“!Mi Ya Mi Stap! Yu Sanem Mi”

OLSEM WILFRED JOHN I TALEM

Ol ami blong Berma oli rere blong faetem mifala long tufala saed blong reva. Wetem ol masket we oli reregud mo ol narafala tul blong faet, oli wokbaot i go insaed long wora we wora i kam antap kasem bel blong olgeta mo oli raonemgud mifala aninit long wan bigfala brij.

MI WETEM fren blong mi mitufala i seksek tumas. ?From wanem? Nating mitufala i no save long lanwis blong olgeta, i no longtaem mitufala i kasem save​—oli holemtaet mitufala. Mitufala i parpar wetem taoel nomo, oli karem mitufala olsem i go long wan polis stesen we i stap kolosap mo wan Engglisman i askem kwestin long mitufala.

Hemia long 1941, long taem blong namba tu bigfala faet blong wol, mo oli ting se mitufala i stap wok long saed blong enemi long fasin haed. Afta we mitufala i eksplenem Kristin wok blong prij blong mitufala long haeman ya blong ansa long hem, hem i talem long mitufala se laki nomo we oli no bin kilim mitufala i ded. Hem i talem se, plante man we oli ting se oli stap wok olsem spae, oli sutum olgeta wantaem nomo, oli no askem ol kwestin long olgeta. Mitufala i talem tangkyu long Jeova mo mitufala i folem advaes blong haeman ya blong no moa stap raonabaot long brij olsem long taem we i kam.

?Olsem wanem mi kasem trabol olsem long Berma (naoia Mianma)? I gud mi mi eksplenem mo talemaot sam samting long laef blong mi wan.

Wan Disisin We Mi Mekem Taem Mi Yang

Mi bon long Wels long 1917 mo taem mi gat sikis yia mi go wetem papa mama blong mi mo wan yangfala brata blong mi long Nyu-Silan, long ples ya mi gruap long plantesin blong papa blong mi blong mekem melek. Wan dei hem i kambak long haos wetem wan hif blong ol olfala buk we hem i pem long wan sekenhan stoa. Insaed long ol buk ya i gat tufala buk ya, Studies in the Scriptures, we ‘Watch Tower Bible and Tract’ Sosaeti i prentem. Tufala buk ya i kam olsem ol sas samting we mama blong mi i gat, mo olsem mama blong Timote, Yunis, hem i tijim mi blong mi gat tingting blong spenem yangtaem blong mi blong mekem wok blong Kingdom blong Jeova.​—2 Timote 1:5.

Long 1937 mi gat disisin blong mekem wan long tufala wok ya: blong lukaot long plantesin blong papa blong mi blong mekem melek no blong talem long Jeova olsem profet blong God, Aesea i bin talem, se “!Mi ya mi stap! Yu sanem mi.” (Aesea 6:8) Mi mi yang, mi strong, mo mi no gat plante wok blong mekem. Mi bin traem finis blong wok long plantesin mo mi laekem. Long defren fasin, mi no gat save long fultaem wok blong talemaot gud nyus, no wok blong paenia. ?Weswan long tufala bambae mi jusum​—wok long plantesin no wok olsem wan paenia?

Ol man blong givim tok long branj ofis blong ol Wetnes blong Jeova long Ostrelya oli faswan blong leftemap tingting blong mi. Oli visitim ples blong mifala long Nyu-Silan mo oli leftemap tingting blong mi blong yusum nambawan yangtaem blong mi long wok blong Jeova. (Eklesiastis 12:1) Mi tokbaot bisnes ya wetem papa mama blong mi, mo oli agri wetem waes fasin blong mi blong putum wil blong God long fasples. Mo tu mi tingtinggud long ol tok blong Jisas Kraes long bigfala toktok blong hem antap long Hil se: “Fastaem yufala i mas lukaotgud blong obei long God we i king blong yufala, mo blong mekem ol stret fasin we hem i wantem. Nao biaen hem i save givim olgeta samting ya tu long yufala.”​—Matyu 6:33.

!Disisin blong mi i stanap! Long taem ya i no gat branj blong ol Wetnes blong Jeova long Nyu-Silan, oli askem mi blong go wok long branj long Sidni, Ostrelya. Taswe, long 1937, mi klaem long wan sip blong go long Ostrelya blong kam olsem wan fultaem minista blong Jeova God.

