From Wanem Ol Wetnes Blong Jeova Oli Stap Lukaotgud
“Yufala i mas lukaotgud. From we yufala i no save long wanem dei, mi, mi Masta blong yufala, bambae mi kamtru.”—MATYU 24:42.
1. ?Hu i mas folem woning ya se, “Yufala i mas lukaotgud”?
!LONG evri man blong God—yangfala no olfala, hemia we i jes givim laef blong hem long Jeova no hemia we i wok plante yia finis long wok blong Jeova—Baebol i givim woning ya se: “Yufala i mas lukaotgud”! (Matyu 24:42) ?From wanem woning ya i impoten?
2, 3. (a) ?Wanem saen Jisas i talemaot klia, mo profet tok we i kamtru i soemaot wanem? (b) ?Matyu 24:42 i tokbaot wanem samting we i traem bilif blong yumi blong soem sipos i rili tru, mo olsem wanem?
2 Kolosap long en blong minista wok blong Jisas long wol, hem i talemaot saen we bambae i soem se hem i tekem paoa blong Kingdom finis, long fasin we yumi no save luk long prapa ae blong yumi. (Matyu, japta 24 mo 25) Hem i talemaot klia taem ya we bambae hem i stap olsem king—mo ol samting we oli fulumap ol profet tok, oli soem se hem i kam King long heven long yia 1914. Mo tu, hem i tokbaot wan samting we bambae i traem bilif blong yumi blong soem sipos bilif blong yumi i rili tru. Samting ya i joen wetem taem we bambae hem i tekem aksin olsem Man blong Mekem Jajmen i kamtru blong spolem rabis wol ya long taem blong bigfala trabol, taswe Jisas i talem se: “Dei blong samting ya, mo taem blong hem, i no gat man naoia i save. Ol enjel blong heven, mo mi tu we mi Pikinini blong God, be mifala i no save. Papa blong mi, hem nomo i save.” Hemia nao samting we i stap long tingting blong Jisas, taem hem i talem se: “From samting ya, yufala i mas lukaotgud. From we yufala i no save long wanem dei, mi, mi Masta blong yufala, bambae mi kamtru.”—Matyu 24:36, 42.
3 From we yumi no save stret dei mo taem we bigfala trabol bambae i stat long hem, evridei yumi mas folem fasin blong laef blong ol trufala Kristin sipos yumi talem se yumi ol Kristin. Taem bigfala trabol i kam, ?bambae Masta i glad long yu long fasin we yu stap yusum laef blong yu? No sipos yu yu ded fastaem, ?bambae hem i rimemba yu olsem wan man we i holemstrong blong mekem wok blong Jeova go kasem en blong laef blong yu?—Matyu 24:13; Revelesen 2:10.
Ol Faswan Disaepol Oli Traehad Blong Stap Lukaotgud
4. ?Yumi save lanem wanem long eksampel blong Jisas long fasin blong lukaotgud long saed blong speret?
4 Jisas Kraes i soem nambawan eksampel long fasin ya blong lukaotgud long saed blong speret. Oltaem hem i prea wetem filing long Papa blong hem. (Luk 6:12; 22:42-44) Taem hem i fesem ol hadtaem, hem i dipen fulwan long ol advaes we oli stap long Baebol blong lidim hem. (Matyu 4:3-10; 26:52-54) Hem i no letem wan samting i stopem hem long wok we Jeova i givim long hem blong mekem. (Luk 4:40-44; Jon 6:15) Olgeta ya tu we oli ting se oli man blong Jisas, ?oli mas gat fasin blong lukaotgud olsem Jisas?
5. (a) ?From wanem ol aposol blong Jisas oli faenem i had blong holemtaet stret tingting long saed blong speret? (b) ?Jisas i givim wanem help long ol aposol blong hem afta we hem i girap, i laef bakegen long ded?
