Ol Wok Blong Jeova Blong Sevem Man Naoia

BAEBOL i talem samting ya long yumi long saed blong Jeova se: “Man we i stret i save harem nogud long plante trabol, be Hae God i save tekemaot hem long olgeta trabol ya” mo, “Hae God i save sevem ol man we oli bilif long hem, oli aot long ol samting blong traem olgeta.”​—Ol Sam 34:19; 2 Pita 2:9.

?Olsem wanem Jeova i givhan long ol man blong hem taem oli kasem trabol? I no wetem wan merikel blong jenisim paoa blong ol samting raonabaot long yumi no wetem ol narafala wok we oli bitim paoa blong man, olsem plante man oli ting se hem i mas mekem, be wetem wan narafala paoa we kolosap olgeta man oli no rili kasem save long hem​—hemia fasin lav. Yes, Jeova i laekem tumas ol man blong hem, mo hem i bin wokem long medel blong olgeta wan lav we oli gat long olgeta we i strong tumas, mekem se hem i save givhan long olgeta long ol fasin we oli luk olsem oli merikel nomo.​—1 Jon 4:​10-12, 21.

Maet samfala oli talem se long taem blong trabol, ol samting we man i nidim, hemia kakae, meresin, mo ol tul​—be i no fasin lav. Tru ya, kakae, meresin, mo ol tul oli impoten. Be, tingting blong aposol Pol i olsemia: “Sipos mi bilif strong long God we i naf blong mi save seftem ol bigfala hil, be mi no laekem ol man, bambae mi olsem nating nomo. Sipos mi givim olting blong mi oli go nating long ol puaman, mo mi letem ol enemi blong mi oli bonem mi long faea from we mi man blong Kraes, be mi no laekem ol man, bambae mi no winim wan samting nating.”​—1 Korin 13:​2, 3.

Plante taem yumi ridim store se ol kakae mo ol samting blong givhan long man we oli gat trabol, oli stap rotin long wof no ol rat oli stap kakae ol samting ya, taem ol man we oli nidim oli stap ded from sik mo hanggri. No samting we i moa nogud se, maet ol samting ya oli stap long han blong ol man we oli gat fasin griri mo oli mekem ol kruked fasin mo oli winim sam profit blong olgeta wetem. Taswe, i gud blong gat ol saplae we ol man oli nidim, be i hadwok blong mekem se olgeta we oli stap trabol oli harem gud long ol samting ya. Trufala lav mo fasin keagud i save mekem se samting ya i kamaot.

Mekem Lav i Wok

Long Septemba 1992, Hariken Iniki i kilim Kauai, wan aelan blong Hawai we i gat 55,000 man. Spid blong hariken ya i 210 kilomita long wan haoa mo samtaem i kasem 260 kilomita long wan haoa, hem i kilim tu man oli ded mo 98 oli gat kil, i spolem 75% blong ol haos, 8,000 man oli no gat haos blong stap, mo i nidim 12 bilyan vatu blong fiksimap ol samting we hem i spolem. Long medel blong ol man we oli stap laef long smol aelan ya, i gat samwe long 800 Wetnes blong Jeova long sikis kongregesen. ?Olsem wanem long olgeta?

Bifo we Iniki i kam, ol elda blong kongregesen, folem advaes blong elda we i go raon, oli bin toktok wetem olgeta memba blong kongregesen blong mekem sua se oli sef mo oli stap long gudfala ples, rere from hariken. Fasin lav olsem i givhan blong blokem bigfala kil no ded long medel blong ol Wetnes.​—Ridim Aesea 32:​1, 2.

Nating se telefon mo transpot oli brokdaon olgeta, trifala man we branj ofis blong Watch Tower Bible and Tract Society long Honolulu i sanem, oli stap long medel blong ol faswan man we oli kasem aelan ya afta long hariken, dipatmen blong sivil difens i bin givim spesel raet long olgeta blong flae long plen i kam long Kauai. Kwiktaem nomo, trifala i toktok wetem ol Wetnes long ples ya mo long nekis moning oli mekem wan miting blong faenem rod blong givim saplae. Oli putumap wan komiti blong faenemaot nid blong olgeta we oli kasem trabol ya mo blong kasem ol samting we branj ofis long Honolulu i sanem i kam. Oli stap wok we oli no spel, mo oli lidim wok ya blong karem ol saplae i go long olgeta we oli nidim mo blong klinim ol ples mo fiksimap bakegen ol haos we oli nogud.

Kwiktaem nomo ol Wetnes long ol narafala aelan oli kam givhan long ol brata blong olgeta we oli nidim help. Taem epot long Kauai i jes open nomo, 70 Wetnes oli flae long plen i kam blong givhan. Mane blong ol saplae ya kolosap i kasem 12,000,000 vatu, wetem ol samting olsem enjin blong laet, stof blong kuk, ol laet, mo kakae, we oli sanem i kam long sip. Oli yusum wan long ol Haos Kingdom long aelan ya olsem wan ples blong putum ol saplae mo blong givimaot; be, oli fraet lelebet se maet sam man oli kam stilim. Biaen sam trak blong Ami i draev i kam long ples blong putum trak, insaed long yad blong Haos Kingdom, mo ol draeva ya oli askem sipos oli save putum trak blong olgeta long ples ya. Ol soldia we oli stap lukaot long ol trak ya oli blokem problem ya blong stilim ol saplae tu.

