?God i Rili Save Yu?
‘O Jeova, . . . yu save olgeta samting we mi stap mekem.’—OL SAM 139:1, 3.
1. ?Filing ya se ‘ol narafala oli no kasem save’ long ol wari, ol problem, mo ol hadtaem we yumi fasem i bigfala olsem wanem?
?I GAT man we i rili savegud ol wari, ol hadtaem, mo ol problem we yu stap fesem? I gat plante milyan man raonabaot long wol, ol yangfala mo ol olfala, oli no gat famle no fren we i lukaot long olgeta. Insaed long ol famle tu, plante waef—yes, mo ol hasban tu—oli harem se waef no hasban blong olgeta i no kasem save long ol trabol we i mekem oli harem nogud. Samtaem, wetem fasin kros, oli talem se: “!Be yu no kasem save long mi!” Mo plante yangfala tu oli bin talem se i no gat wan man i kasem save long olgeta. Be, long medel blong olgeta we oli stap wantem ol narafala blong kasem moa save long olgeta, biaen i gat sam long olgeta we oli bin mekem laef blong olgeta i gat mining. ?Olsem wanem samting ya i save kamaot?
2. ?Wanem i save mekem se ol man blong wosip long Jeova oli gat wan laef we oli harem gud tumas?
2 Hemia from we, nating se ol man oli kasem save long filing blong olgeta fulwan no no gat, be oli bilif se God i save olgeta samting we oli stap fesem, mo from we oli ol man blong hem, God i stap givhan long olgeta blong fesem ol problem blong olgeta. (Ol Sam 46:1) Antap moa, Tok blong God mo ol Kristin elda we oli gat fasin luksave oli givhan long olgeta blong lukluk i go moa long fyuja bitim we oli stap tingbaot prapa problem blong olgeta naoia. Baebol i givhan long olgeta blong luksave se fasin blong olgeta blong wok strong long wok blong God i nambawan long ae blong God mo se ol man we oli putum hop blong olgeta long God mo olgeta samting we hem i givim tru long Jisas Kraes oli gat nambawan fyuja.—Proveb 27:11; 2 Korin 4:17, 18.
3, 4. (a) ?Olsem wanem fasin tangkyu blong yumi long tok ya se Jeova “hem i God” mo se “hem nomo i mekem yumi” i givhan long yumi blong faenem glad long wok blong hem? (b) ?From wanem yumi gat ful tras long nambawan kea blong Jeova?
3 Ating yu yu savegud ol tok blong Ol Sam 100:2, we i talem se: “Yumi glad, yumi mekem wosip long hem. Yumi kam long fes blong hem, yumi singsing.” ?Hamas man oli rili wosip long Jeova long fasin ya? Vas 3 i soemaot from wanem i stret blong mekem olsem, i pulum tingting blong yumi blong no foget se: “Yumi mas tingbaot we Hae God, hem i God. Hem nomo i mekem yumi, mo yumi i blong hem. Yumi ol man blong hem, yumi olsem ol sipsip blong hem.” Long Hibru lanwis, tok ya ‘hem’ long ples ya i minim ‘Elo·himʹ, we i soemaot se hem i bigfala tumas, i hae olgeta, mo i nambawan. Hem nomo i trufala God. (Dutronome 4:39; 7:9; Jon 17:3) Ol man blong God oli save se hem i wan God we i hae olgeta, i no wan samting nomo we oli lanem be olsem wan samting we i hapen long laef blong olgeta mo fasin blong olgeta blong obei, fasin blong trastem, mo wosip blong olgeta i pruvum samting ya.—1 Kronikel 28:9; Rom 1:20.
4 From we Jeova i wan God we i laef, hem i save lukluk long hat blong yumi tu, i no gat wan samting we i save haed long hem. Hem i savegud olgeta samting we i stap hapen long laef blong yumi. Hem i savegud ol stampa blong ol problem we yumi stap fesem mo trabol long tingting mo filing we yumi save kasem from ol problem ya. Olsem Man we i Mekem olgeta samting, hem i savegud yumi bitim save we yumi gat long yumi wan. Mo tu hem i save olsem wanem blong givhan long yumi blong winim ol problem blong yumi mo olsem wanem blong mekem yumi haremgud longtaem. Bambae hem i givhan long yumi wetem fasin lav—olsem wan man blong lukaot sipsip i holem wan smol sipsip i kam long jes blong hem—taem yumi trastem hem wetem olgeta hat blong yumi. (Proveb 3:5, 6; Aesea 40:10, 11) Stadi long buk blong Ol Sam 139 i save givhan bigwan blong mekem bilif blong yumi long saed ya i kam strong moa.
