Trastem Jeova Blong Mekem Ol Stampa Tingting Blong Hem Oli Kamtru
“Ol stret man ya bambae oli tekem graon ya i blong olgeta, mo bambae oli stap long hem gogo i no save finis.”—OL SAM 37:29.
1. ?Wanem stampa tingting blong Jeova long saed blong ol man mo wol ya?
TAEM Jeova i wokem faswan papa mo mama blong yumi, Adam mo Iv, hem i mekem tufala i stret olgeta. Mo i mekem tufala blong bambae tufala i save laef olwe long wol ya—sipos oli obei long ol loa blong hem. (Jenesis 1:26, 27; 2:17) Antap moa, God i putum tufala long wan ples we i olsem paradaes. (Jenesis 2:8, 9) Jeova i talem long tufala se: “I gud yutufala i gat plante pikinini blong yutufala, blong olgeta we bambae oli kamaot biaen long yutufala, bambae oli save go stap long olgeta ples long wol. Nao bambae yufala i save mekem evri samting long wol ya oli stap aninit long han blong yufala.” (Jenesis 1:28) Olsem nao, ol pikinini blong tufala bambae oli go long olgeta ples blong wol, mo wol ya bambae i kam wan paradaes we i fulap long ol man we oli stret olgeta, mo ol man we oli glad. !Hemia wan gudfala stat we famle blong man i gat! “Nao [God] i luk olgeta wok ya we i mekem, mo i glad tumas long olgeta.”—Jenesis 1:31.
2. ?Ol samting we oli stap kamaot long wol ya oli mekem wanem kwestin i stanap?
2 Be, ol samting we oli bin kamaot long wol ya long plante taosen yia we i pas, oli no laenap nating wetem stampa tingting blong God fastaem. Ol man oli no moa stret olgeta mo oli no moa glad. Ol samting we oli stap kamaot long wol oli mekem ol man oli harem nogud, mo olsem profet tok i talem, wol i kam moa nogud bigwan long taem blong yumi. (2 Timote 3:1-5, 13) Ale ?olsem wanem yumi save gat strong tingting se stampa tingting blong God long saed blong ol man bambae i kamaot i no longtaem long fyuja? ?Bambae i gat longfala taem i stap yet blong gotru long moa hadtaem?
?Wanem i Bin Hapen?
3. ?From wanem Jeova i no finisim kwiktaem fasin agens blong ol man?
3 Olgeta we oli gat stret save long Tok blong God oli save from wanem Jeova i letem ol nogud fasin ya oli kamaot long wol. Oli save tu wanem we bambae hem i mekem blong stretem olgeta. From ol tok blong Baebol, oli kasem save se faswan papa mo mama blong yumi, tufala i no yusumgud nambawan presen we God i givim long ol man, hemia fasin fri blong jusum rod blong olgeta. (Skelem 1 Pita 2:16.) Tufala i rong blong jusum rod ya we tufala i seraot long God. (Jenesis, japta 2 mo 3) Fasin agens blong tufala i leftemap ol bigfala kwestin, olsem se: ?Man ya we i Hae moa long olgeta wol i gat raet blong rulum olgeta man? ?Rul blong hem i nambawan long olgeta? ?Rul blong ol man i save gohedgud sipos God i no lidim olgeta? Stret rod blong faenem ansa blong ol kwestin ya i blong letem plante handred yia blong rul blong ol man i pas. Frut blong hem bambae i soemaot klia sipos rul blong man i save gohedgud, taem Man we i Mekem olgeta i no lidim olgeta.
4, 5. (a) ?Wanem frut i kamaot from we man i no wantem rul blong God? (b) ?Ol taem we oli pas finis oli pruvumgud wanem samting?
