Wajtaoa LAEBRI LONG INTENET
Wajtaoa
LAEBRI LONG INTENET
Bislama
  • BAEBOL
  • OL BUK
  • OL MITING
  • w93 3/15 pp. 27-30
  • Jeova i Givhan Long Mi Long Kalabus Long Wan Drae Ples

I no gat video yet long haf ya.

Sori, i gat problem taem i stap lodem video ya.

  • Jeova i Givhan Long Mi Long Kalabus Long Wan Drae Ples
  • Wajtaoa—1993
  • Ol Sabtaetol
  • Sem Samting
  • Oli Holem Mi
  • Taem Mitufala i Stap Long Kalabus
  • Wan Kalabus Long Drae Ples
  • Laef Long Kalabus
  • Holemstrong Long Saed Blong Speret
  • Sanem Tok Long Ol Fren Blong Mitufala
  • !Biaen Mi Kamaot!
  • Bitim 50 Yia Blong ‘Gokros’ Long Ol Defren Ples
    Wajtaoa—1996
  • Mi Ronwe i Kam Long Trutok
    Wekap!—1994
  • Kasem Blesing ‘Nating We Ol Man Oli Wantem Harem Tok Ya No Nogat’
    Wajtaoa—2015
  • Wok Aninit Long Han Blong Jeova We i Gat Lav
    Wajtaoa—1996
Luk Moa Samting
Wajtaoa—1993
w93 3/15 pp. 27-30

Jeova i Givhan Long Mi Long Kalabus Long Wan Drae Ples

OLSEM ISAIAH MNWE I TALEM

I no bin gat wan kot mo mi no bin mekem wan fasin blong brekem loa. Be, oli jajem mi se mi mas go blong mekem wan strong wok long wan kalabus long medel blong Afrika we i hot tumas, hemia drae ples blong Sahara. Samting we i nogud olgeta se, i no gat wan long ol fren blong mi we i save weples mi stap long hem. Samting ya i bin kamaot eit yia finis, long hot taem blong 1984. I gud mi mi eksplenem olsem wanem mi kasem bigfala trabol ya.

LONG 1958, taem mi gat 12 yia nomo, fasbon brata blong mi i kam wan Wetnes blong Jeova. Be, papa mo mama blong mi tufala i gohed blong mekem wosip long ol god blong laen blong Abia, Naejiria, long ples we mifala i stap.

Long 1968, mi joen long ami blong Biafra. Long wan taem blong faet, mi tingbaot fasin blong ol Wetnes blong Jeova we oli no joen long wan grup blong faet, mo mi prea long God blong givhan long mi. Mi promes se sipos hem i letem mi blong laef tru long faet ya, bambae mi kam wan Wetnes blong hem.

Afta we faet ya i finis, mi mi hareap blong mekem samting we mi bin promes. Mi mi baptaes long Julae 1970 mo wantaem nomo mi mekem fultaem wok blong talemaot gud nyus. Biaen mi kam olsem wan elda long Kristin kongregesen. I no longtaem mi kasem wan leta long branj ofis long Naejiria blong mekem wok blong misinari long wan kantri we i stap kolosap we gavman i no bin agri long wok blong ol Wetnes blong Jeova yet. Mi agri, mo long Janewari 1975, mi mi stap long rod blong mi, wetem paspot long han blong mi blong mekem wok ya.

Oli Holem Mi

Long 1978, oli askem mi blong mekem wok blong visitim ol Wetnes blong Jeova long ol ples long kantri ya. Long taem ya oli no plante tumas, taswe mi mas wokbaot long ol ples farawe blong visitim olgeta, mi visitim olgeta taon we i gat ol kongregesen long olgeta, mo ol ples we i gat sam man we oli intres oli stap long olgeta. Plante taem ol polis oli askem kwestin long mi long ol ples blong jekem ol man. Tu taem, long fo dei oli holem mi mo oli askem mi long saed blong wok blong yumi.

