Folem Jisas Oltaem
1 Wan taem, Jisas i bin talem se: “Man we i wantem kam biaen long mi i mas blokem ol samting we hem nomo i wantem, nao i mas karem pos ya we hem i save ded long hem, mo i mas biaen long mi oltaem.” (Mat. 16:24, NW) I sua se yumi wantem mekem samting we Jisas i talem long tok blong hem. Bambae yumi lukluk wanem ol wanwan haf blong tok ya blong singaotem yumi, oli minim.
2 “Blokem Ol Samting We Hem Nomo i Wantem”: Taem yumi givim laef blong yumi long Jeova, yumi blokem ol samting we yumi nomo i wantem. Stampa mining blong Grik wod ya we oli tanem i kam “blokem ol samting we hem nomo i wantem,” hemia se “talem no.” Hemia i minim se yumi agri blong lego ol prapa mak we yumi traehad blong kasem, mo ol samting we yumi nomo i wantem, ol samting we oli save mekem yumi haremgud long saed blong bodi, mo ol pleplei we oli stanap long fasin blong tingbaot yumi nomo. Yumi gat strong tingting blong mekem Jeova i glad blong olwe.—Rom 14:8; 15:3.
3 “Karem Pos Ya We Hem i Save Ded Long Hem”: Laef blong ol Kristin man i wan laef blong karem pos ya we oli save ded long hem. Hemia i minim se oli rere blong lego plante bigfala samting long laef blong olgeta blong mekem wok blong Jeova. Wan rod blong soemaot tingting ya blong livim ol samting we yumi nomo i wantem, i blong wok strong long wok blong talemaot gud nyus. Long yia ya, plante pablisa oli haremgud finis long wok blong haftaem paenia. Ating yu yu wan long olgeta ya, mo yu save agri se ol blesing we yu kasem oli moa, bitim ol samting we yu livim blong mekem wok ya. Plante taem, ol pablisa long kongregesen we oli no save mekem wok blong haftaem paenia, oli traehad blong spenem moa taem long wok blong prij. Blong halpem olgeta, sam kongregesen oli jenisim taem blong ol miting blong prij blong olgeta, oli putum i gobak sam menet nomo bifo long taem we oli stap folem finis. Sam pablisa oli kasem nambawan frut tu, taem oli tekem disisen blong prij long ‘jes wan haos moa,’ no blong wok ‘jes sam menet moa.’
4 Wan narafala rod blong soemaot tingting ya blong livim ol samting we yumi nomo i wantem, hem i long fasin blong putum sam mak we yumi traehad blong kasem. Samfala oli naf blong kam fultaem paenia taem oli mekem wan gudfala plan mo jenisim lelebet program blong olgeta. Sam narafala oli jenisim sam samting long laef blong olgeta blong mekem se oli save wok long Betel no mekem wok blong misinari. Samfala oli muf i go long wan ples we i nidim moa man blong talemaot Kingdom.
5 “Biaen Long Mi Oltaem”: Nating se ol disaepol blong Jisas oli fesem plante hadtaem, fasin blong hem blong wok strong mo blong stanap strong long wok blong prij, i leftemap tingting blong olgeta. (Jon 4:34) Taem hem i stap wetem olgeta mo oli lesin long tok blong hem, oli haremgud bakegen long tingting blong olgeta. Hemia from wanem olgeta ya we oli biaen long Jisas oli bin soemaot trufala glad. (Mat. 11:29) Long sem fasin, yumi mas leftemap tingting blong yumi wanwan blong stanap strong long impoten wok ya blong talemaot Kingdom mo blong mekem disaepol.
6 Yumi evriwan i mas obei long tok blong Jisas we i singaot yumi blong folem hem oltaem. Yumi save mekem olsem, sipos yumi traehad blong gat tingting ya blong livim ol samting we yumi nomo i wantem. Olsemia nao, bambae yumi kasem bigfala glad naoia, mo yumi save tingbaot ol blesing we oli bigfala moa we bambae yumi kasem long fyuja.