5 Samtaem, ol aposol blong Jisas tu, tingting blong olgeta i hafhaf. From we oli stap tingting tumas long taem ya mo oli gat sam rong tingting, oli fesem sam taem we tingting blong olgeta i foldaon. (Luk 19:11; Ol Wok 1:6) Bifo we oli lanem blong dipen fulwan long Jeova, samfala traem we oli kamaot kwiktaem oli mekem tingting blong olgeta i fasfas. Taswe, taem ol man oli holem Jisas, ol aposol blong hem oli ronwe. Biaen, long naet ya, from we Pita i fraet, hem i gyaman tri taem se hem i no save Kraes. Long taem ya, ol aposol oli no folem yet advaes blong Jisas se: ‘Yufala i mas lukaotgud, yufala i mas prea oltaem.’ (Matyu 26:41, 55, 56, 69-75) Afta we Jisas i laef bakegen long ded, hem i yusum ol Tok blong Baebol blong mekem bilif blong olgeta i strong. (Luk 24:44-48) Mo taem sam long olgeta oli soemaot se maet oli putum Kristin minista wok we Jisas i bin givim long olgeta, long seken ples, Jisas i mekem tingting blong olgeta i strong bakegen blong gohed fastaem long wok we i moa impoten.—Jon 21:15-17.
6. ?Bifo finis, Jisas i givim woning long ol disaepol blong hem blong lukaotgud long wanem tufala trap?
6 Bifo finis, Jisas i givim woning long ol disaepol blong hem se oli no mas joen long wol. (Jon 15:19) Mo tu, hem i givim advaes long olgeta se, oli no mas mekem ol narafala oli stap aninit long olgeta, be oli mas wok wanples olsem we olgeta evriwan i brata nomo. (Matyu 20:25-27; 23:8-12) ?Oli folem advaes blong Jisas? Wok ya we Jisas i givim long olgeta, ?oli gohed blong putum long fasples?
7, 8. (a) ?Olsem wanem store blong ol Kristin long faswan handred yia i soem se oli lesin long woning blong Jisas? (b) ?From wanem i impoten we oli gohed oltaem blong lukaotgud long saed blong speret?
7 Long taem ya we ol aposol oli stap laef, oli keagud long kongregesen. Histri i soemaot se ol faswan Kristin oli no joen long ol politik bisnes blong Nesen blong Rom, mo oli no gat wan grup blong ol haeman insaed long kongregesen. Defren nao, oli strong blong talemaot Kingdom blong God. Long en blong faswan handred yia, oli prij finis long olgeta ples long Nesen blong Rom, oli mekem ol disaepol long Esia, Yurop, mo Not Afrika.—Kolosi 1:23.
8 Be, bigfala wok ya blong prij we oli mekem, i no min se oli no moa nidim blong stap lukaotgud long saed blong speret. Taem ya we Jisas i bin talem se bambae hem i kamtru, i longwe yet. Mo taem kongregesen i go insaed long seken handred yia K.T., ol samting oli stat blong hapen we oli mekem trabol long ol Kristin long saed blong speret. ?Olsem wanem?
Olgeta We Oli No Moa Stap Lukaotgud
9, 10. (a) ?Afta long ded blong ol aposol, wanem ol samting we oli kamaot blong soem se ol man we oli talem se oli Kristin oli no stap lukaotgud? (b) ?Wanem ol vas blong Baebol long paragraf ya, we oli save halpem olgeta we oli bin talem se oli Kristin blong stap strong long saed blong speret?
9 Samfala man we oli kam insaed long kongregesen, oli stat talemaot bilif blong olgeta long ol tok blong ol man Gris we oli gat bigfala save long waes blong wol, blong mekem se ol man blong wol bambae oli lesin moa long samting we oli talem. Sloslou, ol hiten tijing, olsem Triniti mo sol we i no save ded, oli kam haf blong Kristin Skul we i no moa klingud. Samting ya i mekem se oli lego hop blong wan taosen yia rul blong Kraes. ?From wanem? Olgeta we oli folem bilif ya se sol blong man i no save ded, oli talem se taem man i ded, sol blong hem bambae i go long ples blong ol speret man blong kasem ol blesing blong rul blong Kraes. From samting ya, oli ting se oli no nid blong traehad blong luksave taem ya we Kraes i tekem paoa blong Kingdom.—Lukluk Galesia 5:7-9; Kolosi 2:8; 1 Tesalonaeka 5:21.
