Mi Trastem Jeova Stat Long Taem We Mi Yangfala

OLSEM BASIL TSATOS I TALEM

Hem i long yia 1920; long ol hil blong Akadia long nambawan ples ya Peloponnisos, long Gris. Mi stap slip long bed, mi sik tumas from Spen flu we i kilim i ded plante man wantaem raonabaot long wol.

TAEM oli ringim bel blong jyos, mi save se oli talemaot wan narafala man we i ded. ?Bambae mi biaen long hem? Tangkyu tumas, mi mi kamgud bakegen, be plante milyan man oli ded. Nating se long taem ya mi gat eit yia nomo, mi tingbaot gud yet ekspiryens ya we i mekem mi mi fraet tumas.

Stat Blong Tingting Long Samting Long Saed Blong Speret

Smoltaem biaen, bubu man blong mi i ded. Afta we mifala i berem hem, mi tingbaot Mama we i kam kolosap long sista blong mi wetem mi long vranda blong haos blong mifala. Hem i traem blong mekem sore blong mitufala i godaon, hem i talem sloslou se: “Tufala pikinini, yumi evriwan yumi mas kam olfala mo yumi ded.”

Nating se hem i talem kwaet nomo, ol tok blong hem oli mekem tingting blong mi i trabol. Mi ting se, ‘!Tok ya i mekem man i sore mo i no stret tu!’ Be mitufala i haremgud taem Mama i gohed blong talem se: “!Be taem Masta i kambak, bambae hem i mekem ol dedman oli laef bakegen, mo yumi no moa save ded bakegen!” !Yes, samting ya i mekem mitufala i haremgud!

Stat long taem ya mi intres bigwan blong faenem wanem stret taem nao bambae hapi taem ya i kamaot. Mi askem plante man, be i no gat wan we i save talem long mi, no, i no gat man tu we i wantem tokbaot bisnes ya wetem mi.

Wan dei taem kolosap mi kasem 12 yia, papa blong mi i kasem wan buk long brata blong hem we i stap long Amerika. Nem blong buk ya The Harp of God, we ‘Watch Tower Bible and Tract Society’ i prentem. Mi folem ol nem blong ol japta we oli stap insaed, mo mi glad tumas taem mi luk japta ya “Masta Blong Yumi i Kambak.” Mi ridim wetem bigfala intres, be mi mi harem nogud from hem i no talem wan stret yia we bambae Masta i kambak. Be, buk ya i soemaot se i no longtaem nating.

Smoltaem biaen mi stat blong go long haeskul mo mi spenem moa taem blong mekem ol stadi blong mi long skul. Be, plante taem, angkel blong mi long Amerika i sanem sam Wajtaoa long mi, we mi laekem tumas blong ridim. Mo tu, evri Sande, mi go long Sande skul, we plante taem bambae bisop i kam mo i toktok long mifala.

Long wan Sande, bisop ya i kros tumas mo i talem se: “Ol man narafala ples oli stap fulumap taon blong yumi wetem ol buk we oli no laenap wetem bilif blong yumi.” Ale hem i holem wan Wajtaoa i go antap mo i singaot se: “Sipos wan long yufala i faenem sam buk olsem long haos, tekem olgeta i kam long jyos, mo bambae mi bonem olgeta.”

Bigfala voes blong hem i mekem mi harem nogud, be tingting blong hem blong wantem givimbak i mekem mi harem nogud moa. Taswe, mi no folem samting we hem i talem. Be, mi raet long angkel blong mi mo mi askem long hem blong i no moa sanem ol buk we ‘Watch Tower’ Sosaeti i prentem. Be, oltaem mi stap tingting long bisnes ya we bambae Kraes i kambak.

