Kam Fri Long Taem We God Bambae i Soemaot Jisas Kraes
“I stret blong yufala i harem gud, . . . Nao taem ol gudgudfala samting blong Kraes bambae oli kamtru, bambae yufala i glad tumas.”—1 PITA 4:13.
1. ?Olsem wanem Jeova i mekem ol man blong hem oli rij?
JEOVA i mekem ol Wetnes blong hem oli rij wetem plante presen. Olsem Bigfala Man blong Tijim yumi, hem i mekem se yumi kasem fulwan save long wok mo plan blong hem. Tru long tabu speret blong hem, hem i mekem yumi kam inaf blong mekem laet ya i saenaot wetem paoa. Tabu speret i pusum aposol Pol blong talem long yumi long 1 Korin 1:6, 7 se: “Tok blong ol wetnes blong Kraes i kam strong finis long laef blong yufala. Nao yufala i stap wet blong God bambae i soemaot Masta blong yumi Jisas Kraes, we yufala i no sot long wan long ol defrenkaen paoa ya we tabu speret i save givim long yufala.”
2. ?Wanem nambawan hop we i kamaot long taem we “God bambae i soemaot Masta blong yumi Jisas Kraes”?
2 “God bambae i soemaot Masta blong yumi Jisas Kraes”—?samting ya i minim wanem? Hem i stap tokbaot taem we bambae Jisas i soemaot hem olsem wan nambawan King, bambae hem i givim pei long ol man blong hem we oli gat strong bilif mo bambae hem i givimbak long ol man we oli no save obei long God. Olsem 1 Pita 4:13 i soemaot, bambae i wan taem we ol tabu Kristin we oli stap fasgud long God mo bigfala hif blong man ya we oli gat bilif mo oli joen wetem olgeta oli “glad tumas,” from we samting ya i soemaot en blong wol blong Setan.
3. ?Olsem wanem yumi save stanap strong, olsem ol brata blong yumi long Tesalonaeka oli mekem?
3 Taem dei ya i stap kam kolosap, Setan i kros mo i stap gohed moa blong mekem hadtaem long yumi. Hem i olsem wan laeon we i stap singaot bigfala, i stap traem blong kakae yumi. !Yumi mas stanap strong! (1 Pita 5:8-10) Ol brata blong yumi long Tesalonaeka bifo, taem oli nyuwan long trutok, oli harem nogud long plante trabol sem mak long ol trabol we plante Wetnes blong Jeova oli stap kasem tede. Taswe, ol tok we aposol Pol i raetem i go long olgeta oli stret long yumi tu. Hem i raetem se: “Be i stret nomo blong God i givimbak long olgeta ya we oli stap mekem yufala i harem nogud. Mo hem bambae i mekem olgeta oli harem nogud bakegen. Mo i stret nomo blong God i givim spel long yufala, we naoia yufala i stap harem nogud, mo long mifala tu. Hem bambae i mekem olsem long taem ya we Jisas, Masta blong yumi, bambae i aot long heven, i kamtru long yufala, wetem ol strostrong enjel blong hem, wetem faea we i laet finis. Hem bambae i kam blong givim panis long olgeta we oli no save ona long God, mo long olgeta we oli no save obei long gud nyus blong Jisas, Masta blong yumi.” (2 Tesalonaeka 1:6-8) !Yes, bambae taem blong spel long ol trabol i kam!
4. ?From wanem i stret blong ol lida blong jyos oli kasem jajmen long taem we God bambae i soemaot Jisas?
4 Long taem blong Pol ol lida blong skul blong ol man Jyu nao oli stampa blong plante trabol ya. Sem mak tede, plante taem ol man we oli talem se oli stap mekem wok blong God, oli bin kam ol faswan man blong agensem ol Wetnes blong Jeova we oli laekem pis. Samting ya i tru moa long ol haeman blong Krisendom. Oli mekem se oli save God, be oli sakemaot “wan Jeova” (NW) blong Baebol, oli karem tok haed ya Triniti blong tekem ples blong hem. (Mak 12:29) Oli no obei long gud nyus long saed blong Masta blong yumi Jisas, oli stap lukluk i go long rul blong man blong finisim ol trabol mo oli sakemaot stret gud nyus blong Kingdom blong Kraes we bambae i mekem stret fasin i stanap. Olgeta man ya blong skul we oli gat fasin agens oli mas lus long taem ya we “Jisas, Masta blong yumi, bambae i aot long heven, i kamtru long yumi”!
