Jajmen Blong Jeova Agens Long Ol Gyaman Tija
“Mi mi luk ol rabis fasin we ol profet long Jerusalem oli mekem. Oli mekem nogud wetem woman, mo oli stap gyaman . . . Long tingting blong mi, olgeta evriwan ya oli olsem Sodom, mo ol man long Jerusalem, oli olsem Gomora.”—JEREMAEA 23:14.
1. ?From wanem man we i tijim tijing blong God i gat wan bigfala responsabiliti?
ENI man we i tijim tijing blong God, i gat wan bigfala responsabiliti. Jemes 3:1 i givim woning se: “Ol brata mo sista. I nogud plante man long yufala bambae oli kam tija blong [kongregesen]. Yufala i save, taem God bambae i jajem mifala tija, bambae hem i save mekem i strong moa long mifala, i winim fasin we bambae i mekem blong jajem ol narafala man.” Yes, ol man blong tijim Tok blong God oli gat wan bigfala responsabiliti blong talemaot long fes blong God we oli mekem gudfala wok, bitim ol narafala Kristin. ?Bambae samting ya i minim wanem long olgeta we oli olsem gyaman tija? I gud yumi lukluk i go long ol samting we oli hapen long taem blong Jeremaea. Bambae yumi luk olsem wanem ol samting we oli hapen long taem ya, oli pija blong ol samting we oli stap hapen tede.
2, 3. ?Jeova i yusum Jeremaea blong givim wanem jajmen long saed blong ol gyaman tija blong Jerusalem?
2 Long yia 647 B.K.T., namba 13 yia blong rul blong King Josia, Jeova i singaot Jeremaea blong mekem wok olsem profet blong Hem. Jeova i gat wan toktok agens long Juda, nao hem i sanem Jeremaea blong talemaot. Ol gyaman profet, no tija blong Jerusalem, oli stap mekem “rabis fasin” long fes blong God. Rabis fasin blong olgeta i bigwan tumas, mekem se God i talem se Jerusalem mo Juda tufala i olsem Sodom mo Gomora nomo. Jeremaea japta 23 i talem samting ya long yumi. Vas 14 i talem se:
3 “Mi mi luk ol rabis fasin we ol profet long Jerusalem oli mekem. Oli mekem nogud wetem woman, mo oli stap gyaman. Oli sapotem ol man nogud blong oli gohed nomo long rabis fasin blong olgeta, oli no jenis. Long tingting blong mi, olgeta evriwan ya oli olsem Sodom, mo ol man long Jerusalem, oli olsem Gomora.”
4. ?Olsem wanem ol rabis eksampel blong ol tija blong Jerusalem oli sem mak long Krisendom tede?
4 Yes, ol profet, no ol tija ya, oli soem ol rabis eksampel long saed blong ol fasin blong olgeta mo, i olsem se, oli pulum ol narafala man blong mekem sem mak. !Lukluk long ol samting we oli stap hapen long Krisendom tede! Oli sem mak nomo long ol samting we oli hapen long taem blong Jeremaea. Tede ol lida blong skul oli letem ol man blong slip wetem woman blong narafala man mo man blong slip wetem man, blong oli stap olsem ol lida insaed long skul mo oli letem olgeta blong lidim sevis long skul. Yumi no sapraes se plante memba blong skul, olgeta tu oli gat fasin blong slip olbaot.
5. ?From wanem rabis fasin blong Krisendom long saed blong seks i bitim hemia blong Sodom mo Gomora?
5 Jeova i talem se ol man we oli stap long Jerusalem oli sem mak long ol man blong Sodom mo Gomora. Be rabis fasin long saed blong seks we Krisendom i mekem, i bitim mak blong fasin ya blong seks we ol man Sodom mo Gomora oli bin mekem. Yes, long lukluk blong Jeova, Krisendom i gat moa fol. Ol tija blong hem oli daonem ol gudfala Kristin fasin. Mo samting ya i mekem plante tingting long saed blong ol rabis fasin i kamaot, mo from samting ya, i gat plante defren kaen samting blong pulum man blong mekem nogud, we hem i no luksave. Rabis fasin ya i kam antap bigwan tumas, mekem se tede oli luk ol rabis fasin olsem we oli oraet nomo.
