“God, Plis Yu Luklukgud Long Mi”
“God, plis yu luklukgud long mi, blong yu savegud ol tingting blong mi. . . . Yu lidim mi long rod ya we i no save lus.”—OL SAM 139:23, 24.
1. ?Jeova i gat wanem fasin wetem ol man blong hem?
YUMI evriwan yumi wantem wan man i kasem save long yumi, man we i tingbaot ol trabol blong yumi, man we i givhan taem yumi mekem mastik, man we i no save askem plante samting long yumi bitim we yumi save mekem. Hemia nao fasin we Jeova God i stap mekem long ol man blong hem. Sam 103:14 i talem se: “Hem i savegud we hem i mekem yumi long graon. Oltaem hem i stap tingbaot we yumi kamaot long ases nomo.” Mo Jisas Kraes, we i stret pija blong Papa blong hem, i gohed blong askem wetem lav se: “Yufala evriwan we yufala i stap hadwok tumas, yufala i stap karem ol hevi samting, yufala i kam long mi. Bambae mi givim spel long yufala. Yufala i mas putum yok blong mi long solda blong yufala, blong yufala i wok blong mi. Mo yufala i mas lan long mi [no, “Kam wetem mi aninit long yok blong mi,” futnot] from we mi mi wan kwaet man, tingting blong mi i stap daon. Nao bambae yufala i faenem we tingting blong yufala i gat spel. From we yok ya we bambae mi putum long yufala, wok blong hem i isi. Mo ol samting we mi givim long yufala blong karem, oli no hevi.”—Matyu 11:28-30.
2. Skelem lukluk blong Jeova we i defren long lukluk blong olgeta man long saed blong (a) Jisas Kraes, mo (b) ol man blong Kraes.
2 Lukluk blong Jeova long ol man blong hem i defren long lukluk blong olgeta man. Hem i stap lukluk ol bisnes we i kamaot long wan rod we i defren mo hem i tingbaot ol samting we maet ol narafala man oli no save nating. Taem Jisas Kraes i stap long wol, “ol man oli no wantem hem mo oli sakemaot hem.” Olgeta we oli no bilif long hem olsem hem i Mesaea “oli luk hem olsem man nating nomo.” (Aesea 53:3; Luk 23:18-21) Be, long ae blong God, hem “i Pikinini blong [God] we God i laekem hem tumas,” we Papa i tokbaot hem se: “Tingting blong mi i harem gud tumas long yu.” (Luk 3:22; 1 Pita 2:4) Long medel blong ol man blong Jisas Kraes i gat ol man we ol narafala man oli tingbaot olgeta olsem oli man nating nomo from oli pua tumas long saed blong bodi mo oli fesem plante trabol. Be, long ae blong Jeova mo Pikinini blong hem, maet ol man olsem oli rij man. (Rom 8:35-39; Revelesen 2:9) ?From wanem ol man olsem oli rij man long lukluk blong Jeova mo Jisas?
3. (a) ?From wanem lukluk blong Jeova long ol man plante taem i defren olgeta long lukluk we olgeta man oli gat? (b) ?From wanem i impoten tumas long yumi blong skelem ol samting we oli stap long hat blong yumi?
3 Jeremaea 11:20 i ansa se: “Jeova . . . i stap skelemgud ol kidni mo hat.” Hem i save se yumi wanem kaen man insaed, nating se ol stampa fasin blong yumi ol narafala man oli no save luk. Long fasin blong hem blong skelem, fastaem hem i makem ol impoten fasin mo laef blong ol man we oli save frengud wetem hem, ol fasin we oli save mekem i gud long yumi blong olwe. Save blong yumi long samting ya i mekem yumi haremgud; mo i mekem tingting blong yumi i spelgud. From we Jeova i stap lukluk se yumi wanem kaen man insaed, i impoten long yumi blong skelem insaed long yumi blong luk sipos yumi wantem kam ol man we hem i wantem blong i stap long nyufala wol blong hem. Tok blong hem i givhan long yumi blong gat fasin blong skelem yumi wan.—Hibrus 4:12, 13.
!Ol Tingting Blong God Oli Nambawan Tumas!
4. (a) ?Wanem samting i pusum man ya blong raetem ol sam blong talem se ol tingting blong God oli nambawan long hem? (b) ?From wanem oli mas nambawan long yumi tu?