Fasin We Jisas Kraes i “Stap Kam”
5. ?Olsem wanem fasin we God bambae i soemaot Jisas i klia nomo long Matyu 24:29, 30?
5 Jisas i soemaot klia samting ya long Matyu 24:29, 30. Long ol defren kaen haf blong saen we hem i talem blong soemaot we hem i stap finis mo en blong wol ya, hem i talem se: “San bambae i kam tudak, mo mun bambae i no moa saen. Ol sta long skae bambae oli folfoldaon, mo ol strostrong samting blong skae, bambae God i muvum olgeta.” Long taem ya “saen blong mi, mi Pikinini blong Man, bambae i kamaot long skae.” Ol nesen blong wol “bambae oli krae, nao bambae oli save luk mi, mi Pikinini blong Man, [King Mesaea blong God] mi [stap kam, NW] long klaod long skae, wetem olgeta paoa we mi mi gat, mo long bigfala laet we bambae i saenaot raonabaot long mi.” Fasin ya blong “stap kam,” (NW) er·khoʹme·non long Grik, i tokbaot fasin we Jisas i kam olsem Man blong soemaot se Jeova i win.
6, 7. ?Olsem wanem “olgeta man bambae oli luk hem [Jisas],” mo hu ol man ya we bambae oli luk hem?
6 Mo tu long Revelesen 1:7, aposol Jon i tokbaot fasin ya blong hem we i “stap kam,” se: “!Yufala i luk! hem i stap kam wetem ol klaod.” (NW) Yes, ol enemi ya bambae oli no save luk Jisas wetem prapa ae blong olgeta, from we “ol klaod” i minim se bambae hem i kam blong jajem ol man we oli no save luk hem wetem prapa ae blong olgeta. Sipos ol man oli luk bigfala laet blong heven we i saenaot raonabaot long hem wetem prapa ae blong olgeta, bambae oli blaen, olsem Sol, long rod i go long Damaskes, hem i blaen taem Jisas i kamaot long hem long wan bigfala laet we i saen.—Ol Wok 9:3-8; 22:6-11.
7 Tok blong Revelesen i talem se “olgeta man bambae oli luk hem, stret long ae blong olgeta. Ol man ya we bifo oli sperem hem bambae oli luk hem. Mo olgeta man long evri ples long wol bambae oli sore tumas, bambae oli krae from we oli luk hem.” Samting ya i min se ol man blong agens long wol ya bambae oli luk bigfala trabol we bambae Jisas i mekem long olgeta taem we hem i kam wetem paoa mo bigfala laet blong hem olsem Man we Jeova i yusum blong givim panis. ?From wanem yumi talem se “ol man ya we bifo oli sperem hem” oli pija blong ol enemi ya? From ol fasin nogud we oli stap mekem long ol man blong Jeova tede oli sem mak nomo long fasin blong olgeta we oli mekem i nogud long Jisas. Tru ya,‘bambae oli sore tumas, bambae oli krae from we oli luk hem.’
8. ?Wanem woning Jisas mo Pol i talemaot long saed blong trabol we bambae i kam wantaem nomo?
