Jisas. Be, Pol i givim woning long olgeta se oli no mas “hareap blong go krangke.” Fastaem, “man blong brekem loa” i mas kamtru, hemia ol lida blong Krisendom. Pol i raetem se ‘man blong brekem loa ya, hem bambae i stap long paoa blong Setan, mo hem bambae i wokem ol narnarafala merikel mo gyaman saen mo samting blong sapraes.’ (2 Tesalonaeka 2⁠:​2, 3, 9) I klia se pa·rou·siʹa blong “man blong brekem loa,” no taem we hem i stap, i no jes minim se hem i kamtru kwiktaem nomo. Hem i wan taem we i gohed blong samtaem, mo long taem ya, bambae hem i wokem ol gyaman saen. ?From wanem samting ya i impoten?

¹⁴ Tingbaot vas we i stap jes bifo long ol tok ya. Hem i se: ‘Man blong Brekem Loa bambae i kamtru long klia ples. Nao Jisas, Masta blong yumi, hem bambae i blu long man ya, i kilim hem i ded. Taem we Jisas bambae i stap, fasin blong hem blong stap we i gud tumas bambae i spolem man ya olgeta.’ Yes, taem ya we “man blong brekem loa” i stap, bambae i kavremap wan longfala taem. Mo long sem fasin, taem ya we Jisas i stap, i blong longtaem, mo long en blong taem ya, bambae hem i spolem ‘man ya blong brekem loa’ blong i lus olgeta.​—2 Tesalonaeka 2:​8.

Sam Tok Long Lanwis Hibru

15, 16. (a) ?Plante taem oli yusum wanem tok taem oli tanem Matyu i go long lanwis Hibru? (b) ?Olsem wanem Baebol i yusum tok ya bohʼ?

¹⁵ Olsem we yumi luk finis, Matyu i raetem Gospel blong hem fastaem long lanwis Hibru. Taswe, ?hem i yusum wanem Hibru tok long Matyu 24:​3, 27, 37, 39? Long sam hanraet blong Matyu we oli tanem i kam long lanwis Hibru blong tede, oli yusum veb ya bohʼ, long kwestin blong ol aposol mo long ansa we Jisas i givim tu. Samting ya i minim se yumi save ridim vas ya olsemia: ‘?Wanem saen we bambae i soemaot se yu yu [bohʼ] mo se wol ya i kasem en blong hem?’ mo, ‘Olsem long taem blong Noa, long taem we Pikinini blong Man i [bohʼ] bambae i sem mak.’ ?Tok ya bohʼ i minim wanem?

¹⁶ Hibru veb ya bohʼ i gat plante mining blong hem, be bigfala mining blong hem se “kam.” Buk ya Theological Dictionary of the Old Testament i talem se: ‘Tok ya bohʼ i stap 2,532 taem long Hibru haf blong Baebol, mo hem i wan veb we oli yusum plante moa taem bitim ol narafala veb. Hem i wan stampa tok we oli yusum blong eksplenem fasin blong mufmuv.’ (Jenesis 7:​1, 13; Eksodas 12:25; 28:35; 2 Samuel 19:30; 2 King 10:21; Ol Sam 65:2; Aesea 1:​23; Esikel 11:16; Daniel 9:​13; Emos 8:​11) Sipos Jisas mo ol aposol blong hem oli bin yusum wan tok olsemia, we i gat plante mining blong hem, ating bambae i hadwok blong kasem stret mining blong tok blong olgeta. ?Be oli yusum tok ya?

17. (a) ?From wanem ol hanraet blong Matyu we oli tanem i go long Hibru tede, oli no soemaot stret samting we Jisas mo ol aposol blong hem oli bin talem? (b) ?Long weples bakegen yumi save faenem wan samting we i soemaot tok we maet Jisas mo ol aposol blong hem oli yusum, mo from wanem narafala risen yumi intres long samting ya? (Lukluk futnot.)