4 Taem Adam mo Iv oli lego long God, Hem i no moa mekem we tufala i stretgud olgeta. Taem hem i no moa sapotem tufala, laef blong tufala i kam nogud. Frut blong samting ya se oli no moa stret olgeta, oli kam olfala, mo biaen oli ded. Folem loa ya se ol pikinini oli stap tekem fasin blong papa mama blong olgeta, papa mo mama blong yumi oli pasem ol nogud frut ya oli go long ol pikinini blong olgeta, wetem yumi tu. (Rom 5:12) ?Mo wanem frut blong rul blong man long plante taosen yia? Oli nogud tumas, olsem Eklesiastis 8:9 i talem tru nomo se: “Man i rulum man blong spolem hem nomo.”
5 Ol taem we i pas finis oli soemaot klia se ol man oli no save gohedgud long ol rod blong olgeta sipos Man ya we i Wokem olgeta i no stap lidim olgeta. Tok blong God long Baebol we Jeremaea i raetemdaon i talemaot se: “O Jeova, mi mi save gud we man blong graon i no masta blong rod blong hem. Man i no naf blong jusum wanem rod hem i mas wokbaot long hem.”—Jeremaea 10:23; Dutronome 32:4, 5; Eklesiastis 7:29.
Stampa Tingting Blong God i No Bin Jenis
6, 7. (a) ?Ol taosen yia blong histri oli bin jenisim stampa tingting blong Jeova long saed blong fyuja? (b) ?Wanem i joen long stampa tingting blong Jeova long saed blong fyuja?
6 Ol taosen yia blong histri blong man we oli pas—fulap long ol rabis fasin mo ol samting blong mekem man i harem nogud—?oli jenisim stampa tingting blong God? Tok blong hem i talem se: “Hemia nao Tok blong Jeova, Man ya we i wokem heven, hem nomo i tru God. Hem nomo i stampa blong wol ya, i wokem hem, i mekem hem i stanap strong. Hem i no mekem blong nating nomo, be hem i mekem blong ol man oli save stap long hem.” (Aesea 45:18) Yes God i wokem wol ya blong ol man oli stap long hem, mo hemia i stampa tingting blong hem yet.
7 Jeova i no wokem wol ya blong ol man oli stap long hem nomo, be stampa tingting blong hem se bambae i kam paradaes, blong ol stret man mo ol man we oli glad oli save haremgud long hem. Hemia nao from wanem Baebol i talem se bambae i gat “wan nyufala wol,” wan nyufala grup blong man, we bambae “stret fasin nomo i stap long hem.” (2 Pita 3:13) Mo long Revelesen 21:4, Tok blong God i talem long yumi se long nyufala wol blong hem, “hem bambae i ravemaot wora blong ae blong olgeta [man]. Nao bambae i no moa gat man i ded mo man we i krae from ded. Bambae i no moa gat man i krae, mo man i harem nogud long bodi blong hem. Ol samting ya blong bifo oli lus olgeta.” From risen ya nao, Jisas i save tokbaot nyufala wol we bambae i kamaot long wol ya nomo, olsem “Paradaes.”—Luk 23:43.
8. ?From wanem yumi save sua se Jeova bambae i mekem stampa tingting blong hem i kamtru?
8 From we Jeova we i gat olgeta paoa mo olgeta waes i wokem heven mo wol ya, i no gat wan man i save spolem stampa tingting blong hem long saed blong fyuja. “Jeova blong ol ami i mekem promes blong hem i strong, i talem se: ‘Tru ya, bambae i kamaot olsem mi talem finis. Advaes we mi givim finis, bambae i kamtru.’ ” (Aesea 14:24) Taswe, taem God i talem se bambae i mekem wol ya i kam paradaes blong ol stret man oli stap long hem, hemia nao wanem we bambae i mas kamaot. Jisas i talem se: “Ol kwaet man, oli save harem gud, from we bambae oli kasem wol ya i blong olgeta.” (Matyu 5:5, NW; skelem Ol Sam 37:29.) Yumi save sua se promes ya bambae i kamtru fulwan. Yes yumi save bilif strong long hem, olsem we yumi rere blong lusum laef blong yumi from.