Long Jun 1984, long wan Sande taem mifala i stap rere blong go talemaot gud nyus, wan haeman we i laekem mifala i talem long mifala se ol polis oli stap lukaot ol Wetnes blong Jeova blong holem olgeta. Wan wik biaen oli holem mi wetem Djagli Koffivi, we hem i wan man Togo. Oli tekem mifala i go long ol hedkwota blong ol polis mo oli talem se mifala i mas talemaot olgeta nem blong ol Wetnes blong Jeova long taon ya. Oli talem se, “Sipos yutufala i no talemaot ol nem blong olgeta long mifala, bambae mifala i no save letem yutufala i go.”

Mi givim ansa se, “Yufala nao ol polis. Hem i wok blong yufala blong lukaot ol man we yu wantem faenem. Mi no man blong wok blong yufala.” Mifala i agyu samwe long 30 menet, mo ol polis oli givim woning se bambae oli kilim mitufala. Be, mitufala i no talemaot ol nem blong ol Kristin brata blong mitufala long olgeta. Ale oli mekem disisin blong tekem ol buk blong mi we oli tokbaot Baebol.

Taem Mitufala i Stap Long Kalabus

Afta we mifala i gobak long ples blong ol polis wetem ol buk, Djagli wetem mi mitufala i karemaot ol buk. Taem mitufala i stap mekem, i gat wan pepa i kamaot long bigfala Baebol blong mi. Hem i program blong wan distrik asembli we oli raetem nem blong ol Kristin elda long kantri ya long hem. Kwiktaem nomo mi tekem pepa ya mo mi pusum insaed long poket blong mi. Be, wan long ol polis man i luk mi mo i talem long mi blong givim pepa ya long hem. I tru, mi mi fraet tumas.

Oli putum pepa ya long tebel long rum we Djagli wetem mi mitufala i stap putum ol buk long hem. Taem mi karem ol narafala buk blong mi oli kam, mi go long tebel ya, mi tekem pepa ya, mo mi putum insaed long poket blong mi. Ale mi talem se mi wantem go long tolet. Wan polis man i lidim mi mi go long ples blong tolet. Afta we mi go insaed mo satem doa blong tolet, mi terem pepa ya long ol pis mo mi sakem i godaon long tolet.

Taem ol polis man oli save wanem samting we i bin hapen, oli kros tumas. Be oli fraet blong mekem wan samting from we man we i bos long olgeta bambae i talem se i fol blong olgeta from oli letem jans blong mi blong spolem pepa ya. Afta we oli putum mifala long kalabus long 17 dei, wan haeman blong ol polis i talem se mitufala i mas putum ol samting blong mifala i kam wanples from bambae mitufala i go samples. Mitufala i putum sam klos long wan plastik, mo daon long botom mi putum wan smol Baebol we wan man we i kam visitim mifala i bin givim long mifala long fasin haed.

Mifala i save talem long ol Wetnes se bambae mifala i go long narafala ples be mifala i no save weples. Eli long nekis moning, Julae 4, 1984, haeman ya blong ol polis i wekemap mitufala. Hem i jekemap mitufala, i askem mitufala blong tekemaot ol klos long plastik mo blong hangem long ol han blong mitufala. Be taem mi kasem laswan sot, hem i talem se mi save putumbak olgeta klos i go insaed long plastik, ale hem i no faenem Baebol ya.

Wan Kalabus Long Drae Ples

Ol polis oli putum mitufala long ples blong plen, long ples ya mitufala i go insaed long plen blong ol ami. Sam haoa biaen mifala i kasem wan taon we i gat samting olsem 2,000 man long hem, long ples ya i gat wan haos kalabus i stap kolosap. Haos kalabus ya i stap olsem 650 kilomita long wan taon. Oli tekemaot mitufala long plen ya i go long haos kalabus ya mo oli putum mitufala long han blong man we i lukaot long ol presin man. I no gat wan famle no ol fren blong mitufala we i save weples oli tekem mitufala i go long hem.