4 Afta we man ya blong raetem Ol Sam, Deved, i tingting dip long save blong God long ol man blong hem we save ya i hae mo i bigfala tumas, mo paoa blong hem blong givim help long wanem samting we maet ol man oli nidim, hem i raetem se: “God, i strong tumas blong mi kasem ol tingting blong yu.” (Ol Sam 139:17a) Ol tingting ya, we Tok blong hem, Baebol i soemaot, oli hae moa bitim eni samting we man i mekem, nating se wanem waes we ol man ya oli gat. (Aesea 55:8, 9) Ol tingting blong God oli givhan long yumi blong pulum yumi i go long ol trufala impoten samting long laef mo blong wok strong long wok blong hem. (Filipae 1:9-11) Oli soemaot long yumi olsem wanem blong lukluk ol bisnes olsem God i mekem. Oli givhan long yumi blong gat stret fasin long yumi wanwan, blong luksave we long hat blong yumi, yumi rili wanem kaen man. ?Yu yu wantem mekem olsem?
5. (a) ?Tok blong God i talem long yumi blong lukaot gud long wanem samting moa “bitim ol narafala samting”? (b) ?Olsem wanem store blong Ken long Baebol i save givhan long yumi? (c) Nating se yumi no stap ananit long Loa blong Moses, ?olsem wanem loa ya i save givhan long yumi blong save ol samting we oli save mekem Jeova i glad?
5 Oltaem ol man oli stap tingbaot nomo lukluk blong olgeta afsaed, be Baebol i givim advaes long yumi se: “Samting we yu mas lukaot moa long hem i bitim ol narafala samting, se hat blong yu.” (Proveb 4:23) Wetem ol rul mo ol eksampel, Baebol i givhan long yumi blong mekem samting ya. Baebol i talem long yumi se Ken i wantem mekem sakrifaes i go long God taem hat blong hem i fulap long fasin kros, biaen hem i no laekem nating brata blong hem Ebel. Mo i talem long yumi blong no kam olsem Ken. (Jenesis 4:3-5; 1 Jon 3:11, 12) Baebol i kipim ol Loa blong Moses we man i mas obei long olgeta. Be hem i makem tu se nambawan impoten samting blong mekem long loa ya, hemia se olgeta we oli wosip long Jeova oli mas laekem hem long olgeta hat, laef, maen, mo paoa; mo hem i talem namba tu loa long hemia se oli mas laekem ol man we oli stap raonabaot long olgeta, oli mas mekem i gud long olgeta olsem we oli stap mekem i gud long olgeta nomo.—Dutronome 5:32, 33; Mak 12:28-31.
6. Taem yumi stap folem Proveb 3:1, ?yumi mas askem wanem kwestin long yumi wanwan?
6 Proveb 3:1 i talem se yumi no mas holem ol loa blong God nomo be blong mekem sua se fasin obei i soemaot trufala samting we i stap long hat blong yumi. I nidim blong askem long yumi wanwan se, ‘?Mi stap folem fasin ya blong obei long ol samting we God i talem?’ Sipos yumi luksave se fasin no tingting blong yumi long sam bisnes i no stret—mo i no gat wan long yumi i save talem se yumi stret olgeta—ale yumi mas askem se, ‘?Mi mi stap mekem wanem blong mekem fasin ya i kam gud moa?’—Proveb 20:9; 1 Jon 1:8.
7. (a) ?Olsem wanem tok blong Jisas agens long ol Farisi long Matyu 15:3-9 i save givhan long yumi blong lukaot gud long hat blong yumi? (b) ?Long ol wanem taem yumi nidim strong aksin blong stretem tingting mo hat blong yumi?
