Wan Kwestin

Yumi glad tumas blong stadi long parabol blong Jisas long saed blong ol sipsip mo nani. Folem nyufala save we i kamaot long “Wajtaoa” blong Oktoba 15, 1995, ?yumi save talem yet se ol Wetnes blong Jeova oli stap joen long wan wok blong seraotem ol man naoia?

Yes. I klia from wanem plante oli askem kwestin ya. Hemia from we Matyu 25:31, 32 i talem se: “Long taem ya we mi, mi Pikinini blong Man, bambae mi kamtru wetem olgeta enjel, bambae mi mi king, mi gat olgeta paoa blong mi, nao mi go sidaon long bigfala jea blong mi. Nao olgeta man blong wol bambae oli kam stanap long fes blong mi, mo mi bambae mi seraot olgeta, olsem we man blong lukaot long sipsip i save seraot ol sipsip blong hem long ol nani blong hem.” Wajtaoa blong Oktoba 15, 1995, i soem from wanem ol vas ya bambae oli kamtru afta we bigfala trabol i stat. Bambae Jisas i kamtru wetem olgeta paoa blong hem mo ol enjel blong hem, nao bambae hem i sidaon long bigfala jea blong hem blong jajem ol man. Long taem ya, bambae hem i seraotem ol man. ?I minim wanem se hem i seraotem ol man? I minim se bambae hem i jajem olgeta long ol samting we oli bin mekem no oli no bin mekem bifo long taem ya.

Yumi save skelem samting ya wetem wan bisnes we i pas long kot. Bifo we kot i mekem wan disisen mo givim panis, oli tekem longtaem blong hivimap ol pruf. Ale, longtaem finis ol pruf oli stap hivap blong soem sipos long en blong bisnes ya, ol man we oli laef naoia bambae oli sipsip no ol nani. Mo ol pruf ya oli stap kam antap yet. Ale, taem Jisas i sidaon long bigfala jea blong hem, bambae ol pruf ya i hivap finis. Nao hem i rere blong jajem ol man. Bambae hem i seraotem ol man, haf i kasem panis we i no save finis, mo narafala haf i kasem laef we i no save finis.

Be, nating we Matyu 25:32 i talem se wok blong seraotem ol man blong oli kasem laef no oli ded bambae i kamaot long fyuja, hemia i no minim se ol man oli no seraot nating bifo long taem ya. Long Matyu japta 13, Baebol i tokbaot wan wok blong seraotem ol man we i kamaot fastaem. Long saed ya, yumi intres long tok blong buk ya, Joen Tugeta Long Wosip Blong Trufala God, long pej 179 mo 180, aninit long smol stampa tok ya “Seraot Ol Man i Go Long Tufala Kampani.”a Hem i se: “Jisas i tokbaot sam narafala big samting we oli mas kamaot long ol lastaem blong rabis fasin ya blong wol. I gat wok ya blong seraot ‘ol pikinini blong Kingdom’ mo ‘ol pikinini blong rabiswan’ i go long tufala defren kampani. Jisas i tokbaot samting ya long wan pijatok blong hem. Hem i tokbaot wan garen mo wan enemi we i kam planem sam sid blong rabis gras long hem.”

Buk ya i tokbaot pijatok blong Jisas long Matyu 13:24-​30 mo mining blong hem long vas 36-​43. Makem long vas 38 se ol gudfala sid blong wit oli ol pikinini blong Kingdom, be ol rabis gras oli ol pikinini blong hemia we i rabis. Vas 39 mo 40 i soem se ol enjel oli hivimap ol rabis gras long ‘en blong wol ya’​—long taem we yumi laef long hem naoia. Oli seraotem ol rabis gras ya long ol wit mo oli bonem olgeta long faea, yes oli lus olgeta.

Pijatok ya i tokbaot ol Kristin we tabu speret i makemaot olgeta (long parabol blong ol sipsip mo nani, hemia ol brata blong Jisas). Nating se i olsem, i klia se wan impoten wok blong seraotem ol man i stap gohed long taem blong yumi. Ol Kristin we tabu speret i makemaot olgeta oli seraot long ol gyaman Kristin we fasin blong olgeta i soem se oli “ol man blong Setan” nomo.

Jisas i givim sam narafala eksampel blong soem olsem wanem ol man oli stap seraot. Tingtingbak long tok blong hem long saed blong bigfala rod we i blong go lus nomo. Hem i talem se: “Plante man oli stap folem rod ya.” (Matyu 7:​13) Hemia i no stap tokbaot samting we bambae i hapen long en blong bisnes ya nomo. Hem i tokbaot wan samting we i stap gohed longtaem, olsem samting we i stap hapen naoia taem smol namba blong man i stap faenem smol rod we i go kasem laef. Tingbaot tu se, taem Jisas i sanemaot ol aposol, hem i talem long olgeta se bambae oli faenem sam man we oli stret blong kasem laef. Bambae ol narafala oli no stret, mo ol aposol oli mas ravemaot graon long leg blong olgeta, “blong mekem saen” agensem ol man ya. (Luk 9:5) Semfala samting i stap hapen taem ol Kristin oli mekem wok blong prij long taem blong yumi. Samfala oli lesin, be sam narafala oli sakemaot mesej blong God we yumi karem.

Wajtaoa ya we i tokbaot ol sipsip mo nani i makem se: “Jajmen we parabol ya i tokbaot bambae i kamtru i no longtaem long fyuja. Be naoia tu i gat wan impoten samting i stap hapen. Yumi ol Kristin, yumi stap mekem wan wok blong sevem laef blong man. Hemia wok blong talemaot wan mesej we i mekem ol man oli seraot long tu grup. (Matyu 10:32-​39).” Long ol vas ya blong Matyu japta 10, Jisas i talem se fasin blong folem hem i save mekem famle i seraot​—papa agens long boe blong hem, gel agens long mama blong hem.

Laswan samting se, ol brata blong Kraes we tabu speret i makemaot olgeta, oli bin lidim wan wok blong talemaot mesej blong Kingdom long olgeta ples blong wol. Ol man we oli kasem mesej ya, olgeta nomo oli stap makemaot olgeta from fasin blong olgeta blong lesin long mesej ya mo folem, no from fasin blong olgeta blong sakemaot mesej ya. Yumi ol man, yumi no save talem, mo yumi no mas talem, se: ‘Man ya i wan sipsip, narawan ya i wan nani,’ folem mining blong Matyu japta 25. Nating se i olsem, taem yumi talemaot gud nyus long ol man, yumi givim jans long olgeta blong soemaot wanem saed oli stap long hem​—oli wanem kaen man, mo oli mekem wanem long ol brata blong Jisas. Taswe, fasin blong ol man blong seraot long tu grup, olgeta we oli sapotem ol brata blong Jisas mo olgeta we oli no wantem sapotem olgeta, i kam klia moa, olsem ol pruf we i stap hivap bifo we wan man i pas long kot. (Malakae 3:​18) Olsem Wajtaoa i bin soemaot, kolosap nao bambae Jisas i sidaon long bigfala jea blong hem, i jajem ol man, mo i seraotem olgeta fulwan blong oli kasem laef no blong oli lus.

[Futnot]