Taon we oli tekem mitufala i go long hem i wan ples we i gat wora long hem long Sahara. I gat ol smosmol tri, i no gat plante tri we oli bigbigfala, mo ol haos we oli mekem ol wol blong olgeta wetem sofmad. Yu save kasem wora taem yu digim hol i godaon samting olsem wan mita. !Be, wan man ples we i gat 31 yia i talem long mifala se hem i bin luk ren be wan taem nomo long laef blong hem! Mo ples ya i hot tumas. !Wan presin man i talem se samting blong makem hot taem long haos kalabus i stap go antap kasem 60 digri! Wan strong win i stap gohed blong blu, i mekem sanbij i kam long mifala gogo mifala i harem i soa long skin blong mifala mo i spolem ol ae blong mifala.

Wan man we i kasem ples ya i luksave se hem i stap long wan ples blong panis we hem i nogud moa long ol narafala ples long kantri ya. Ol bigbigfala wol oli goraon long haos kalabus ya mo oli protektem ol man long win mo san. Be, i no nidim ol wol ya blong blokem fasin blong ronwe, from we i no gat wan narafala ples blong go long hem. Afsaed long ples ya we i gat wora, i no gat wan tri nating, i no gat wan samting nating, blong blokem san long wan man we i wantem ronwe.

Bifo we mitufala i go insaed, bigfala man blong kalabus ya i mas jekemap mitufala blong luk sipos mitufala i haedem wan samting. Hem i talem se mitufala i mas karemaot olgeta samting long plastik blong mitufala. Mi stat blong tekemaot ol sot blong mitufala, wanwan. Taem i gat wan sot nomo i stap we i kavremap Baebol, mi holem plastik ya blong soem long hem, wan sot we i stap insaed mo mi talem se: “Hemia nomo ol samting we oli letem mifala blong karem.” Hem i talem se, i gud, kam insaed long yad blong haos blong kalabus. Baebol ya nomo i wan buk we mitufala i gat.

Laef Long Kalabus

I gat samwe long 34 presin man evriwan. Olgeta ya ol man oli savegud olgeta mo oli denja tumas from ol nogud fasin blong olgeta blong brekem loa long kantri ya. Plante oli man blong kilim man i ded we oli no wantem tanem tingting blong olgeta bakegen from fasin nogud. Mifala evriwan i slip long tu bigbigfala rum we long medel i gat wan bigfala ples blong swim we i seraotem mifala. Insaed long ples blong swim ya i gat wan dram we oli no kavremap we mifala i yusum olsem tolet. Nating se evri moning ol presin man oli mas karemaot samting ya, i luk olsem se olgeta flae long drae ples ya oli kam blong haremgud long ol doti insaed long dram ya.

Wan sid we i samting olsem wit, we nem blong hem Sorghum vulgare i kakae ya nomo we mifala i gat. Wan presin man i graenem, i kukum, i putum long ol plet, mo afta i putumaot long wanwan mat blong slip blong ol presin man. I no gat samting blong kavremap kakae. Long taem we mifala i kambak long wok, i gat plante handred flae we i kavremap wanwan plet blong kakae ya sogam. Taem mifala i tekem plet blong mifala, ol flae ya oli mekem bigfala noes taem oli kamaot long plet. Long tufala faswan dei, mitufala i no kakae wan samting. Biaen, long namba tri dei, afta we mitufala i ronemaot ol flae mo tekemaot ol drae kakae antap we flae i bin sidaon long hem, mitufala i stat blong kakae sogam ya. Mitufala i prea se Jeova i protektem mitufala long sik.

Mifala i wok long san, mifala i brekem ol wol long ol olfala yad blong haos kalabus mo mifala i mekem ol nyufala wol. Hem i hadwok tumas. Mifala i wok had stat long 6 klok long moning kasem medel dei, kakae smol, mo gohed blong wok kasem 6 klok long naet. I no gat dei we mifala i spel long hem. Mifala i no harem nogud nomo from hot be long koltaem mifala i harem nogud from kolkol. Mo tu mifala i harem nogud long nogud fasin we ol gad blong kalabus oli stap mekem long mifala.