7 Taem fasin ya we ol Farisi blong ol man Jyu oli tingbaot intres blong olgeta nomo i pusum olgeta blong gyaman se oli stap wosip long God, Jisas i talem se oli gat tu fes mo i soemaot se wosip blong olgeta i blong nating nomo. (Matyu 15:3-9) Mo tu Jisas i givim woning se blong mekem God ya we i stap lukluk hat i glad, i no inaf blong stap soemaot se yumi stap folem wan gudfala laef, be long semtaem yumi wantem haremgud long samting we tingting blong yumi i wantem, mo tu oltaem yumi stap tingting long ol rabis fasin. Maet yumi nidim blong tekem wan strong aksin blong stretem tingting mo hat blong yumi. (Proveb 23:12; Matyu 5:27-29) Yumi nidim fasin stretem ya tu sipos yumi letem fasin blong wol ya i pulum yumi blong folem ol rod blong hem long wok blong yumi blong winim mane, ol mak blong yumi long edukesen, no ol samting we yumi stap jusum blong lukluk mo harem. I gud blong tingbaot tok we disaepol Jemes i raetem se ol man we oli talem se oli man blong God be oli stap fren wetem ol fasin blong wol ya, oli olsem “woman we i stap mekem i krangke long man blong hem, i stap slip wetem narafala man.” ?From wanem? From we “olgeta man blong wol oli stap long paoa blong Setan.”—Jemes 4:4; 1 Jon 2:15-17; 5:19.
8. ?Yumi mas mekem wanem blong kasem frut fulwan long ol nambawan tingting blong God?
8 Blong kasem fulwan ol gudfala samting long ol tingting blong God long ol bisnes ya mo ol narafala bisnes tu, yumi mas tekem taem blong ridim no harem ol tingting ya. Antap moa long samting ya, yumi mas stadi long olgeta, tokbaot olgeta, mo tingting dip long olgeta. Plante man we oli stap ridim Wajtaoa oli kam oltaem long ol kongregesen miting blong ol Wetnes blong Jeova, we long ples ya oli tokbaot Baebol. Oli pemaot taem we oli gat blong mekem ol narafala samting blong mekem samting ya. (Efesas 5:15-17) Mo ol samting we oli kasem oli sas moa bitim ol sas samting long saed blong bodi. ?Yu yu harem olsem?
9. ?From wanem samfala we oli stap kam long ol miting oli gohed moa long saed blong speret bitim ol narafala?
9 Be, samfala we oli go long ol miting ya oli gohed moa long saed blong speret bitim ol narafala. Oli mekem trutok i wok fulwan moa long laef blong olgeta. ?Wanem i givim long saed ya? Plante taem, bigfala samting we i givhan long olgeta hemia fasin blong mekem prapa stadi blong olgeta oltaem. Oli luksave se yumi no save laef long bred nomo; ol kakae long saed blong speret evri dei i impoten olsem kakae long saed blong bodi oltaem. (Matyu 4:4; Hibrus 5:14) Taswe oli traehad blong spenem sam taem evri dei blong ridim Baebol no ol buk we oli eksplenem Baebol. Oli mekem rere ol haf blong kongregesen miting, oli stadi moa long ol lesen mo oli jekemap ol vas blong Baebol. Oli mekem moa samting bitim we oli ridim buk nomo; oli tingting dip long hem. Fasin blong olgeta blong stadi i joen wetem fasin blong tingting strong long ol samting we oli stap lanem se olsem wanem ol samting ya oli save gat paoa long laef blong olgeta. Taem oli stap gru long saed blong speret, oli harem olsem man ya blong raetem ol sam we i raetem se: “!Mi mi laekem ol loa blong yu tumas! . . . Ol rul we yu yu mekem oli gudfala tumas.”—Ol Sam 1:1-3; 119:97, 129.
10. (a) ?I gud blong tekem hamas taem blong gohed blong stadi long Tok blong God? (b) ?Olsem wanem Baebol i soemaot?
10 Nating se yumi bin stadi long Tok blong God blong wan yia, 5 yia, no 50 yia, neva hem i kam wan buk we oltaem bakegen mo bakegen yumi stap stadi tru long hem—yumi no harem olsem sipos yumi luksave se ol tingting blong God oli impoten tumas long yumi. Nating se sam long yumi oli bin lanem plante samting finis long Baebol, i gat plante samting yet we yumi no save. Deved i talem se: “God, i strong tumas blong mi kasem ol tingting blong yu. Olgeta oli plante tumas. Sipos mi kaontem olgeta, bambae mi faenemaot se oli plante moa, i winim sanbij long solwora.” Yumi i no naf blong kasem save long olgeta tingting blong God. Sipos yumi stadi long ol tingting blong God stat long moning kasem sapa mo yumi go slip long naet, taem yumi girap long moning, i gat plante moa samting blong tingbaot. Taswe, Deved i raetem se: “Sipos mi mi slip, nao mi wekap bakegen, be bambae mi stap wetem yu yet.” (Ol Sam 139:17, 18) Bambae yumi gohed blong lanem moa samting long saed blong Jeova mo ol rod blong hem gogo i no save finis. Neva bambae yumi kasem save evri samting long saed blong Jeova.—Rom 11:33.