“Oli Stap Gyaman”
6. ?Jeremaea i talem wanem long saed blong rabis fasin blong ol profet blong Jerusalem?
6 Naoia makemgud samting we vas 14 i talem long saed blong ol profet blong Jerusalem. “Oli stap gyaman.” Mo lashaf blong vas 15 i talem se: “Ol profet long Jerusalem oli stampa blong apostasi we i kasem ol ples raonabaot.” Ale vas 16 i gohed se: “Hemia nao tok blong Jeova blong ol ami, se: ‘Yufala i no mas lesin long ol tok we ol profet ya oli stap talemaot long yufala ol man. Oli stap mekem yufala i kam man nating. Oli stap talemaot vison we i kamaot long prapa hat blong olgeta—hem i no kamaot long maot blong Jeova.’ ”
7, 8. ?From wanem ol lida blong Krisendom oli olsem ol gyaman profet blong Jerusalem, mo olsem wanem samting ya i bin gat paoa long ol man we oli stap go long skul?
7 Olsem ol gyaman profet blong Jerusalem, ol lida blong Krisendom tu oli stap gyaman, oli stap tijim ol tijing blong apostasi,a ol tijing we oli no stap nating long Tok blong God. ?Wanem sam long ol gyaman tijing ya? Sol we i no save ded, Triniti, pegatri, mo helfaea blong mekem man i harem nogud blong olwe. Mo tu oli mekem ol man blong olgeta oli glad, taem oli tijim ol samting we ol man ya oli wantem harem. Plante taem bakegen oli talem se Krisendom i no save kasem trabol from hem i gat pis blong God. Be ol lida blong skul oli stap talem “vison we i kamaot long prapa hat blong olgeta.” Vison ya i gyaman nomo. Olgeta we oli bilif long ol gyaman tok olsem, oli stap kasem posen long saed blong speret. !Samting ya i lidim olgeta oli go krangke folem rod ya we bambae oli lus long hem!
8 Tingbaot samting we Jeova i talem long saed blong ol gyaman tija ya long vas 21: “Mi mi no sanem ol profet ya, be olgeta nomo oli resis i go. Mi no toktok long olgeta, be olgeta nomo oli stap talemaot profet tok.” Ale tede, God i no bin sanem ol lida blong skul, mo oli no tijim ol trutok blong hem. ?Wanem frut i kamaot? Ol man we oli stap go long skul oli no wantem ridim Baebol from ol lida blong skul blong olgeta oli stap tijim olgeta long ol waes blong wol.
9, 10. (a) ?Ol gyaman tija blong Jerusalem oli kasem wanem kaen drim? (b) ?Olsem wanem ol lida blong Krisendom tu oli tijim “ol gyaman drim”?
9 Antap long samting ya, ol lida blong skul tede oli talemaot ol gyaman hop. Makemgud long vas 25: “Mi harem ol gyaman profet tok we ol profet oli bin talemaot long nem blong mi, oli stap talem se, ‘!Mi bin kasem wan drim! !Mi bin kasem wan drim!’ ” ?Ol wanem kaen drim ya? Vas 32 i talem long yumi se: “Hemia tok blong Jeova, ‘Mi ya mi stap agens long ol profet blong ol gyaman drim, we oli talemaot olgeta mo oli mekem ol man blong mi oli go olbaot from ol gyaman tok blong olgeta mo from fasin flas blong olgeta. Be mi no sanem olgeta no mi givim oda long olgeta. Taswe bambae oli no save givhan long ol man ya.’ Hemia tok blong Jeova.”