Holemstrong Long Saed Blong Speret

Djagli wetem mi mitufala i ridim Baebol long ples we i haed, mo mitufala i toktok wanples long samting we mitufala i lanem. Mitufala i no save ridim long klia ples from we oli save tekemaot Baebol mo oli save panisim mitufala from. Wan presin man we mi statem Baebol stadi wetem hem i gat wan laet we i wok wetem karsin we mitufala i yusum. Plante taem mi girap long wan no tu klok long moning mo mi rid gogo kolosap faef klok. Long rod ya mi save rid tru long fulwan Baebol.

Mitufala i prij long ol narafala presin man, mo wan long olgeta i talemaot mitufala long haeman we i lukaot long haos kalabus ya. !Mitufala i sapraes, haeman ya we i lukaot haos kalabus i givim wan Wekap! magasin we hem i gat long presin man ya, mo presin man ya i givim long mitufala. Mi ridim magasin ya bakegen mo bakegen. Fasin blong mitufala blong rid mo blong prij i givhan long mitufala blong stap strong long saed blong speret.

Sanem Tok Long Ol Fren Blong Mitufala

Oli no letem mitufala blong raet mo blong sanem sam leta. Be, wan man we i bin mekem fren wetem mitufala i talem se bambae hem i givhan long mi. Long Ogis 20, samwe long sikis wik afta we mitufala i bin kasem ples ya, mi raetem tufala leta long ples we i haed, wan i go long hedkwota long Naejiria mo narafala i go long ol fren we oli Wetnes. Mi berem tufala leta ya long sanbij mo mi makem ples ya wetem wan bigfala ston. Biaen fren blong mi i kam mo i digimaot tufala.

Ol wik oli pas, mo mi no harem wan nyus nating. Sloslou mi ting se ol leta oli no bin kasem ples we oli mas go long hem. Be oli gotru, mo ol narafala Wetnes oli traehad blong mekem se mitufala i mas kamaot. Mo tu wan ofisa blong Naejiria we i lukaot long ol man blong ol defren kantri long kantri ya i intres long bisnes ya mo i askem long gavman blong kantri we mi stap kalabus long hem se from wanem gavman i putum mi long wan kalabus olsem.

Long sem taem ya, long moning blong Novemba 15, 1984, oli tekem mifala blong mekem sam wok blong klinim ples. Ol gad oli lidim mi long wan tolet blong wan haeskul we ol man oli bin yusum long sam wik nating se tolet ya i fas. Hem i fulap long sitsit. Ol gad ya oli talem se: wok blong mi blong klinimaot. Ol tul we mi gat hemia ol han blong mi nomo. Taem mi stap tingting yet olsem wanem blong mekem rabis wok ya, haeman we i lukaot long kalabus i kam mo i talem long mi se bigfala bos we i lukaot long ples ya i wantem luk mi.

Taem mi kamtru, bigfala bos we i lukaot long ples ya i talem se hem i jes toktok wetem presiden blong kantri ya, we i bin kasem nyus long trabol blong mi. Presiden ya i eksplenem se sipos mi talemaot olgeta nem blong ol Wetnes blong Jeova long kantri ya, bambae wantaem nomo mi kamaot long kalabus mo bambae mi gohom long nekis plen. Bakegen mi talem se sipos oli wantem ol Wetnes blong Jeova hem i wok blong ol polis blong lukaot olgeta. Bigfala bos we i lukaot long ples ya i talem long mi se mi mas tingtinggud long ol jans we oli stap givim long mi. Bambae hem i givim fo no faef dei long mi blong tingting long samting ya. !Biaen hem i sanemaot mi, mo ol gad ya oli lidim mi mi gobak long haos kalabus, mi haremgud we mi no gobak long tolet ya!