¹⁷ Yumi no mas fogetem se ol Hibru hanraet blong tede, oli tanem i kamaot long narafala hanraet nomo, mo maet oli no sem mak olgeta wetem tok we Matyu i raetem fastaem long olfala lanwis Hibru. Maet Jisas i bin yusum wan narafala tok we i defren long bohʼ, maet hem i wan tok we i karem semfala mining olsem pa·rou·siʹa. Yumi luk samting ya long buk ya Hebrew Gospel of Matthew, we Tija George Howard i raetem long 1995. Buk ya i tokbaot olgeta tok we man Jyu ya Shem-Tob ben Isaac Ibn Shaprut, we hem i wan dokta, i bin raetem agensem Kristin skul long ol yia 1300. Buk ya i soem wan hanraet blong Gospel blong Matyu long Hibru. I gat pruf se hanraet ya blong Matyu, oli no tanem i kamaot long lanwis Latin no Grik long taem blong Shem-Tob, be hem i olfala tumas mo oli raetem fastaem long Hibru.d Taswe, maet hanraet ya i save halpem yumi blong kasem mining we i stret moa long saed blong ol tok we i bin kamaot antap long Hil blong ol Oliftri.

18. ?Wanem Hibru tok we Shem-Tob i yusum, mo wanem mining blong tok ya?

¹⁸ Long Matyu 24:​3, 27, 39, hanraet blong Matyu we Shem-Tob i raetem i no yusum veb ya bohʼ. Be, hem i yusum wan narafala tok we i kolosap sem mak se, bi·ʼahʹ. Tok ya i stap long Hibru haf blong Baebol long Esikel 8:5 nomo, mo long vas ya hem i minim “rod blong kam insaed.” Long ples ya, tok ya bi·ʼahʹ i no minim aksin blong kam, be hem i minim ples we man i kam insaed long wan haos; taem yu stap long rod we i go insaed no long doa, i olsem we yu stap long haos finis. Mo tu, sam long ol hanraet blong Ded Si we oli no long saed blong Baebol be oli hanraet blong jyos, oli yusum tok ya bi·ʼahʹ plante taem, blong tokbaot stat blong wok blong ol pris no taem we oli kam pris. (Lukluk 1 Kronikel 24:​3-​19; Luk 1:​5, 8, 23.) Mo long 1986, taem oli tanem hanraet blong Peshitta blong Siria bifo (no, Aramaik) i kam long Hibru lanwis, oli yusum tok ya bi·ʼahʹ long ol vas ya Matyu 24:​3, 27, 37, 39. Taswe i gat pruf se long taem bifo maet oli yusum tok ya bi·ʼahʹ long wan fasin we mining blong hem i defren long veb ya bohʼ we Baebol i yusum. ?From wanem yumi intres long samting ya?

19. ?Sipos Jisas mo ol aposol blong hem oli bin yusum tok ya bi·ʼah,ʹ bambae yumi save gat wanem tingting?

¹⁹ Ating ol aposol oli yusum tok ya bi·ʼahʹ taem oli askem kwestin long Jisas, mo ating Jisas tu i bin yusum tok ya long ansa blong hem. Nating se ol aposol oli stap tingbaot taem ya we Jisas bambae i kamtru long fyuja nomo, be maet Kraes i yusum tok ya bi·ʼahʹ blong tokbaot wan samting we i bigwan moa i bitim samting we olgeta oli stap tingbaot. Ating Jisas i stap poen i go long taem ya we bambae hem i kamtru blong tekem wan nyufala posisen. Taem hem i kamtru, bambae hem i statem wan nyufala wok. Samting ya i stret long mining blong tok ya pa·rou·siʹa, we Matyu i yusum biaen. Mining ya blong tok ya bi·ʼahʹ i stret long samting we ol Wetnes blong Jeova oli tijim longtaem finis i kam, se olgeta “saen” ya we Jisas i givim oli soemaot se hem i stap finis.

Wet Go Kasem En Blong Taem Ya We Kraes i Stap

20, 21. ?Yumi save lanem wanem from tok blong Jisas long saed blong taem blong Noa?

²⁰ Stadi we yumi mekem long saed blong taem ya we Jisas i stap, i mas gat paoa long laef blong yumi mo long fyuja blong yumi. Jisas i talem long ol man blong hem se oli mas stap rere. Hem i givim wan saen blong ol man oli save luksave taem ya we bambae hem i stap, be plante man bambae oli no wantem luksave saen ya. Hem i se: ‘Olsem we long taem blong Noa, ol man oli no rere, oraet, long taem we mi, mi Pikinini blong Man bambae mi stap, bambae i olsem. Long taem ya bifo, taem we wora i no ron bigfala yet, ol man oli stap kakae, oli stap dring, oli stap mekem mared, kam kasem taem we Noa i go insaed long bigfala sip blong hem. Mo olgeta ya oli no save wan samting, kamkam we wora i ron bigfala, i tekemaot olgeta. Nao long taem ya we mi, mi Pikinini blong Man bambae mi stap, bambae i olsem.’​—Matyu 24:37-​39.

