Mekem Wok Blong Jeova Wetem Tingting Blong Sakrifaes
“Man we i wantem kam biaen long mi i mas blokem ol samting we hem nomo i wantem, nao i mas karem [pos, “NW”] blong hem, i mas biaen long mi.”—MATYU 16:24.
1. ?Olsem wanem Jisas i talemaot klia ded blong hem we i stap kam long ol disaepol blong hem?
KOLOSAP long hil ya Hemon, we top blong hem i fulap long sno, Jisas Kraes i kasem wan bigfala mak long laef blong hem. Kolosap wan yia biaen bambae hem i ded. Hem i save samting ya; ol disaepol blong hem oli no save. Naoia i stret taem blong olgeta oli save. Tru ya, bifo finis Jisas i bin toktok smol long saed blong ded blong hem we i stap kam, be hemia i fastaem we hem i talemaot klia samting ya. (Matyu 9:15; 12:40) Tok blong Matyu i talem se: “Nao i stat long taem ya, Jisas i stat soemaot long ol man blong hem we bambae hem i mas go long Jerusalem, mo ol elda blong ol man Isrel, wetem ol jif pris mo ol tija blong Loa bambae oli mekem hem i harem nogud long plante samting. Bambae olgeta oli kilim hem i ded, mo biaen long tri dei, bambae God i mekem hem i laef bakegen.”—Matyu 16:21; Mak 8:31, 32.
2. ?Wanem fasin blong Pita long ol tok we Jisas i talem blong tokbaot we bambae Hem i harem nogud long fyuja, mo Jisas i ansa olsem wanem?
2 Smoltaem nomo nao i stap bifo we Jisas i ded. Be, Pita, i tok strong long hem taem hem i harem samting ya. Hem i no save bilif se bambae oli kilim Mesaea. From samting ya, Pita i traem blong toktok blong blokem Masta blong hem. Wetem tingting we hem i wantem mekem i gud long Masta blong hem, hem i kwik blong talem se: “Masta, God i mas blokem samting ya. Ol samting ya oli no save kamtru long yu olsem.” Be wantaem nomo Jisas i agensem fasin blong Pita we Pita i ting se hem i mekem i kaengud long Masta blong hem, Jisas i mekem olsem wan man we i purumbut strong long hed blong snek we i posen, i se, “Setan, yu gowe long mi. Yu yu stap blokem mi nomo. Tingting blong yu i no tingting blong God, i tingting blong man nomo.”—Matyu 16:22, 23.
3. (a) ?Olsem wanem Pita i mekem hem wan i kam olsem wan man we Setan i yusum nating se hem i no save? (b) ?Olsem wanem Pita i kam olsem wan tul blong blokem rod long tingting blong sakrifaes?
3 Pita i no save se hem i mekem hem wan i kam olsem man we Setan i stap yusum. Ansa blong Jisas i strong olsem ansa we hem i talem long Setan we i traem blong trikim hem long drae ples. Long ples ya Setan i wantem traem Jisas wetem wan laef we i isi, blong kam wan king be hem i no harem nogud fastaem. (Matyu 4:1-10) Nao Pita i leftemap tingting blong Jisas blong folem laef we i isi. Jisas i save se samting ya i no wil blong Papa blong hem. Long laef blong hem, hem i mas gat tingting blong sakrifaes, i no blong mekem samting we hem nomo i haremgud long hem. (Matyu 20:28) Pita i kam wan tul blong blokem wan rod olsem; ol gudfala filing blong sore we hem i soemaot i kam olsem wan trap.a Be, Jisas, i luk klia se sipos hem i folem ol tingting blong wan laef we i no gat fasin blong sakrifaes, bambae hem i no mekem samting we God i laekem from we trap blong Setan i kasem hem olsem we ded i holemtaet ol man.
4. ?From wanem wan laef we man i tingbaot hem wan nomo i no stret long Jisas mo ol man blong hem?
