Mekem Fasin Joen Long Mared i Kam Strong Moa

“?I STRET long loa blong yumi blong man i mekem divos long woman blong hem, from evri tok we man i talem, no i no stret olsem?” Ol Farisi we oli stap traem blong kasem Bigfala Tija Jisas Kraes long toktok blong hem, oli bin askem kwestin ya long hem. Hem i ansa long olgeta taem hem i tokbaot faswan mared mo i givim rul long bisnes ya, i se: “From we God i joenem tufala olsem, man i mas no brekemaot tufala bakegen.”

Ol Farisi oli agyu we Moses i mekem ol rod blong mekem divos taem hem i raetemdaon rul ya se man i save “givim pepa blong divos long woman blong hem nao i save sanemaot hem.” Jisas i ansa long olgeta, i se: “From we hed blong yufala i strong tumas, taswe Moses i letem long yufala, blong yufala i mekem divos long ol woman blong yufala. Be fastaem i no olsem. Mo mi mi talem long yufala, sipos man i mekem divos long woman blong hem, be woman ya i no bin slip wetem narafala man, nao man ya i go mared long narafala woman, man ya i mekem sin. Hem i mekem i krangke long woman blong hem.”​—Matyu 19:​3-9.

Long stat, fasin blong joen long mared hem i blong olwe. Ded tu i no save seraotem faswan hasban mo waef, from we God i wokem tufala i stretgud olgeta wetem tingting blong laef gogo i no save finis. Be, tufala i mekem sin. Sin blong tufala i spolem mared blong ol man. Enemi ya ded i stat blong seraotem hasban mo waef. God i luk ded olsem samting blong finisim wan mared, olsem we yumi ridim long Baebol se: “Woman we i mared finis, hem i no save livim man blong hem taem we man blong hem i stap laef yet. Be taem we man blong hem i ded, hem i fri blong i mared long wanem man we hem i wantem. Be wan samting nomo, man i mas wan man blong Masta blong yumi.” (1 Korin 7:39) Samting ya i defren olgeta long ol tingting blong skul we, taem hasban i ded ol man oli askem no fosem waef blong man ya blong hem i bonem hem wan i ded, from oli bilif se fasin joen long mared i gohed yet long sam kaen laef afta long ded.

Rod We Loa Blong Moses i Givim

Taem Loa blong Moses i kam, fasin fren insaed long mared i no moa strong, hem i kasem mak ya we Jeova i mekem wan rod blong man i save divos, from we hed blong ol man Isrel i strong tumas. (Dutronome 24:1) I no plan blong God long ol man Isrel blong oli yusum nogud loa ya blong oli stap mekem divos long woman blong olgeta from ol smosmol mastik, olsem yumi luk long loa ya blong hem se oli mas laekem ol man raonabaot long olgeta olsem we oli stap laekem olgeta wanwan. (Levitikas 19:18) Mo tu fasin blong mekem pepa blong divos i olsem wan rod blong blokem divos, from we taem hasban we i wantem divos i stap mekem rere pepa blong divos, hem i mas go luk ol hae man we oli save givim raet long hem, olgeta ya bambae oli traehad blong mekem hasban ya mo waef blong hem tufala i stap gud tugeta bakegen. Yes, God i no givim loa ya blong givim raet long man i mekem divos long woman blong hem “from evri tok we man i talem.”​—Matyu 19:3.

Be, sloslou ol man Isrel oli fogetem tingting biaen long loa ya mo oli yusum tok ya olsem eskyus blong mekem divos long woman blong olgeta from eni samting, olsem we oli wantem. Long ol yia 400 B.K.T., oli stap spolem ol woman ya we oli stap mared wetem olgeta taem oli yangfala, oli mekem divos long olgeta from eni kaen samting nomo. (Malakae 2:​14-16) From samting ya nao Jisas i tok strong long fasin blong mekem divos olsem ol man Isrel oli stap mekem long taem blong hem.

