Wan Kwestin

From we Baebol i tokbaot oltaem “boe we i no gat papa blong lukaot long hem,” ?hem ya i soemaot se oli no wari tumas long ol gel?

I no olsem nating.

New World Translation of the Holy Scriptures i yusum tok ya “boe we i no gat papa blong lukaot long hem” long plante vas we i soemaot klia we God i wari long ol pikinini we mama nomo i stap lukaot long olgeta. God i mekem wari ya i klia long ol loa blong hem we i givim long Isrel.

Eksampel, God i talemaot stret se: ‘Yufala i no mas mekem wan wido no wan boe we i no gat papa blong lukaot long hem i harem nogud. Sipos yufala i mekem hem i harem nogud, afta sipos hem i kraeaot long mi, bambae mi mas harem krae blong hem; mo kros blong mi bambae i kam antap, mo bambae mi kilim yufala wetem naef blong faet, mo ol woman blong yu oli mas kam ol wido mo ol boe blong yu bambae oli no gat papa.’ (Eksodas 22:​22-24) ‘Jeova God blong yu i God blong ol god mo Masta blong ol Masta, Bigfala God, i Hae tumas mo i save mekem man i fraet, i mekem i sem mak long olgeta man mo i no akseptem doti mane, hem i mekem jajmen i kamtru blong givhan long boe we i no gat papa blong lukaot long hem mo wido.’​—⁠Dutronome 10:​17, 18; 14:29; 24:17; 27:⁠19.

Plante translesen blong Baebol i talem olsem “pikinini we i no gat papa blong lukaot long hem” no “pikinini we i no gat papa mo mama” long ol vas ya, olsemia i minim ol boe mo ol gel tu. Be, ol translesen olsem oli no lukluk long wan mining we i stap long Hibru tok ya (ya·thohmʹ), we oli yusum blong tokbaot boe no man nomo. Defren nao, New World Translation of the Holy Scriptures i yusum stret translesen we i kam “boe (no ol boe) we i no gat papa blong lukaot long hem,” olsem long Ol Sam 68:5, we i talem olsem: ‘God we i stap long tabu haos blong hem i papa blong ol boe we oli no gat papa blong lukaot long olgeta mo jaj blong ol wido.’ Folem semfala fasin we i stanap long Hibru tok, veb we oli yusum blong tokbaot woman no gel nomo long Ol Sam 68:11 i mekem se oli tanem vas ya olsem: “Ol woman we oli stap talemaot gud nyus oli olsem wan bigfala ami.”a

Nating se “boe we i no gat papa blong lukaot long hem” i stampa translesen blong ya·thohmʹ, be hem ya i no min se oli stap talem se oli no wari long ol gel we oli no gat papa blong lukaot long olgeta. Ol vas ya we oli putum mo sam narafala i soemaot se oli leftemap tingting blong ol man blong God blong lukaotgud long ol gel mo woman, mo ol wido. (Ol Sam 146:9; Aesea 1:17; Jeremaea 22:3; Sekaraea 7:​9, 10; Malakae 3:⁠5) Long Loa tu, God i putum wan store long saed blong wan disisen blong jaj we i promes se ol samting blong papa we i ded oli mas seraot long ol gel blong Selofehad. Rul ya i kam wan loa blong lukluk long hem taem wan narafala samting olsem i hapen, olsemia nao i leftemap raet blong ol gel we oli no gat papa blong lukaot long olgeta.​—⁠Namba 27:​1-8.

Jisas i no soemaot kaen fasin long ol pikinini boe bitim ol pikinini gel. Defren nao, yumi ridim: “Nao i gat sam man oli tekem ol pikinini blong olgeta oli kam long Jisas, blong hem i putum han blong hem long olgeta, i blesem olgeta. Be ol man blong Jisas oli blokem olgeta. Be taem Jisas i luk samting ya, hem i tok strong, i talem long olgeta, i se: ‘Yufala i no blokem ol pikinini ya, yufala i letem olgeta oli kam long mi. From we ol pikinini tu oli gat raet wetem ol man we God i king blong olgeta. Tru mi talem long yufala, man we i no glad blong kam olsem pikinini blong bodaon long God, hem i no save kam samtaem we God i king blong hem.’ Nao hem i putum han blong hem i goraon long ol pikinini ya, nao i putum han blong hem long olgeta, i blesem olgeta.”​—⁠Mak 10:​13-16.

Grik tok ya long ples ya we oli tanem i kam “ol yangfala pikinini” i no minim boe nomo no gel nomo. Wan Grik diksonari i talem se tok ya oli “yusum long ol boe mo ol gel.” Jisas i soemaot sem fasin olsem Jeova we i intres long olgeta pikinini, ol boe mo ol gel tu. (Hibrus 1:3; skelem Dutronome 16:14; Mak 5:​35, 38-42.) Taswe yumi mas luksave se advaes blong Hibru haf blong Baebol long fasin blong lukaotgud long “ol boe we oli no gat papa blong lukaot long olgeta” i olsem advaes ya olsem wanem yumi mas wari long olgeta pikinini we oli no gat papa no oli no gat ol papa mama.

[Futnot]