10 ?Wanem ol gyaman drim, no ol gyaman hop, we ol lida blong ol skul oli stap tijim? Yes, hemia se Yunaeted Nesen nomo i hop ya blong olgeta man blong kasem pis mo seftaem tede. Long ol yia we oli jes pas, oli bin kolem Yunaeted Nesen se “laswan hop blong mekem ol man oli gat wan tingting mo pis,” “bigfala miting blong putum pis mo stret fasin,” “stampa hop blong putum pis long wol naoia.” !Samting ya i gyaman nomo! Kingdom blong God nomo i hop blong olgeta man. Be ol lida blong skul oli no talemaot mo oli no tijim trutok long saed blong gavman ya blong heven, we i stampa tok blong Jisas taem hem i prij.
11. (a) ?Ol gyaman tija blong Jerusalem oli mekem wanem rabis samting long prapa nem blong God? (b) ?Defren olgeta long grup ya we i olsem Jeremaea, ol tija blong ol gyaman skul tede oli bin mekem wanem samting long saed blong nem blong God?
11 Vas 27 i talemaot moa long yumi. “Oli gat tingting blong yusum ol drim blong olgeta, we oli stap taltalemaot long olgeta blong mekem ol man blong mi oli fogetem nem blong mi, olsem we Bal i mekem papa blong olgeta oli fogetem nem blong mi.” Ol gyaman profet blong Jerusalem oli mekem ol man oli fogetem nem blong God. ?Tede, ol lida blong gyaman skul oli mekem sem mak? Si oli mekem. Oli mekem samting we i moa nogud. Oli haedem nem blong God, Jeova. Oli tijim se i no nid blong yusum nem ya, mo oli tekemaot nem ya long ol nyufala Baebol blong olgeta. Oli strong blong agensem eni man we i tijim ol man se Jeova i nem blong God. Be grup ya we i olsem Jeremaea, hemia smol grup blong ol Kristin we tabu speret i makemaot, wetem ol fren blong olgeta, oli mekem samting we i sem mak olsem we Jisas mekem. Oli tijim plante milyan man long saed blong nem blong God.—Jon 17:6.
Soemaot Poen Blong Olgeta
12. (a) ?From wanem ol tija blong ol gyaman skul oli gat bigfala fol from blad? (b) ?Ol lida blong skul oli bin mekem wanem long tu bigfala faet blong wol?
12 Bakegen mo bakegen grup ya we i olsem Jeremaea i bin soemaot ol lida blong skul se oli ol gyaman tija we oli stap lidim ol sipsip blong olgeta oli go long bigfala rod blong lus. Yes, ol tabu Kristin oli bin soemaotgud from wanem i stret blong ol man ya blong drim oli mas kasem strong jajmen blong Jeova. Eksampel, plante taem ol man blong Jeova oli bin tokbaot Revelesen 18:24, we i talem se long Bigfala Babilon, oli faenem blad blong “olgeta man we ol man oli kilim olgeta.” Tingbaot olgeta faet we oli bin kamaot from ol defren tingting blong ol skul. !Ol tija blong gyaman skul oli gat bigfala fol from blad blong olgeta we ol man oli kilim olgeta! Tijing blong olgeta i mekem se ol man oli seraot mo i gohed blong mekem ol man we oli gat defren bilif mo kantri oli agensem olgeta bigwan. Long saed blong Faswan Bigfala Faet Blong Wol, buk ya Preachers Present Arms i talem se: “Ol clercs [lida blong skul] oli mekem ol man oli harem se oli stap faet long saed blong speret mo samting ya i pusum ol man blong faet. . . . From samting ya, ol skul oli joen fulwan long plan blong faet.” I sem mak long Namba Tu Bigfala Faet Blong Wol. Ol lida blong skul oli sapotem fulwan ol kantri we oli stap faet mo oli blesem ol ami blong olgeta. Tu bigfala faet blong wol oli stat long Krisendom, we ol man blong semfala skul oli kilkilim olgeta oli ded. Ol grup blong skul mo ol narafala grup insaed long Krisendom oli stap gohed blong mekem blad i ron kasem taem blong yumi. !Ol gyaman tijing blong olgeta oli bin mekem ol rabis frut oli kamaot!