4 From samting ya, Pita i mas stretem tingting blong hem. Ol tok we hem i talem long Jisas oli soemaot tingting blong man, i no tingting blong God. Wan gudfala laef, wan isi rod we i blong ronwe long fasin blong harem nogud, i no blong Jisas; no ol man blong hem oli no mas folem rod blong laef olsem, from we afta Jisas i talem long Pita mo ol narafala disaepol se: “Man we i wantem kam biaen long mi i mas blokem ol samting we hem nomo i wantem, nao i mas karem [pos, NW] blong hem, i mas biaen long mi.”—Matyu 16:24.
5. (a) ?Wanem traem blong folem Kristin laef? (b) ?Wan Kristin i mas rere long wanem trifala samting?
5 Bakegen mo bakegen, Jisas i kambak long bigfala stampa tok ya: hemia i wan traem blong folem fasin blong Kristin laef. Blong kam ol man blong Jisas, ol Kristin, olsem Masta blong olgeta, oli mas mekem wok blong Jeova wetem tingting blong sakrifaes. (Matyu 10:37-39) Taswe, hem i tokbaot trifala samting we wan Kristin i mas rere blong mekem: (1) i mas blokem ol samting we hem nomo i wantem, (2) i mas karem pos blong hem, (3) i mas biaen long Hem oltaem.
“Man We i Wantem Kam Biaen long Mi”
6. (a) ?Olsem wanem wan man i save blokem ol samting we hem wan nomo i wantem? (b) ?Yumi mas mekem hu i haremgud bitim we yumi nomo i haremgud?
6 ?I minim wanem blong wan man i mas blokem ol samting we hem nomo i wantem? I minim se wan man i mas haedem hem wan olgeta, wan kaen ded we hem i kasem. Stampa mining blong Grik tok ya we oli tanem i kam “blokem” i “blong talem ‘no’ ”; i minim se “blong haedem olgeta.” From samting ya, sipos yu akseptem traem blong Kristin laef, yu yu rere blong lego ol prapa tingting blong yu blong kasem ol mak we yu nomo yu wantem, ol samting we yu yu laekem, glad, ol samting we yu save haremgud long hem. I olsem we, yu givim ful laef blong yu mo evri samting we i joen wetem laef ya i go long Jeova God blong oltaem. Blong blokem ol samting we wan man nomo i wantem i gat moa mining bitim fasin we sam samtaem nomo hem i livim sam samting we hem i save haremgud long hem. I defren nao, hem i minim se wan man i mas letem fasin ya blong bos long hem wan i go long Jeova. (1 Korin 6:19, 20) Man we i blokem ol samting we hem nomo i wantem i stap laef blong mekem God i glad, i no blong mekem hem wan i glad. (Rom 14:8; 15:3) I minim se evri menet long laef blong hem, hem i mas talem ‘no’ long ol samting we hem nomo i wantem mo i talem ‘yes’ long Jeova.
7. ?Wanem ya pos blong wan Kristin, mo olsem wanem hem i karem?
7 From samting ya, blong karem pos blong yu, i gat ol impoten fasin blong folem. Blong karem wan pos i wan baden mo wan saen blong ded. Kristin man i rere blong harem nogud sipos hem i kasem trabol, no hem i sem no oli mekem hem i harem nogud tumas no ating oli kilim hem i ded from we hem i wan man blong Jisas Kraes. Jisas i talem se: “Man we i no tekem [pos, NW] blong hem, blong i karem, i biaen long mi, hem i no stret blong i kam man blong mi.” (Matyu 10:38) I no evri man we oli stap harem nogud oli stap karem pos ya. Ol man nogud oli stap “harem nogud tumas” be oli no karem pos ya. (Ol Sam 32:10) Be, Kristin laef i wan laef blong karem pos ya blong mekem wok blong Jeova wetem wan tingting blong sakrifaes.
8. ?Wanem eksampel long laef Jisas i soem long ol man blong hem?