10 Ol narafala samting we oli kamaot oli mekem se trabol ya i kam moa nogud. Samfala man we oli talem se oli ol Kristin elda, oli stat blong yusum kongregesen blong olgeta olsem wan tul blong kasem haenem. Long fasin we i haed lelebet, oli traem soemaot se prapa tingting mo tijing blong olgeta oli sem mak no oli moa hae long ol tingting mo tijing blong Baebol. Taem wan jans i kamaot, skul ya we i mekem apostasia i letem hem blong givhan long bisnes blong kantri long saed blong politik.—Ol Wok 20:30; 2 Pita 2:1, 3.
Ol Frut Taem Oli Mekem Fasin Blong Lukaotgud i Kam Strong Moa
11, 12. ?From wanem wok blong Nyufala Grup blong Protestan i no soem se trufala wosip i stanap bakegen?
11 Afta long plante handred yia we Roman Katolik Jyos i stap spolem ol man, sam man we oli wantem jenisim sam tingting oli stat blong mekem plante toktok long ol yia biaen long 1500. Be samting ya i no makem wan taem we trufala wosip i stanap bakegen. ?From wanem?
12 Nating se plante defren grup blong Protestan oli kam fri long paoa blong Rom, oli holemtaet plante stampa tijing mo fasin blong apostasi—tingting blong putumap sam haeman blong jyos, mo tu, bilif long Triniti, sol we i no save ded, mo harem nogud blong olwe afta long ded. Mo, oli gohed blong joen long wol, oli frengud wetem ol bisnes blong politik, olsem Roman Katolik Jyos. Taswe oli traem blong sakemaot eni tingting long saed blong taem we Kraes bambae i kam olsem King.
13. (a) ?Wanem i soem se samfala man oli rili tinghevi long Tok blong God? (b) ?Afta long yia 1800, sam man we oli talem se oli Kristin oli intres bigwan long wanem samting? (c) ?From wanem tingting blong plante i foldaon?
13 Nating se i olsem, Jisas i bin talem se afta long ded blong ol aposol, ol trufala pikinini blong Kingdom (we hem i talem se oli olsem wit) bambae oli gohed blong gru kolosap long ol gyaman Kristin (no, ol rabis gras) gogo kasem taem blong tekem kakae. (Matyu 13:29, 30) Tede, yumi no save talem stret nem blong wanwan blong olgeta ya we, long taem ya, Masta i tingbaot olgeta olsem wit. Be yumi save makem se biaen long ol yia 1300, 1400, mo 1500, i gat sam man we oli putum laef mo fasin fri blong olgeta long denja from we oli wantem tanem Baebol i go long lanwis blong ol man long taem ya. Sam narafala oli no jes akseptem Baebol olsem Tok blong God nomo, be oli sakemaot Triniti tu olsem wan tijing we i no stanap long Baebol. Samfala oli sakemaot bilif ya se sol i no save ded mo fasin blong harem nogud blong olwe long helfaea, oli se ol tijing ya oli no laenap nating wetem Tok blong God. Mo tu, from we sam grup long Yunaeted Stet, Jemani, Engglan, mo Rasia, oli stadi moa long Baebol, biaen long yia 1800, oli stat blong talemaot bilif ya se, taem we Kraes bambae i kambak bakegen i kolosap nomo. Be plante taem oli harem nogud from we bighaf blong ol samting we oli ting se bambae oli hapen, oli no kamtru. ?From wanem? Yumi save talem se, wan bigfala risen i from we oli dipen tumas long man mo oli no dipen inaf long Baebol.
