Winim Fasin Ya Blong Sore Long Hom Blong Mekem Wok Blong God
JISAS KRAES i givim oda long ol man blong hem se: “Yufala i mas go long ol man long olgeta ples long wol, blong pulum olgeta oli kam man blong mi.” (Matyu 28:19) Plante Kristin, blong mekem wok ya, oli mas akseptem ol hadtaem ya we oli stap kasem longwe long hom. Ol elda we oli goraon blong visitim ol kongregesen, ol waef blong olgeta, mo plante narafala oli livim ol samting long ples blong olgeta blong mekem wok blong God. Fasin ya blong stap sore long hom i save kam wan bigfala traem long olgeta Wetnes ya blong Jeova.
Fasin blong stap sore long hom i kamaot taem yu tingtingbak long ples we yu sefgud long hem mo ol samting blong bifo we yu laekem tumas. Samting ya i save mekem se yu harem nogud tumas, tingting blong yu i foldaon mo yu no save gohed. Samting we i bin hapen se, samfala oli salem olting blong olgeta mo mekem wan trep we i sas blong go long wan narafala kantri, be afta oli no moa folem plan blong olgeta mo oli gobak long ples blong olgeta nomo. Fasin ya blong stap sore long hom i winim olgeta.
Long plante man, ol tingting ya we oli spolem filing blong olgeta oli kamaot plante taem jes biaen we oli muf i go long narafala ples, be long samfala ol filing ya oli gohed long ful laef blong olgeta. Afta we Jekob i stap longwe bitim 20 yia, i ‘wantem tumas blong gobak long ples blong papa blong hem.’ (Jenesis 31:30) ?Hu i save harem nogud from filing ya blong sore long hom? ?Wanem i mekem filing ya i kamaot? ?Olsem wanem wan man i save winim ol filing olsem?
?Wanem i Statem Filing Ya Blong Harem Nogud?
Fasin ya blong stap sore long hom i save spolem eni man. Yumi save ting se Amytis, dota blong King Astyages blong Media, i gat plante risen blong glad: ol rij samting, ona, wan naesfala haos. Be, hem i sore tumas long ol hil blong Media mekem se hasban blong hem, King Nebukadnesa, i wokem ol naes ‘hanging garen’ blong Babilon blong traem mekem hem i haremgud.
Fasin blong sore long hom i save kam olsem wan traem we i bigwan moa long wan man taem laef i had moa bitim bifo we hem i muf i go long narafala ples. Taem ol man Juda oli stap kalabus long narafala kantri, oli talem wetem sore se: “Taem mifala i stap long Babilon, mifala i tingbaot Saeon, . . . nao mifala i sidaon kolosap long wora, mifala i stap krae. ?Olsem wanem bambae mifala i save singsing long Hae God long narafala ples olsem?”—Ol Sam 137:1, 4.
Plante samting i save mekem man i harem nogud i sore long hom. Terry, we i livim Kanada, i talem se: “Wan dei foto blong famle blong mi i kamaot long wan buk i foldaon. Taem mi pikimap, kwiktaem nomo mi sore long hom, mo mi krae.” Chris, we i kamaot long Engglan i go long wan kantri we i pua, i talem se: “Taem mi harem nomo wan singsing blong bifo no harem smel blong kakae we i sem mak long bifo, samting ya i save mekem mi mi wantem tumas ol samting we mi livim finis.”—Skelem Namba 11:5.
Plante taem filing blong sore long hom i save kamaot from we oltaem famle i bin joengud. Roseli, wan woman Brasil we naoia i stap laef long wan kantri kolosap, i talem se: “Mi harem nogud taem mi kasem bad nyus long hom mo mi no save stap wetem famle blong givhan. Samtaem i nogud moa taem mi no kasem nyus nating mo mi stat tingting long ol samting we maet oli bin hapen.” Janice i aot long Not Amerika i muf i go long wan smol taon long ol hot ples long Amason. Hem i talem se: “Mi sore long hom taem mi harem gud nyus i kam long hom. Mi harem olsem wanem oli stap joengud wanples, mo mi wantem tumas we mi save stap wetem olgeta.”
