Wanem Samting Yumi Mas Mekem Blong Stap Aninit Long God

“Yufala i mas putum yufala i stap daon, aninit long han blong God.”​—JEMES 4:7.

1. ?Yumi save talem wanem long saed blong God ya we yumi stap wosip long hem?

!JEOVA i wan gudfala God! !Yumi no save skelem hem wetem man, hem i hae moa long olgeta fasin blong hem, hem i defren long plante fasin! Hem i Hae Rula long heven mo long wol we olgeta trufala paoa blong rul oli stap long Hem. Hem i bin stap olwe mo bambae hem i stap we i no save ded samtaem, mo hem i gat bigfala paoa, from samting ya i no gat man i luk hem mo i save stap laef. (Eksodas 33:20; Rom 16:26) Hem i gat bigfala paoa mo waes we i no gat mak blong hem, mo hem i gat stret fasin we i stretgud olgeta, mo hem i lav. Hem nao i Wokem yumi, i Jaj blong yumi, i Givim Loa long yumi mo i King blong yumi. Evri samting we oli gud mo evri presen we oli nambawan oli kam long hem.​—Ol Sam 100:3; Aesea 33:22; Jemes 1:17.

2. ?Fasin ya blong stap aninit long God i minim wanem?

² From ol samting ya, i stret nomo blong yumi stap aninit long hem. ?Samting ya i minim wanem long yumi? I gat ol samting we yumi mas mekem. From we yumi no save luk Jeova long prapa ae blong yumi, fasin blong stap aninit long hem i min se yumi lesin long gudfala voes blong hat mo tingting blong yumi, wok tugeta wetem ogenaesesen blong God long wol, luksave ol haeman blong wol, mo ona long hed blong famle.

Gat Gudfala Voes Blong Hat

3. ?Blong holem gudfala voes blong hat, yumi mas obei long ol wanem kaen rul we oli blokem yumi long sam samting?

³ Blong gat wan gudfala voes blong hat, yumi mas obei long samting we i stap long hat​—hemia, ol loa no ol rul we man i no naf blong putumap olsem loa. Eksampel, laswan long ol Ten Loa, we i agensem fasin ya blong wantem samting blong narafala man, ol haeman oli no save putumap olsem wan loa. Samting ya i pruvum se God nomo i stampa blong ol Ten Loa ya, from we ol man blong mekem ol loa bambae oli no mekem wan loa we oli no naf blong jajem sipos man i brekem. From loa ya, Jeova God i givim long ol wanwan man Isrel responsabiliti ya blong stap lukluk hem wan olsem polisman​—sipos hem i wantem wan gudfala voes blong hat. (Eksodas 20:17) Sem mak, long olgeta fasin we ol man oli stap mekem folem tingting blong olgeta nomo, we bambae i blokem olgeta blong oli no go insaed long Kingdom blong God, hemia “jelas” mo fasin blong “wantem kasem mak blong narafala man”​—ol fasin we ol jaj blong wol oli no save jajem. (Galesia 5:​19-21) Be blong gat wan gudfala voes blong hat yumi no mas mekem ol samting ya.

4. ?Blong holem wan gudfala voes blong hat, yumi mas folem wanem rul long Baebol?

⁴ Yes, yumi mas laef folem ol rul blong Baebol. Ol rul olsem oli stap long tufala loa we Jisas i talem blong ansa long kwestin ya se weswan long ol loa blong Moses i bigwan moa bitim ol narafala. “Yu mas laekem Hae God ya [Jeova, NW] we i God blong yu long olgeta tingting blong yu, mo long olgeta laef blong yu, mo long olgeta maen blong yu. . . . Yu mas laekem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu.” (Matyu 22:​36-40) Tok blong Jisas long Matyu 7:12 i soemaot wanem i joen long namba tu loa ya, hem i se: “Yufala i mas mekem long ol narafala man, olsem we yufala i wantem blong ol narafala man oli mekem long yufala. Hemia i mining blong Loa blong Moses, mo blong ol tok blong ol profet tu.”

5. ?Olsem wanem yumi save holem gudfala fasin fren wetem Jeova God?