Olsem Wanem Olgeta Ya Oli Soem Se Oli Stap Lukaotgud
14. Tokbaot fasin we C. T. Russell mo ol fren blong hem oli folem blong stadi Baebol.
14 Ale, long 1870, Charles Taze Russell mo sam fren blong hem, oli mekem wan grup blong stadi Baebol long Alegeni, Pensylvania. Oli no ol faswan man we oli luksave plante long ol trutok blong Baebol we biaen oli akseptem, be taem oli stap stadi, oli folem fasin blong jekemapgud olgeta vas blong Baebol long eni kwestin we i stap.b Mak blong olgeta, i no blong faenem ol vas blong pruvum wan prapa tingting blong olgeta we i stap finis, be blong mekem sua se ol tingting we oli akseptem oli mas laenap wetem evri samting we Baebol i talem long saed ya.
15. (a) ?Sam narafala man tu we oli no joen wetem Brata Russell oli luksave wanem? (b) ?Wanem i mekem se ol Baebol Studen oli defren long olgeta ya?
15 Samfala bifo long Russell mo ol fren blong hem, oli luksave se bambae Kraes i kambak long fasin we yumi no save luk wetem prapa ae blong yumi, olsem wan speret man. Samfala oli luksave se Kraes bambae i kambak, i no blong bonem wol ya wetem faea mo blong tekemaot laef blong olgeta man, be blong blesem olgeta famle blong wol. I gat samfala we oli luksave tu se yia 1914 bambae i makem en blong Rul blong ol Hiten Man. Be, long tingting blong ol Baebol Studen we oli joen wetem Brata Russell, ol trutok ya oli bitim ol storeyan long ol dip save long saed God. Oli mekem ful laef blong olgeta i joen wetem ol trutok ya mo oli talemaot olgeta long evri ples blong wol long fasin we i bitim samting we ol man long taem ya oli bin luk.
16. Long yia 1914, ?from wanem Brata Russell i raetem se: “Yumi stap long taem blong kasem traem”?
16 Be i no finis long taem ya, oli mas gohed blong lukaotgud. ?From wanem? Olsem wan eksampel, nating we oli save se 1914 i wan yia we profet tok blong Baebol i tokbaot, oli no save stret se wanem samting bambae i hapen long yia ya. Samting ya i mekem se oli kasem wan traem. Long Wajtaoa blong Novemba 1, 1914, Brata Russell i raetem se: “I gud yumi tingbaot se yumi stap long taem blong kasem traem. . . . Sipos i gat sam samting we i mekem se samfala oli lego Masta mo Trutok blong Hem mo oli stop blong yusum ful laef blong olgeta blong mekem Wok blong Masta, ale i no lav blong God we i stap long hat blong olgeta we i pusum olgeta blong soem intres long Masta, be wan narafala samting; ating wan hop se taem i sotfala; oli givim laef blong olgeta blong wan smol taem nomo.”
17. ?Olsem wanem A. H. Macmillan, mo ol narafala olsem hem, oli holemtaet stret tingting long saed blong speret?
17 Long taem ya, samfala oli lego wok blong Jeova. Be A. H. Macmillan i wan we i no lego. Sam yia biaen, hem i talemaot stret se: “Samtaem, ol samting we yumi ting se bambae oli kamaot long wan stret dei oli bitim samting we Baebol i talem.” ?Wanem i halpem hem blong holemtaet stret tingting long saed blong speret? Hem i luksave, olsem hem i talem, se “taem ol samting we yumi ting se bambae oli kamtru, oli no kamtru, samting ya i no jenisim stampa tingting blong God.” Hem i gohed, i se: “Mi lanem se yumi mas luksave ol mastik blong yumi mo gohed blong lukaot moa save long Tok blong God.”c Wetem tingting daon, ol faswan Baebol Studen ya, oli letem Tok blong God i jenisim tingting blong olgeta long saed blong fyuja.—2 Timote 3:16, 17.
