?From Wanem Yu Mas Blokem Fasin Blong Wosip Long Ol Aedol?

“Ol pikinini blong mi, yufala i mas lukaot gud blong yufala i no go krangke long ol narafala god we i blong gyaman nomo.”​—1 JON 5:21.

1. ?From wanem fasin blong wosip long Jeova i no mas joen nating long fasin blong wosip long ol aedol?

JEOVA i no wan God we oli wokem hem long pis aean, wud, no ston. Ol man oli no save putum hem insaed long wan tempel long wol ya. Hem i Speret man we i gat bigfala paoa, ol man oli no save luk hem, from samting ya man i no naf blong mekem wan pija blong hem. Nao, fasin blong wosip long Jeova we i klin i no mas joen nating wetem ol aedol.​—Eksodas 33:20; Ol Wok 17:24; 2 Korin 3:17.

2. ?Wanem kwestin yumi mas tingting long hem?

² Sipos yu yu wan man blong wosip long Jeova, maet yu save askem se, ‘?Be, fasin blong wosip long ol aedol i olsem wanem? ?Olsem wanem ol man blong Jeova oli naf blong blokem samting ya bifo? ?Mo from wanem yumi mas blokem fasin ya blong wosip long ol aedol tede?’

Wosip Long Ol Aedol

3, 4. ?Wanem mining blong tok ya, wosip long ol aedol?

³ Kolosap evritaem fasin blong wosip long ol aedol i minim wan lafet blong wosip no i wan kastom. Wosip long ol aedol i minim fasin blong givim ona, lav, wosip, no respek long wan aedol. ?Mo wanem ya aedol? Aedol i wan pija, wan pija blong narafala samting we yumi no luk, no hem i wan saen blong wan samting blong wosip. Oltaem, ol man we oli stap wosip long ol aedol, oli stap mekem wosip i go stret long wan trufala paoa no wan bigfala paoa we oli bilif se hem i stap (olsem man, anamol, no wan ogenaesesen). Be fasin ya blong wosip long ol aedol, ol man oli save mekem tu long ol samting we oli no rili laef (wan paoa no wan samting raonabaot long yumi we oli no gat laef).

⁴ Long Baebol, ol Hibru tok we oli tokbaot ol aedol oltaem oli minim wan samting we i no save givhan nating, ol tok blong daonem nomo. Sam long ol tok ya oli se “pija we oli katem long wud” (wan trufala samting we oli katem long wud no ston); “wan ston no aedol we oli wokem long ston” (wan samting olsem led we oli bonem blong wokem samting long hem); “rabis aedol”; “aedol nating nomo” (rili, oli no save givhan); mo “ol doti aedol.” Oli stap tanem Grik tok ya eiʹdo·lon i kam “aedol.”

5. ?From wanem yumi save talem se olgeta pija oli no aedol?

⁵ I no evri pija oli aedol. God hem wan i talem long ol man Isrel blong oli wokem tu jerubim long gol blong oli putum long bokis blong kontrak mo blong flasem ten pis kaliko blong haos tapolen wetem ol pija blong ol jerubim mo long kaliko we i seraotem Tabu Ples mo Ples we i Tabu we i Tabu. (Eksodas 25:​1, 18; 26:​1, 31-33) Ol pris ya nomo we oli stap wok insaed oli luk ol pija ya we oli saen blong ol jerubim long heven. (Lukluk Hibrus 9:​24, 25.) I klia nomo se ol pija ya blong ol jerubim long haos tapolen oli no stap ya blong ol man oli wosip long olgeta, from we ol enjel we oli stretgud oli no save akseptem wosip we man i mekem long olgeta.​—Kolosi 2:18; Revelesen 19:10; 22:​8, 9.

Tingting Blong Jeova Long Fasin Ya

6. ?Wanem tingting blong Jeova long fasin blong wosip long ol aedol?