8 Laswan mak we Jisas i tokbaot i se yumi mas biaen long hem oltaem. Jisas i no talem se yumi agri mo bilif nomo long samting we hem i tijim, be tu yumi mas folem rod we hem i soem. ?Mo wanem sam long ol bigfala samting we hem i bin soemaot long laef blong hem? Taem hem i givim laswan oda long ol man blong wok blong hem, hem i talem se: “From samting ya, yufala i mas go long ol man long olgeta ples long wol, blong pulum olgeta oli kam man blong mi. . . . Mo yufala i mas tijim olgeta blong oli folem olgeta tok ya we mi mi givim finis long yufala.” (Matyu 28:19, 20) Jisas i prij mo i tijim ol man long gud nyus ya blong Kingdom. Ale kwiktaem ol disaepol blong hem oli mekem olsem mo, faswan Kristin kongregesen tu i mekem wok ya. Tabu wok ya we oli wok strong long hem wetem fasin blong olgeta blong no kam haf blong wol ya i mekem se oli kasem hadtaem mo ol man long wol oli agensem olgeta. Hem i olsem fasin blong olgeta blong karem pos i kam hevi moa.—Jon 15:19, 20; Ol Wok 8:4.
9. ?Wanem fasin blong Jisas long ol narafala man?
9 Wan narafala nambawan eksampel we yumi luk long laef blong Jisas, hemia fasin we hem i soemaot long ol narafala man. Hem i gat fasin kaen mo hem i “wan kwaet man, tingting blong [hem] i stap daon.” Taswe, ol man we oli stap lesin long hem oli haremgud long tingting mo hem i leftemap tingting blong olgeta taem hem i jes stap kolosap long olgeta nomo. (Matyu 11:29) Hem i no fosem olgeta blong folem hem no blong putum rul antap long narafala rul olsem wanem bambae oli mas mekem; no hem i mekem se oli fraet, blong fosem olgeta blong kam disaepol blong hem. Nating se oli gat tingting blong sakrifaes long laef blong olgeta, oli haremgud long trufala glad. !Hemia i defren long olgeta we oli gat tingting blong wol blong laekem samting we olgeta nomo oli wantem we fasin ya i makem “Lasdei blong wol”!—2 Timote 3:1-4.
Traehad blong Kasem mo Holemtaet Tingting blong Sakrifaes we Jisas i Gat
10. (a) ?Olsem wanem Kraes i blokem samting we hem wan nomo i wantem, olsem Filipae 2:5-8 i soemaot? (b) ?Sipos yumi ol man blong Kraes, wanem stret tingting yumi mas soemaot?
10 Jisas i soemaot eksampel long fasin ya blong blokem ol samting we wan man nomo i wantem. Hem i tekem pos blong hem mo i gohed blong karem taem hem i stap mekem wil blong Papa blong hem. Pol i raet long ol Kristin long Filipae se: “Tingting blong yufala i mas kam stret gud wetem tingting we Kraes i gat. Fastaem, bifo olgeta, hem i olsem God nomo, be hem i no ting se i mas holemtaet samting ya we hem i sem mak wetem God, no gat. Hem nomo i lego ol samting blong laet ya, nao i kam olsem man blong wok nomo. Hem i bon long wol ya, i kam olsem man. Hem i karem fasin blong man, mo i mekem tingting blong hem i stap daon blong i obei long God, gogo i ded. Mo ded ya blong hem, ol man oli nilim hem long [pos, NW].” (Filipae 2:5-8) ?Hu i save blokem olgeta samting we hem nomo i wantem bitim hemia? Sipos yu wan man blong Jisas Kraes mo yu stap folem hem, yu mas gat semkaen fasin ya long tingting blong yu.
11. ?Laef wetem tingting blong sakrifaes i minim stap laef blong mekem wil blong hu?
11 Pita, wan narafala aposol, i talem long yumi se, from we Jisas i harem nogud mo i ded from yumi, ol Kristin man tu oli mas rere, olsem ol soldia we oli reregud, wetem sem tingting we Jisas i gat. Hem i raetem se: “Taem Kraes i stap long wol ya, hem i harem nogud long bodi blong hem. Nao from samting ya, yufala tu i mas tekem sem tingting we hem i gat, blong mekem yufala i strong, from we ol man we oli stap harem nogud long bodi blong olgeta, oli no moa mekem ol sin. Oraet, nao i stat naoia, bambae yufala i no moa letem ol rabis samting we tingting blong yufala i wantem, oli bos long yufala. Ol samting we God i wantem, oli mas bos long yufala.” (1 Pita 3:18; 4:1, 2) Tingting blong sakrifaes we Jisas i gat i soemaot klia tingting blong hem long saed blong wil blong God. Tingting blong hem i stap long fasin blong hem blong onagud long God nomo, oltaem hem i stap putum wil blong Papa blong hem fastaem long prapa wil blong hem, nating se hem i stap long rod we hem i mas ded long wan fasin we i nogud.—Matyu 6:10; Luk 22:42.