18. ?Olsem wanem fasin blong ol Kristin blong lukaotgud i givhan sloslou long fasin ya blong no joen long wol?
18 Long ol yia biaen long taem ya, oli mas gohed blong lukaotgud, oli no mas kam slak long saed ya. Tru ya, oli save se ol Kristin oli no mas joen long wol. (Jon 17:14; Jemes 4:4) Folem samting ya, oli no joenem Krisendom blong agri long Ligofnesen olsem wan politik saen blong Kingdom blong God. Be oli no luksave se ol Kristin oli no mas joen long faet, kam kasem 1939, nao oli jes luksave klia.—Lukluk Wajtaoa blong Novemba 1, 1939 (Engglis).
19. From we ogenaesesen i stap lukaotgud, ?wanem frut i kamaot long saed blong fasin blong lukaot long kongregesen?
19 Oli neva gat wan grup blong ol haeman long kongregesen, nating se sam elda we ol man long kongregesen oli vot blong putumap olgeta, oli harem se wok blong tij long kongregesen, hemia nomo wok blong olgeta. Be, from we ogenaesesen i wantem folemgud Baebol, hem i talem bakegen wok blong ol elda folem ol vas blong Baebol, i mekem olsem plante taem bakegen tru long ol haf blong Wajtaoa. Ale oli mekem ol jenis long ogenaesesen folem ol samting we Baebol i soem.
20-22. ?Olsem wanem fulwan ogenaesesen i bin mekemrere blong finisim wok blong talemaot gud nyus blong Kingdom long olgeta ples long wol, olsem profet tok i bin talem?
20 Fulwan ogenaesesen i stap mekemrere blong finisimgud wok we Tok blong God i talem se ol man oli mas mekem long taem blong yumi. (Aesea 61:1, 2) ?Ol man oli mas talemaot gud nyus go kasem wanem mak long taem blong yumi? Jisas i talem se: “Gud nyus ya i mas go long olgeta man long wol fastaem.” (Mak 13:10) Long tingting blong ol man, plante taem i luk olsem se wok ya i bigwan tumas blong mekem.
21 Nating se i olsem, wetem tras long Kraes olsem Hed blong kongregesen, grup we i olsem slef ya we i stret mo waes i gohed nomo. (Matyu 24:45) Wetem fasin blong holemstrong mo fasin blong no fraet, oli soemaot long ol man blong Jeova, wok ya we oli mas mekem. I stat long 1919 i go, oli makem moa wok ya blong talemaot gud nyus. Long plante long olgeta, i no isi blong go long ol haos wanwan blong toktok long ol strenja. (Ol Wok 20:20) Be ol haf we oli stadi long olgeta olsem “Ol Man We Oli No Fraet Oli Kasem Blesing” (long 1919) mo “Yufala i No Fraet” (long 1921) i halpem samfala blong stat blong joen long wok ya, wetem tras long Jeova.
22 Long 1922, tok ya se “talemaot, talemaot, talemaot, King mo Kingdom blong hem,” i givim paoa we oli nidim blong tinghevi long wok ya, olsem i stret blong mekem. Stat long 1927 i go, oli tekemaot wok blong elda long olgeta we oli no akseptem responsabiliti ya blong prij we i stanap long Baebol. Samwe long taem ya nao, oli putumap ol man we oli stap goraon blong visitim ol kongregesen long nem blong Sosaeti, ol pilgrim, olsem ol man blong lidim wok blong prij long wan eria, oli stap tijim ol pablisa wanwan blong prij. I no evriwan i save mekem wok blong paenia, be long wiken, plante oli spenem fuldei blong prij, stat long eli moning, stop smol blong kakae wan sanwij, ale gohed bakegen gogo kasem sapa. Hemia ol impoten taem we ol tiokratik fasin oli stat kam antap, mo i givhan long yumi bigwan blong tingbaot olsem wanem Jeova i bin lidim ol man blong hem long taem ya. Hem i gohed blong mekem olsem. Wetem blesing blong hem, wok blong talemaot gud nyus blong Kingdom we i stanap finis bambae i gohedgud gogo kasem en blong hem.