⁶ Ol man blong Jeova oli blokem fasin ya blong wosip long ol aedol from we Jeova i no laekem enikaen fasin blong wosip long ol aedol. God i givim oda long ol man Isrel blong oli no wokem pija no aedol olsem ol samting blong givim ona mo mekem wosip long olgeta. Long ol Ten Komanmen, yumi save faenem ol tok ya se: “Bambae yufala i no mekem pija blong ol samting long heven, mo long wol, mo long solwora we wol ya i stanap long hem, blong yufala i mekem wosip long hem. Bambae yufala i no bodaon long aedol olsem, blong mekem wosip long hem, from we mi mi Hae God, mi God blong yufala, mo yufala i man blong mi, nao mi mi no save letem yufala i mekem wosip long narafala god bakegen. Fasin blong mi long ol man we oli no laekem mi, oli stap agens long mi, mi mi save panisim olgeta, wetem ol pikinini we bambae oli stap kamaot biaen long olgeta, go kasem ol smol bubu blong ol smol bubu blong olgeta. Be olgeta we oli stap laekem mi tumas mo oli stap obei long ol loa blong mi, mi mi save laekem olgeta, wetem ol pikinini we bambae oli stap kamaot biaen long olgeta gogo kasem plante taosen yia.”​—Eksodas 20:​4-6.

7. ?From wanem Jeova i no laekem fasin ya blong wosip long ol aedol?

⁷ ?From wanem Jeova i no laekem enikaen fasin blong wosip long ol aedol? Faswan risen, from we hem i wantem ol man oli wosip long hem nomo, olsem namba tu loa long Ten Komanmen antap i soemaot. Mo tu, hem i talem tru long profet blong hem, Aesea, i se: “Mi mi Jeova. Hemia nao nem blong mi. Mo bambae mi mi no givim haenem blong mi long wan narafala, mo bambae mi mi no letem ol toktok blong presem mi oli go long ol imej we man i katem.” (Aesea 42:8) Long wan taem, fasin ya blong wosip long ol aedol i holemtaet ol man Isrel olsem wan trap nao “oli stap kilim ol pikinini blong olgeta blong mekem sakrifaes long ol narafala god ya we oli devel nomo.” (Ol Sam 106:​36, 37) Ol man we oli stap wosip long ol aedol oli no bilif se Jeova i trufala God, be i no hemia nomo, olgeta ya oli stap mekem wok blong jif Enemi blong God, Setan wetem olgeta rabis enjel blong hem tu.

Stap Tru Long Jeova Long Ol Traem

8. ?Wanem traem ol trifala man Hibru, Sadrak, Misak, mo Abednigo i fesem?

⁸ Fasin blong stap tru long Jeova i mekem se yumi blokem fasin ya blong wosip long ol aedol. Store we i stap long Daniel japta 3 i soemaot samting ya. Nebukadnesa, king blong Babilon i hivimap ol haeman blong wok long gavman blong hem blong dediketem wan bigfala aedol we oli wokem long gol. Oda ya we hem i givim i go tu long Sadrak, Misak, mo Abednigo​—ol trifala man Hibru we oli haeman long gavman blong Babilon. Olgeta we oli stap long taem ya oli mas bodaon long fored long aedol ya taem oli harem myusek. Hemia wan traem we prapa god blong Babilon, Setan, i wantem pulum trifala man Hibru oli bodaon long aedol ya we i pija blong Kingdom blong Babilon. Traem tingbaot sipos yu yu stap long taem ya.

9, 10. (a) ?Ol trifala man ya oli mekem wanem, mo wanem pei oli kasem from? (b) ?Ol Wetnes blong Jeova oli kasem wanem long fasin ya blong trifala man Hibru?

⁹ !Yu luk! Ol trifala man Hibru oli stanap. Oli tingbaot loa blong God we i agensem fasin blong wokem mo mekem wok blong ol aedol we oli katem nomo. Nebukadnesa i mekem se oli mas jus​—!bodaon sipos no oli mas ded! Be long fasin we oli stap tru long Jeova, oli talem se: “Sipos ol samting oli mas kam olsem, God blong mifala we mifala i mekem wok blong hem, hem i save sevem mifala. !Mo bambae hem i sevem mifala from ples blong bigfala faea ya, mo from han blong yu, O king! Be sipos i no olsem, yu yu mas save wan samting, O king. Ol god blong yu, mifala i no mekem wok blong olgeta. Mo pija blong gol we yu yu bin stanemap, mifala bambae i no wosip long hem.”​—Daniel 3:​16-18.