13. ?Olsem wanem Jeremaea 23:22 i pruvum se ol lida blong Krisendom oli no fren nating wetem Jeova?
13 Plis makemgud Jeremaea japta 23, vas 22 se: “Sipos oli stanap long medel blong kampani blong ol gudfala fren blong mi, ale oli save mekem ol man blong mi oli harem ol prapa tok blong mi, mo oli save mekem olgeta oli tanem baksaed long ol rabis rod blong olgeta mo long rabis fasin we oli stap mekem.” Sipos ol profet blong ol skul blong Krisendom oli stanap long medel blong kampani blong ol gudfala fren blong Jeova, blong frengud wetem hem olsem wan slef we i stret mo i waes, ale olgeta tu bambae oli stap folem ol rul blong God. Olgeta tu bambae oli mekem ol man long Krisendom oli harem ol prapa tok blong God. Be, ol gyaman tija long taem blong yumi oli bin satem tingting blong ol man we oli folem olgeta, nao ol man ya oli kam olsem man blong wok blong Enemi blong God, Devel Setan.
14. ?Wanem strongfala tok we i kamaot long yia 1958, we i soemaot klia ol lida blong Krisendom?
14 Grup ya we i olsem Jeremaea i bin wok strong blong soemaot klia ol lida blong skul. Eksampel, long 1958 Wil Blong God Intenasnal Asembli blong ol Wetnes blong Jeova long Nyu Yok Siti, vaes presiden blong Watch Tower Society i givim wan tok we haf blong hem i talem se: “Mifala i talemaot wetem tok we i no givim tu mining mo mifala i no fraet blong talemaot se stampa blong ol fasin blong brekem loa, stronghed fasin, fasin blong no laekem nating narafala, faet, tok nogud long samfala, . . . mo ol krangke fasin blong laef we oli olbaot, hemia ol skul we oli no stret, gyaman skul; we enemi ya blong ol man we man i no save luk, Devel Setan, i stap biaen long olgeta. Ol man we oli gat bigfala fol from ol fasin blong wol, hemia ol tija mo ol lida blong ol skul; mo ol man we oli gat bigfala fol bitim ol narafala long ol samting ya, hemia ol lida blong ol skul blong Krisendom. . . . Biaen long ol yia we oli stat long Faswan Bigfala Faet Blong Wol kasem naoia, Krisendom i gat wan fasin fren wetem God olsem fasin fren we ol man Isrel long taem blong Jeremaea oli gat. Yes, Krisendom i stap fesem wan bigfala trabol blong spolem hem we i moa strong mo i save mekem man i fraet moa bitim hemia we Jeremaea i luk long Jerusalem.”
Jajmen Blong Ol Gyaman Tija
15. ?Ol lida blong skul oli bin talemaot wanem profet tok long saed blong pis? ?Bambae samting ya i kamtru?
15 Nating se oli kasem woning ya, ?ol lida blong skul oli bin mekem wanem kam kasem tede? Olsem vas 17 i talem: “Oli stap talem bakegen mo bakegen long olgeta we oli no gat respek long mi se: ‘Jeova i talem finis, se: “Bambae yufala i gat pis.” ’ Mo long olgeta we oli stronghed long hat blong olgeta, oli stap talem se: ‘Bambae i no gat wan trabol i save kam kasem yufala.’ ” ?Samting ya i tru, no? !No gat! Bambae Jeova i soemaot klia we ol profet tok blong ol lida blong skul, oli ol gyaman profet tok nomo. Bambae hem i no save mekem ol samting we oli stap talem long nem blong hem, oli kamtru. !Be, gyaman tingting ya blong ol lida blong skul se oli gat pis wetem God i save trikim yumi!
16. (a) ?Wanem tingting blong wol ya long saed blong ol fasin blong laef, mo hu i gat fol from? (b) ?Grup ya we i olsem Jeremaea i stap mekem wanem long saed blong ol rabis tingting blong wol ya?