?Yu Yu Stap Lukaotgud?
23. Long saed blong Kristin lav mo fasin blong no joen long wol, ?olsem wanem wanwan long yumi i save soem se i stap lukaotgud?
23 Folem rod we Jeova i lidim olgeta long hem, ogenaesesen blong hem i stap gohed blong givim woning long yumi long ol fasin mo ol tingting we oli save makem yumi olsem haf blong wol ya, nao yumi stap long denja, yumi save lus wetem hem. (1 Jon 2:17) Antap long samting ya, wanwan long yumi i mas stap lukaotgud, mo yumi stap mekem olsem taem yumi letem Jeova i lidim yumi. Mo tu, Jeova i stap tijim yumi olsem wanem blong laef mo wok tugeta. Ogenaesesen blong hem i halpem yumi blong kasem save moa long trufala mining blong Kristin lav. (1 Pita 4:7, 8) Blong lukaotgud oltaem, yumi mas traehad oltaem blong folem advaes ya, nating se yumi no stretgud olgeta.
24, 25. ?Yumi mas lukaotgud long saed blong wanem impoten samting, wetem wanem hop long tingting blong yumi?
24 Oltaem, slef ya we i stret mo waes i stap wekemap tingting blong yumi se: “Yu mas trastem Jeova long ful hat blong yu. Yu no mas stanap long prapa waes blong yu nomo.” (Proveb 3:5) “Oltaem yufala i mas stap prea.” (1 Tesalonaeka 5:17) Yumi kasem advaes blong lanem blong mekem ol disisen we oli stanap long Tok blong God, blong letem tok ya i kam olsem ‘laet we i stap lidim yumi, i olsem laet long rod blong yumi.’ (Ol Sam 119:105) Wetem kaen fasin, yumi kasem tok blong leftemap tingting blong yumi blong putum wok blong talemaot gud nyus blong Kingdom blong God long fasples long laef blong yumi, wok ya we Jisas i talem se bambae i kamaot long taem blong yumi.—Matyu 24:14.
25 Yes, slef ya we i stret mo waes i rili stap lukaotgud. Wanwan long yumi tu i nidim blong stap lukaotgud. Blesing we yumi save kasem sipos yumi mekem olsem se, yumi save stanap long medel blong olgeta we Pikinini blong man i glad long olgeta taem hem i kam blong mekem jajmen i kamtru.—Matyu 24:30; Luk 21:34-36.
[Ol futnot]
a Ol man we oli lego mo agensem trufala bilif.
b Faith on the March, we A. H. Macmillan i raetem, Prentice-Hall, Inc., 1957, pej 19-22.
c Lukluk Wajtaoa, Ogis 15, 1966, pej 504-510 (Engglis).
Tingtingbak
◻ Olsem Matyu 24:42 i soem, ?from wanem yumi mas stap lukaotgud?
◻ ?Olsem wanem Jisas mo ol man blong hem long faswan handred yia oli holemtaet fasin blong lukaotgud long saed blong speret?
◻ Stat long 1870, ?wanem ol samting we oli bin kamaot from we ol man blong Jeova oli stap lukaotgud?
◻ ?Wanem bambae i pruvum se wanwan long yumi i stap lukaotgud?
[Tok blong pija long pej 23]
Jisas i stap bisi blong mekem wok we Papa blong hem i givim long hem blong mekem. Mo tu hem i prea wetem filing
[Tok blong pija long pej 24]
Charles Taze Russell taem we hem i olfala
[Tok blong pija long pej 25]
Bitim 4,700,000 man blong talemaot Kingdom, oli stap wok strong long olgeta ples long wol