I Gat Wan Risen Nomo We i Stret Blong Mekem Divos

Be, Jisas i givim wan risen we i stret blong mekem divos from: hemia fasin blong slip wetem narafala man. (Matyu 5:​31, 32; 19:​8, 9) Tok ya we oli tanem i kam “slip wetem narafala man” i minim olgeta nogud fasin blong seks, afsaed long mared we i stanap long Baebol, olsem man i slip wetem narafala woman no woman i slip wetem narafala man we i no hasban no waef blong hem, man i slip wetem man no woman i slip wetem woman, no wetem wan anamol.

Nating se i olsem, Jisas i no askem hemia we i mekem i no stret blong hem i mekem divos. Hem i dipen long hemia we i stap tru long man no woman blong hem, blong hem i skelemgud ol frut we oli save kamaot sipos hem i wantem divos no no gat. Ol waef we oli wantem mekem divos olsem i stanap long poen ya we Baebol i givim, maet oli wantem tu blong tingbaot tok ya blong God taem hem i jajem faswan woman from sin we hem i mekem. Antap moa long panis blong ded, God i talem stret long Iv se: “Bambae yu stap wantem man blong yu yet, mo hem bambae i bos blong yu.” (Jenesis 3:16) Buk ya blong C. F. Keil mo F. Delitzsch, Commentary on the Old Testament, i tokbaot fasin ya blong “wantem” olsem “wan tingting blong wantem tumas we i strong olsem sik.” I tru, filing ya blong wantem i no strong olsemia long evri waef, be taem wan waef i wantem mekem divos long hasban blong hem we i mekem i no stret, i waes blong i tingbaot ol nid blong filing we ol woman oli kasem from Iv. Be, maet from rabis sik, olsem AIDS, we narafala i save kasem from hasban no waef blong hem i go slip wetem narafala man no woman, ale samfala we oli stap tru long hasban no waef blong olgeta oli bin mekem divos olsem Jisas i talem.

Planem Ol Sid Blong Trabol Blong Famle

Stronghed blong man i stat from sin we tufala faswan man mo woman tufala i mekem agens long God. (Rom 5:12) Ol sid blong trabol long famle oli stat taem faswan man mo woman tufala i sin agens long Papa blong tufala long heven. ?Olsem wanem? Taem snek i pulum faswan woman, Iv, blong kakae long tri ya we hem i no mas kakae long hem, hem i gohed mo i kakae frut blong tri ya. Afta nomo we hem i bin mekem disisen ya, nao hem i talem tok blong snek ya long hasban blong hem. (Jenesis 3:6) Yes, hem i no toktok wetem hasban blong hem fastaem bifo i mekem wan samting. Hemia sem kaen trabol we plante famle oli stap fesem tede​—oli no stap toktok blong talemaot wanem i stap long hat blong olgeta.

Biaen, taem tufala i kasem frut blong sin blong tufala, tufala ya Adam mo Iv tufala i yusum sem fasin we plante hasban mo waef oli stap yusum tede taem oli kasem trabol, hemia fasin blong blemem narafala. Faswan man Adam, i blemem waef blong hem mo Jeova from samting we hem i bin mekem, hem i se: “Yes, be woman ya nomo we yu givim long mi blong i stap wetem mi, hem nao i givim frut blong tri ya long mi, nao mi kakae.” Nao woman i talem se: “No, be snek ya. Hem nao i gyaman long mi, nao mi kakae.”​—Jenesis 3:​12, 13.

Jajmen toktok blong Jeova long Adam mo Iv i soem wan narafala poen insaed long ol trabol we bambae oli kamaot biaen. Long saed blong fasin fren blong Iv wetem hasban blong hem, Jeova i talem long Iv i se: “Hem bambae i bos blong yu.” Plante hasban tede, olsem Isao we faswan haf i tokbaot hem, oli stap bos nogud long waef blong olgeta, oli no tingbaot filing blong ol waef blong olgeta. Be, plante waef oli gohed blong wantem yet ol man blong olgeta blong oli tingbaot olgeta. Taem ol waef oli no kasem samting ya we oli wantem, ale oli save askem samting ya taem oli mekem sam samting long fasin blong tingbaot olgeta nomo. Taem plante hasban oli stap bos mo plante waef oli stap wantem, fasin blong man i tingbaot hem nomo i stap gru nao, mo pis i no moa stap. Insaed long wan pepa we stampa tok blong hem se “How to Analyze Today’s Divorces” (Olsem Wanem Blong Skelem Ol Divos Blong Tede), Shunsuke Serizawa i talem se: “Sipos yumi mestem stampa blong bisnes ya we ‘man i stap folem prapa tingting blong hem,’ olsem, fasin ya we man i stap tingbaot hem wan fastaem, kwiktaem bambae yumi no save skelem ol divos blong tede.”

