Fasin Joen Long Mared i No Moa Strong
WAN yangfala mama i stap holemgud pikinini blong hem we i gat tu manis. Nao, wantaem nomo, hem i lego pikinini ya i foldaon long graon. Sam haoa biaen pikinini boe ya i ded. Mama ya i talem se: “Mi mi minim blong mekem olsem, from we hasban blong mi i no moa tingbaot mifala ol famle blong hem.” Be mama ya i no tokbaot samting ya fastaem wetem hasban blong hem, hem i gohed i putum kros blong hem long bebi ya we i no mekem wan rong samting.
Sam mama nomo oli save mekem ol nogud samting olsem kilim pikinini i ded, plante oli no mekem be oli gat filing olsem hem. I stap kam strong moa long ol mared man mo woman blong gat wan gudfala laef long mared blong olgeta. Journal of Marriage and the Family, i talem se: “From we i isi blong mared i brokdaon long Amerika naoia, taswe blong man i mekem wan strong promes we i holem fulwan long mared blong hem . . . samting ya i denja tumas mekem se i no gat wan man we i waes olgeta we bambae i mekem.”
Naoia we laef i strong, rabis fasin blong seks, no save laef tugeta, ol kaon, ol rao wetem ol palika, mo fasin blong man i tingbaot hem wan oli mekem faet i kamaot long famle, we samtaem i kasem mak ya blong divos. Fasin ya i bigwan tumas long Japon mekem se Katolik Jyos tu, we hem i stap tok strong agensem fasin blong divos, i putumap wan spesel komiti blong mekem laef blong ol memba we oli divos mo oli mared bakegen i isi moa. Plante moa man we oli stap go long jyos oli kasem ol trabol blong divos.
Be, ol divos ya oli soem smol samting nomo long saed blong bigfala trabol we i stap. Wan stadi long Amerika i soem se fasin blong laef insaed long mared nao i stampa blong ol divos ya we i stap go antap, be i no from tingting blong ol man i jenis long saed blong divos we i mekem i isi moa blong divos. Taem hasban mo waef oli no moa traehad mo holem strong tingting blong mekem mared i wok, nao mared laef i lusum ol gudfala samting long hem. Plante waef mo hasban oli stap soem nomo blong ol man oli luk se oli mared, be oli no stap slip tugeta, oli no stap toktok long tufala. Sam oli harem olsem woman ya blong Is we i pem narafala gref we bambae oli berem hem long hem, hem i talem se, ‘Mi no wantem stap tugeta wetem hasban blong mi long gref ya.’ From we woman ya i no save divos long man blong hem naoia, hem i wantem divos long hem afta long ded. Sore tumas, nating se ol man olsem oli no divos, mared laef i no givim glad long olgeta.
Hemia nao samting we i kamaot long Isao. Hem i mared long waef blong hem from wan kwik tingting we i kasem hem, taswe hem i no gat strong tingting blong jenisim fasin blong laef we hem i stap tingbaot hem wan nomo. Nating se hem i winim plante mane olsem draeva blong kamiong, hem i spenem olgeta mane blong hem long kakae mo dring, hem i no lukaot long famle blong hem. From samting ya, hem i rao oltaem wetem woman blong hem. Biaen Isao i talem se: “Taem mi no glad long sam samting, bambae mi gohom mo mi putum kros blong mi long famle blong mi.” I olsem volkeno we i no save go daon, toktok long saed blong divos i faerap evridei.
Plante man mo woman oli stap laef long wan nogud mared. Nating se oli divos no no gat, olgeta ya oli no faenem glad. ?I gat rod blong oli haremgud long mared blong olgeta? ?Olsem wanem oli save mekem fasin joen long mared blong olgeta i kam strong moa?