16 Maet yu gat tingting ya se, ‘?Olsem wanem, ol gyaman tijing blong ol lida blong skul oli save trikim mi? !Neva!’ !Ating, yu no mas gat strong tingting olsem! Tingbaot se ol gyaman tijing blong ol lida blong skul oli bin gohed blong leftemap ol tingting long saed blong rabis fasin, be man i no luksave. Long ol tijing blong olgeta, kolosap oli agri long enikaen fasin, nating se i rabis olgeta. Mo ol rabis tingting ya oli insaed long olgeta pleplei, sinema, televisin, ol magasin, mo ol myusek. From samting ya, yumi mas lukaotgud, blong no foldaon aninit long paoa blong ol rabis fasin ya we oli save pulum yumi be yumi no luksave. Ol yangfala oli save foldaon long trap ya blong lukluk ol rabis video mo lesin long ol rabis myusek. Tingbaot se tingting blong ol man tede we oli agri long eni samting, i frut ya we i kamaot stret long ol gyaman tijing blong ol lida blong skul mo from oli no leftemap ol stret rul blong God. Grup ya we i olsem Jeremaea i stap agensem ol rabis tingting ya mo i stap halpem ol man blong Jeova blong sakemaot ol rabis fasin we i stap kavremap Krisendom.
17. (a) Olsem Jeremaea i soemaot, ?wanem jajmen bambae i kam long Jerusalem we i fulap long rabis fasin? (b) ?Bambae wanem samting i hapen long Krisendom i no longtaem?
17 ?Jeova, bigfala Jaj, bambae i mekem wanem jajmen long ol gyaman tija blong Krisendom? Vas 19, 20, 39, mo 40 i givim ansa se: “!Harem! Tru ya, bigfala win blong Jeova, bigfala fasin kros hem wan, bambae i kamaot, yes wan bigfala win we i tanraon. Bambae hem i tanraon antap long hed blong ol rabis man. Bambae kros blong Jeova i no finis, gogo kasem we bambae hem i mekem ol tingting blong hat blong hem oli kamtru fastaem, oli kamtru olgeta. . . . Bambae mi sakemaot yufala ol man, we mi no save tekem yufala bakegen, mo bambae mi lego yufala mo taon ya we mi bin givim long yufala mo long ol bubu blong yufala—long fored blong mi. Mo bambae mi putum trabol antap long yufala gogo i no save finis mo bambae mi mekem yufala i sem gogo i no save finis, we bambae man i no save fogetem.” !Olgeta samting ya oli hapen long Jerusalem we i fulap long rabis fasin mo haos prea blong hem, mo i no longtaem wan trabol olsem bambae i kasem Krisendom we i fulap long rabis fasin!
Talemaot “Baden Blong Jeova”
18, 19. ?Jeremaea i talemaot wanem “baden blong Jeova” long Juda, mo wanem i kamaot from?
18 ?Nao, wanem responsabiliti blong grup ya we i olsem Jeremaea mo ol fren blong olgeta? Vas 33 i talem long yumi se: “Taem ol man ya no wan profet no wan pris i askem long yu, se, ‘?Wanem nao baden blong Jeova?’ yu mas ansa long olgeta se, ‘ “!Yufala nao—Yufala i wan bigfala baden! Mo wantaem nomo bambae mi mi lego yufala,” hemia tok blong Jeova.’ ”
19 Hibru wod we oli yusum blong talem “baden” i gat tufala mining blong hem. Hem i save minim hevi mesej blong God no samting we i hevi tumas long wan man, mekem se hem i taed. Long vas ya, tok ya “baden blong Jeova” i minim wan hevi profet tok—mesej ya se bambae oli mas spolem Jerusalem. ?Olgeta man oli wantem harem ol hevi profet tok blong Jeova we Jeremaea i stap gohed blong talemaot? No gat, ol man oli jikim Jeremaea se: ‘?Wanem profet tok (baden) we yu yu gat naoia? !Mifala i sua se profet tok blong yu bambae i wan narafala baden we i mekem man i taed!’ ?Be Jeova i talem wanem long olgeta? Hemia: “!Yufala nao—Yufala i wan bigfala baden! Mo wantaem nomo bambae mi mi lego yufala.” Yes, ol man ya oli wan baden long Jeova, mo bambae hem i sakemaot olgeta blong oli no moa stap olsem wan baden long hem.