Intres Long Saed Blong Speret i Gru

Taem spel blong hot taem i kam, mi tekem bokis blong mi blong fulumap ol klos blong mi. Long botom blong bokis i gat tri buklet i stap we ‘Watch Tower’ Sosaeti i bin prentem. Sam samting i mekem se mi no bin luk olgeta bifo. Nem blong wan se ?Ol Dedman Oli Stap Weples?

Mi stap tingting se ‘Samting ya i gud tumas.’ Nating se mi stap tingbaot woning blong bisop, mi mekem disisen blong ridimgud ol buklet ya blong faenemaot ol mastik we mi ting se oli stap insaed. Mi tekem wan pensel mo sloslou mi stat blong lukaot. Mi sek se, evri samting insaed long ol buklet ya oli gat mining, mo long evri tok i gat ol vas i stap blong man we i ridim i save jekemap long Baebol.

From we mifala i no gat Baebol, mi stap tingting se maet ol vas ya oli no laenap wetem ol poen long buklet ya mo maet oli blong joen nomo wetem plan blong ol man we oli raetem. Taswe mi raet long angkel blong mi blong sanem wan ful Baebol i kam. Mo hem i sanem wan i kam kwiktaem. Tu taem mi ridim fulwan Baebol, mo nating se i gat plante samting insaed we mi no kasem save long olgeta, mi mi intres tumas long buk blong Daniel mo Revelesen. Mi wantem save ol samting we tufala buk ya i tokbaot, be i no gat wan man i stap we i save givhan long mi.

Mi livim skul long 1929, mo smoltaem biaen angkel blong mi long Amerika i sanem sam Wajtaoa long mi bakegen. Mi stat blong laekem moa blong ridim olgeta mo mi askem long hem blong sanem i kam oltaem. Mo tu mi stat blong tokbaot hop long saed blong fyuja we mi lanem long ol magasin ya wetem ol narafala man. Be biaen laef blong mi i jenis bigwan.

Gru Long Saed Blong Speret Long Bema

Ol brata blong mama blong mi oli bin muf i go long Bema (naoia Mianma), mo famle i mekem disisen se sipos mi joenem olgeta, bambae save blong mi i kam bigwan mo ating mi gat jans blong statem wan bisnes. Oltaem mi intres long ol ples long Is, taswe mi laekem jans ya blong go long ples ya. Long Bema, oltaem mi kasem ol Wajtaoa we angkel blong mi i sanem, be neva mi mitim wan long ol Baebol studen, olsem nem blong ol Wetnes blong Jeova long taem ya.

Wan dei mi glad tumas blong faenem wan mesej long Wajtaoa, blong askem ol buk ya Light, tufala volyum we i eksplenem buk blong Revelesen. Mo tu, mi faenem se branj blong ‘Watch Tower’ Sosaeti long India we i stap long Bombei i lukaot long wok blong ol Baebol Studen long Bema. Wantaem nomo mi raet blong askem ol buk ya Light, mo tu mi askem olgeta blong sanem sam Baebol Studen blong India blong kam prij long Bema.

Oli sanem ol buk ya kwiktaem long leta, mo kolosap wan wik biaen, sam Baebol Studen blong Bema oli kam visitim mi. Mi glad blong save se i gat wan smol grup blong olgeta long taon ya Rangun (naoia Yangon), bigfala taon blong Bema, we mi stap long hem. Oli askem mi blong joen long grup blong olgeta blong stadi Baebol oltaem mo tu blong joen wetem olgeta blong prij long ol haos wanwan. Fastaem mi no laekem tumas be biaen mi stat glad blong tokbaot ol save blong Baebol wetem ol Budis, ol Hindu, mo ol Muslim, sem mak long olgeta we oli talem se oli Kristin.

Biaen branj ofis long India i sanem tu fultaem minista (ol paenia), Ewart Francis mo Randall Hopley oli kam long Rangun. Tufala evriwan i blong Engglan be plante yia oli bin wok long India. Oli leftemap tingting blong mi bigwan, mo long 1934, mi tekem baptaes blong soemaot se mi givim ful laef blong mi long Jeova.