⁵ Yumi mas mekem wanem we yumi save se i stret mo yumi no mas mekem samting we yumi save se i rong, nating se narafala i luk no no gat. Yumi mekem olsem nating se yumi no save kasem panis taem yumi no mekem samting we yumi mas mekem no taem yumi mekem wan samting we yumi no mas mekem. I min se yumi mas frengud wetem Papa blong yumi long heven, yumi tingbaot woning we aposol Pol i talem long Hibrus 4:13, i se: “I no gat wan samting nating long wol ya we God i mekem, we i save haed long fes blong God. Olgeta samting oli stap olsem long klia ples nomo, stret long fes blong hem. Mo long fes blong hem nomo, yumi evriwan i mas talemaot ol fasin blong laef blong yumi.” Sipos oltaem yumi gat strong tingting blong mekem fasin we i stret, samting ya bambae i givhan long yumi blong agensem ol gyaman trik blong Devel Setan, blong blokem ol traem blong wol, mo blong agensem fasin blong man i tingbaot hem nomo we yumi bon wetem.​—Lukluk Efesas 6:11.

Stap Aninit Long Ogenaesesen Blong God

6. ?Wanem ol rod we Jeova i yusum blong toktok wetem man, bifo long taem blong ol Kristin?

⁶ Jeova God i no livim evri samting i stap long yumi wanwan blong yumi nomo i jusum olsem wanem blong mekem ol rul long Baebol i wok long laef blong yumi. Stat bifo finis long histri blong man, God i stap yusum ol man olsem rod blong hem i toktok long ol man. Olsemia nao, Adam i man blong talem tok blong God long Iv. God i givim loa long saed blong frut we hem i putum tabu long hem long Adam bifo we hem i wokem Iv, taswe Adam i mas talemaot long Iv ol samting we God i wantem Iv i mekem. (Jenesis 2:​16-23) Noa i mekem wok blong profet blong God long famle blong hem mo long ol man we oli laef bifo Bigfala Wora i ron. (Jenesis 6:13; 2 Pita 2:5) Ebraham i man blong talemaot tok blong God long famle blong hem. (Jenesis 18:19) Moses i profet blong God mo hem nao i rod ya we God i yusum blong toktok long nesen ya Isrel. (Eksodas 3:​15, 16; 19:​3, 7) Biaen long hem, kam kasem taem blong Jon Baptaes, plante profet, ol pris, mo ol king, God i yusum olgeta blong talemaot wil blong hem long ol man blong hem.

7, 8. (a) ?Taem Mesaea i kam, God i stap yusum hu olsem man blong karem tok blong hem? (b) ?Ol Wetnes blong Jeova tede oli mas mekem wanem blong stap aninit long God?

⁷ Taem Mesaea, Jisas Kraes i kam, God i yusum hem mo ol trufala aposol mo ol disaepol blong hem blong oli wok olsem ol man blong karem tok blong God. Biaen, ol trufala man blong Jisas we tabu speret i makemaot olgeta oli mekem wok olsem “slef ya we i stret mo waes” (NW) taem oli talemaot long ol man blong Jeova olsem wanem oli save mekem ol rul blong Baebol oli wok long laef blong olgeta. Fasin blong stap aninit long God i minin se man i luksave tul ya we Jeova God i stap yusum.​—Matyu 24:​45-47; Efesas 4:​11-14.

⁸ I gat ol pruf i soemaot se tede “slef ya we i stret mo waes” i stap wetem ol Wetnes blong Jeova mo Hed Kampani blong ol Wetnes blong Jeova i wok long nem blong hem. Biaen grup ya i putumap ol man blong lukaot long ol defren samting​—olsem ol elda mo ol elda we oli stap goraon—​blong lidim wok long ples blong olgeta. Blong stap aninit long God evri Wetnes wanwan oli mas stap aninit long ol man ya blong lukaot olsem Hibrus 13:17 i talem, i se: “Yufala i mas ona long ol man we i stap lidim yufala, mo yufala i mas obei long ol tok blong olgeta. Olgeta ya oli stap lukaot long Kristin laef blong yufala, we oli no save spel, mo bambae oli mas talemaot long God we oli holem wok ya blong olgeta olsem wanem. Yufala i mas mekem olgeta oli harem gud long wok ya blong olgeta. Sipos yufala i stap mekem olgeta oli harem nogud long wok ya, fasin ya bambae i no givhan long yufala nating.”

Akseptem Fasin Stretem

9. ?Fasin ya blong stap aninit long God plante taem i minim wanem tu?