Ol brata oli karem ol enjin blong lektrik long ol haos wanwan, mo oli mekem i wok blong tu no tri haoa, blong givhan long olgeta man blong yusum ol aesbokis blong olgeta. Oli sanem ol grup blong brata i go long ol defren haos blong givhan blong klinim ples mo blong fiksimap bakegen ol samting we oli nogud. Taem oli wok long haos blong wan sista we hasban blong hem i agensem hem bigwan bifo, samting ya i tajem hat blong hasban ya mekem se hem i jes stap lukluk olgeta nomo mo krae. Wan man we i kam long big aelan we i luk wan narafala grup blong ol Wetnes we oli stap wok i sapraes tumas long fasin mo ogenaesesen blong olgeta, mekem se hem i kam kolosap long olgeta mo i askem se wanem i mekem olgeta oli defren. Taem wan brata i eksplenem se hem i from lav blong olgeta long God mo long ol Kristin brata sista blong olgeta, man ya i talem se: “?Olsem wanem mi save kasem save long God?” (Matyu 22:​37-40) Mo hem i gohed se: “!Yufala i gat plan blong evri samting, ating yufala i sanem wan man finis blong i stap wet long mi taem mi gobak long Florida!”

Long evri samting, ol Wetnes blong Jeova oli givhan blong klinim mo fiksimap bakegen 295 haos long Kauai. Long ol haos ya, i gat 207 we oli no nidim plante samting blong fiksimap, be 54 i gat plante samting we oli kam nogud, mo 19 oli nogud olgeta. Mo wok blong olgeta tu i blong go visitim evri Wetnes long aelan ya we oli save olgeta, blong mekem sua se evriwan oli kasem help. Taem oli karem ol saplae i go long wan sista, wan Budis we i stap kolosap i talem se grup blong hem i no givim wan ti-bag no wan samting nating long hem, olsem wan ti-bag. Wan narafala woman, we wan grup blong ol Wetnes i bin klinim haos blong hem, i talem se: “Longtaem finis yufala i bin stap kam long doa blong mi, mo mi tingbaot yufala olsem ol gudfala man we i stap raonabaot long mi, be fasin ya blong soem lav long ol man we oli stap raonabaot long yufala i soemaot long mi se ogenaesesen blong yufala i olsem wanem. Tangkyu tumas from hadwok blong yufala.”

Antap long fasin ya we oli givim ol nid long saed blong bodi long ol Kristin brata sista blong olgeta, ol man we oli lukaot long ol saplae oli wari tu long ol samting we oli nidim long saed blong speret. I no tu dei yet afta long hariken, sam kongregesen oli stap mekem miting blong olgeta finis. Kwiktaem nomo, ol smosmol grup blong buk stadi oli gohed bakegen. Ten elda blong ol narafala aelan oli kam long Kauai blong givhan long ol elda long ples ya blong oli save visitim evri Wetnes long aelan ya blong leftemap tingting blong olgeta. Long Sande biaen, ol sikis kongregesen oli joen wanples long Wajtaoa Stadi, wan tok blong 30 menet we wan memba blong ‘Relief Committee’ i givim long saed blong wok we oli mekem, mo laswan tok blong 30 menet we wan memba blong Branj Komiti long Honolulu i kam blong givim. Wan man we i stap long taem ya i talem se: “Evriwan oli harem gud long nambawan advaes we oli kasem mo oli harem se oli reregud long saed blong speret blong fesem sam problem blong olgeta we oli stap yet. Plante man long medel blong olgeta oli krae taem program ya i finis, mo wantaem nomo oli kilkilim han blong olgeta.”

Wan Brata Nomo Long Olgeta Ples Long Wol

Lav mo fasin keagud olsem i wan fasin we i makem ol man blong Jeova long olgeta ples long wol. Taem Hariken Val i kilim Westen Samoa, samwe long wan yia bifo, hem i spolem plante samting lelebet, be kwiktaem nomo ol Wetnes blong Jeova long ol narafala ples long wol oli kam givhan long ol brata blong olgeta long ples ya. Biaen, taem gavman i givim mane long ol skul​—ol Wetnes blong Jeova tu​—blong fiksimap bakegen ol haos blong olgeta, ol Wetnes oli givimbak mane ya wetem wan leta we i talem se oli fiksimap finis ol haos blong olgeta we oli nogud, mo oli save yusum mane ya blong fiksimap bakegen sam haos blong gavman. Wan nyuspepa blong ples ya i talemaot samting ya we oli mekem. From samting ya, wan haeman blong gavman i talem long wan Wetnes se skul blong hem i mekem hem i sem from oli akseptem mane long gavman nating se insurens bambae i givim mane long olgeta from ol haos blong olgeta we hariken i spolem.