Wan Strongfala Wetnes

Biaen branj ofis long India i sanem moa paenia long Bema. Tu long olgeta, Claude Goodman mo Ron Tippin, oli mekem visit long ples blong tekem tren mo oli prij long Sydney Coote, man we i lukaot long ples ya. Hem i tekem ol buk, i ridim olgeta fulwan, mo i stat blong raet i go long sista blong hem we i mared finis, Daisy D’Souza, long Mandalei. Daisy tu i intres tumas long ol buk ya mo i askem moa.

Daisy, we bifo hem i wan Katolik, hem i wan woman we i no fraet nating. Hem i stat blong visitim ol man raonabaot long hem mo i talemaot long olgeta ol samting we hem i lanem. Mo taem wan pris blong jyos long ples ya i visitim hem, mo pris ya i askem long hem se from wanem hem i stop blong go long jyos, hem i soemaot long pris ya se Baebol i no sapotem ol samting we hem i stap tijim, olsem helfaea.

Biaen, pris ya i askem se: “Long plante yia finis we mi stap talemaot helfaea long olgeta, ?olsem wanem mi save talem long olgeta naoia se i no gat wan ples olsem? Bambae i no gat man i wantem kam long jyos.”

Daisy i ansa i se, “Sipos yu wan trufala Kristin, bambae yu tijim trutok long olgeta, nating se wanem samting i save kamaot from.” Hem i gohed se: “!Sipos yu no mekem, ale bambae mi mekem!” Mo woman ya i mekem.

Dick mo Daisy wetem tu bigfala gel blong tufala oli baptaes long Rangun long semtaem wetem mi. Tri yia biaen, long 1937, mi maredem namba tu gel blong tufala, Phyllis.

Ronwe i Go Long India

Ol ami blong Japon oli go insaed long Bema long Namba Tu Bigfala Faet Blong Wol, mo oli tekem Rangun long Maj 8, 1942. Oli fosem ol man blong narafala ples se oli mas hareap blong go long India. Plante handred man oli traem blong gotru long bigfala bus, be plante long olgeta oli bin ded nomo long rod. Mi wan mi save long haeman we i lukaot long wok blong karemaot ol man long ples ya, ale oli givim raet long mitufala blong pas long laswan sip blong kago we i aot long Rangun blong go long Kalkata. Long taem ya mitufala i sore tumas blong livim haos mo kolosap olgeta samting blong mitufala from fasin blong hareap olsem. Ol Japanis oli bos long Bema stat long 1942 kasem 1945.

Mitufala i gat smol mane nomo taem mitufala i kasem India, mo i no isi blong faenem wan wok. Samting ya i traem bilif blong mitufala. Mi mitim wan haeman blong ami blong Engglan we i wantem givim wan wok we i no blong faet we mi save winim plante mane from, be mi mas joen wetem ami blong mekem wok ya. Wetem help blong Jeova, mi save strong blong no mekem wok ya we hem i wantem givim mo from samting ya mi holem wan Kristin voes blong hat mo tingting we i klia. (Aesea 2:​2-4) Long sam narafala rod tu, mitufala i luksave nambawan help blong Jeova.

Mitufala i stap long Nyu Delhi, bigfala taon blong India, we i no isi nating blong kasem haos blong slip. Nating se i olsem, mitufala i faenem wan bigfala haos stret long medel blong taon ya. Haos ya i gat wan bigfala rum blong spel we man i save pas long doa blong hem blong kam insaed mo go afsaed, mo rum ya i stap olsem Haos Kingdom blong Kongregesen blong Ol Wetnes blong Jeova long Delhi long sam yia biaen. Be, from tabu we i blokem ol buk blong ‘Watch Tower’ Sosaeti long India long 1941, mifala i no save kasem ol buk we oli tokbaot Baebol.