20. ?Wanem ya “baden blong Jeova” tede?
20 ?Tede, wanem ya “baden blong Jeova”? Hemia hevi mesej long profet tok long Tok blong God. Hem i hevi no i fulap wetem trabol, i stap talemaot en blong Krisendom we i stap kam kwik. Long ol man blong Jeova, yumi gat wan hevi responsabiliti blong talemaot “baden blong Jeova.” Taem en i stap kam kolosap, yumi mas talemaot long olgeta man se, ol man blong Krisendom we fasin blong olgeta i olbaot oli wan “baden,” yes, ‘!oli wan bigfala baden!’ long Jeova God, mo se i no longtaem bambae hem i fri olgeta long “baden” ya taem hem i lego Krisendom i go long bigfala trabol.
21. (a) ?From wanem oli spolem Jerusalem long yia 607 B.K.T.? (b) Afta we oli spolem Jerusalem, ?wanem i hapen long ol gyaman profet mo long trufala profet blong Jeova, mo samting ya i mekem yumi sua long wanem samting tede?
21 Long taem blong Jeremaea, Jeova i mekem jajmen blong hem i kamtru taem ol man Babilon oli spolem Jerusalem long yia 607 B.K.T. Olsem profet tok i talem, hemia wan ‘trabol mo sem’ blong ol stronghed man Isrel ya we oli no stap tru long God. (Jeremaea 23:39, 40) Samting ya i soem long olgeta se Jeova, we plante taem oli bin mekem nogud long hem, naoia i lego olgeta blong oli kasem ol frut blong rabis fasin blong olgeta. Long taem ya ol profet blong olgeta we oli flas oli no moa save talem wan samting. Be, Jeremaea i stap gohed blong talemaot profet tok. Jeova i no lego hem. Folem eksampel ya, bambae Jeova i no save lego grup ya we i olsem Jeremaea taem hevi disisen blong hem i smasem laef blong ol lida blong Krisendom mo olgeta we oli bilif long ol gyaman tok blong olgeta.
22. ?Olsem wanem long Krisendom taem bambae jajmen blong Jeova i kamtru long hem?
22 Yes, taem oli tekemaot ol rij samting blong ol skul blong Krisendom mo ol man oli luk sem blong hem, bambae hem i sem mak long Jerusalem afta long yia 607 B.K.T., taem we i kam nogud mo i no gat man i stap long hem. Hemia nao stret jajmen we Jeova i bin promes agens long ol gyaman tija. Bambae jajmen ya i no save mestem. Olsem ol woning we tabu speret i pusum Jeremaea blong talemaot, oli kamtru bifo, bambae oli kamtru tu long taem blong yumi. Ale i gud yumi kam olsem Jeremaea. !Yumi no mas fraet blong talemaot profet tok long saed blong baden blong Jeova long olgeta man, olsemia nao bambae oli kasem save from wanem fulwan mak blong stret jajmen blong Jeova bambae i kasem ol tija blong ol gyaman skul!
[Futnot]
a Fasin blong lego trutok mo agensem hem.
Ol Kwestin Blong Tingtingbak
◻ ?Jerusalem blong bifo i nogud olsem wanem long lukluk blong Jeova?
◻ ?Krisendom “i stap gyaman” long wanem rod?
◻ ?Olsem wanem fol blong ol lida blong skul long taem blong yumi i bin kam long klia ples?
◻ ?Oli stap talemaot wanem “baden blong Jeova” naoia?
[Tok blong pija long pej 8]
Ol profet blong Jerusalem oli mekem “ol rabis fasin”
[Tok blong pija long pej 9]
“Oli stap talemaot vison we i kamaot long prapa hat blong olgeta”
[Tok blong pija long pej 10]
Jerusalem, afta we oli spolem hem, i soemaot laswan trabol long Krisendom