⁹ Samtaem fasin blong stap aninit long God i blong akseptem fasin blong stretem long olgeta we oli mekem wok olsem man blong lukaot. Sipos yumi no stap stretem yumi wanwan oltaem taem i gat nid blong mekem olsem, maet yumi nidim advaes mo fasin stretem long olgeta we oli gat ekspiryens mo paoa blong mekem olsem, olsem ol elda long kongregesen blong yumi. I waes blong akseptem fasin stretem olsem.​—Proveb 12:15; 19:20.

10. ?Olgeta we oli stap stretem ol narafala oli mas mekem wanem?

¹⁰ Yes, ol elda we oli stap stretem man oli mas soem se olgeta oli stap aninit long God. ?Olsem wanem? Galesia 6:​1 i se olgeta ya oli no mas givim advaes nomo be oli mas soemaot eksampel long fasin blong olgeta. “Ol brata mo sista. Sipos wan long yufala i foldaon, i mekem samting we i no stret, yufala we Speret blong God i stap long yufala, yufala i mas givhan long hem blong stretem hem. Be yufala i mas mekem long kwaet fasin. Mo yufala tu i mas lukaotgud long yufala, blong sam samting bambae i no kam traem yufala.” I olsem se, advaes blong elda i mas laenap wetem eksampel blong hem. Olsemia nao hem i laenap wetem advaes we i stap long 2 Timote 2:​24, 25 mo long Taetas 1:9. Yes, olgeta we oli stap stretem ol narafala oli mas lukaotgud se oli no mas strong tumas. Oltaem oli mas kwaet, kaen, be tu oli mas strong blong holemtaet ol rul long Tok blong God. Taem oli lesin long ol man oli no mas tekem saed blong wan man agens long narafala man, oli mas mekem tingting blong olgeta we oli stap hadwok mo wari i spel.​—Lukluk Matyu 11:​28-30.

Stap Aninit Long Ol Haeman Blong Wol

11. ?Wanem fasin ol Kristin oli mas gat long ol haeman?

¹¹ Blong stap aninit long God yumi mas obei long ol haeman blong wol tu. Rom 13:1 i givim advaes long yumi se: “Olgeta man oli mas ona long gavman, from we ol gavman oli stap holem nem from wan samting nomo, from we God nomo i letem olsem long olgeta. Ol haeman ya we oli stap, be God nomo i putumap olgeta.” Ol tok ya oli min se, yumi mas obei long ol loa blong rod mo yumi mas tingbaot blong pem ol takis, olsem aposol Pol i talem long Rom 13:7.

12. ?From wanem yumi no save obei long Sisa long evri samting?

¹² I tru se, fasin ya blong stap aninit long Sisa hem i long sam samting nomo. Yumi no mas fogetem rul we Jisas Kraes i talem, long Matyu 22:21 se: “Oraet, samting we i blong Sisa, yufala i givimbak long Sisa. Samting we i blong God, yufala i givimbak long God.” Futnot blong Rom 13:1 long Baebol (Oxford NIV [New International Version] Scofield Study Bible) i talem se: “Samting ya i no min se hem i mas obei long ol loa we oli no stret no oli agensem Kristin fasin. No gat. Taem olsem i stap long hem blong hem i obei long God bitim we hem i obei long ol man (Ol Wok 5:29; cp. Dan. 3:​16-18; 6:10ff).”

Stap Aninit Long God Insaed Long Famle

13. ?Ol wanwan memba blong famle oli mas mekem wanem blong oli gat fasin blong stap aninit long God?

¹³ Insaed long famle, hasban mo papa i olsem hed blong famle. Samting ya i min se ol waef oli mas folem advaes we i stap long Efesas 5:​22, 23, se: “Yufala woman we i mared, yufala i mas ona long man blong yufala, olsem we yufala i stap ona long Masta blong yumi. From we man i hed blong woman blong hem, olsem we Kraes i hed blong jyos.”a Long saed blong ol pikinini, olgeta oli no stap mekem prapa rul blong olgeta be oli mas stap aninit long papa mo mama, olsem Pol i eksplenem long Efesas 6:​1-3: “Yufala pikinini, from we yufala i joen long Masta blong yumi, yufala i mas obei long papa mo mama blong yufala. Hemia i stret fasin blong yufala. Loa ya we i talem se ‘Yufala i mas ona long papa mo mama blong yufala,’ hemia faswan long ol loa ya we i gat promes i stap long hem. Biaen, hem i talem bakegen se ‘Blong bambae ol samting blong laef blong yufala oli save ron gud, mo blong bambae laef blong yufala long graon ya, i longfala.’ ”

14. ?Ol hed blong famle oli mas mekem wanem blong oli gat fasin ya blong stap aninit long God?