Wan man i save sore long hom i no jes from we hem i livim biaen ol man. Linda i eksplenem se: “Mi mi harem nogud taem mi no save weples blong pem ol samting we mi nidim. Mi no save ol praes mo olsem wanem blong folem fasin ya blong jenisim wan samting blong wan narafala samting. I sas tumas blong pem wan trak, mo oltaem ol man oli pusum mi olbaot taem mi traehad blong kasem ol pablik transpot we ol man oli fasfas long hem. Samting ya i mekem se mi wantem tumas blong go hom.” Long saed blong defren kastom mo fasin pua long ples we i stap long hem, Janet i talem se: “Taem mi luk ol man oli pua tumas, samting ya i mekem mi mi harem nogud. Neva bifo mi luk ol man we oli stap askem bred, no ol bigfala famle we evriwan oli stap laef long wan smol rum nomo we i no gat wora. . . . Ol samting ya oli mekem mi mi harem nogud tumas we mi filim se mi no moa save stap long ples ya.”
Winim Ol Filing Blong Yu
Yumi no mas sem blong gat ol strong filing long ol man we yumi laekem olgeta no long ples we yumi gruap long hem. Jeova God i givim filing long yumi blong haremgud long fasin fren blong yumi wetem ol narafala. Ol Kristin elda blong kongregesen long Efesas oli ol man we oli gruap finis long saed blong filing. ?Be wanem i hapen taem aposol Pol i finisim visit blong hem wetem olgeta? !Yes, “nao olgeta oli stap krae tumas, oli stap holem Pol, oli stap kis long hem blong talem tata long hem”! (Ol Wok 20:37) I tru, samting ya i no kamaot from fasin ya blong sore long hom. Be, i mekem yumi tingbaot wan samting. I stret blong gat ol filing, be yumi no mas letem olgeta oli bos long yumi. ?Oraet, olsem wanem yu save winim fasin ya blong stap sore long hom?
Sipos yu lanem blong toktok long lanwis blong ples ya we yu go long hem, hemia i bigfala samting blong mekem tingting blong yu i stap kwaet. Ol filing we i save mekem yu sore long hom oli save kam antap taem yu no save storeyan gud wetem ol narafala from we yu mas toktok long wan narafala lanwis. From samting ya, sipos i gat rod, lanem blong rid mo toktok long lanwis blong ples ya bifo we yu go long hem. Sipos no, stadi moa long lanwis ya long ol faswan wik afta we yu kasem ples we yu mas stap long hem. Hemia taem we yu gat strong tingting blong pusum yu, taswe hemia beswan taem blong lanem lanwis. Sipos yu yusum ol faswan wik ya blong stadi long lanwis nomo, i no longtaem bambae yu stap glad blong toktok long ol man, mo samting ya i save halpem yu blong winim ol filing blong sore long hom.
Mekem fren long samfala kwiktaem, from we samting ya bambae i halpem yu blong harem olsem we yu stap long ples blong yu. Kongregesen blong ol Wetnes blong Jeova i nambawan ples blong faenem ol trufala fren. Yu yu mekem faswan samting mo soem intres long ol narafala. Traehad blong save laef blong olgeta bifo, famle blong olgeta, ol problem blong olgeta, mo ol samting we oli intres long hem. Askem olgeta we oli gat sem bilif olsem yu blong oli kam long haos blong yu. Nao, bambae yu faenem se ol narafala oli intres long yu.