Sem mak, long Septemba 1992, taem Oves Reva long saot-is blong Franis i ron bigfala mo i spolem Vaison-la-Romen mo 15 velej we oli stap raon long ples ya, kwiktaem nomo ol Wetnes oli kam. Long wan naet, bigfala wora ya i kilim i ded 40 man, i karemaot 400 haos, mo i mekem sam trabol long plante handred narafala haos, mo plante taosen famle oli no gat wora no lektrik. Kwiktaem long nekis moning, ol Wetnes long ol kongregesen long ples ya oli ol faswan man blong kam givhan long ol man we oli kasem trabol from wora ya we i ron bigwan. Wetem fasin lav, ol famle blong ol Wetnes long ples ya, oli tekem olgeta we oli nidim wan haos blong stap long hem. Plante handred Wetnes oli kam long ol ples farawe mo kolosap blong givhan. Oli putumap wan komiti long Orenj, wan taon we i stap kolosap, blong lukaot long ol fo grup we oli stap wok strong blong givhan, we oli tekemaot sofmad mo oli klinim ol haos, oli wasem ol bigbigfala hif blong ol klos we sofmad i kavremap, mo oli mekem rere kakae mo wora blong dring mo oli karem i kam long ol ples ya we i kasem trabol. Mo tu oli klinim wan skul long ples ya mo sam haos blong minisipol. Ol brata blong olgeta mo ol man long ples ya oli gat fasin tangkyu long ol hadwok blong ol Wetnes ya.

Long plante narafala ples, ol Wetnes blong Jeova oli bin harem nogud from sam disasta, olsem wora i ron bigfala, ol strong win, mo graon i seksek, olsem plante narafala man oli kasem. Oli save se hemia ol trabol we man i no save long hem mo oli no save blokem, taswe oli no talem se i fol blong God no wan narafala man. (Eklesiastis 9:11) Be, oli bilif se lav blong ol brata sista blong olgeta we i stanap long fasin blong tingbaot narafala fastaem bambae i givhan long olgeta nomata wanem trabol i kasem olgeta. Ol wok olsem blong soem lav oli frut ya blong bilif we evriwan long olgeta oli gat. Disaepol Jemes i eksplenem se: “?Sipos i gat ol brata mo sista blong yufala we oli trabol long blangket mo kakae, nao wan long yufala i no givhan long olgeta, weswe nao? ?Sipos wan long yufala i talem long olgeta se ‘God i blesem yufala, yufala i go wom, yufala i go kakae,’ be hem i no givim blangket mo kakae long olgeta, hem bambae i winim wanem? Tok olsem i blong nating nomo. Mo fasin blong bilif blong yumi i olsem. Sipos hem i stap hem wan, i no gat ol gudfala fasin i stap wetem, hem i ded nomo.”​—Jemes 2:​15-17.

Stampa Blong Trufala Fasin Blong Stap Sefgud

Ol Wetnes blong Jeova oli no gat tingting se bambae oli luk ol merikel we God i mekem wantaem nomo, be oli save se bambae oli stap sefgud long medel blong ol Kristin brata blong olgeta raonabaot long wol. Blong talem stret, samting we ol brata ya oli mekem long ol taem ya blong trabol, kolosap i olsem merikel. Oli tingbaot tok blong Jisas we yumi faenem long Matyu 17:20 se: “Sipos bilif blong yufala i olsem sid ya blong nambangga we i smol tumas, bambae yufala i save talem long bigfala hil ya se ‘Yu gowe,’ nao bambae hem i mas gowe. Bambae i no gat wan samting we yufala i no save mekem.” Yes, ol hadtaem we oli olsem ol hil, oli lus taem trufala Kristin bilif, wetem lav, i wok wantaem.

Ol man blong Jeova long olgeta ples long wol oli haremsave han blong God blong olgeta we i stap protektem olgeta naoia we laef i olbaot mo i denja tumas. Oli harem olsem man ya blong raetem Ol Sam se: “Hae God. Taem mi mi ledaon, tingting blong mi i kwaet, nao mi mi slip, from we yu nomo yu stap lukaotgud long mi, nao mi mi sef.” (Ol Sam 4:8) Wetem strong bilif, oli putum tingting blong olgeta long wok ya we oli stap mekem naoia: “Nao bambae ol man oli stap talemaot gud nyus ya se God i King blong olgeta man. Bambae oli talemaot long olgeta ples long wol, blong oli wetnes blong hem long fes blong olgeta man. Nao biaen, Lasdei i save kam.” (Matyu 24:14) Mo wetem bilif, oli stap lukluk i go long fyuja, taem promes blong Jeova long wan nyufala wol we i gat pis mo stret fasin long hem bambae i kamtru, we oli no moa kasem olgeta trabol, trabol we man i mekem no trabol olsem hariken, graon i seksek mo bigfala wora we i ron.​—Maeka 4:4.

[Tok Blong Pija Long Pej 12]

Ol Wetnes oli kam long ol ples farawe mo kolosap blong givhan long olgeta we oli kasem trabol from bigfala wora