Man We i Luk Olgeta Rod Blong Yumi
5. ?Wanem mining blong tok ya se “luklukgud” mo from wanem samting ya i gud tumas?
5 Wetem fasin luksave, man ya blong raetem Ol Sam, Deved, i raetem se: “Hae God, yu yu luklukgud long mi finis. Yu yu savegud mi.” (Ol Sam 139:1) Deved i bilif se Jeova i savegud hem. God i no lukluk Deved long fasin we ol man oli stap lukluk, we oli stap lukluk saes blong bodi blong hem nomo, save blong hem blong toktok, no gudhan we hem i gat blong plei long hap. (1 Samuel 16:7, 18) Jeova i “savegud” samting we i stap long hat blong Deved mo i bin mekem olsem wetem tingting blong mekem i gud long hem long saed blong speret. Sipos yu yu wan long ol man we yu stap wosip long Jeova, hem i savegud yu olsem i savegud Deved. ?Samting ya i pulum filing yu blong obei mo blong fraet gud long hem?
6. ?Olsem wanem Ol Sam 139:2, 3 i soem se Jeova i savegud evri samting we yumi mekem mo i savegud tingting blong yumi tu?
6 Jeova i luk olgeta samting we Deved i stap mekem, mo Deved i save samting ya. Hem i raetem se, “Yu yu save evri samting we mi stap mekem, yu stap longwe, be yu save olgeta tingting blong mi. Nating se mi stap wok no mi spel, be yu stap luk mi, yu save olgeta samting we mi stap mekem.” (Ol Sam 139:2, 3) Tok ya se Jeova i stap long heven, we i stap longwe long wol ya, i no blokem hem blong savegud ol samting we Deved i stap mekem no i stap tingting long olgeta. Long dei mo long naet, hem i “stap lukluk,” no i stap skelemgud ol wok blong Deved, blong savegud olgeta.
7. (a) Yusum sam samting we oli hapen long laef blong Deved mo tokbaot sam samting we oli hapen long laef blong yumi we i soemaot we God i savegud ol samting ya. (b) ?Olsem wanem fasin ya we God i savegud ol samting we oli hapen long laef blong yumi i gat paoa long yumi?
7 Taem lav blong hem long God mo fasin blong trastem paoa blong God we i save sevem man, i pulum yangfala man ya Deved blong i wantem go faetem bigfala man Filistia ya, Golaeat, Jeova i save samting ya. (1 Samuel 17:32-37, 45-47) Biaen, taem fasin agens blong ol man i mekem hat blong Deved i harem nogud tumas, taem traem ya i kam bigfala we i mekem se evri naet Deved i stap krae, hem i haremgud bakegen from hem i save se Jeova i harem prea blong hem. (Ol Sam 6:6, 9; 55:2-5, 22) I sem mak, taem hat blong Deved i fulap long fasin tangkyu we i mekem se hem i stap tingting dip long Jeova i stat long sapa kasem moning, Jeova i savegud samting ya. (Ol Sam 63:6; ridim Filipae 4:8, 9.) Wan aftenun taem Deved i stap lukluk waef blong wan man kolosap long hem we i stap swim, Jeova i save samting ya tu, mo Jeova i luk samting we i hapen, nating se long smoltaem nomo, Deved i letem tingting blong wantem mekem sin i pusumaot God long tingting blong hem. (2 Samuel 11:2-4) Biaen, taem Natan i go blong talemaot bigfala sin blong Deved, Jeova i no harem nomo ol tok we Deved i talem, be i luksave tu se taem Deved i talem ol tok ya, hem i rili tanem tingting blong hem from ol sin we hem i mekem. (2 Samuel 12:1-14; Ol Sam 51:1, 17) Samting ya i mas pusum yumi blong tingting gud long ol rod we yumi stap folem, samting we yumi mekem, mo ol samting we oli stap long hat blong yumi.