12. ?Laef wetem tingting blong sakrifaes i mekem Jisas i harem nogud? Eksplenem.
12 Nating se long laef blong Jisas, tingting blong sakrifaes i mekem se hem i folem wan rod we i fulap long ol hadtaem mo traem, hem i no ting se rod ya i strong tumas. Jisas i glad blong givim hem wan blong mekem wil blong God. Long hem, wok blong Papa blong hem i olsem kakae. Hem i haremgud tumas long hem, olsem wan man i haremgud long wan gudfala kakae. (Matyu 4:4; Jon 4:34) Taswe, sipos yu wantem haremgud long laef blong yu, i no gat wan samting yu save mekem we i moa gud bitim we yu folem eksampel blong Jisas taem yu stap traehad blong kasem sem tingting we hem i gat.
13. ?Olsem wanem lav i wan paoa we i pusum man blong gat tingting blong sakrifaes?
13 ?Wanem samting nao i stap pusum yumi blong gat tingting blong sakrifaes? Long wan tok, hemia lav. Jisas i talem se: “ ‘Yu mas laekem [Jeova, NW] we i God blong yu long olgeta tingting blong yu, mo long olgeta laef blong yu, mo long olgeta maen blong yu. Hemia loa ya we i hae moa long ol narafala loa, mo i nambawan blong folem. Mo narawan, kolosap i olsem. Yu mas laekem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu. Hemia namba tu loa ya.’ ” (Matyu 22:37-39) Wan Kristin i no save lukaot ol samting we hem nomo i wantem mo, long semtaem, i obei long ol tok ya. Ol samting we hem nomo i stap glad mo i intres long olgeta oli mas stanap fastaem long lav blong hem long Jeova mo long ol man we oli stap raonabaot long hem. Hemia nao fasin blong laef we Jisas i gat, mo hem i wantem se ol man blong hem tu oli folem fasin ya.
14. (a) ?Wanem ol responsabiliti we Hibrus 13:15, 16 i eksplenem? (b) ?Wanem i pusum yumi blong talemaot gud nyus wetem wan strong tingting?
14 Aposol Pol i kasem save long loa ya long saed blong fasin lav. Hem i raetem se: “From samting ya, yumi mas stap joen long Jisas ya, nao oltaem yumi mas stap leftemap nem blong God. Fasin ya i olsem we oltaem yumi stap kilim anamol blong givim i go long Hem. From we evri taem yumi talemaot nem blong Jisas long fes blong ol man, i olsem we yumi givim presen i go long God. Mo yufala i mas stap mekem ol gudfala fasin, mo yufala i mas stap givgivhan long yufala. . . . From we ol fasin ya tu oli olsem we yufala i stap kilim anamol blong givim i go long God, we hem i glad tumas long olgeta.” (Hibrus 13:15, 16) Ol Kristin oli no mekem sakrifaes long anamol i go long Jeova no sam samting olsem; taswe, oli no nidim ol pris blong mekem wosip blong olgeta long wan haos prea blong wol ya. Yumi stap givim sakrifaes blong talem tangkyu blong yumi i gotru long Jisas Kraes nomo. Mo sakrifaes blong talem tangkyu ya, we hem i olsem fasin blong talemaot nem blong hem long open ples, hemia nao bigfala fasin we yumi soemaot lav blong yumi long God. Antap moa fasin blong yumi blong no tingbaot yumi wan nomo we i stanap long lav i pusum yumi blong talemaot gud nyus wetem strong tingting, blong traehad oltaem blong givim frut blong maot blong yumi i go long God. Long rod ya yumi stap soemaot lav long ol man we oli stap raonabaot long yumi tu.
Tingting blong Sakrifaes i Karem Plante Blesing
15. ?Yumi save ansa long ol wanem kwestin long saed blong tingting blong sakrifaes?
