?Ol Wetnes Blong Jeova Oli Wan Narakaen Grup Blong Wosip We i Folem Wan Man?

OLI blemem Jisas Kraes se hem i wan man blong drong, wan man we i kakae tumas, wan man blong brekem loa blong Sabat, wan gyaman wetnes, wan man blong tok nogud long God, mo wan man blong karem mesej blong Setan. Oli talem tu se hem i agensem gavman.​—⁠Matyu 9:34; 11:19; 12:24; 26:65; Jon 8:13; 9:16; 19:⁠12.

Afta we Jisas i ded mo i laef bakegen, long sem fasin oli jajem ol disaepol blong hem tu from ol samting ya. Ol man oli dragem wan grup blong ol Kristin blong faswan handred yia i go long ol haeman blong taon nao oli singaot se: ‘Ol man ya oli stap mekem tumas trabol long olgeta ples long wol.’ (Ol Wok 17:⁠6) Long wan narafala taem bakegen oli tekem aposol Pol mo fren blong hem Saelas i go long ol haeman mo oli talem se tufala ya i mekem taon blong Filipae i no save stap kwaet.​—⁠Ol Wok 16:⁠20.

Biaen oli jajem Pol se “i wan rabis man, hem i stampa blong plante trabol. Olbaot long wol, hem i stap mekem plante bigfala rao long ol man Isrel,” mo hem i traem blong “mekem haos blong God i doti long fes blong God.” (Ol Wok 24:​5, 6) Ol lida blong ol man Jyu long Rom oli talemaot tru, wanem nao i stap kamaot long ol man blong Jisas, taem oli talem se: “Mifala i save we olbaot long evri ples, ol man oli stap tok nogud long kampani ya blong yufala.”​—⁠Ol Wok 28:⁠22.

I klia se, nyufala grup ya we Jisas Kraes i putumap, sam oli luk hem olsem wan grup blong skul wetem ol narakaen tingting mo fasin we oli agensem ol stret rul we ol man long taem ya oli akseptem. I tru, plante man blong tede bambae oli luk ol Kristin long taem bifo olsem wan narakaen grup blong wosip we i folem wan man, we i save spolem plante man. Plante taem ol man ya blong tok agens oli haeman we ol man oli respektem olgeta, mo from samting ya plante man oli ting se ol tok agens blong olgeta i tru. Plante oli bilivim ol samting ya we oli blemem Jisas mo ol disaepol blong hem from. !Be, olsem we maet yu save, evriwan long ol tok ya we oli talem blong agensem ol disaepol oli gyaman! Nating se ol man oli stap talem, be samting ya i no mekem se ol tok ya oli tru.

?Olsem wanem long tede? ?I stret blong talem se ol Wetnes blong Jeova oli olsem wan grup long saed blong skul wetem ol narakaen tingting mo fasin we oli agensem ol stret rul we ol man oli akseptem olgeta? ?Ol Wetnes blong Jeova oli narakaen grup blong wosip we i folem wan man?

Wanem We Ol Pruf Oli Soemaot

Wan haeman blong gavman long taon ya blong Sen Pitasbeg, Rasia, i eksplenem se: “Ol man oli bin talem se ol Wetnes blong Jeova oli talemaot long mifala se wan narakaen grup blong wosip we oli stap wok haed mo oli stap kilim i ded ol pikinini mo kilkilim olgeta wanwan bakegen.” Be, i no longtaem i pas, ol man blong Rasia oli kasem save moa long ol trufala fasin blong ol Wetnes blong Jeova. Afta we hem i wok wetem ol Wetnes blong Jeova long saed blong wan intenasnal asembli, semfala haeman ya i talem se: “Naoia mi luk ol man we oli gat stret tingting, oli stap smael, oli moa gud bitim plante man we mi save olgeta. Oli stap long pis mo oli gat kwaet tingting, mo oli laeklaekem olgeta tumas.” Hem i ademap se: “Mi no rili kasem save from wanem ol man oli stap talem ol gyaman tok long saed blong olgeta.”

Ol Wetnes blong Jeova oli no mekem ol miting we oli stap folem sam kaen kastom nomo, no mekem wosip blong olgeta long wan fasin haed. Wan woman blong raetem ol buk Julia Mitchell Corbett we i no wan Wetnes, i talem se: “Bitim wan taem long wan wik oli kam wanples, long ol Haos Kingdom blong olgeta (ol ples we oli stap mekem miting long hem oli no kolem se ol jyos), plante long ol taem blong olgeta oli spenem blong mekem Baebol stadi mo blong tokbaot Baebol.” Oli makem klia ples blong miting blong olgeta wetem wan saen. Ol miting ya oli open, mo oli singaot ol man olbaot blong go long olgeta. Oli no talemaot nem blong ol man we oli jes kam be oli mekem welkam long olgeta.