8 ?Dei blong Jeova blong givimbak bambae i kam olsem wanem? Long profet tok ya long Luk 21, Jisas i tokbaot taem blong ol bigfala trabol we i olsem saen blong soem se hem i stap finis i stat long 1914. Ale, long vas 34 mo 35, Jisas i givim woning se: “Yufala i mas lukaot gud. Sipos yufala i letem tingting blong yufala i kam slak, from we yufala i stap ronem lafet, mo yufala i stap dring mo yufala i stap tingting tumas long laef ya long wol, bambae dei ya blong mi i kam kasem yufala wantaem, olsem we trap i sat. From we bambae dei ya i save kamtru long olgeta man blong wol.” !Yes, dei ya blong Jeova blong givimbak bambae i kam wantaem nomo, bambae i mekem ol man oli sek! Aposol Pol i sapotem tok ya long tok blong hem long 1 Tesalonaeka 5:2, 3, we i talem se: “From we yufala i save finis we dei ya blong Masta blong yumi bambae i mekem ol man oli sek, olsem wan man blong stil, we i kamtru long naet. Taem ol man oli stap talem se ‘[Pis mo seftaem, NW],’ long taem ya nao bambae bigfala trabol i save kasem olgeta, i spolem olgeta. Bambae trabol ya i kasem olgeta wantaem nomo.” Naoia ol nesen oli stap tokbaot pis mo seftaem finis mo oli stap mekem plan blong Yunaeted Nesen i kam strong moa we bambae hem i save yusum ol tul blong faet blong stopem ol trabol long wol.
9. ‘Laet we i laet bigwan,’ i blong hu mo from wanem?
9 Long vas 4 mo 5, aposol ya i gohed blong talem long yumi se: “Ol brata mo sista. Yufala i no olsem. Yufala i no moa stap long tudak. I no stret blong dei ya bambae i kam kasem yufala olsem we man blong stil i mekem yufala i sek. Yufala evriwan i olsem man blong delaet. Yufala evriwan i stap mekem ol fasin blong delaet. Yumi no man blong naet. Yumi no man blong tudak.” Yumi glad blong stap olsem ol pikinini blong delaet—ol man blong karem laet i go long olgeta we oli stap lukaot trufala pis mo seftaem long nyufala wol blong God. Long Ol Sam 97:10, 11, yumi ridim se: “[Yufala we i laekem tumas Jeova, yufala i no mas laekem nating ol rabis fasin, NW]. Hem i stap lukaotgud long laef blong ol man blong hem, i stap tekemaot olgeta taem we oli stap long paoa blong ol man nogud. Laet blong hem i stap saen long ol stret man, mo glad blong hem i stap kam fulap long ol gudfala man.”
Ol Samting We Bambae Oli Kamaot
10. ?Wanem woning i goaot fastaem we yumi mas folem long saed blong dei blong God blong givimbak? (Revelesen 16:15)
10 ?Wanem nao ol samting we bambae oli kamaot long taem we bigfala trabol i kamtru? Yumi save luk long Revelesen japta 16. Makemgud, olsem i talem long vas 13 kasem 16, se ol rabis devel oli tekem olgeta king long wol oli kam long Amageden, bigfala dei blong faet blong God ya we i gat olgeta paoa. Bakegen, hem i tokbaot dei ya blong givimbak se bambae i kam olsem man blong stil, mo yumi kasem woning blong stap wekap—blong no tekemaot ol klos blong yumi long saed blong speret we oli makem yumi blong sef. Taem i kam finis blong jajem olgeta man long wol, olgeta nesen, mo—wan narafala man bakegen. ?Hu ya?
11. ?Olsem wanem woman ya long Revelesen 17:5 i soem we hem i hu?
11 Wan woman i pija blong hem we hem i bin traehad blong mekem hem wan i kam olsem ‘wan impoten man.’ Revelesen 17:5 i tokbaot woman ya olsem wan “tok haed, we i min se: ‘Bigfala Taon ya Babilon, we i mama blong olgeta woman blong rod, mo stampa blong olgeta fasin we i nogud olgeta.’ ” Be hem i no moa wan tok haed long ol Wetnes blong Jeova. Hem i bin soemaot klia hem wan olsem ogenaesesen blong ol gyaman skul long wol, we ol skul blong Krisendom oli bighaf blong hem. Fasin blong hem we i nogud olgeta long ae blong Jeova, hemia we hem i stap joen long ol politik. Hem i kam “fuldrong from we i dring blad blong ol man blong God” taem hem i stap ronem ol trufala Kristin, mo hem i gat fol from “blad blong olgeta man we ol man oli kilim olgeta,” wetem bitim wan handred milyan man we oli ded long ol faet long handred yia we i pas finis.—Revelesen 17:2, 6; 18:24.