15 Spel smol mo ansa long ol kwestin we i kam biaen: ?Rod we mi stap folem long laef blong mi naoia i soemaot tingting blong sakrifaes? ?Ol mak we mi putum long laef blong mi oli stap soemaot tingting ya? ?Ol memba blong famle blong mi oli stap kasem gudfala frut long saed blong speret from eksampel blong mi? (Skelem wetem 1 Timote 5:8.) ?Olsem wanem long ol pikinini we oli no gat papa blong olgeta mo ol wido woman? ?Mi mi stap givhan long olgeta tu from tingting blong sakrifaes we mi gat? (Jemes 1:27) ?Mi save tekem moa taem blong spenem long fasin blong sakrifaes blong givim ona long God long open ples? ?Mi mi save traehad blong gat jans blong mekem wok blong paenia, wok long Betel, no wok blong misinari, no mi save go blong wok long wan ples we i gat bigfala nid blong talemaot Kingdom?
16. ?Olsem wanem fasin waes i save givhan long yumi blong folem wan laef wetem tingting blong sakrifaes?
16 Samtaem i nidim waes fasin long plan blong yumi blong kasem fulwan mak blong mekem wok blong Jeova wetem wan tingting blong sakrifaes. Eksampel, Janet we i wan fultaem paenia long Ekwado, hem i stap wok fultaem long wok blong hem blong winim mane. I no longtaem, plan blong hem i mekem i hadwok long hem blong kasem stret ol haoa blong fultaem paenia wetem wan gudfala tingting. Hem i mekem desisin blong eksplenem trabol ya long bos blong hem mo i askem bos sipos hem i save wok haftaem nomo. From we bos ya i no wantem blong sista ya i wok haftaem, sista ya i tekem Maria i kam wetem hem, we hem i stap lukaot wan haftaem wok, blong hem i save mekem wok blong paenia. Wanwan long tufala i askem blong wok long haf dei, tufala i seraotem haoa blong wok ya blong mekem se wok ya i save gohed long ful dei. Bos i agri long samting we tufala i askem. Naoia tufala sista ya i stap wok olsem fultaem paenia. From nambawan samting we i kamaot from fasin ya, Kaffa we hem tu i stap wok fultaem long sem kampani ya mo i stap traehad blong gohed long wok blong paenia, hem tu i tekem Magali mo i mekem sem samting. Bos i akseptem samting ya tu. Taswe fo sista oli save mekem wok olsem paenia, i no tufala ya nomo we tufala i bin tingting blong lego wok blong fultaem paenia. Fasin waes blong mekem plan mo blong tekem fas step blong askem i karem ol gudfala frut.
17-21. ?Olsem wanem wan man wetem waef blong hem tufala i tingting bakegen long plan blong laef blong tufala, mo wanem samting i kamaot from?
17 Antap moa, tingbaot rod blong tingting blong sakrifaes we Evonne i folem long ol ten yia we oli pas finis. Hem i raetem ol tok ya i go long ‘Watch Tower’ Sosaeti long Mei 1991 se:
18 “Long Oktoba 1982, famle blong mi wetem mi mifala i go long Betel long Bruklin. Taem mi luk, samting ya i mekem mi mi wantem wok long ples ya. Mi ridim wan pepa we i blong askem wok long ples ya, mo i gat wan strong kwestin, se ‘?Wanem medel namba blong yu long haoa long wok blong prij long ol sikis manis we i pas? Sipos medel namba blong haoa blong yu i no kasem ten, eksplenem from wanem.’ Mi no save tingbaot wan gudfala risen, ale mi putum wan mak mo long faef manis mi kasem mak ya.
19 “Nating se mi save tingbaot sam eskyus blong no mekem wok blong paenia, taem mi ridim 1983 Yearbook of Jehovah’s Witnesses, mi luksave se plante oli bin winim ol traem we oli bigwan moa bitim mi blong mekem wok blong paenia. Ale, long Epril 1, 1983, mi finis long fultaem wok we mi stap winim bigfala mane long hem mo mi kam wan haftaem paenia, mo mi kasem mak blong fultaem paenia long Septemba 1, 1983.