‘?Wanem wok bambae mi kasem?’ mi askem long mi wan. Be nating se hem i wanem kaen wok, mi bin talem long Jeova se, ‘Mi ya mi stap. Yusum mi long wanem ples we yu wantem.’ Long tu yia mi givhan blong mekem ol teprikoda we ol Wetnes blong Jeova oli yusum long taem ya blong givimaot ol tok blong Baebol long ol man blong haos. Be, bigfala wok we mi lanem long branj, hemia blong sanemaot ol buk.

Go Long Singapo

Long 1939, mi kasem wan leta blong go wok long wan ples longwe long Is​—blong wok long Singapo, ples we Sosaeti i yusum blong sanemaot ol buk. Ples ya i olsem wan medel ples blong kasem ol buk we oli kam long Ostrelya, Engglan, mo Amerika mo sanem i go long plante kantri long Esia.

Singapo i wan taon we i gat plante lanwis long hem mo long ples ya ol kantri long Is mo Yurop oli meksemap ol kastom blong olgeta. Lanwis blong Malai (naoia oli kolem Bahasa Malaysia) i wan lanwis we oli yusum plante blong toktok, mo blong prij long ol haos wanwan, mifala ol man blong defren kantri i mas lanem. Long plante lanwis, mifala i gat wan samting we oli kolem wan kad blong talemaot mifala. Kad ya i gat wan smol mesej blong Kingdom we i stap long hem.

Blong stat mi holem long tingting blong mi evri tok we i stap long kad blong Malai gogo mi kamgud moa long fasin blong toktok long lanwis ya. Be mifala i karem ol narafala buk we oli tokbaot Baebol long plante narafala lanwis tu. Eksampel, long olgeta man blong Is India, mifala i gat ol buk long lanwis blong Bengali, Gujarati, Hindi, Malayalam, Tamil, mo Urdu. Hemia i wan nyufala ekspiryens blong mi blong faenem ol man long plante grup we oli gat ol defren lanwis.

Yes mi tingbaot toktok we i kamaot long Septemba 1939, oli talemaot faet long Yurop we i mekem mi mi fraet tumas. Mifala i wari, ‘?Bambae faet ya i kasem ol ples longwe long Is mo bambae oli joen long hem?’ !Long mi i luk olsem faet blong kasem Amageden​—mi ting se hem i stret taem nao! Mi glad se mi stap yusum fulwan mo yusumgud yangtaem blong mi.

Antap long wok blong mi long ples ya blong kasem mo givimaot ol buk, mi joen fulwan long ol miting blong kongregesen mo long wok blong prij. Mi mekem ol Baebol stadi, mo samfala man oli lesin mo oli givim olgeta blong baptaes long wora. Oli tekem olgeta ya oli go long sanbij we i stap kolosap mo oli draonem olgeta fulwan long solwora blong Singapo we i hot lelebet. Mo tu mifala i mekem plan blong mekem wan asembli, long kwaet fasin mifala i singaot ol man we oli intres blong oli kam. Mifala i glad tumas, kolosap 25 man oli kam long taem ya we mifala i bilif se hem i laswan asembli blong mifala bifo Amageden.

Long taem blong faet i hadwok blong branj blong Sosaeti i sanem toktok i go long ol narafala branj. Eksampel, ples blong mifala blong kasem mo givimaot ol buk long Singapo, i kasem wan smol mesej se bambae trifala paenia blong Jemani i kasem Singapo i no longtaem long wan sip we i no gat nem blong go long wan ples blong wok we oli no save. Sam wik biaen oli kam mo oli haremgud blong stap ten haoa wetem mifala. Nating se lanwis i wan trabol, mifala i kasem save se Sanghae nao hem i ples we bambae oli go wok long hem.

Oli Askem Mi Blong Go Wok Long Sanghae

Wan yia biaen mi tu mi kasem wan leta blong go wok long Sanghae. Mi no gat adres blong ol rod long taon, bokis namba blong postofis nomo. Afta we oli askem fulap kwestin long mi long postofis, oli trastem mi inaf blong givim adres blong haos blong Sosaeti long mi. Be, man Jaena ya we i stap long haos ya i talem long mi se branj i no moa stap long ples ya, mo i no gat wan narafala adres.