No Laekem Nating Samting We Jeova i No Laekem Nating
11. ?From wanem i impoten blong no kasem save nomo long tingting blong God be blong serem ol filing blong hem tu?
11 Yumi no mas ting se yumi stap stadi long tok blong God blong fulumap hed blong yumi nomo long ol trufala samting. Taem yumi letem ol tingting blong God i kam insaed long hat blong yumi, yumi tu yumi stat blong serem ol filing blong God. !Samting ya i impoten tumas! Sipos yumi no gat ol filing olsem, ?wanem samting i save kamaot? Nating se plante taem bakegen yumi save talem samting we Baebol i talem, be maet yumi stap laekem samting we loa blong God i blokem, no maet yumi save harem se samting we yumi mas mekem i wan baden long yumi. Nating se yumi no laekem nating ol samting ya we oli no stret, be i tru se yumi save faenem i strong blong mekem olsem from we yumi no stret gud olgeta. (Rom 7:15) Be sipos yumi no traehad blong mekem samting we i stap long hat blong yumi i laenap wetem fasin we i stret, ?yu ting se yumi save mekem Jeova, “man ya blong skelem hat,” i glad long yumi?—Proveb 17:3.
12. ?Lav long God mo fasin blong no laekem nating ol samting we God i no laekem i impoten olsem wanem?
12 Fasin blong no laekem ol samting we God i no laekem nating i gat paoa blong protektem yumi blong no mekem ol fasin nogud, olsem fasin blong laekem God i mekem se yumi glad blong mekem samting ya nomo we i stret. (1 Jon 5:3) Plante taem Baebol i talem long yumi blong gat fasin lav mo fasin blong no laekem nating. ‘Yufala we i laekem tumas Jeova, yufala i no mas laekem nating ol rabis fasin.’ (Ol Sam 97:10) “Oltaem yufala i mas agensem ol fasin we i nogud, be yufala i mas holemstrong long ol fasin we i gud.” (Rom 12:9) ?Yu yu stap mekem samting ya?
13. (a) ?Wanem prea blong Deved long fasin blong spolem ol man nogud we yumi agri fulwan long hem? (b) ?Olsem prea blong Deved i soemaot, hu ya ol man nogud we hem i prea long God blong spolem olgeta?
13 Jeova i bin talemaot klia stampa tingting blong hem blong spolem ol rabis man long wol mo blong mekem wan nyufala wol we ol stret man nomo bambae oli stap long hem. (Ol Sam 37:10, 11; 2 Pita 3:13) Ol man we oli laekem stret fasin oli wantem tumas blong taem ya i kam. Oli agri fulwan wetem Deved man ya blong raetem Ol Sam, we i prea se: “God. !Mi wantem tumas blong yu kilim ol man nogud ya oli ded! !Mi wantem tumas se ol man blong faet ya oli mas livim mi! Oli stap talem ol rabis tok agens long yu, oli stap tok nogud blong spolem nem blong yu.” (Ol Sam 139:19, 20) Deved hem wan i no wantem kilim ol rabis man ya. Hem i prea se bambae Jeova nomo i givimbak long olgeta. (Dutronome 32:35; Hibrus 10:30) Ol man ya oli no ol man ya nomo we oli agensem Deved hem wan. Ol man ya oli bin talem se oli man blong God be fasin blong olgeta i no stret, oli stap tok nogud blong spolem nem blong hem. (Eksodas 20:7) Wetem fasin gyaman, oli talem se oli stap mekem wok blong hem, be oli stap yusum nem blong hem blong mekem ol prapa plan blong olgeta. Deved i no laekem nating ol man ya we oli wantem kam enemi blong God.
14. ?Yumi save givhan long ol man nogud? Sipos yes, ?olsem wanem yumi save mekem?