Corbett i ademap long buk blong hem Religion in America se “ol Wetnes oli winim respek blong ol man from fasin blong olgeta blong no gyaman, oli soemaot respek long ol narafala, mo oli wok strong oltaem.” Plante we oli no Wetnes oli agri fulwan se i no gat ol fasin we oli narakaen mo oli krangke long ol Wetnes blong Jeova. Fasin blong olgeta i no agensem ol stret fasin blong laef we ol man oli akseptem. The New Encyclopædia Britannica i tru taem hem i talem se ol Wetnes oli “strong blong kasem ol hae mak long saed blong fasin blong laef blong olgeta wanwan.”

Man blong lukaot long nyus mo ol spesel store long stesen blong televisin long Yunaeted Stet i raet i go long ol Wetnes blong Jeova blong ansa long wan ripot we i no givim stret tingting long saed blong ol Wetnes we oli soemaot long televisin long nyus program ya 60 Minutes. Hem i talem se: “Sipos ol man oli folem sem fasin blong laef olsem we skul blong yufala i mekem, bambae nesen ya i no save stap long rod we i stap long hem naoia. Mi mi wan man blong nyus we mi savegud se ogenaesesen blong yufala i stanap long lav mo long strong bilif long Man we i Wokem olgeta samting. Mi wantem talem long yufala se i no evri man blong nyus we oli no gat stret tingting.”

Wan Skul We Ol Man Oli Savegud Long Hem

?I stret blong talem se ol Wetnes blong Jeova oli wan smol grup blong wosip we oli folem ol narakaen mo krangke fasin? Long wan fasin, ol Wetnes blong Jeova oli smol long namba taem yumi skelem wetem sam skul. Be, tingbaot wanem we Jisas i talem se: “Get ya we i smol nomo, mo rod we i strong, hemia i blong go kasem laef. Mo smol man nomo oli faenem.”​—⁠Matyu 7:​13, 14.

Mo tu, ol Wetnes oli no wan smol grup blong wosip we i folem wan man wetem ol narakaen tingting mo fasin. I gat moa long 11 milyan man we oli kam long Memoriol blong ded blong Kraes, long taem we ol tri oli putum flaoa long 1993. Be samting we i impoten moa long namba blong olgeta se gudfala fasin mo eksampel we oli soemaot, we i mekem se long olgeta ples raon long wol ol man oli toktok gud long saed blong olgeta. I tru, hemia wan samting we i bin mekem se gavman blong sam kantri oli bin agri long olgeta olsem wan prapa skul folem loa.

Bigfala samting hemia wan disisen we i kamaot i no longtaem long ‘European Court of Human Rights.’ I talemaot se ol Wetnes ol mas gat fasin fri long saed blong tingting, voes blong hat mo tingting, mo skul mo oli gat raet blong talemaot bilif blong olgeta mo tijim long ol narafala man. Oli no save mekem disisen olsem sipos oli save se ol Wetnes blong Jeova oli yusum sam kaen fasin we oli no stret blong gyaman long ol man blong pulum ol nyufala memba blong olgeta no sipos oli yusum sam rod blong kontrolem tingting blong ol man blong olgeta.

Bigfala namba blong ol man long olgeta ples blong wol oli save gud ol Wetnes blong Jeova. Long plante milyan blong ol man we oli no Wetnes be oli stadi Baebol wetem ol Wetnes no we oli bin stadi wetem olgeta wan taem bifo, mifala i askem long yufala se, ?Oli traem fosem yu blong tingting olsem olgeta? ?Ol Wetnes oli traem ol defren kaen fasin blong kontrolem tingting blong yu? Tru ya, bambae yufala i ansa klia se “No gat”. I klia se, sipos oli bin yusum ol fasin ya, fulap man we oli bin spolem olgeta finis bambae oli agensem saed blong ol Wetnes blong Jeova.

“Wok Strong Blong Halpem Ol Man”

Ol memba blong wan narakaen grup we oli folem wan man plante taem oli no stap joen wetem ol famle, ol fren, mo tu long ol narafala man olbaot. ?Ol Wetnes blong Jeova oli mekem olsem? Wan man blong nyus long Jek Ripablik i raetem se: “Mi mi no wan Wetnes blong Jeova,” Be hem i ademap se: “I klia se [ol Wetnes blong Jeova] oli strong blong folem ol stret fasin. . . . Oli gat respek long ol haeman blong gavman be oli bilif se Kingdom blong God nomo i naf blong winim olgeta trabol blong ol man. Be makemgud​—⁠oli no bitim mak folem krangke fasin. Oli ol man we oli wok strong blong halpem ol narafala man.”

Mo oli no stap long ol grup olgeta nomo, longwe long ol famle, mo ol narafala man. Ol Wetnes blong Jeova oli luksave responsabiliti blong olgeta long Baebol blong laekem mo lukaotgud long ol famle blong olgeta. Oli laef mo wok wetem ol man we oli kamaot long ol defren laen mo skul. Taem disasta i spolem wan ples, kwiktaem nomo oli givim ol samting we ol man oli nidim mo oli givhan long ol man long ol narafala rod tu.