¹⁰ Oli sakem ol trufala man ya blong God i go insaed long faea ya we i hot we i hot. Nebukadnesa i sapraes blong luk se i gat fo man i stap wokbaot insaed long faea, mo i singaot ol trifala man Hibru ya blong oli kamaot, mo oli kamaot. Nao King i talem se: “I gud blong presem God blong Sadrak, Misak, mo Abednigo, we hem i sanem enjel [we i namba fo man long bigfala faea ya] mo i sevem ol man blong wok blong hem we oli trastem hem mo hem i jenisim tok blong king mo i sevem bodi blong olgeta, from we oli no save mekem wok mo oli no save wosip long narafala god be hem nomo i God blong olgeta. . . . I no gat narafala god we i save sevem man olsem hemia.” (Daniel 3:​28, 29) Fasin ya blong ol trifala man Hibru blong holemstrong long God i leftemap tingting blong ol Wetnes blong Jeova tede blong oli stap tru long God, blong oli holemtaet fasin ya blong no joen nating long ol politik bisnes blong wol, mo blong oli no mekem wosip long ol aedol.​—Jon 17:16.

Ol Aedol Oli Lus Long Kot

11, 12. (a) ?Aesea i tokbaot wanem samting we i kamaot bitwin Jeova mo ol aedol? (b) ?Ol god blong ol nesen oli mekem wanem taem Jeova i askem kwestin long olgeta?

¹¹ Narafala risen blong blokem fasin ya blong wosip long ol aedol se fasin ya blong ona long ol aedol i blong nating nomo. Nating se sam aedol oli luk olsem ol trufala samting we oli laef​—oli gat maot, ol ae, mo ol sora​—be oli no save toktok, lukluk, no harem wan samting mo oli no save givhan long ol man we oli stap wosip long olgeta. (Ol Sam 135:​15-18) Yumi luk samting ya long ol yia we oli ron bitwin 800 mo 700 B.K.T., taem profet blong God i raetem daon long Aesea 43:​8-28 se i gat wan samting bitwin Jeova mo ol aedol blong stretem long kot. Insaed long kot ya ol man blong God Isrel oli stap long wan saed, mo ol nesen blong wol oli stap long narasaed. Jeova i askem ol gyaman god blong ol nesen blong talemaot “ol faswan samting,” hemia blong talemaot profet tok we i stret. I no gat wan i save mekem olsem. Nao Jeova i talem long ol man blong hem, i se: “Yufala i wetnes blong mi, . . . mo mi mi God.” Ol nesen oli no save pruvum se ol god blong olgeta oli stap fastaem long Jeova no ol god ya oli save talem profet tok. Be Jeova i bin talemaot trabol we bambae i kasem Babilon mo hem i bin talemaot se ol man blong hem we oli kalabus bambae oli kam fri.

¹² Mo tu, ol man blong God we hem i sevem olgeta, oli save talem olsem tok we i stap long Aesea 44:​1-8 se oli “blong Jeova.” Jeova hem wan i talem se: “Mi mi fastaem mo mi mi laswan, mo i no gat narafala God be mi nomo.” Ol gyaman god oli no gat samting blong talem. Bakegen Jeova i talem long ol man blong hem, i se, “Yufala i wetnes blong mi,” mo i gohed i se: “?I gat narafala God wetem mi? No gat, i no gat wan we i olsem Bigfala Ston olsem mi.”

13. ?Fasin blong wosip long ol aedol i soemaot wanem samting long saed blong man we i mekem wosip olsem?

¹³ Yumi blokem fasin blong wosip long ol aedol from we man we i mekem wosip olsem i soem se hem i no waes. Long wan haf blong tri, man blong wosip long aedol i wokem wan god blong wosip long hem, mo narafala haf blong wud ya hem i yusum blong mekem faea blong kukum kakae blong hem. (Aesea 44:​9-17) !Man ya i krangke! Bigfala sem tu long wan man blong wokem ol aedol mo i mekem wosip long olgeta, from we hem i no save givim wan trufala wetnes blong pruvum se ol samting ya oli god. Be fasin ya we Jeova i stap olsem God i tru nomo, from we hem i talemaot fastaem we ol man blong hem bambae oli kam fri long Babilon mo tu hem nao i mekem se oli kam fri. Jerusalem i kam fulap bakegen long ol man, ol taon blong Juda oli stanap bakegen, mo “dip wora” blong Babilon​—hemia Reva blong Yufretes​—i no moa stap olsem wan rod blong kipim olgeta i stap sef. (Aesea 44:​18-27) Olsem we God i bin talem finis, Saeras blong Pesia i winim Babilon long faet.​—Aesea 44:28 kasem 45:6.

14. ?Long Bigfala Kot blong Heven mo Wol, wanem samting bambae i kamaot we bambae i stanap blong olwe?