Oli Trastem Jeova
9. ?Ebraham i mekem wanem we i soemaot se hem i trastem Jeova?
9 Plante man we oli fraetgud long God long ol yia we oli pas finis, oli rere blong lusum laef blong olgeta from stampa tingting blong God long saed blong wol ya, from we oli bilif fulwan se hem bambae i mekem i kamtru. Nating se save blong olgeta i no bigwan tumas, oli trastem God mo oli mekem laef blong olgeta i stanap long fasin blong mekem wil blong Hem. Eksampel, i gat Ebraham, we i laef kolosap 2,000 yia bifo we Jisas i wokbaot long wol ya—plante yia bifo we oli stat blong raetem Baebol. Hem i trastem Jeova blong mekem ol promes blong Hem oli kamtru. Ating, Ebraham i lanem ol samting long saed blong Man we i Wokem olgeta samting from olfala blong hem Sem we i gat strong bilif, from Noa i tijim hem. Taswe taem God i talem long Ebraham blong kamaot long naesfala ples ya Uru blong ol man Koldia blong go long Kenan, ples we hem i no savegud mo wan denja ples, olfala ya i save se hem i save trastem Jeova, mo from samting ya hem i go. (Hibrus 11:8) Biaen, Jeova i talem long hem se: “Bambae mi mekem we yu gat plante pikinini we bambae oli kamaot biaen long yu, nao bambae olgeta ya oli kam plante we oli plante. Bambae oli kam wan strongfala nesen.”—Jenesis 12:2.
10, 11. ?From wanem Ebraham i rere blong givim wan pikinini blong hem nomo we hem i gat, Aesak, olsem wan sakrifaes?
10 ?Wanem i kamaot afta we Aesak, pikinini blong Ebraham i bon? Jeova i talem long Ebraham se tru long Aesak nao ol pikinini blong hem bambae oli kam wan bigfala nesen. (Jenesis 21:12) Taswe, ating i luk olsem we promes blong Jeova i no tru, taem hem i talem long Ebraham, olsem wan traem long bilif blong hem, blong kilim pikinini blong hem Aesak olsem wan sakrifaes. (Jenesis 22:2) Be, wetem ful tras long Jeova, Ebraham i mekem ol samting blong obei long oda ya, i karem naef blong hem blong kilim i ded Aesak. Long las menet nomo, God i sanem wan enjel blong blokem Ebraham.—Jenesis 22:9-14.
11 ?From wanem Ebraham i obei fulwan olsem? Hibrus 11:17-19 i talemaot se: “From we Ebraham i stap bilif long God, taswe taem God i traem hem, hem i rere blong kilim pikinini blong hem Aesak, blong givim i go long God. God i mekem ol promes ya long Ebraham, mo Ebraham i gat wan pikinini nomo blong hem, be hem i rere blong kilim blong givim i go long God. God i talemaot long hem finis, i se ‘Long Aesak ya, bambae laen blong yu oli plante, blong holem nem blong yu.’ Be Ebraham i stap tingbaot we God i save mekem man i laef bakegen long ded. Mo hem i kasem pikinini blong hem Aesak bakegen, kolosap olsem we hem i laef bakegen long ded.” Rom 4:20, 21 i talem kolosap sem mak i se: “Tingting blong [Ebraham] i no seksek long promes blong God, bilif blong hem i stap strong. . . . From we i savegud we bambae God i save mekem olgeta samting we hem i promes blong mekem.”
12. ?Wanem blesing Ebraham i kasem from strong bilif blong hem?