14 I gat plante taosen milyan man we oli no save Jeova. Plante long olgeta oli stap mekem ol samting we Tok blong God i soemaot se oli nogud. Sipos oli gohed blong folem rod ya, bambae oli stap long medel blong ol man ya we bambae oli lus long taem blong bigfala trabol. Be, Jeova i no harem gud taem wan man nogud i ded, mo yumi tu yumi no mas harem gud taem wan nogud man i ded. (Esikel 33:11) Long ol taem we i stap yet, yumi traehad blong givhan long ol man olsem blong lanem mo blong folem ol rod blong Jeova. ?Be olsem wanem sipos sam man oli strong blong soem se oli agensem Jeova?
15. (a) ?Hu ya we man blong raetem ol sam i luk olgeta olsem “ol enemi”? (b) ?Tede, olsem wanem yumi save soemaot se yumi “no laekem nating” olgeta we oli stap agensem Jeova?
15 Long ol man ya, man blong raetem Ol Sam i talem se: “Hae God, mi mi no laekem nating olgeta ya we oli no laekem yu, mi mi agens long olgeta from we oli stap agens long yu. Oltaem mi stap harem nogud from we olgeta ya oli stap mekem i nogud long yu. Mi mi no laekem olgeta we mi no laekem olgeta nating, oltaem mi stap makem olgeta se ol enemi blong mi nomo.” (Ol Sam 139:21, 22) Deved i no laekem olgeta from we oli no laekem Jeova nating. Olgeta we oli stap soemaot se oli no laekem Jeova nating taem oli stap agensem hem, olgeta tu oli ol man blong apostasi. I tru se fasin blong apostasi i wan fasin blong agensem Jeova. Sam man blong apostasi oli talem se oli save God mo oli stap mekem wok blong hem, be oli sakemaot ol tijing no ol rul we oli stap long Tok blong hem. Samfala oli talem se oli bilif long Baebol, be oli sakemaot ogenaesesen blong Jeova mo oli strong blong traem blokem wok blong hem. Taem olgeta nomo oli jusum ol rabis fasin ya nating se oli bin save finis wanem i stret, mo taem rabis fasin ya i kam strong long olgeta mekem se i kam stampa fasin blong olgeta, nao wan Kristin i mas agensem (fasin agens we i stret wetem Baebol) olgeta we oli seraot blong mekem ol samting we oli nogud. Ol trufala Kristin oli serem ol filing we Jeova i gat long saed blong apostasi, oli no wantem save ol tingting blong apostasi. Be, “oli no laekem nating” olgeta we oli mekem oli kam ol enemi blong God, ale oli letem samting ya i stap long han blong Jeova nomo blong givimbak.—Job 13:16; Rom 12:19; 2 Jon 9, 10.
Taem God i Skelem Tingting Blong Yumi
16. (a) ?From wanem Deved i wantem se Jeova i luklukgud long hem? (b) ?Wanem samting long saed blong prapa hat blong yumi we yumi mas askem God blong givhan long yumi blong luksave?
16 Long eni rod, Deved i no wantem kam olsem ol man nogud. Plante man oli traem haedem samting we i stap long hat blong olgeta, be wetem tingting daon, Deved i prea se: “God, plis yu lukaot gud long mi, blong yu savegud ol [hat] blong mi. Plis yu skelem laef blong mi, blong yu faenemaot ol samting we mi stap tingting long hem. Sipos i gat sam samting nogud long laef blong mi, plis yu traem faenemaot, nao yu lidim mi long rod ya we i no save lus.” (Ol Sam 139:23, 24) Taem Deved i stap tokbaot hat blong hem, hem i no minim prapa hat blong hem. Long stret mining blong pija tok ya, hem i stap tokbaot samting we i stap haed long tingting blong hem, insaed blong man. Yumi tu yumi mas wantem blong God i skelem hat blong yumi mo blong luk sipos yumi wantem tumas, yumi laekem, yumi gat filing long, yumi plan long, tingting i pulum yumi long ol rabis samting. (Ol Sam 26:2) Jeova i askem yumi se: “Pikinini blong mi, givim hat blong yu long mi, mo i gud yu lukluk gud long ol rod blong mi nomo.”—Proveb 23:26.