¹⁴ Ol gyaman god oli lusum kot ya se hu i naf blong stap olsem God. Ol samting we oli kamaot long Babilon bambae oli kamaot long hemia we i sem mak long hem tede, Bigfala Babilon, hemia olgeta gyaman skul blong wol. Hem wetem olgeta god blong hem, olgeta samting blong hem, mo olgeta aedol we oli stap yusum blong wosip long hem bambae oli lus blong olwe. (Revelesen 17:12 kasem 18:8) Long Bigfala Saprim Kot blong Heven mo Wol, bambae i kam klia blong olwe se Jeova nomo i trufala God ya we i laef mo we hem i stap mekem ol profet tok blong hem oli kamtru.

Ol Sakrifaes Long Ol Devel

15. ?Tabu speret mo hed kampani blong faswan handred yia i soemaot wanem long saed blong ol man blong Jeova mo fasin ya blong wosip long ol aedol?

¹⁵ Ol man blong Jeova oli blokem fasin ya blong wosip long ol aedol from we speret blong God mo ogenaesesen blong hem oli lidim olgeta. Hed kampani blong ol man blong Jeova long faswan handred yia i talem long ol narafala Kristin i se: “Tok blong Tabu Speret, mo i tok blong mifala tu, se bambae mifala i no putum sam narafala loa long yufala, we bambae i olsem wan hevi samting long yufala, antap long ol rul ya we i mas gat. Hemia ol rul ya. Bambae yufala i no kakae ol kakae ya we man i yusum finis blong mekem wosip long ol narafala god. Bambae yufala i no kakae blad. Bambae yufala i no kakae anamol we man i jokem nek blong hem nomo, we blad i stap yet long mit blong hem. Mo bambae yufala i no mekem nogud wetem woman. Sipos yufala i folem ol rul ya, bambae yufala i go long stret rod. Hemia en blong tok blong mifala.”​—Ol Wok 15:​28, 29.

16. ?Long prapa toktok blong yu, olsem wanem bambae yu yu tokbaot tok blong Pol long saed blong ol sakrifaes long ol aedol?

¹⁶ Wan narafala risen blong blokem fasin ya blong wosip long ol aedol i blong no joen long wok blong ol rabis speret. Aposol Pol i tokbaot Kakae blong Masta long ol Kristin long Korin, i se: “I nogud yufala i stap mekem wosip long ol narafala god. . . . ?Olsem wanem long gudfala kap ya we yumi stap talem tangkyu tumas long God from? ?Taem yumi dring long kap ya, yumi no kam wan wetem Kraes long blad blong hem? ?Olsem wanem long bred ya we yumi stap brekem? ?Taem yumi kakae bred ya, yumi no kam wan wetem Kraes long bodi blong hem? Yumi plante, be from we i gat wan bred nomo i stap, mo yumi evriwan i kakae bred ya, taswe yumi evriwan i olsem wan bodi nomo. Yufala i traem tingbaot fasin blong ol man Isrel. ?Olsem wanem long ol man ya we oli stap kakae ol anamol ya we olgeta oli kilim long olta blong mekem sakrifaes long God? Olgeta ya oli kam wan kampani nomo long olta ya. ?Tok ya blong mi i min wanem? Mi mi no talem se ol narafala god ya oli prapa god. Mo mi no talem se mit blong ol anamol ya we olgeta oli kilim blong mekem sakrifaes long ol narafala god, i gat samting i stap long hem. Mi mi no tok olsem. Mi mi talem se taem ol man oli kilim anamol blong mekem sakrifaes long ol narafala god, i olsem tok blong Baebol we i talem se ‘Oli stap mekem sakrifaes long ol devel, oli no mekem long God.’ Nao mi no wantem nating we bambae yufala i kam wan kampani wetem ol devel. Yufala i no save dring long kap blong [Jeova, NW], nao bakegen long kap blong ol devel. Yufala i no save sidaon blong kakae long tebel blong [Jeova, NW], nao bakegen long tebel blong ol devel. ?Weswe? ?Yufala i wantem blong yumi mekem [Jeova, NW] i jelas? ?Yufala i ting se paoa blong yumi i moa long paoa blong hem?”​—1 Korin 10:​14-22.

17. ?Long faswan handred yia K.T. wetaem wan Kristin i save kakae mit we oli yusum finis blong mekem sakrifaes long aedol, mo from wanem?