12. ?From wanem ol skul blong Krisendom oli mas kasem panis?
12 Samting we i nogud olgeta, ol skul blong Krisendom oli sakem doti long nem blong God we oli gyaman se oli stap mekem wok blong hem. Oli no tijim ol Tok blong God we i klin be oli tijim ol waes tok blong ol man Babilon mo Gris mo oli bin joen long fasin blong lidim ol nesen oli go krangke taem oli akseptem ol defren kaen fasin blong laef blong olgeta man blong wol we oli no laenap wetem ol rul blong Baebol. Jemes 5:1, 5 i agensem fasin griri blong olgeta long saed blong mane se: “Ol rij man. Yufala tu i lesin long mi. I gud yufala i krae, i gud yufala i krakrae from ol trabol ya we bambae i kasem yufala. Long wol ya, yufala i gat isi laef, yufala i kasem ol samting blong mekem yufala i harem gud. Yufala i mekem yufala olsem buluk we oli fidim i fatfat, be dei blong kilim yufala i kamtru finis.”
!Bigfala Babilon Bambae i Lus!
13. ?Olsem wanem bambae bigfala trabol i stat, mo Revelesen 18:4, 5 i soemaot se ol man oli mas mekem wanem kwiktaem?
13 Bigfala trabol bambae i stat long taem we Jeova i spolem Bigfala Babilon. Revelesen 17:15-18 i eksplenem klia “tingting” blong God—blong lidim “ol ten hon,” hemia strongfala paoa blong plante nesen insaed long Yunaeted Nesen we i olsem “wael anamol,” blong spolem Bigfala babilon. “Ol ten hon blong anamol ya, we yu luk, bambae oli no laekem woman ya blong rod, bambae oli agensem hem olgeta. Bambae oli tekemaot olgeta samting we hem i gat, oli livim hem i stap neked. Bambae oli kakae ol mit blong bodi blong hem, nao bambae oli bonem hem long faea blong spolem hem olgeta. Bambae oli mekem olsem from we God i putum long tingting blong olgeta blong mekem olsem we hem i wantem.” Yumi no sapraes, wan voes we i kamaot long heven i talemaot wan impoten woning long Revelesen 18:4, 5 se: “Ol man blong mi, yufala i kam. Yufala i kamaot long hem. I nogud yufala i stap joen wetem hem long ol sin ya we hem i stap mekem, mo i nogud we bambae yufala i joen wetem hem blong panis wetem hem. Ol sin ya blong hem i stap hivap i go kasem heven, mo God i stap tingbaot ol rabis fasin blong hem.” Woning ya i gohed se: !I naf blong joen wetem gyaman skul, yu mas aot long hem bifo we i no moa gat taem blong kamaot!
14. ?Bambae hu i sore long Bigfala Babilon taem hem i kam nogud, mo from wanem?
14 ?Olsem wanem bambae olgeta man long wol oli tingbaot Bigfala Babilon taem hem i kam nogud? Ol man blong politik wetem ol kruked fasin blong olgeta—“ol king blong wol”—oli stap longwe long hem, oli krae long hem from we long plante handred yia finis oli bin joen wetem hem blong haremgud taem oli stap mekem rabis fasin wetem hem long saed blong speret. Ol griri bisnes man tu oli sore mo oli krae long hem, “ol tredaman ya we oli kam rij man finis from bisnes we oli mekem wetem woman ya.” Olgeta ya tu oli stanap longwe long hem, oli stap talem se: “!O, sore we sore tumas long yu, yu bigfala taon! Bifo yu yu stap werem ol gudfala klos blong yu, hemia we i red we i blu lelebet, mo hemia we i red we i red. Bifo yu yu flasem yu long ol samting ya we oli wokem long gol, mo long ol gudfala ston, mo long ol perel. Be long wan haoa nomo, ol gudfala samting ya blong yu oli lus.” !Ol naes klos blong ol haeman blong jyos mo ol bigbigfala flas jyos haos blong olgeta long wol bambae oli lus blong olwe! (Revelesen 18:9-17) ?Be bambae evri man oli krae from Bigfala Babilon?
