Wan Kwestin
?Sipos ol man oli no akseptem trufala Kristin fasin naoia mo oli ded bifo long stat blong bigfala trabol, bambae oli save laef bakegen long ded?
I gud sipos yumi evriwan i blokem tingting blong mekem wok olsem ol jaj, mo luksave se laswan disisin, hemia jajmen blong Jeova we hem i yusum Jisas Kraes blong mekem, hemia nao impoten samting. (Jon 5:22; Ol Wok 10:42; 2 Timote 4:1) Be Baebol i givim sam samting blong givhan long yumi blong ansa long kwestin ya.
Wok blong talemaot gud nyus blong Kingdom long olgeta ples long wol hem i wan impoten haf blong ‘saen we i soem se Jisas i stap finis.’ Saen ya i stat kamaot i no longtaem afta long 1900. Wok blong prij i mekem se wok blong seraotem ol man long olgeta ples long wol i fulumap pijatok blong Jisas long saed blong “ol sipsip” mo “ol nani.” Taem wok blong prij mo wok blong seraotem ol man i finis, “bigfala trabol” bambae i finisim rabis fasin blong naoia.—Matyu 24:3, 21, 22; 25:31-46.
Jeova wetem Pikinini blong hem, tufala bambae i jajem ol man we oli no wantem lesin long mesej blong Kingdom mo oli ded bifo long stat blong bigfala trabol, se oli olsem ol nani no no gat. Jisas i talem se ol nani bambae oli “go long faea ya we bambae i no save ded samtaem.” Taswe, yumi save talem se olgeta ya we God i luk olgeta olsem ol nani bambae oli no kasem laef bakegen long ded. Bambae oli kasem wan jajmen sem mak olsem olgeta we “bambae oli kasem long dei ya, hemia i olsem ded we i no save finis” long taem blong bigfala trabol.—2 Tesalonaeka 1:9.
?Be olsem wanem long olgeta ya we maet oli no gat naf jans blong harem mesej blong Kingdom nao oli no save mekem wan waes disisin long saed blong trutok no agensem trutok bifo we oli ded long taem ya blong “las dei”?—2 Timote 3:1.
Plante we oli ded taem wok blong prij i stap gohed bifo we bigfala trabol bambae i kam, i klia se bambae oli kasem laef bakegen long ded. Yumi luk samting ya taem yumi ridim long Revelesen 6:7, 8 long saed blong saen ya we ol man oli ron long hos. Plante man oli ded from ol faet, kakae i sot, mo ol bigfala sik. From we ol man ya we oli “ded” oli go long “Hades,” bambae oli save laef bakegen long ded long taem we Kraes i rul long Wan Taosen Yia, taem Hades bambae hem i givimbak olgeta man we oli stap long hem. (Revelesen 20:13, NW) Sam long olgeta we oli laef bakegen maet oli bin harem mesej blong Kingdom finis bifo we oli ded.
!Yumi glad we Jisas i no livim long ol man blong oli faenemaot se hu nao oli sipsip mo hu ya oli olsem ol nani! Ol man we oli no stretgud olgeta oli no save jajemgud blong save sipos wan man hem i gat inaf jans blong harem mo akseptem gud nyus. ?Yu ting se yumi naf blong save olsem wanem long hat blong hem no sipos hem i rili laekem stret fasin? ?Yumi save skelem sipos ol famle blong hem, no skul blong hem, no ol narafala samting oli pulum hem? No gat. Be, yumi save se Jeova God mo Jisas Kraes tufala i save skelem ol bisnes ya mo tufala i save mekem jajmen we i stretgud olgeta, mo i folem stret fasin.—Dutronome 32:4; Aesea 11:1-5.
Taswe, i no nid blong yumi traem faenemaot se hu long olgeta we oli ded i no longtaem oli save laef bakegen, no oli no save laef bakegen long ded. Hemia i no wan samting we yumi gat raet blong mekem. (Lukluk Luk 12:13, 14.) I waes moa long yumi blong wet long ol disisin blong ol Jaj we oli stret, Jeova God mo Jisas Kraes. Samting ya bambae i givim moa pis long tingting blong yumi olsem ol man blong Jeova. Bambae hem i givhan long yumi tu blong yumi putum tingting blong yumi i strong moa long wok we yumi mas mekem—hemia blong ‘go mo mekem disaepol long ol man long olgeta nesen, tijim olgeta blong oli folem olgeta loa we Jisas i talem.’—Matyu 28:19, 20, NW.
[Foto Credit Line long pej 31]
Leicester sheep, Meyers