Afta long faef dei bigfala bos we i lukaot long ples ya i singaot mi blong askem wanem disisin we mi mi mekem. Mi talem se wan risen nomo from wanem mi go long kalabus blong olgeta, hemia from we mi wetnes long trufala God mo mi no mekem wan samting i rong. Mi eksplenem se mi gat wan stret paspot mo wan pepa we gavman i givim blong mi save stap long kantri ya. Olgeta pepa blong mi oli stret, mo enitaem we mi go long wan narafala taon, oltaem mi pas long polis blong meksua se evri samting i stret. Mi no mekem wan samting we i brekem loa, taswe mi askem se: “?From wanem mi mi kasem panis? ?Sipos yufala i no wantem mi long kantri ya, from wanem yufala i no sanemaot mi? ?From wanem yufala i sanem mi mi kam long ples ya?”

Mi toktok samwe long 15 menet. Taem mi mi finis, oli askem mi blong raetemdaon olgeta samting we mi jes talem, mo oli talem se bambae oli sanem ol tok blong mi oli go long presiden. Oli givim pepa long mi, mo mi raetem samting ya long fo pej.

!Biaen Mi Kamaot!

Mi no harem wan samting bakegen long bisnes ya kasem Janewari 1985, afta long seven manis we mi bin stap long kalabus. Long taem ya, haeman blong kalabus ya i kam mo i askem mi sipos mi bin raetem wan leta i go long hedkwota blong Naejiria. Mi ansa se, “Yes.”

Hem i askem se, “?From wanem yu mekem samting ya? ?From wanem yu no wantem talem long mi?”

Mi talem long hem se hemia i no bisnes blong hem. Be mi talem stret long hem se mi no bin raetem wan samting blong agensem hem, from i no hem we i sanem mi mi go long kalabus. Mi talem se, “Mama blong mi tu i no save weples mi go.” Ale hem i wantem save olsem wanem mi bin sanem leta i go, be mi no wantem talem long hem.

Long nekis dei ol gad oli mekemrere wan Land-Rover (wan strong trak) blong mifala mo oli talem se Djagli wetem mi bambae mitufala i aot. Oli tekem mitufala i go afsaed, oli tekemaot ol klos blong mifala, mo oli jekem. Bifo finis mi bin givim Baebol blong mi long wan presin man we mi stap mekem stadi long hem from we mi save se sipos ol gad oli faenem Baebol ya bambae oli tekemaot long mi. Man ya i talem long mitufala se taem we bambae hem i kamaot long kalabus, bambae hem i kam wan Wetnes blong Jeova. Mitufala i prea blong hem i mekem olsem.

Smoltaem biaen, oli sanem mi mi go long Naejiria, mo long Febuwari 1985, mi statem wok blong mi bakegen olsem wan elda blong goraon long kantri ya. Stat long 1990, mi bin wok olsem wan distrik elda long Naejiria. Naoia Djagli i stap wok olsem wan Wetnes we i gat strong bilif long Côte d’Ivoire.

Long ekspiryens ya, mi luk wetem ae blong mi olsem wanem Jeova God i save mekem yumi stanap strong nating se yumi kasem bigfala traem. Plante taem mifala i luk olsem wanem han blong hem i stap protektem mifala long kalabus. Taem oli letem mifala i go fri, samting ya i makem long mi se Jeova i no save nomo se ol man blong hem oli stap wea mo wanem fasin oli stap harem nogud long hem be tu hem i save tekemaot olgeta long trabol soa.​—2 Pita 2:9.

    Ol buk long Bislama (1987-2026)
    Logaot
    Login
    • Bislama
    • Serem
    • Setemap Olsem Yu Wantem
    • Copyright © 2025 Watch Tower Bible and Tract Society of Pennsylvania
    • Ol Rul
    • Privacy Policy
    • Privacy Settings
    • JW.ORG
    • Login
    Serem