15, 16. ?Wanem bigfala glad we ol man blong God bambae oli gat?
15 Revelesen 18:20, 21 i givim ansa i se: “Olgeta long heven, wetem ol man blong God, mo ol aposol, mo ol profet. I gud yufala i harem gud, yufala i glad, from we God i jajem woman ya from ol samting we hem i mekem long yufala, mo i givim panis long hem.” Olsem wan bigfala ston we oli sakem i go long solwora, “hemia wan saen blong soemaot fasin we God bambae i mekem long yu [Bigfala Babilon we yu wan bigfala taon]. Hem bambae i sakemdaon yu, we bambae man i no save luk yu bakegen samtaem.”
16 !Oli kasem bigfala glad from! Revelesen 19:1-8 i soemaot samting ya. Fo taem tok ya, “!Yumi presem [Jah, NW]!” i kamaot long heven. Faswan trifala Aleluia i presem Jeova from we hem i mekem stret jajmen long rabis woman blong rod ya, Bigfala Babilon. !Bigfala ogenaesesen blong gyaman skul long wol i no moa stap! Wan voes i kamaot long bigfala jea blong God, i talem se: “Olgeta man blong wok blong God, wetem olgeta we oli stap mekem wosip long hem, olgeta we oli haeman wetem olgeta we oli no gat nem, yufala i mas presem God blong yumi.” !Yumi gat jans blong joen long singsing ya!
Mared Blong Smol Sipsip
17. ?Taem yumi skelem Revelesen 11:17 mo 19:6, wanem tufala pruf we oli soemaot se Jeova i stat blong rul olsem king?
17 Namba fo Aleluia i talem wan narafala stampa tok se: “Hae God ya we i Masta blong yumi mo i gat olgeta paoa, yumi presem hem, from we hem nomo i king.” ?Be hemia i sem singsing we i stap long Revelesen 11:17? Yumi ridim se: “Hae God, Masta blong mifala, yu yu gat olgeta paoa. Yu yu stap fastaem, bifo olgeta . . . Mifala i talem tangkyu long yu, from we yu yu tekem bigfala paoa blong yu finis, yu yu kam king finis.” Yes. Be, ol vas raonabaot long Revelesen 11:17 i tokbaot we Jeova i putumap Kingdom blong Mesaea long 1914 blong “bambae i king long olgeta man long wol, mo saen blong paoa blong hem, i wokingstik we oli wokem long aean.” (Revelesen 12:5) Revelesen 19:6 i joen wetem ol vas we oli tokbaot trabol we bambae Bigfala Babilon i kasem. Bambae Jeova i tekemaot ol skul we oli olsem woman ya blong rod, mo Hae Rul blong hem bambae i stanap foreva. !Wosip blong hem olsem Hae Rula mo King blong hem i stanap naoia!
18. ?Fasin blong spolem Bigfala Babilon i openem rod blong wanem impoten mesej?
18 Taswe, oli glad blong talemaot tok ya se: “Yumi harem gud tumas, yumi sing from glad blong yumi, mo yumi leftemap nem blong [Jah] i go antap, from we taem i kam finis blong Smol Sipsip blong hem i mared. Mo woman ya we i olsem promes blong hem, hem i rere finis. Woman ya, God i givim ol gudfala klos long hem blong i werem, we oli klin gud, oli saen. Ol gudfala klos ya blong hem, hemia ol gudfala fasin ya we ol man blong God oli mekem finis.” (Revelesen 19:7, 8) Yumi no save wetaem ol tabu Kristin we oli stap yet long wol bambae oli laef bakegen blong go long heven. Be yumi save samting ya long ol vas we oli stap raonabaot long vas ya se taem blong olgeta blong joen long mared blong Smol Sipsip, Jisas Kraes, bambae i wan glad taem, antap moa oli bin lukluk ol bigfala trabol we rabis woman ya blong rod, Bigfala Babilon, i bin kasem blong spolem hem.