¹⁷ Taem ol man oli yusum wan anamol blong mekem sakrifaes long wan aedol, haf mit blong anamol ya i go long ol pris, mo olgeta we oli mekem wosip oli karem haf blong hem blong mekem lafet. Mo, maet sam haf blong mit ya oli save salem long maket. I no stret we wan Kristin i go long wan tempel blong aedol blong i kakae mit nating se hem i no joen long wan kastom ya blong wosip, from fasin ya i save mekem ol narafala i foldaon long bilif no i save pulum hem long gyaman wosip. (1 Korin 8:​1-13; Revelesen 2:​12, 14, 18, 20) Fasin blong yusum anamol blong mekem sakrifaes long wan aedol i no jenisim mit blong hem, taswe wan Kristin i save pem sam mit olsem long maket. Mo tu sipos hem i stap long haos blong narafala, mo man blong haos i givim kakae long hem, i no nid blong hem i askem blong faenemaot weples hem i tekem mit blong hem. Be sipos wan man i talem se mit ya “i blong wan anamol we oli kilim blong mekem sakrifaes long narafala god,” nao bambae hem i no kakae mit ya, blong mekem se man i no foldaon from fasin blong hem.​—1 Korin 10:​25-29.

18. ?Olsem wanem olgeta we oli kakae mit we ol man oli yusum finis blong mekem sakrifaes long ol aedol hem i joen tu wetem ol rabis speret?

¹⁸ Samtaem ol man oli ting se afta long sakrifaes, god ya i stap insaed long mit mo i go insaed long bodi blong ol man we oli kakae long taem blong lafet blong olgeta. Ol man ya we oli stap kakae tugeta oli kam joen tugeta moa, long sem fasin olgeta we oli kakae long anamol ya we oli yusum finis blong mekem sakrifaes oli joen long fasin ya blong wosip mo oli joen wetem rabis speret god ya we aedol i tekem nem blong hem. Long fasin ya blong wosip long ol aedol, ol rabis speret oli holemtaet ol man blong oli no wosip long trufala God. (Jeremaea 10:​1-15) !From samting ya, ol man blong Jeova oli no stap kakae ol samting we oli yusum finis blong mekem sakrifaes long ol aedol! Fasin blong stap tru long God, akseptem rod we tabu speret mo ogenaesesen blong hem i lidim yumi long hem, mo gat strong tingting blong no joen long wok blong ol rabis speret i save givim paoa long yumi blong blokem fasin ya blong wosip long ol aedol tede.

?From Wanem Yumi Mas Lukaotgud?

19. ?Wanem kaen fasin blong wosip long ol aedol i stap long Efesas bifo?

¹⁹ Ol Kristin oli gohed oltaem blong blokem fasin ya blong wosip long ol aedol from we i gat plante defren rod we man i save foldaon long hem, mo nating ol man oli mekem wan nomo long ol fasin ya blong wosip long ol aedol, olgeta oli no moa holem bilif blong olgeta. Aposol Jon i talem long ol narafala man blong bilif se: “Yufala i mas lukaot gud blong yufala i no go krangke long ol narafala god.” (1 Jon 5:21) Oli nidim advaes ya from we i gat plante defren fasin blong wosip long ol aedol raonabaot long olgeta. Jon i stap long Efesas, wan taon we i fulap long fasin blong wokem majik mo ol kastom store blong ol gyaman god mo hem i raetem leta ya. Wan long ol seven bigfala samting long wol we ol man oli stap kam luk, i stap long Efesas​—hemia tempel blong Atemis, wan ples blong holem ol man blong brekem loa mo wan ples blong mekem ol lafet blong mekem ol rabis fasin long saed blong seks. Heracleitus, man we i savegud fasin blong toktok long Efesas i tokbaot dak rod we i go long olta blong tempel ya olsem tudak we i joen long ol rabis fasin, mo hem i tokbaot ol nogud fasin blong ol man we oli stap go long tempel ya. Fasin blong olgeta i nogud bitim fasin blong ol anamol. Taswe, ol Kristin long Efesas oli mas stanap strong agensem ol wok blong rabis speret, nogud fasin blong seks, mo fasin blong wosip long ol aedol.

20. ?From wanem yumi mas no joen nating long olgeta defren kaen fasin blong wosip long ol aedol?