Olsem Wanem Oli Tekemaot Tabu Ya

Wan Sande long 1943, olgeta we oli go long jyos long Delhi oli kasem wan traket we 13 haeman blong ol defren jyos oli saenem. Traket ya i givim woning se: “OL MAN DELHI LUKAOT LONG OL WETNES BLONG JEOVA.” Oli talem se oli blokem Ol Wetnes blong Jeova long India from sam fasin blong politik.

Taem we branj ofis long Bombei i agri long plan blong mifala, kwiktaem nomo mifala i prentem mo givimaot wan traket we i soemaot klia ol fasin blong ol haeman ya. From we mi lukaot long ol wok long ples ya, nem mo adres blong mi i stap long en blong ol strong tok blong traket ya. Smoltaem biaen, taem ol polis oli faenem mi wetem Margrit Hoffman we mitufala i stap givimaot ol traket ya, oli holem mitufala mo oli putum mitufala long kalabus. Be, i no longtaem mitufala i kamaot be oli holem sam samting blong mifala olsem promes se bambae mitufala i mas kambak long wan stret taem.

Biaen, taem Margrit i stap prij, hem i visitim haos blong Masta Srivastava, wan haeman we ol man India oli savegud hem we gavman i putumap hem blong lukaot long ples ya. Masta Srivastava i letem hem i kam insaed long haos, mo taem oli stap storeyan, hem i talem long Masta Srivastava se tabu we oli bin putum blong blokem ol buk blong yumi long India i no stret. Long sem dei ya Margrit i mitim memba blong palemen we i lukaot long nesen blong Madras. Hem i kam long taon ya blong joen long wan miting blong palemen. Margrit i talemaot from wanem i no stret blong putum tabu long ol buk blong yumi, mo man ya i talem se bambae hem i askem kwestin ya long miting we i stap kam.

Long taem ya, mi stap wok olsem man blong givhan long ol sikman blong oli kamgud bakegen long wan hospetal long ples ya. Nao, Masta Srivastava i harem nogud from wan kil, mo hospetal ya i sanem mi blong luk sipos hem i nidim mi blong givhan long hem. Mi faenem se Masta Srivastava i wan man we i gat kaen fasin, mo taem mifala i stap storeyan, mi talem se Mis Hoffman wetem mi mitufala i bin kamaot long kalabus be oli holem sam samting blong mifala olsem promes se bambae mitufala i mas kambak long wan stret taem. Mi eksplenem se oli putum tabu long ol buk blong mifala from ol haeman blong jyos oli strong blong talem se ol buk ya oli blong mekem politik, be mifala i no joen nating long politik. Mi gohed se, man we i lukaot long branj blong mifala, Edwin Skinner, i bin askem finis blong mekem wan toktok blong eksplenem disisen blong mifala, be oli no wantem.

Tu dei biaen, Masta Srivastava i talem long mi se: “Masta Jenkins [haeman blong gavman we i no bin agri long wok blong mifala] bambae i finis long wok blong hem long sam dei we i kam, mo bambae Masta Francis Mudie i tekem ples blong hem. Singaot Masta Skinner blong kam antap, mo bambae mi soem hem long Masta Francis.”

Masta Srivastava i mekem miting ya olsem we hem i bin talem. Long taem blong miting, Masta Francis Mudie i talem long Brata Skinner se: “Mi no save talem wan samting long yu, be bambae mi lukluk long bisnes ya.” From we palemen bambae i open long sam dei we i kam, Brata Skinner i stap blong luk samting we bambae i kamaot. Stret olsem tok we memba blong palemen blong Madras i talem, hem i stanap mo i askem se: “?I tru se tabu we i blokem ol buk blong ‘Watch Tower Bible and Tract Society’ i from we oli joen wetem politik?”

“Masta Francis Mudie i ansa i se, “No gat, tabu ya i olsem wan woning nomo, be naoia gavman i mekem disisen finis blong tekemaot tabu ya.”