8. (a) ?Long wanem rod ‘tok we bambae yumi talem’ i gat paoa long fasin blong yumi wetem God? (b) ?Olsem wanem yumi save winim slak fasin long saed blong toktok? (Matyu 15:18; Luk 6:45)
8 From we God i save evri samting we yumi stap mekem, yumi no sapraes se hem i savegud ol smosmol haf blong bodi blong yumi tu, olsem tang. King Deved i save samting ya, mo hem i raetem se: “Nomata we mi no toktok yet, be yu yu save finis ol samting ya we bambae mi talem.” (Ol Sam 139:4) Deved i save se ol man we Jeova i singaot olgeta blong kam insaed long haos tapolen blong hem oli no mas man blong talem ol gyaman toktok blong daonem narafala mo oli ol man we oli no agri blong yusum tang blong olgeta blong toktok long baksaed blong fren blong olgeta blong spolem fasin fren blong olgeta. Jeova i laekem ol man ya nomo we oli stap talemaot trutok wetem hat blong olgeta. (Ol Sam 15:1-3; Proveb 6:16-19) I no gat wan long yumi we i no save mekem mastik wetem tang blong hem samtaem, be Deved i strong blong talem se i gat ol samting we hem i save mekem blong kamgud moa long fasin blong hem. Hem i spenem plante taem blong mekem singsing mo blong singsing long ol sam blong presem Jeova. Mo tu hem i luksave se hem i nidim help mo hem i mas prea blong askem help ya long God. (Ol Sam 19:12-14) ?Olsem wanem long tang blong yumi, yumi nidim blong prea blong lukaot gud long hem?
9. (a) ?Olsem wanem tok we i stap long Ol Sam 139:5 i soemaot se God i savegud ol taem we yumi stap long olgeta? (b) Wanem samting i mekem yumi bilif?
9 Jeova i no lukluk yumi no ol bisnes long laef blong yumi jes long wan saed nomo. Hem i luk evri samting, hem i savegud evri saed long ol bisnes long laef blong yumi. Deved i yusum wan taon we oli blokem gud olsem wan eksampel, hem i raetem se: “Yu yu stap blokemgud mi long evri saed.” Long Deved, God i no wan enemi we i blokemgud hem, be wan man blong lukaotgud long hem. Deved i gohed se, “Yu yu stap lukaot long mi long paoa blong yu.” Samting ya i soemaot fasin we God bambae i lidim mo protektem olgeta we oli laekem hem blong haremgud blong olwe. Deved i luksave samting ya, “Yu yu save mi we yu savegud mi, fasin blong yu blong save mi i hae tumas, mi mi no naf blong save samting ya.” (Ol Sam 139:5, 6) God i savegud ol man blong hem mo yumi no naf blong skelem save ya blong hem. Be yumi gat inaf save long Jeova we i mekem se yumi bilif se hem i savegud yumi mo se bambae hem i givim nambawan help blong givhan long yumi.—Aesea 48:17, 18.
Weples We Yumi Stap, God i Save Givhan Long Yumi
10. ?Ol Sam 139:7-12 i leftemap wanem trutok?
10 Man blong raetem Ol Sam i gohed blong tokbaot wan narafala nambawan fasin keagud blong Jeova se: “?Weples bambae mi save go haed long hem blong yu no luk mi? ?Weples bambae mi save go long hem blong ronwe long yu?” Deved i no gat tingting blong traem gowe long Jeova, be hem i save se long evri ples we hem i stap, Jeova i save givhan long hem wetem tabu speret. Hem i gohed se: “Sipos mi go long heven, be yu yu stap long ples ya, bambae yu luk mi, mo sipos mi go ledaon long [beregraon], be yu yu stap long ples ya tu, bambae yu faenem mi. Sipos mi ronwe, mi go long is, we mi go bitim ples we san i kam antap, mo mi go stap longwe tumas long wes, long narasaed ples we san i godaon, be bambae yu yu stap long ples ya blong lidim mi, bambae yu stap long ples ya blong givhan long mi. Mi mi save askem tudak i kam blong mi haed long hem, mo mi save askem delaet we i stap raon long mi i kam naet, be tudak, hem i no dak nating long yu, mo naet, long yu i olsem dei nomo. Tudak i delaet, long yu, tufala i sem mak nomo.” (Ol Sam 139:7-12) I no gat wan ples we yumi save go long hem, no maet ol trabol we yumi fesem, we i save mekem se Jeova i no save luk yumi no we speret blong hem i no save kasem blong givhan long yumi. No gat.
11, 12. (a) ?Nating se Jona i fogetem samting ya blong smoltaem, olsem wanem Jeova i soemaot save blong hem mo fasin blong hem blong givhan long trabol blong Jona? (b) ?Olsem wanem ekspiryens blong Jona i save halpem yumi?
11 Wan taem profet Jona i fogetem samting ya. Jeova i sanem hem blong go prij long ol man blong taon ya Nineve. Sam samting i mekem hem i harem se hem i no save mekem wok ya. Ating from strong fasin blong ol man Asiria, Jona i fraet blong go prij long Nineve. Ale hem i traem blong haed. Long pasis blong Jopa, hem i tekem wan sip blong go long Tasis (hemia long Spen, we i stap bitim 3,500 kilomita long wes blong Nineve). Be, Jeova i luk we hem i tekem sip, i go insaed olgeta long sip ya mo i stap slip. Biaen taem oli sakemaot hem long sip, God i save weples we Jona i stap, mo Jeova i harem Jona taem hem i mekem wan promes long bel blong fis se bambae hem i mekem samting we hem i promes blong mekem. God i mekem se Jona i go soa, mo bakegen God i givim jans long hem blong go prij long Nineve.—Jona 1:3, 17; 2:1 kasem 3:4.