²⁰ Ol Kristin oli mas gat strong tingting blong no mekem wan smol mastik blong wosip long ol aedol from we wan smol mastik long wosip long Setan bambae i sapotem tok ya blong hem we i agensem God, se ol man bambae oli no stap holemstrong long God sipos oli kasem traem. (Job 1:​8-12) Taem Setan i soemaot “olgeta kantri long wol ya wetem ol gudgudfala samting we oli gat” long Jisas, hem i talem long Jisas se: “Olgeta samting ya bambae mi mi givim long yu, sipos yu foldaon long mi, yu mekem wosip long mi.” Taem Jisas i no wantem, samting ya i soemaot se hem i stanap long saed blong hae rul blong Jeova mo hem i pruvum se Devel Setan i man blong gyaman.​—Matyu 4:​8-11; Proveb 27:11.

21. ?Long saed blong hedgavman blong Rom, ol Kristin we oli holemstrong long God oli no wantem mekem wanem?

²¹ Sem mak ol man blong Jisas bifo oli no mekem wan fasin blong wosip we i save sapotem tok blong Setan. Nating se oli gat stret tingting long saed blong “ol haeman” blong gavman, bambae oli no bonem insens blong givim ona long hedgavman blong Rom, nating se oli mas ded sipos oli no mekem samting ya. (Rom 13:​1-7) Daniel P. Mannix i tokbaot samting ya se: “Smol namba blong ol Kristin nomo oli mekem samting ya, nating se ol man oli putum wan olta we faea i laet long hem i stap long medel blong stad blong mekem i isi blong ol Krisin oli mekem sipos oli wantem. Wanem we wan man we i stap long kalabus i mas mekem, hem i mas putum wan smol insens nomo long faea nao hem i save kasem wan Stefeket blong Sakrifaes mo hem i save kam fri. Mo tu oli eksplenem gud long hem se hem i no wosip long hedgavman long fasin ya; be hem i luksave nomo ol gudfala fasin blong God long man ya we i hedgavman blong Rom. Be, kolosap i no gat Kristin we oli mekem samting ya blong oli aot long kalabus.” (Those About to Die, pej 137) ?Sipos yu kasem sem traem olsem, bambae yu blokem olkaen fasin blong wosip long ol aedol?

?Bambae Yu Blokem Fasin Blong Wosip Long Ol Aedol?

22, 23. ?From wanem yumi mas blokem fasin ya blong wosip long ol aedol?

²² I klia se ol Kristin oli mas blokem olgeta defren fasin blong wosip long ol aedol. Jeova i wantem se ol man oli wosipim hem nomo. Ol trifala man Hibru we oli stap holemstrong long hem oli givim wan gudfala eksampel taem oli no wantem bodaon long bigfala aedol we King Nebukadnesa blong Babilon i stanemap. Long bigfala kot we profet Aesea i tokbaot, Jeova nomo hem i trufala God mo hem i God ya we i laef i stap. Ol Kristin wetnes blong hem bifo oli no mas kakae ol samting we ol man oli yusum finis blong mekem sakrifaes long ol aedol. Plante long olgeta we oli stap holemstrong oli no foldaon long fasin ya blong wosip long ol aedol we i agensem Jeova.

²³ Taswe, ?yu yu stap blokem fasin blong wosip long ol aedol? ?Yu yu stap givim wosip long God nomo? ?Yu yu stap sapotem hae rul blong Jeova mo yu stap leftemap hem olsem trufala God mo God ya we i laef? Sipos yes, yu mas gat strong tingting blong gohed blong stanap strong blong agensem olgeta fasin ya blong wosip long ol aedol. ?Be wanem ol narafala poen long Baebol we i save givhan long yu blong blokem olgeta defren kaen fasin blong wosip long ol aedol?

?Wanem Ol Tingting Blong Yu?

◻ ?Wanem ya fasin blong wosip long ol aedol?

◻ ?From wanem Jeova i no laekem olgeta defren fasin blong wosip long ol aedol?

◻ ?Ol trifala man Hibru oli mekem wanem long saed blong wosip long ol aedol?

◻ ?Olsem wanem olgeta we oli kakae ol samting we ol man oli yusum finis blong mekem sakrifaes long ol aedol oli joen wetem ol rabis speret?

◻ ?From wanem yumi mas blokem fasin ya blong wosip long ol aedol?

[Tok Blong Pija Long Pej 23]

Nating se laef blong olgeta i stap long denja, ol trifala man Hibru oli no wantem joen long fasin blong wosip long aedol