Wol Blong Setan i Lus
19. ?Wanem narafala samting we i mas kamaot we i stap long Revelesen 19:11-21?
19 Waet hos ya we Revelesen 6:2 i bin tokbaot i kamaot bakegen. Yumi ridim long Revelesen 19:11 se: “Nao man we i stap sidaon long [long waet hos], nem blong hem, man we yu save bilif strong long hem, we hem i tru. Taem hem i jajem man, mo taem hem i mekem faet, be hem i stap mekem long fasin we i stret nomo.” Taswe “King blong ol king mo Masta blong ol masta” i ron long hos i go blong kilim ol nesen mo blong mekem i strong long olgeta, “olsem we man i purumpurumbut long frut ya blong rop blong mekem wora blong hem i kamaot blong mekem waen. Fasin ya i olsem we God ya we i gat olgeta paoa, hem i kros tumas, nao kros blong hem i kasem olgeta.” I blong nating nomo we “ol king blong wol wetem ol soldia blong olgeta” oli hivap wanples blong mekem faet long faet ya long Amageden. Man we i stap ron long waet hos ya i finisim faet blong hem. I no gat wan samting long ogenaesesen blong Setan long wol ya we bambae i stap.—Revelesen 19:12-21.
20. ?Bambae wanem i hapen long Setan hem wan?
20 ?Be olsem wanem long Devel Setan hem wan? Long Revelesen 20:1-6, i tokbaot Jisas Kraes olsem “wan enjel we i aot long heven i kamdaon. Long han blong hem, hem i stap holem ki blong bigfala hol ya we i godaon we i godaon olgeta, mo i stap holem wan bigfala jen.” Hem i holem bigfala algita ya, we i Snek ya blong bifo, we nem blong hem Devel Setan, i fasemgud hem, i sakem hem i go insaed long bigfala hol ya we i godaon we i godaon, i satem mo i lokem doa blong hol. Setan i no moa stap blong lidim olgeta nesen oli go krangke. Nambawan Rul blong Wan Taosen Yia blong Smol Sipsip wetem woman blong hem i kamtru. !I no moa gat man i krae from hem i harem nogud! !I no moa gat ded we Adam i stampa blong hem! !I no moa gat man i harem nogud, no i krae, no i harem i soa! “Ol samting ya blong bifo oli lus olgeta.”—Revelesen 21:4.
21. ?Taem we yumi stap wet blong God bambae i soemaot Jisas Kraes, yumi mas gat wanem fasin?
21 Taem yumi stap wet blong God bambae i soemaot Masta blong yumi Jisas Kraes, i gud yumi soem fasin blong stanap strong blong talemaot nambawan promes blong Kingdom blong God long ol narafala man. !Kolosap yumi fri olgeta! !I gud yumi wokbaot i go, i go fored, olsem ol pikinini blong Hae Masta Jeova we oli gat save!
Tingtingbak
◻ ?Wanem i soemaot se kolosap nao God bambae i soemaot Jisas Kraes?
◻ ?Olsem wanem dei blong Jeova blong givimbak bambae i kam?
◻ ?Olsem wanem ol man we oli “laekem Jeova” oli save tingbaot ol samting we oli stap hapen long wol naoia?
◻ ?Wanem ol samting we bambae oli kamaot folfolem olgeta taem bigfala trabol i kamtru?
[Tok Blong Pija Long Pej 23]
Jisas ‘i kam long klaod’ —blong jajem ol man long fasin we yumi no save luk wetem ae blong yumi
[Tok Blong Pija Long Pej 25]
I no longtaem ol gyaman skul, ol rabis fasin blong Setan, mo Setan hem wan bambae oli lus