‘?Bambae mi mekem wanem nao?’ mi stap tingting. Long kwaet fasin mi mekem wan prea blong askem Jeova blong lidim mi. Taem mi stap lukluk i go mi luk trifala man, oli longfala lelebet bitim ol narafala man mo fasin blong jenis blong olgeta i defren lelebet. I luk olsem hemia nao trifala man Jemani we oli stap smoltaem long Singapo. Kwiktaem nomo, mi wokbaot i go long rod blong olgeta.

Mi askem se, “Plis,” mi toktok be mi stap seksek tu. Oli stop mo oli lukluk strong long mi blong luksave mi. Mi askem se, “Singapo. Ol Wetnes blong Jeova. ?Yu luksave mi?”

Afta we smoltaem i pas, oli ansa se: “!Ja! !Ja! !Ja!” Wantaem nomo mifala i holemtaet mifala, mo mi krae from mi glad tumas. Long plante milyan man long taon ya, ?olsem wanem trifala man ya i save wokbaot i pas long ples ya long stret taem olsem? Wantaem nomo mi talem se, “Tangkyu, Jeova.” Long taem ya trifala Jaenis famle, trifala man Jemani, wetem mi, mifala nomo ol Wetnes long Sanghae.

Hong Kong Mo Afta Berma

Afta we mi wok long Sanghae blong sam manis, oli sanem mi i go long Hong Kong. Taem wan fren blong mi we hem i wan paenia blong Ostrelya i no kam, mi stap mi wan, mi wan Wetnes nomo long ples ya we Engglan i gat paoa long hem, hemia long Hong Kong. Bakegen, mi mas tingbaot we mi bin talem long Jeova se, “!Mi ya mi stap! Yu sanem mi.”

Mi mekem wok blong mi bigwan long ol man Jaena we oli toktok Engglis, be mi faenem se i had blong go insaed long yad blong olgeta from we ol man we oli gad long ol get ya oli toktok lanwis Jaena nomo. Ale mi lanem Jaenis lanwis lelebet long tufala fasin blong toktok we oli yusum plante. !Hem i wok! Mi kam kolosap long gad, givim kad blong mi long saed blong bisnes, talem sam toktok long Jaenis lanwis, mo plante taem biaen hem i letem mi mi go insaed.

Wan taem mi stap visitim wan skul, ale mi folem fasin ya blong toktok wetem hedmasta. Wan yangfala tija i faenem mi long rum blong spel. Mi folem hem tru long tufala klasrum, mi talem tangkyu long ol pikinini from fasin respek we oli soemaot, mo mi rere blong mitim hedmas­ta. Tija i kilim doa, i openem doa, i stanap long saed, mo i mekem saen long mi blong go fastaem. !Mi no haremgud mo mi sek, from hem i tekem mi i go long tolet! I luk olsem oli no bin kasem save long fasin blong mi blong toktok Jaenis, olsem hedmasta i talem long mi biaen, oli ting se mi wan man blong fiksimap ol ples blong wora mo man blong jekemap ol tolet.

Afta fo manis long wok ya, ol polis blong Hong Kong oli talem long mi se oli putum tabu long wok blong yumi blong prij mo se bambae mi mas stop long wok blong prij sipos no bambae oli sanemaot mi. Mi mekem disisin blong oli sanemaot mi blong mekem se i gat jans blong gohed long wok blong prij long wan narafala ples we oli no blokem. Taem ya long Hong Kong, mi bin givimaot 462 buk mo mi bin givhan long tu narafala man blong joen long minista wok.

Taem mi aot long Hong Kong, oli sanem mi long Berma. Long ples ya mi mekem wok blong paenia mo mi givhan blong mekem wok blong kasem mo givimaot ol buk long Rangun (naoia Yangon). Wan ekspiryens we i gud tumas hemia blong prij long ol taon mo ol velej we oli laen folem rod i stat long Rangun i go long Mandalai mo antap long mak blong Jaenis long taon ya Lasio. Fren blong mi wetem mi mitufala i prij moa long olgeta man ya we oli toktok Engglis, mitufala i kasem plante handred sabskripsen blong Consolation (naoia Wekap! magasin). Samting we i gud blong save se, bigfala rod ya we i stat long Rangun i go long Mandalai biaen oli kolem Rod blong Berma, rod we ol man Amerika oli stap yusum blong sanem ol tul blong faet i go long Jaena.