12 Ebraham i kasem blesing from bilif blong hem, taem Aesak i no ded mo taem wan “bigfala nesen” i kamaot long hem, be i no hemia nomo, hem i kasem long narafala rod tu. God i talem long Ebraham: “Bambae ol man long ol narafala kantri oli save prea long mi blong mi blesem olgeta, olsem we bambae mi mi mekem i gud tumas long olgeta ya we bambae oli kamaot biaen long yu, from fasin ya nomo we yu yu mekem tede, we yu obei long tok ya blong mi.” (Jenesis 22:18) ?Olsem wanem bambae hem i mekem olsem? King ya blong Kingdom blong God long heven bambae i kamtru long laen blong Ebraham. Kingdom ya bambae i spolem olgeta rabis samting blong wol ya we i stap aninit long paoa blong Setan. (Daniel 2:44; Rom 16:20; Revelesen 19:11-21) Biaen, long wan klin wol aninit long rul blong Kingdom, bambae Paradaes i save kamaot long olgeta ples long wol, mo ol man blong “ol narafala kantri” we oli mekem wil blong God, bambae oli haremgud long helt we i nambawan mo laef we i no save finis. (1 Jon 2:15-17) Mo nating se Ebraham i no gat plante save long saed blong Kingdom, hem i trastem God mo i lukluk i go oltaem long prapa taem blong hem blong stanemap Kingdom ya.—Hibrus 11:10.
13, 14. ?From wanem Job i trastem God?
13 Sam handred yia biaen, i gat man ya Job, we i stap laef long medel blong 17 mo 16 handred yia B.K.T. long ples ya we naoia oli kolem Arebia. Hem tu i laef bifo we oli stat blong raetem Baebol. Job “i no gat poen long hem mo i mekem ol fasin we oli stretgud, i fraetgud long God mo i tanem baksaed blong hem long ol samting we i nogud.” (Job 1:1) Taem Setan i kilim Job wetem wan nogud sik we i mekem hem i harem nogud tumas, man ya blong bilif “i no talem wan nogud tok” long olgeta taem we i stap harem nogud. (Job 2:10, The New English Bible) Job i trastem God. Mo nating se hem i no save from wanem hem i harem nogud tumas olsem, hem i rere blong lusum laef blong hem blong soem se hem i trastem God mo ol promes blong Hem.
14 Job i save se nating sipos hem i ded, wan dei bambae God i save mekem hem i laef bakegen long ded. Hem i tokbaot hop ya taem hem i talem long Jeova God se: “!Plis yu haedem mi long Seol [beregraon], . . . plis yu makem dei we bambae yu yu save tingbaot mi bakegen! ?Sipos wan man we i strong gud i ded, hem i save laef bakegen? . . . Yu bambae yu singaot long mi, nao mi bambae mi ansa long yu.” (Job 14:13-15) Nating se hem i harem i soa tumas long bodi blong hem, Job i soemaot bilif blong hem long bigfala paoa blong Jeova, hem i talem se: “Go kasem taem we bambae mi ded, be mi mi no save lego bilif blong mi samtaem.”—Job 27:5.
15. ?Olsem wanem Deved i talemaot bilif blong hem long stampa tingting blong Jeova?
15 Samwe sikis handred yia afta Job mo kolosap wan taosen yia bifo we Jisas i kam long wol, Deved i talemaot bilif blong hem long wan nyufala wol. Hem i talem long Ol Sam: “Olgeta we oli trastem Hae God bambae oli tekem graon ya i blong olgeta . . . Bambae i no longtaem, ol man nogud oli lus . . . Ol man we tingting blong olgeta i stap daon, bambae oli tekem graon ya i blong olgeta. Bambae oli haremgud, from we oli stap long pis, mo oli gat plante samting. Ol stret man ya bambae oli tekem graon ya i blong olgeta, mo bambae oli stap long hem gogo i no save finis.” From we hop blong hem i no seksek, Deved i talemaot se: “Yu mas trastem [Jeova], . . . Yu mas luk long Hae God blong i mekem yu yu glad, nao bambae hem i givim long yu ol samting we yu yu wantem tumas.”—Ol Sam 37:3, 4, 9-11, 29.
16. ?‘Wan bigfala kampani blong ol wetnes’ oli gat wanem hop?