12 !I gud tumas sipos Jona i bin dipen long speret blong Jeova blong givhan long hem blong mekem wok blong hem long fasples! Be, biaen, wetem tingting daon Jona i raetem daon store blong hem, mo kasem tede, store ya i bin givhan long plante man blong trastem Jeova we i luk olsem i had wok long Jona blong trastem hem.—Rom 15:4.
13. (a) ?Elaeja i strong blong mekem wanem wok bifo we hem i ronwe long Kwin Jesebel? (b) ?Olsem wanem Jeova i givhan long Elaeja nating taem hem i go blong haed long ol teritori afsaed long Isrel?
13 Ekspiryens blong Elaeja i defren lelebet. Hem i bin wok strong blong talemaot tok blong Jeova se bambae ol man Isrel oli harem nogud from draetaem olsem panis we oli kasem from sin blong olgeta. (1 King 16:30-33; 17:1) Hem i bin wok strong blong leftemap trufala wosip long wan tes bitwin Jeova mo Bal long Maon Kamel. Mo long en blong tes ya i gat 450 profet blong Bal oli ded long vali blong Kison. Be taem Kwin Jesebel i kros mo i promes blong kilim Elaeja i ded, Elaeja i ronwe long kantri ya. (1 King 18:18-40; 19:1-4) ?Nao, Jeova i stap long ples ya blong givhan long hem long hadtaem ya? Yes, hem i stap. Sipos Elaeja i bin go antap long wan hil we i hae, olsem we hem i go antap long heven; sipos hem i bin haed long wan hol blong ston we i stap daon olgeta long graon, olsem long beregraon; sipos hem i bin ronwe i go long sam aelan farawe wetem wan spid we i olsem spid blong laet antap long wol taem san i girap long moning—han blong Jeova i stap long ol ples ya blong givim paoa mo blong lidim hem. (Ridim Rom 8:38, 39.) Mo Jeova i no givim kakae nomo blong mekem Elaeja i strong blong wokbaot be tu paoa we hem i kasem from ol nambawan samting we oli kamaot from tabu speret blong Hem. Elaeja i kasem moa paoa mo i gohed long wok blong hem blong talemaot ol profet tok.—1 King 19:5-18.
14. (a) ?From wanem i rong blong talem se Jeova i stap long evri ples long semtaem? (b) ?Long taem blong yumi, Jeova i bin givhan long ol man blong hem long wanem samting? (c) ?Olsem wanem yumi save talem se sipos yumi stap long beregraon, be God i save go long ples ya?
14 Profet tok blong Sam 139:7-12 i no min se God i stap long evri ples long semtaem, se oltaem hem wan i stap long olgeta ples. No gat. I klia se Baebol i soemaot samting ya. (Dutronome 26:15; Hibrus 9:24) Be, neva hem i mestem wan long ol man blong hem. Samting ya i tru long olgeta we oli mas go blong mekem tiokratik wok long ol ples farawe. Samting ya i tru long ol Wetnes we oli stap long ol rabis kalabus blong Nasi long taem blong Seken Bigfala Faet blong Wol mo tu ol misinari we oli putum olgeta wanwan long ol kalabus long Jaena stat long en blong ol yia 1950 kasem ol yia biaen long 1960. Samting ya i tru long ol gudfala brata sista blong yumi long wan kantri long Sentrol Afrika we plante taem oli ronwe long ol velej mo kantri blong olgeta tu. Sipos Jeova i wantem, hem i save go daon olgeta long beregraon, mo blong mekem ol man we oli holem strong long hem oli laef bakegen.—Job 14:13-15; Luk 20:37, 38.
Man We i Rili Save Yumi
15. (a) ?I stat long wanem taem Jeova i save luk we yumi stap gru? (b) ?Olsem wanem tok blong man ya blong raetem ol sam i soemaot bigfala save blong God long saed blong yumi taem hem i tokbaot ol kidni?