17. (a) ?Yumi mas mekem wanem bitim we yumi stap haedem tingting blong yumi we i no stap kwaet? (b) ?Bambae yumi sapraes taem wan rong samting i stap long tingting blong yumi, mo yumi mas mekem wanem long ol samting ya?
17 Sipos yumi stap harem nogud from sam samting we oli stap haed insaed long yumi, tingting blong yumi i no stap kwaet from we yumi stap laekem wan samting we i no stret no samting we i no stret i pulum yumi no from we yumi stap mekem sam samting we oli no stret, ale i tru se yumi wantem Jeova blong givhan long yumi blong stretem ol bisnes ya. I defren long tok ya “eni rod we i save mekem man i harem nogud,” translesen blong Moffatt i yusum tok ya “wan rod we i no stret”; The New English Bible i talem se: “Eni rod we i mekem hem i harem nogud [hemia, God].” Yumi nomo yumi no save kasem klia save long ol tingting blong yumi we oli no stap kwaet mo from samting ya yumi no save olsem wanem blong talemaot problem blong yumi long God, be hem i savegud long laef blong yumi. (Rom 8:26, 27) Yumi no save sapraes sipos tingting blong yumi i stap long ol samting nogud; be, yumi no mas letem oli stap. (Jenesis 8:21) Yumi mas lukaot help long God blong givhan long yumi blong tekemaot ol tingting ya. Sipos yumi rili laekem Jeova mo ol rod blong hem, yumi save kam kolosap long hem blong askem help olsem wetem bilif se “God i hae moa long tingting blong yumi, mo hem i save evri samting.”—1 Jon 3:19-21.
18. (a) ?Olsem wanem Jeova i lidim yumi long rod ya we i no save lus? (b) ?Sipos yumi gohed blong folem ol rod blong Jeova, wanem gudfala samting ya we yumi wet blong kasem?
18 Yes, olsem prea blong man blong raetem ol sam, Jeova i stap lidim ol man blong hem we oli gat tingting daon mo we oli stap obei long hem, hem i stap lidim olgeta long rod we i no save lus. Hem i no lidim olgeta nomo long rod we i save minim se oli fri olgeta long fasin we i no stret long ful laef blong olgeta be hem i lidim olgeta tu long rod blong laef blong olwe. Hem i givim praes blong sakrifaes blong Jisas we yumi nidim blong tekemaot sin blong yumi. Tru long Tok blong hem mo ogenaesesen blong hem, hem i givim ol impoten tijing long yumi blong mekem se yumi save mekem wok blong hem. Hem i soemaot se i impoten we yumi askem help long hem blong mekem se yumi save soemaot ol fasin we oli kamaot long hat blong yumi. (Ol Sam 86:11) Mo hem i leftemap tingting blong yumi wetem wan janis blong gat wan bodi we i stret gud olgeta long saed blong helt, long wan nyufala wol we stret fasin nomo i stap long hem, blong mekem wok blong God, we hem nomo i trufala God. Sipos yumi gohed blong folem gud ol rod blong hem, wetem tok we i gat paoa, bambae hem i talem long yumi olsem we hem i bin talem long pikinini blong hem se: “Tingting blong mi i harem gud tumas long yu.”—Luk 3:22; Jon 6:27; Jemes 1:12.
?Yu Ansa Olsem Wanem?
◻ ?From wanem tingting blong Jeova long ol man blong hem i defren long tingting we ol man oli gat?
◻ ?Wanem i save givhan long yumi blong luksave samting we God i luk taem hem i skelem hat blong yumi?
◻ ?Wanem kaen stadi i givhan long yumi blong lanem mo blong lukaot gud long hat blong yumi?
◻ ?From wanem i no impoten nomo blong save samting we God i talem be tu blong serem ol filing blong hem?
◻ ?From wanem yumi wanwan yumi mas prea se: “God, plis yu luklukgud long mi, blong yu savegud [hat] blong mi”?
[Tok Blong Pija Long Pej 16]
Taem yumi stap stadi, traehad blong gat ol filing mo ol tingting blong God
[Tok Blong Pija Long Pej 18]
Ol tingting blong Jeova oli “plante moa i winim sanbij long solwora”
[Credit Line]
Pictorial Archive (Near Eastern History) Est.