²¹ Bighaf blong ol man long taem blong Noa oli gohed nomo wetem ol bisnes blong olgeta evri dei. Jisas i talem se samting ya i sem mak long taem ya we “Pikinini blong Man bambae i stap.” Ating ol man raonabaot long Noa oli ting se bambae i no gat wan samting i kamaot. Be yu yu save finis wanem samting i kamaot. Taem ya, we i gohed longtaem, i kasem en blong hem, nao “wora i ron bigfala, i tekemaot olgeta.” Luk i tokbaot sem samting, we Jisas i bin skelem “taem blong Noa” wetem ‘taem blong Pikinini blong Man.’ Jisas i givim advaes ya se: “Ale, be long taem ya we bambae mi soemaot we mi mi Pikinini blong Man, bambae i olsem.”​—Luk 17:26-​30.

22. ?From wanem yumi intres bigwan long profet tok blong Jisas long Matyu japta 24?

²² Olgeta samting ya i gat wan spesel mining long yumi, from we yumi stap laef long wan taem we yumi luksave olgeta trabol we Jisas i bin talemaot​—ol faet, graon i seksek, ol sik, kakae i sot, mo ol man oli ronem ol disaepol blong hem. (Matyu 24:​7-9; Luk 21:10-​12) Nating se ol samting ya oli stap kamaot long wol stat long taem blong Faswan Bigfala Faet Blong Wol, we i jenisim laef blong ol man, be bighaf blong ol man oli luk ol samting ya olsem we oli nating nomo. Be ol trufala Kristin oli save mining blong ol bigfala trabol ya, olsem ol man oli save se hot taem i kolosap taem oli luk we ol figtri oli stap putum lif blong olgeta. Jisas i givim advaes ya se: “Ale, bambae i sem mak long yufala. Taem yufala i luk we ol samting ya oli stap kamaot, bambae yufala i save se kingdom blong God i kolosap.”​—Luk 21:​31, NW.

23. ?Ol tok blong Jisas long Matyu japta 24 oli gat spesel mining long hu, mo from wanem?

²³ Bighaf blong ol tok we Jisas i talem antap long Hil blong ol Oliftri, i go stret long ol man blong hem. Olgeta nao bambae oli joen long wok ya blong talemaot gud nyus long olgeta ples blong wol blong sevem laef blong ol man, bifo we en i kam. Olgeta nao bambae oli luksave, taem ‘rabis samting blong spolem ol ples . . . i stap stanap long ples we i tabu.’ Olgeta nao bambae oli harem woning, nao oli “ronwe” bifo we bigfala trabol i kasem olgeta. Mo ol tok ya oli stret moa long olgeta tu, se: “Hae God i tingbaot finis blong katem taem blong trabol ya. Sipos no, bambae i no gat man i save stap laef. Be hem i katem taem ya blong bambae i sevem ol man we hem i jusumaot olgeta finis, se oli man blong hem.” (Matyu 24:​9, 14-​22) Be, ?ol impoten tok ya oli minim wanem? mo ?From wanem yumi save talem se ol tok ya oli givim risen long yumi blong glad moa, blong gat strong tingting moa mo blong wok strong moa naoia? Stadi long saed blong Matyu 24⁠:22 we i kam biaen, bambae i givim ansa long ol kwestin ya.

[Ol futnot]

?Bambae Yu Ansa Olsem Wanem?

◻ ?From wanem i impoten blong luk olsem wanem ol Baebol oli yusum ol defren tok long Matyu 24:3?

◻ ?Wanem mining blong pa·rou·siʹa, mo from wanem samting ya i impoten?

◻ ?Maet wanem samting i sem mak long Matyu 24⁠:3 long lanwis Grik mo long lanwis Hibru?

◻ ?Wanem impoten samting long saed blong taem, we yumi nidim blong save long hem blong kasem mining blong Matyu japta 24?

[Tok blong pija long pej 10]

Hil blong ol Oliftri, we i stap kolosap long Jerusalem