¹⁴ Yes, i isi moa long ol waef mo ol pikinini blong gat fasin ya blong stap aninit sipos hasban mo papa i soemaot fasin ya tu blong stap aninit long God. Oli mekem olsem taem oli bos long famle folem ol rul long Baebol, olsem olgeta we oli stap long Efesas 5:​28, 29; mo 6:4: “Long sem fasin, man i mas laekem woman blong hem, i mas lukaotgud long hem, olsem we i stap lukaotgud long bodi blong hem nomo. Taem man i stap lukaotgud long woman blong hem, i olsem we hem i stap lukaotgud long bodi blong hem nomo. Nao i no gat man we i stap lukluk nogud long bodi blong hem, i stap spolem bodi blong hem, no gat. Ol man oli stap kakae gud blong mekem bodi blong olgeta i strong. Mo oli stap lukaotgud long bodi blong olgeta, olsem we Kraes i stap lukaotgud long [kongregesen, NW].” “Yufala papa mo mama, bambae yufala i no agensem ol pikinini blong yufala oltaem. Fasin ya bambae i mekem olgeta oli kros. Yufala i mas lukaotgud long olgeta. Yufala i mas stretem olgeta, mo yufala i mas tijim olgeta, olsem we Masta blong yumi i stap stretem yumi, i stap tijim yumi.”

Ol Help Blong Soem Fasin Blong Stap Aninit

15. ?Wanem frut blong tabu speret bambae i givhan long yumi blong gat fasin ya blong stap aninit long Jeova?

¹⁵ ?Wanem bambae i givhan long yumi blong stap aninit long God long ol defren samting ya? Fastaem, trufala lav we i stanap long fasin blong no tingbaot yumi nomo​—lav long Jeova God mo long olgeta ya we hem i putumap blong oli lukaot long yumi. Fas Jon 5:3 i talem long yumi se: “Sipos yumi laekem God tumas, hemia i min se yumi stap folem ol loa blong hem. Mo ol loa blong hem oli no strong tumas blong folem.” Jisas i bin talem sem samting long Jon 14:15, i se: “Sipos yufala i laekem mi tumas, bambae yufala i save obei long ol loa blong mi.” Tru ya, lav​—hemia nambawan frut blong tabu speret​—bambae i givhan long yumi blong yumi gat fasin tangkyu long olgeta samting we Jeova i mekem long yumi mo bambae i givhan long yumi blong stap aninit long God.​—Galesia 5:22

16. ?Fasin fraetgud long God i givhan olsem wanem long yumi blong stap aninit long God?

¹⁶ Namba tu samting, fasin fraetgud long God. Sipos yumi fraet blong mekem Jeova God i no moa laekem yumi, samting ya i givhan long yumi, from we fasin ya “i minim fasin blong no laekem nating ol samting we i nogud.” (Proveb 8:13) I klia se, fasin ya we yumi fraet blong mekem Jeova i no moa laekem yumi bambae i blokem yumi blong yumi no agensem bilif blong yumi from we yumi fraet long man. Fasin ya tu bambae i givhan long yumi blong obei long ol advaes blong God nating se i hadwok blong winim sam samting blong yumi folem ol advaes ya. Mo tu, fasin ya bambae i blokem yumi blong yumi no foldaon long ol traem no ol nogud tingting we oli pulum yumi blong mekem fasin we i no stret. Baebol i soemaot se, fasin ya blong fraetgud long Jeova nao i mekem se Ebraham i naf blong traem kilim stret pikinini blong hem, Aesak olsem wan sakrifaes mo fasin ya, fraet blong mekem Jeova i no moa laekem hem i mekem se Josef i naf blong blokem nogud fasin blong seks we waef blong Potifa i wantem mekem wetem hem.​—Jenesis 22:12; 39:9.

17. ?Olsem wanem bilif i givhan long yumi blong stap aninit long God?