Plante taem mitufala i stap wokbaot long ples we i gat plante smok blong rod mo mitufala i nidim blong swim gud. Taswe samting we yumi tokbaot finis i kamaot we oli bin holem mitufala taem mitufala i stap swim long reva aninit long wan brij. I no longtaem biaen ol faet mo sik i mekem mitufala i kambak long Rangun. Mi mi stap long Berma kasem 1943, taem ya faet i kam bigwan ale i mekem se mi gobak long Ostrelya.

Long Ostrelya

Bifo finis, oli putum tabu long wok blong ol Wetnes blong Jeova long Ostrelya. Be, i no longtaem oli tekemaot tabu ya, mo biaen bakegen oli singaot mi blong go wok long branj ofis. Biaen, long 1947, mi maredem Betty Moss, we i bin wok long branj blong Sosaeti long Ostrelya. Papa mo mama blong Betty tufala i paenia, mo oli leftemap tingting blong Betty mo brata blong hem Bill blong gohed blong mekem wok blong paenia. Betty i bin statem wok blong paenia taem hem i kasem 14 yia, dei we hem i livim skul. Mi ting se bambae mifala i wokgud wanples, from we hem tu, hem i bin talem strong long Jeova se, “!Mi ya mi stap! Yu sanem mi.”

Wan yia biaen long mared blong mitufala, oli singaot mi blong mekem wok blong seket elda, blong visitim ol kongregesen blong ol Wetnes blong Jeova. I wan bigfala traem blong mi taem mi stap wok long ol ples long medel long Ostrelya. Ol wora we i ron bigfala wantaem i mekem i hadwok blong wokbaot long trak, antap moa long ol rod we oli glis. Ol tempraja blong hot taem i go antap kasem 43 digri long ol ples we i no gat san. From we mifala i stap long haos tapolen, mifala i faenem se hot taem ya i hot bitim mak mo koltaem i kol tumas.

I wan bigfala glad blong wok olsem wan distrik elda taem i gat tu ples nomo blong go long hem long Ostrelya. Donald MacLean i lukaot long wan ples, mo mi mi lukaot long narafala. Ale mifala i stap jenis raon. I wan bigfala glad blong ridim sam buk we i tokbaot ol kongregesen we naoia i stap long ol ples we mifala i bin wok long hem bifo. !I tru ol sid long saed blong trutok blong Baebol oli bin gru mo karem frut!

Mi Gobak Long Ples We Mi Bin Stat

Long 1961, mi gat jans blong go long fas klas blong Giled skul blong misinari afta we hem i muv i go long Bruklin, Nyu Yok. Fastaem oli bin singaot mi blong go long skul ya be mi no save go from trabol long saed blong sik. Long en blong kos ya blong ten manis, oli askem mi blong go long Nyu-Silan olsem ples we mi mas wok long hem.

Ale stat long Janewari 1962, mi mo Betty mitufala i bin stap long Nyu-Silan, wan long tufala ples ya we oli kolem se, “daon anda” (Ostrelya mo Nyu-Silan). Plante taem oli tokbaot hem olsem wan naesfala perel long Pasifik. Long tiokratik wok ya, mi glad tumas blong wok long tufala wok ya long saed blong seket mo distrik. Long ol 14 yia we oli pas, stat long Epril 1979, mifala i stap wok long branj ofis long Nyu-Silan.

Betty mo mi naoia mitufala i gat bitim 70 yia, mo long mitufala evriwan mitufala i bin gohed nomo long fultaem minista wok blong talemaot gud nyus blong 116 yia. Betty i bin stat blong mekem wok blong paenia long Janewari 1933, mo mi long Epril 1937. Mifala i bin glad plante taem, taem mifala i luk ol pikinini blong mitufala long saed blong speret mo ol bubu blong mitufala oli mekem samting we mitufala i bin mekem taem mitufala i yangfala, hemia, oli obei long advaes we i stap long Eklesiastis 12:1 se: “Taswe yu mas tingbaot Bigfala Man we i wokem yu. Yu mas tingbaot hem taem yu yu yang yet.”

!I wan bigfala jans long mitufala blong spenem kolosap ful laef blong mitufala long wok blong prij blong talemaot gud nyus blong Kingdom mo blong mekem disaepol, olsem Masta blong yumi Jisas Kraes i talem! (Matyu 24:14; 28:​19, 20) Mitufala i glad tumas se taem God i singaot mitufala, mitufala i givim ansa olsem profet Aesea long taem bifo, se “!Mi ya mi stap! Yu sanem mi.”