Be, Jeova i lidim man long Tok blong hem blong mekem se ol hasban mo ol waef we oli gat fasin obei, oli save haremgud long mared nating se oli no stretgud olgeta. Isao i folem rod ya we God i soem mo naoia hem i stap haremgud long wan hapi laef long famle. I gud yumi luk olsem wanem ol rul blong Baebol oli save givhan blong mekem fasin joen long mared i kam strong moa.

Tokbaot ol Samting Tugeta

Long plante mared, fasin blong no toktok tugeta, fasin blong blemem narafala, mo fasin ya blong man i tingbaot hem wan oli mekem i hadwok long hasban mo waef blong tufala i kasem save long ol filing blong tufala wanwan. Woman ya blong stadi, Caryl S. Avery i talem se: “Fasin blong serem filing bitwin hasban mo waef i save joenem gud tufala, ale blong kasem mak ya tufala i mas trastem tufala fulwan. Mo tede fasin blong trastem narafala i smol.” Fasin blong serem ol dip filing i bildimap fasin ya blong trastem narafala man. Samting ya i soem se hasban mo waef tufala i mas storeyan long ol samting we oli stap long hat blong tufala.

Proveb i yusum wan pijatok blong leftemap tingting blong ol man blong oli serem ol dip tingting blong olgeta, i se: “Advaes we i stap long hat blong man i olsem dip wora, be man we i gat fasin luksave, hem nao i save pulum wora ya i kam antap.” (Proveb 20:5) Ol hasban mo ol waef oli mas gat fasin luksave mo pulum ol tingting ya we oli stap dip long hat blong hasban no waef blong olgeta. Tingbaot se hasban no waef blong yu i harem nogud. I nogud blong talem se: “Tede mi tu mi harem nogud we,” maet i gud blong talem long kaen fasin se: “?Yu harem nogud tede? ?Wanem i hapen?” Maet i tekem taem mo fasin traehad blong lesin long hasban no waef blong yu, be plante taem bambae yu laekem, mo haremgud from, mo yu sevem taem long rod ya bitim we yu no lesin long hasban no waef blong yu mo yu mas fesem ol strong filing we bambae oli kamaot biaen.

Blong narafala i trastem yu, yutufala wanwan i mas tok tru mo traem talem ol filing long wan rod we narafala i save kasem save. Tok blong God i talem se: “From we yumi evriwan i olsem ol haf blong wan bodi nomo. . . . Yufala i mas tok tru nomo long yufala.” (Efesas 4:25) Blong tok tru nomo, i nidim fasin luksave. Sipos wan waef i harem olsem we hasban blong hem i no bin lesin long hem. Bifo we woman ya i toktok, hem i mas tingbaot proveb ya: “Man we i blokem ol tok blong hem, hem i gat save, mo man we i gat fasin luksave, speret blong hem i kwaet.” (Proveb 17:27) I nogud blong tok strong long hasban blong hem se, “!Yu neva lesin long mi!” i gud moa blong talem ol filing blong hem long kwaet fasin bifo we wari mo fasin kros i kam bigwan insaed long hem. Maet hem i save soem filing blong hem long tok olsem se, “Mi save se yu bisi, be sipos mi spenem moa taem wetem yu bambae mi glad tumas.”