I impoten moa se, oli joen long wan program blong tijim ol man we i moa gud long ol narafala program. ?Hamas skul we oli stap folem wan plan blong visitim olgeta man wanwan long taon no velej blong olgeta? !Ol Wetnes blong Jeova oli mekem olsem ya long bitim 200 kantri mo bitim 200 lanwis! I klia se, ol Wetnes blong Jeova oli “wok strong blong halpem ol man.”

Stap Fasgud Long Baebol

I tru, ol tijing blong ol Wetnes blong Jeova oli defren long ol tijing we ol jyos oli givim. Ol Wetnes blong Jeova oli bilif se Jeova i haefala God olgeta mo Jisas i Pikinini blong hem, oli no haf blong wan triniti god. Oli bilif strong se Kingdom blong God nomo i save karemaot ol samting we ol man oli stap harem nogud long hem. Oli givim woning long ol man long saed blong bigfala trabol ya we kolosap nao bambae i finisim ol nogud fasin blong naoia. Oli talemaot promes blong God long saed blong paradaes long wol we i blong ol man we oli obei long hem. Oli no wosip long kros. Oli no mekem lafet blong Krismas. Oli bilif se sol i save ded mo i no gat helfaea. Bambae oli no kakae blad, no akseptem ol blad transfyusen. Oli no joen long politik mo no joen long faet. ?Yu askem long yu wan samtaem from wanem ol tijing blong ol Wetnes blong Jeova oli defren?

Wan nyuspepa blong Masajuset, Daily Hampshire Gazette, i eksplenem se ol Wetnes blong Jeova oli “strong blong folem mining blong Baebol from samting ya oli putum tabu long plante fasin we ol narafala oli harem gud long olgeta . . . , oli mekem samting ya blong traehad blong folem eksampel blong ol Kristin blong faswan handred yia mo tok blong Baebol.” The Encyclopedia of Religion i agri se “olgeta samting we oli bilif long hem i kamaot long Baebol. Oli ‘pruf vas’ (hemia i min se, oli putum ol vas we oli sapotem ol poen) kolosap long evri bilif we oli talem, oli akseptem ol rul blong Baebol fulwan, we i tekem ples blong olgeta kastom.” Buk ya Religion in America i talem se: “Grup ya oli neva kam slak blong stadi long Baebol, mo oli yusum fulap vas blong sapotem ol tijing blong olgeta.”

?Hu i Lida Blong Olgeta?

From we ol Wetnes blong Jeova oli fasgud long ol tijing blong Baebol, fasin ya blong ona mo wosip long ol lida we oli man nomo i no stap long medel blong olgeta olsem we ol narakaen grup we oli folem wan man oli stap mekem tede. Oli no wantem fasin ya we ol lida blong skul oli putum olgeta oli hae moa long ol narafala man long skul. The Encyclopedia of Religion i talem tru long saed blong ol Wetnes blong Jeova se: “I no gat wan grup we oli lida blong skul ya mo oli no karem ol taetel blong mekem olgeta oli defren long ol narafala long skul.”

Oli folem Jisas Kraes olsem Lida blong olgeta mo olsem Hed blong Kristin kongregesen. Jisas nao i talem se: “Be bambae yufala i no letem ol man oli singaot yufala se ‘Tija,’ from we yufala i gat wan tija nomo blong yufala, mo yufala evriwan i brata. Mo bambae yufala i no singaot man long wol ya se ‘Papa,’ from we yufala i gat wan Papa nomo blong yufala, we hem i stap long heven. Mo bambae yufala i no letem ol man oli singaot yufala se ‘Masta,’ from we yufala i gat wan Masta nomo blong yufala, we mi ya, mi Mesaea.”​—⁠Matyu 23:​8-12.

I klia se ol Wetnes blong Jeova oli stap longwe long fasin blong wan narakaen grup blong wosip we i folem wan man olsem we Jisas tu i longwe long fasin blong man blong kakae tumas no man blong drong. I tru, i no evriwan we oli bilif long ol gyaman ripot long saed blong Jisas mo ol disaepol blong hem oli foldaon long trap ya blong talemaot ol gyaman toktok blong spolem nem blong hem. Maet samfala man oli jes harem ol store we oli no stret nomo. Sipos yu gat sam kwestin long saed blong ol Wetnes blong Jeova mo ol bilif blong olgeta, ?from wanem yu no wantem save moa long olgeta? Doa we i go long ol Haos Kingdom blong olgeta i open bigwan long olgeta man we oli stap lukaot trutok.

Yu save haremgud tu long fasin ya blong olgeta blong lukaot ol stret save blong Baebol mo lanem olsem wanem blong mekem wosip long God folem ol tok blong Jisas se: “I gat taem i stap kam, yes, taem ya i kam finis, we prapa man blong mekem wosip i save mekem wosip long Papa blong yumi long trutok we i kamaot long tingting blong hem. Hemia nao ol prapa man blong mekem wosip we Papa blong yumi i wantem blong oli stap mekem wosip long hem.”​—⁠Jon 4:⁠23.