15 Wetem paoa blong God, man blong raetem ol sam i pulum tingting i go long tok ya se taem yumi no bon yet be God i savegud yumi finis, hem i se: “Yu yu mekem evri haf blong [kidni] blong mi, yu mekem olgeta oli joen gud taem mi stap yet long bel blong mama blong mi. Yu yu hae tumas, i stret blong man i bodaon long yu i ona long yu, mo mi mi presem yu from. Olgeta samting we yu yu mekem oli narafala mo oli nambawan tu. Mi mi save we mi savegud samting ya.” (Ol Sam 139:13, 14) Fasin joen blong tu defren blad we i kamaot long papa mo mama long taem we pikinini i stat fom long bel blong mama i wokem plan ya we bodi mo tingting blong pikinini i mas folem. God i savegud samting ya we i bambae hapen. Ol Sam ya i tokbaot kidni long wan spesel fasin, we plante taem Baebol i yusum blong tokbaot fasin we i stap haed dip insaed long man.a (Ol Sam 7:9; Jeremaea 17:10) Jeova i savegud ol samting long saed blong yumi bifo we yumi bon. Mo tu hem i man ya we i mekem plan blong bodi blong man we i mekem se wan sel long bel blong mama i joen gud mo i stap gru long sefples.
16. (a) ?Long wanem rod Ol Sam 139:15, 16 i tokbaot bigfala paoa long tingting blong God long saed blong fyuja? (b) ?From wanem samting ya i mas leftemap tingting blong yumi?
16 Ale, taem man ya blong raetem Ol Sam i stap tokbaot bigfala paoa long tingting blong God long saed blong fyuja, hem i gohed se: Taem mi mi stap long bel blong mama blong mi, long ples ya we i haed we i haed, nao ol bun blong mi oli stap joen gud, mi stap gru, be yu yu save we mi mi stap long ples ya [i tru se hem i stap tokbaot taem hem i stap long bel blong mama blong hem be hem i stap tingbaot Adam we i kamaot long graon]. Taem mi mi no bon yet, be yu yu luk [olgeta haf blong bodi blong] mi finis, mo olgeta dei we yu yu makemaot se oli blong mi, taem ol dei ya oli no kamtru nating yet, be yu yu raetemdaon olgeta [defren haf blong bodi blong mi] finis long buk blong yu.” (Ol Sam 139:15, 16) Samting ya i tru—nating se ol fren blong yumi oli kasem save long yumi no no gat, be Jeova i savegud yumi. ?Olsem wanem samting ya i save gat paoa long yumi?
17. ?Taem yumi luk ol naesfala samting we God i mekem, samting ya i mas pusum yumi blong mekem wanem?
17 Man we i raetem Ol Sam 139 i luksave se ol wok blong God we hem i tokbaot long Sam ya oli nambawan tumas. ?Yu yu harem olsem tu? Samting we i nambawan i mekem man i tingting dip no blong soem se hem i gat fasin blong lukaotem gud. I gud blong yu mekem olsem long ol wok blong Jeova we yumi save luk. (Ridim Ol Sam 8:3, 4, 9.) ?Yu yu stap putum tingting ya tu long samting we hem i bin mekem blong stanemap Kingdom blong Mesaea, long samting we hem i stap mekem blong talemaot gud nyus long olgeta ples long wol, mo long rod ya we Tok blong hem i stap jenisim stampa fasin blong man?—Ridim 1 Pita 1:10-12.
18. ?Sipos yumi luk se wok blong God i soemaot se yumi mas fraet gud long hem, olsem wanem samting ya i save gat paoa long yumi?
18 ?Yu gat tingting ya tu se yumi mas fraet gud long God mo tingting dip long wok blong hem, we i mekem se yu yu gat wan fraet we i stret, hemia we i gat paoa blong pusum man, hemia we i gat paoa long fasin blong yu mo fasin we yu stap yusum laef blong yu? (Ridim Ol Sam 66:5.) Sipos i olsem, bambae hat blong yu i pusum yu blong givim ona long Jeova, blong presem hem, blong tekem jans blong talemaot stampa tingting blong hem mo ol nambawan samting we hem i bin mekem rere long olgeta we oli laekem hem.—Ol Sam 145:1-3.
[Futnot]
a Lukluk Insight on the Scriptures, we Watchtower Bible and Tract Society blong Niu Yok, Inc. i prentem, Volyum 2, pej 150.
?Wanem Ansa Blong Yu?
◻ ?Olsem wanem save we yumi gat se Jeova “hem i God” i givhan long yumi blong mekem wok blong hem wetem fasin glad?
◻ ?Olsem wanem yumi save soemaot se God i save evri samting we yumi mekem?
◻ ?From wanem tok ya se God i neva mestem wan long yumi i leftemap tingting blong yumi?
◻ ?From wanem God i savegud yumi long ol fasin we i no gat wan man i save mekem?
◻ ?From wanem stadi olsem hemia i wantem mekem yumi presem Jeova?