!Mifala i glad tumas taem mifala i harem nyus ya! Wan wik biaen branj ofis long Bombei i kasem wan leta we i talemaot en blong tabu ya.

Gobak Long Bema Biaen Long Faet

Engglan i rul bakegen long Bema biaen long Namba Tu Bigfala Faet Blong Wol, mo sam manis biaen ten long mifala ol Wetnes i gobak long Rangun. Mifala i glad blong luk bakegen wanwan long ol Wetnes we oli ol man ples ya. Kantri ya i stap long wan taem we i had. Ol samting we man i yusum oltaem, wetem lektrik mo ol pablik transpot, oli no gat. Taswe mifala i pem wan trak long ol ami mo mifala i yusumgud blong karem ol man oli kam long ol miting we mifala i bin mekemrere smoltaem biaen we mifala i kambak.

Wan man we i intres i givim graon long mifala, mo wetem help blong ol man long ples ya we oli gat kaen fasin, mifala i bildim wan Haos Kingdom we i bigwan lelebet. Mifala i bildim wetem ol strong bambu, tanem bambu olsem mat blong mekem ol wol blong hem, mo mifala i mekem ruf blong hem wetem natanggura. Long ples ya, long Epril 1947, Nathan H. Knorr, presiden blong ‘Watch Tower’ Sosaeti long taem ya, mo sekretari blong hem, Milton G. Henschel, tufala i givim pablik tok taem tufala i visitim Rangun. Long taem ya, mifala i gat 19 Wetnes nomo long Bema. !Be pablik tok blong Brata Knorr, we hem i givim long New Excelsior Theatre, i gat 287 man oli kam!

Mifala i Stap Kwaet Long Ostrelya

Long Janewari 4, 1948, Bema i kasem independen blong hem long rul blong Engglan, mo plante waetman oli luk se i gud blong oli livim kantri ya. Afta long ol prea blong mitufala blong tingtinggud long samting ya, Phyllis wetem mi mitufala i mekem disisen blong tekem gel blong mitufala mo mifala i go long Ostrelya. Mifala i stap long Peth, bigfala taon long Wes saed blong Ostrelya.

Aot long Bema bakegen, mo naoia i blong olwe, i wan taem we mifala i sore tumas. Plante taem, mifala i harem nyus blong ol gudfala brata long ples ya, mo mifala i glad tumas blong save se wok blong Kingdom long kantri ya i stap gohed.

Stat long 1978, long fo yia mifala i haremgud blong wok long ol kongregesen we oli toktok lanwis blong ol man Gris long ol bigfala taon blong Ostrelya. Samting ya i min se mifala i mas go long ol ples we oli stap longlongwe, from we i bitim 4200 kilomita stat long Wes kos i go long Is kos blong bigfala kantri ya. Samtaem biaen, from ol defren weta long ol wanwan ples ya, mekem se i gat trabol long bodi blong mitufala. Taswe mitufala i go stap bakegen long Peth, we mi gohed yet blong wok olsem wan elda long wan long ol 44 kongregesen long taon ya.

Taem ol yia oli stap pas, ae blong mi i kam nogud moa, mo i hadwok long mi blong rid. Be, nating se mitufala i kasem problem long saed blong bodi, hat blong mitufala i stap strong yet. Mitufala i gat strong tingting blong wet long hapi dei ya taem olgeta we oli fraet long Jeova bambae oli luk bigfala laet blong lav blong hem “i saen i go, wetem meresin long wing blong hem; mo bambae [yumi] go mo wokbaot long graon ya olsem ol yangfala buluk we oli fatfatgud.”​—Malakae 4:2.a

[Futnot]

[Tok Blong Pija Long Pej 24]

Famle blong mi wetem Brata Henschel mo Knorr long Bema (Mianma) long 1947

[Tok Blong Pija Long Pej 25]

Basil Tsatos wetem waef blong hem, Phyllis, long Ostrelya