16 Long ol handred yia we oli pas finis, ol man mo ol woman blong bilif oli gat semfala hop ya blong laef blong olwe long wol. Yes, oli mekemap ‘wan bigfala kampani blong ol wetnes’ we oli rere blong lusum prapa laef blong olgeta from bilif blong olgeta long ol promes blong Jeova. Plante long olgeta wetnes ya blong bifo oli harem nogud long bodi blong olgeta mo oli ded from bilif blong olgeta, blong oli save kasem “laef bakegen long wan laef we i gud moa.” ?Olsem wanem samting ya bambae i kamtru? Long nyufala wol, God bambae i givim gudfala presen long olgeta, hemia laef bakegen long wan laef we i moa gud mo hop blong laef blong olwe.—Jon 5:28, 29; Hibrus 11:35; 12:1.
Ol Kristin Wetnes Oli Trastem God
17. ?Ol Kristin blong faswan handred yia oli strong olsem wanem blong trastem Jeova?
17 Long faswan handred yia K.T., Jeova i talem plante moa samting long saed blong Kingdom mo rul blong hem long wol ya, long nyufala Kristin kongregesen we i jes stanap. Eksampel, speret blong hem i pusum aposol Jon blong raetemdaon se stret namba blong ol man we bambae oli joen wetem Jisas Kraes long Kingdom blong heven, hemia 144,000. Hemia ol man blong God we oli gat strong bilif we oli bin “tekemaot olgeta long ol narafala man.” (Revelesen 7:4; 14:1-4) Olgeta ya bambae oli rulum wol ya ‘olsem ol king’ wetem Kraes long heven. (Revelesen 20:4-6) Olgeta Kristin ya long faswan handred yia oli bin trastemgud Jeova se bambae hem i mekem stampa tingting blong hem i kamtru, long saed blong Kingdom blong heven mo wol ya we bambae i stap aninit long rul blong Kingdom ya, taswe oli rere blong lusum laef blong olgeta from bilif blong olgeta. Plante long olgeta oli mekem olsem ya.
18. ?Olsem wanem ol Wetnes blong Jeova tede oli folem eksampel blong ol man long taem bifo we oli sem mak long olgeta?
18 Tede, kolosap faef milyan Wetnes blong Jeova oli gat sem fasin blong trastem God, olsem ol man we oli sem mak long olgeta we oli laef plante handred yia bifo long olgeta. Ol Wetnes blong Jeova tede tu oli rere blong lusum laef blong olgeta from bilif blong olgeta long ol promes blong God. Oli givim laef blong olgeta i go long hem mo oli gat ful Baebol blong mekem bilif blong olgeta i strong. (2 Timote 3:14-17) Ol Wetnes ya blong Jeova tede oli folem eksampel blong ol man blong Jisas long faswan handred yia, we oli bin talemaot se bambae oli ‘obei long God olsem rula blong olgeta bitim ol man.’ (Ol Wok 5:29) Ol man oli bin yusum ol raf fasin bitim mak blong ronem plante long ol Kristin Wetnes ya long laswan handred yia ya. Mo oli kilim sam long olgeta oli ded from bilif blong olgeta. Sam narafala oli ded from ol sik, akseden, no oli olfala. Be oli trastem God olsem ol wetnes we oli holemstrong bilif blong olgeta long ol taem bifo, from we oli save se bambae hem i givim laef long olgeta long nyufala wol blong hem, taem hem i mekem olgeta oli laef bakegen long ded.—Jon 5:28, 29; Ol Wok 24:15; Revelesen 20:12, 13.
19, 20. ?Yumi luksave wanem long saed blong profet tok blong Baebol we i tokbaot taem blong yumi?