20 “Mi glad blong maredem wan nambawan man blong givhan long Epril 1985. Tri yia biaen, wan tok long saed blong wok blong paenia we i kamaot long distrik asembli i pusum hasban blong mi blong askem long mi se, ‘?Yu save sam risen from wanem mi no save stat blong mekem wok blong paenia long Septemba 1?’ Stat long taem ya hem i joenem mi long wok ya blong tu yia.
21 “Mo tu hasban blong mi i wok long saed blong bildim ol haos blong Betel long Bruklin blong tu wik mo hem i fulumap fom blong joen long bigfala program blong bildim haos raonabaot long wol. Ale long Mei 1989 mifala i go long Naejeria blong wan manis blong givhan blong bildim branj. Tumora bambae mifala i go long Jemani, we bambae mifala i stretem visa blong mifala blong go insaed long Polan. Mitufala i glad tumas blong joen long nambawan wok olsem, we mitufala i no save fogetem impoten wok ya blong bildim ol branj mo we i olsem wan narafala haf blong fultaem paenia.”
22. (a) ?Olsem wanem yumi save kam olsem Pita, blong kam wan tul blong blokem narafala? (b) ?Mekem wok blong Jeova wetem tingting blong sakrifaes i no dipen long wanem samting?
22 ?Sipos yu wan we yu no save mekem wok blong paenia, yu save leftemap tingting blong olgeta we oli stap long fultaem wok ya blong no lego long nambawan jans blong olgeta mo ating givhan long olgeta blong mekem olsem? ?No bambae yu olsem sam memba blong famle no ol fren we oli ting se oli stap soem kaengud fasin we, olsem Pita, maet oli talem long wan man we i wok fultaem olsem paenia blong tekem wan laef we i isi, blong mekem hem wan i haremgud, oli no tingbaot se hemia wan tul blong blokem narafala? Tru ya, sipos wan paenia i kasem sik we i mekem se hem i stap long denja no sipos hem i stap sakemaot ol narafala Kristin wok we hem i mas mekem, maet hem i mas livim fultaem wok ya blong smoltaem. Mekem wok blong Jeova wetem wan tingting blong sakrifaes i no dipen long wan nem nomo we yu tekem, olsem paenia, man blong wok long Betel no narafala. No gat, hem i dipen long evri fasin blong laef blong yumi wanwan—olsem wanem yumi stap tingting, wanem samting we yumi mekem, wanem fasin blong yumi long ol narafala man, olsem wanem yumi stap laef.
23. (a) ?Olsem wanem yumi save gohed blong gat glad blong stap olsem wan man blong wok wetem God? (b) ?Yumi sua long wanem samting we yumi faenem long Hibrus 6:10-12?
23 Sipos i tru se yumi gat tingting blong sakrifaes, bambae yumi glad blong stap olsem ol man blong wok wetem God. (1 Korin 3:9) Bambae yumi haremgud blong save se yumi stap mekem hat blong Jeova i glad. (Proveb 27:11) Mo yumi sua se bambae Jeova i neva fogetem yumi no i lego yumi long taem we yumi stap holemstrong long hem.—Hibrus 6:10-12.
[Futnot]
a Long Grik, “tul blong blokem” (skanʹda·lon, σκάνδαλον) i olsem “nem blong wan haf blong wan trap we bet i stap long hem, taswe, trap hem wan.”—Vine’s Expository Dictionary of Old and New Testament Words.
?Wanem Ol Tingting Blong Yu?
◻ ?Olsem wanem Pita i kam wan tul blong blokem tingting blong sakrifaes?
◻ ?I minim wanem blong ‘blokem samting we wan man nomo i wantem’?
◻ ?Olsem wanem wan Kristin i save karem pos blong hem?
◻ ?Olsem wanem yumi save kasem mo holemtaet tingting ya blong sakrifaes?
◻ ?Wanem i mas pusum yumi blong gat tingting blong sakrifaes?
[Tok Blong Pija Long Pej 10]
?Yu wantem blokem ol samting we yu nomo yu wantem, karem pos blong yu, mo biaen long Jisas?