Tru ya, “olgeta plan blong man oli save foldaon sipos oli no toktok gud tugeta fastaem.” (Proveb 15:22) Hasban no waef blong yu i laekem yu, be samting ya i no min se hem i save talem samting we i stap long tingting blong yu. No gat. Yu mas letem hasban no waef blong yu i save filing blong yu long wan fasin we i waes. Samting ya bambae i givhan long yutufala, olsem Kristin hasban mo waef, blong mekem ol gudfala jenis blong bambae ‘yufala i kam wan kampani nomo, mo speret i givim pis long tingting blong yufala.’​—Efesas 4:2, 3.

Eksampel, tingbaot Kazuo, we waef blong hem i stap daonem hem oltaem mo oltaem Kazuo i wantem plei lake. Hem i gat plante kaon we i kasem plante milyan vatu. Hem i askem mane blong pem ol kaon blong hem, ale ol kaon i go antap moa oli kavremap hem olsem we hem i stap draon moa long wora we i doti. Nao hem i stat blong stadi Baebol mo biaen hem i harem se hem i save talem ol trabol ya long woman blong hem. Hem i rere blong fesem ol strong toktok blong woman blong hem. Be, hem i sapraes taem waef blong hem, we i stap stadi Baebol fastaem long hem, i ansa long kwaet fasin se: “Yumitu traem luk olsem wanem yumi save pembak ol kaon ya.”

Long nekis dei, tufala i visitim ol man ya we tufala i gat kaon wetem olgeta mo stat blong pembak kaon blong tufala, mo tufala i salem haos blong tufala. I tekem kolosap wan yia blong finisim ol kaon ya. ?Wanem i jenisim fasin blong waef blong hem, Kimie? Kimie i talem se: “Ol toktok we oli stap long Filipae japta 4, vas 6 mo 7, oli rili tru. ‘I nogud yufala i stap tingting tumas from sam samting. Be sipos yufala i sot long wan samting, yufala i mas prea long God from. Yufala i mas askem long hem, mo yufala i mas talem tangkyu tu long hem. Nao pis we God i save putum, hem i bigfala moa, i bitim save blong yumi olgeta. Mo God bambae i putum pis ya long tingting blong yufala, blong lukaotgud long yufala ya we i joen long Jisas Kraes.’ ” Hem i gohed i se: “Taem wan fren blong mi i luk olsem wanem mi mi stap haremgud nating se i gat ol hadtaem, i stat blong joen wetem mi blong stadi Baebol.” Kazuo mo waef blong hem tufala i bin baptaes mo naoia tufala i stap haremgud long wan hapi laef long famle.

Antap moa long fasin ya blong trastem tufala wanwan taem tufala i stap tok tru long tufala, ol hasban mo ol waef we oli gat ol ekspiryens antap oli mekem sam samting we i givhan long ol hasban mo waef blong winim trabol blong olgeta. Oli stap toktok long Jeova we i Stampa blong mared. Nating se i gat ol traem mo ol hadtaem we ol hasban mo ol waef oli stap fesem, God bambae i blesem olgeta wetem pis ya blong hem we i bigfala moa bitim save blong olgeta sipos oli traehad blong folem ol rul blong hem mo livim ol narafala samting i stap long han blong hem. Fasin blong stap prea tugeta i givhan bigwan. Hasban nao i mas mekem fastaem mo ‘talemaot ol trabol blong hem’ long God, askem God blong i lidim mo soem rod long hem long eni trabol we hem mo waef blong hem tufala i stap fesem. (Ol Sam 62:8) Yes, Jeova God bambae i harem ol prea olsem.

Yes, i gat rod blong mekem fasin joen long mared i kam strong moa. Yes naoia, nating se yumi stap laef long laef ya blong yumi we i no stretgud olgeta insaed long wan wol we i fulap wetem trabol, ol hasban mo ol waef oli save faenem bigfala glad long laef blong olgeta. Yu save faenem ol gudfala rod blong folem mo ol advaes blong God long buk ya ?Olsem Wanem Blong Mekem Famle Blong Yu i Hapi? we Watchtower Bible and Tract Society of New York, Inc. i wokem. Antap moa, ol hasban mo ol waef we oli traehad blong folem ol rul blong Baebol oli gat hop blong joen tugeta long lav long nyufala wol ya blong God we bambae i no longtaem i kam.