19 Ol Wetnes blong Jeova oli luksave se fasin blong olgeta blong kamaot long olgeta nesen blong kam olsem wan brata nomo long olgeta ples blong wol, i laenap wetem profet tok we Baebol i bin talem longtaem finis. (Aesea 2:2-4; Revelesen 7:4, 9-17) Mo Jeova i talem long olgeta blong mekem wan wok blong prij long olgeta ples blong wol, blong hivimap ol narafala man we hat blong olgeta i stret, blong hem i save glad long olgeta mo lukaotgud long olgeta. (Proveb 18:10; Matyu 24:14; Rom 10:13) Olgeta man ya oli trastem Jeova fulwan, oli save se i no longtaem bambae hem i mekem nambawan nyufala wol blong hem i kamtru.—Skelem 1 Korin 15:58; Hibrus 6:10.
20 Profet tok blong Baebol i soemaot se kolosap 80 yia nao, wol blong Setan i stap finis long lasdei blong hem, stat long impoten yia ya 1914. Wol ya i kolosap nomo long en blong hem. (Rom 16:20; 2 Korin 4:4; 2 Timote 3:1-5) From samting ya, ol Wetnes blong Jeova oli gat strong tingting blong stanap strong from we oli luksave se i no longtaem Kingdom blong God bambae i kontrolem ol samting blong wol ya fulwan. Taem God i finisim rabis wol ya blong naoia mo i mekem nyufala wol blong hem we stret fasin i stap long hem i kamaot, bambae Hem i karemaot fulwan olgeta nogud fasin we oli bin stap long wol blong plante handred yia finis.—Proveb 2:21, 22.
21. ?From wanem yumi save glad, nating se yumi stap kasem ol trabol tede?
21 Biaen, God bambae i soemaot bigfala fasin kea blong hem long yumi blong olwe, taem bambae hem i givim fulap blesing long yumi we oli no jes tekemaot ol samting we oli bin spolem yumi bifo, be bambae oli givim plante moa samting long yumi. Plante gudfala samting tumas bambae oli kamaot long yumi long nyufala wol, mekem se bambae yumi no moa tingbaot ol trabol blong yumi blong bifo. Yumi haremgud tumas blong save se biaen, Jeova bambae i ‘openem han blong hem blong mekem olgeta samting we oli laef oli kasem ol samting we oli wantem.’—Ol Sam 145:16; Aesea 65:17, 18.
22. ?From wanem yumi mas trastem Jeova?
22 Long nyu wol ya, ol man blong bilif bambae oli luk Rom 8:21 i kamtru fulwan se: “Naoia i olsem we olgeta samting ya we God i mekem oli stap panis, from we oli stap rotin nomo. Be long dei ya we God bambae i mekem ol pikinini blong hem oli fri olgeta long sin, panis ya bambae i finis, nao olgeta samting ya we God i mekem bambae oli fri olgeta, olsem ol pikinini blong hem.” Olgeta bambae oli luk prea ya we Jisas i tijim long ol man blong hem i kamtru fulwan: ‘Mifala i wantem we yu yu kam King blong olgeta man, mo we olgeta man long wol oli mekem olsem we yu yu wantem, olsem we olgeta long heven oli stap mekem.’ (Matyu 6:10) Taswe yu mas trastem Jeova fulwan from we promes blong hem we i no save mestem, hemia se: “Ol stret man bambae oli tekem graon ya i blong olgeta, mo bambae oli stap long hem gogo i no save finis.”—Ol Sam 37:29.
?Yu Yu Save Ansa Olsem Wanem?
◻ ?Wanem stampa tingting blong Jeova long saed blong ol man mo wol ya?
◻ ?From wanem God i letem rabis fasin i stap long wol ya?
◻ ?Olsem wanem ol man blong bilif bifo oli soemaot tras blong olgeta long Jeova?
◻ ?From wanem ol man blong God tede oli trastem Jeova?
[Tok blong pija long pej 16]
God i wokem ol man blong laef olwe, blong haremgud long wan paradaes wol
[Tok blong pija long pej 18]
Ebraham i putum tras blong hem long paoa blong Jeova blong mekem man we i ded i laef bakegen