¹⁷ Namba tri samting, hemia bilif long Jeova God. Bilif bambae i givhan long yumi blong folem advaes long Proveb 3:​5, 6, i se: “Yu mas trastem Jeova long ful hat blong yu. Yu no mas stanap long prapa waes blong yu nomo. Long olgeta samting we yu yu mekem, lesin long hem, mo hem bambae i mekem ol rod blong yu oli stret.” Bilif bambae i givhan long yumi taem yumi harem nogud from ol man oli mekem i no stret long yumi no ol man oli agensem yumi from kala no laen blong yumi no from kantri no from samkaen fasin blong yumi. Maet sam oli harem nogud from we oli no kam wan elda no wan man blong givhan. Sipos yumi gat bilif, bambae yumi wet long Jeova blong hem i stretem bisnes ya long prapa taem blong hem. Naoia maet yumi nidim blong gat longfala tingting.​—Lamentesin 3:26.

18. ?Wanem namba fo samting we i givhan long yumi blong stap aninit long God?

¹⁸ Namba fo samting, hemia fasin blong gat tingting daon. I no hadwok long wan man we i gat tingting daon blong hem i stap aninit long God from we ‘tingting blong hem i stap daon, mo hem i stap luk ol narafala man olsem we oli gud moa long hem.’ Wan man we tingting blong hem i stap daon i rere blong stap olsem we hem i “daon moa long” ol narafala. (Filipae 2:​2-4; Luk 9:48) Be man we i flas i no wantem stap aninit long ol narafala mo hem i kros sipos hem i mas mekem olsem. Long saed blong ol flas man, wan tok i talem se, bambae olgeta ya oli save letem man i leftemap olgeta, mo fasin ya bambae i spolem olgeta bitim we oli save letem man i tok strong long olgeta blong i sevem olgeta.

19. ?Wanem gudfala eksampel namba tu presiden blong ‘Watch Tower Society’ i givim long saed blong fasin ya blong gat tingting daon?

¹⁹ Joseph Rutherford, namba tu presiden blong ‘Watch Tower Bible and Tract Society’ i bin soem gudfala eksampel long fasin blong gat tingting daon mo stap aninit long God. Taem Hitler i putum tabu long wok blong ol Wetnes blong Jeova long Jemani, ol brata longwe oli raet long hem blong askem wanem samting oli mas mekem long saed blong tabu we oli putum long ol miting mo long wok blong prij. Hem i talemaot samting ya long famle long Betel mo hem i talemaot stret se hem i no save wanem bambae hem i talem long ol brata long Jemani, antap moa long saed blong trabol we gavman blong Hitler i stap mekem long olgeta. Hem i talem se sipos wan i save wanem blong talem long ol brata long Jemani, bambae hem i glad blong harem tingting blong hem. !Hemia wan tingting daon!b

Ol Blesing We Oli Kamaot From Fasin Ya Blong Stap Aninit Long God

20. ?Wanem blesing i kamaot from fasin ya blong stap aninit long God?

²⁰ Maet i gud blong askem se: ?Wanem blesing man i save kasem taem hem i stap aninit long God? !I gat plante blesing we yumi save kasem! Yumi ronwe long ol wari mo ol trabol we oli stap spolem ol man we oli wantem independen long God. Yumi glad long gudfala fasin fren wetem Jeova God. Yumi kampani gud wetem ol Kristin brata blong yumi. Mo tu, taem yumi gat fasin blong obei long loa, yumi no save gat ol smosmol trabol wetem ol haeman. Yumi haremgud tu long hapi famle olsem ol hasban mo ol waef, olsem ol papa mama mo ol pikinini. Mo tu, taem yumi holem fasin ya blong stap aninit long God, yumi stap folem advaes long Proveb 27:11, se: “Pikinini blong mi, yu mas waes, mo yu mas mekem hat blong mi i glad, blong bambae mi save ansa long hem we i stap jikim mi.”

[Ol futnot]

Ol Kwestin Blong Tingtingbak

◻ ?Hu ya ol man we God i yusum blong toktok wetem ol narafala man, mo ol man blong hem oli mas mekem wanem long olgeta?

◻ ?Yumi mas stap aninit long hu?

◻ ?Wanem ol fasin we bambae oli givhan long yumi blong gat fasin ya blong stap aninit long God?

◻ ?Wanem ol blesing oli kamaot from fasin ya blong stap aninit long God?

[Tok Blong Pija Long Pej 16]

God i yusum ogenaesesen long tempel blong Jerusalem blong talemaot wil blong hem long ol man blong hem

[Tok Blong Pija Long Pej 18]

Ol defren samting we yumi save gat fasin ya blong stap aninit long God long hem