Long medel blong ol man blong God, fasin fren i save kam strong olsem insaed long stret famle blong yu. Jisas i talem se: “Man we i stap mekem ol samting we God i wantem, hemia nao i brata blong mi, mo sista blong mi, mo mama blong mi.” (Mak 3:35) Kraes i promes tu long ol man blong hem se: “Man we i livim haos blong hem, no brata no sista blong hem, no papa no mama blong hem, no pikinini blong hem, no graon blong hem, from we i man blong mi, no from we i man blong gud nyus blong mi, hem bambae i no save sot long ol samting ya. Tru mi talem long yufala, long wol ya bambae hem i save kasem wan handred taem antap bakegen, wanem samting we hem i livim, olsem haos, no brata no sista no mama no papa no pikinini no graon blong hem. Be ol man bambae oli mekem trabol long hem tu. Be long nyufala wol ya we bambae i kam, hem bambae i gat laef we i no save finis.” (Mak 10:29, 30) Wetem ol nambawan brata long saed blong speret olsem, yumi no stap yumi nomo, nating se yumi stap long wan nyufala kantri.
Sipos yu stap gohed blong fren wetem olgeta we oli stap long ples blong yu, samting ya i save halpem yu blong winim fasin ya blong sore long hom. Yu save sapraes se naoia we yu muf longwe finis, fasin blong toktok long leta i gat spesel mining long yu, from we ating bambae yu tingtinggud long ol tok we yu raetem. Bambae i gat plante gudfala samting we yu wantem talem. Janet, we yumi tokbaot fastaem finis, i talem se: “Blong toktok long telefon i go long narafala kantri i sas, be blong sanem tru long postofis wan kaset we yu tepem, i no sas tumas. Fastaem bambae yu harem se i narakaen blong toktok long wan mesin. Be, sipos yu storeyan wetem wan man we maekrofon i stap long medel blong yutufala, i isi mo bambae yu glad blong mekem.” Maet yu askem tu blong oli tepem wan kaset blong sanem bak long yu.
Shirley, we i aot long Yunaeted Stet i go long Latin Amerika 25 yia bifo, i talem se: “Oltaem mi stap raet long saed blong ol samting we i leftemap tingting bitim ol problem. Samting ya i stap pulum ol narafala blong oli stap raet long mi.” Be, yu mas lukaotgud. Tumas leta i save blokem yu blong no stap mekem ol nyufala fren. Del, we i aot long Kanada i go long narafala kantri, i talem se: “Blokem fasin ya blong stap long haos mo tingbaot ol samting we yu mestem. I moa gud yu go aot mo haremgud long nyufala ples we yu stap long hem.”
Traem blong save ol kastom, histri, ol samting we i mekem man i laf, mo ol ples we man i intres long olgeta, mo ol naesfala ples long nyufala kantri ya. Samting ya bambae i givhan long yu blong no tingting tumas long ol nogud samting mo ol problem. Mo sipos yu wantem blong stap olwe long ples we yu muf i go long hem, i nogud blong yu go visitim ples blong yu kwiktaem nomo no oltaem. I tekem longfala taem blong mekem ol nyufala fren mo blong savegud ol samting we oli stap raonabaot long yu long nyufala ples ya. Sipos yu stap visitim ples blong yu oltaem mo blong longtaem lelebet, samting ya i save blokem fasin ya blong lan long nyufala kantri. Taem yu haremgud long nyufala ples ya, yu save haremgud blong gobak blong visitim ples blong yu—mo yu kambak bakegen biaen. Kasem taem ya, stap bisi blong mekem ol samting blong wokem wan fasin joen wetem nyufala ples blong yu.
Stap Lukluk i Go Fored
Jeova i givim ful wol ya olsem ples blong yumi. (Ol Sam 115:16) Taem yu gat Kristin fasin wetem glad, yu save haremgud long laef long eni kantri. Sipos yu muf long narafala kantri no long narafala ples long kantri blong yu blong mekem intres long saed blong Kingdom oli gru mo blong talemaot gud nyus, mekem samting ya wetem fasin glad blong lukluk i go fored. Tingbaot blong mekem ol nyufala fren, lanem ol defren kastom, mekem wok blong pulum ol man oli kam disaepol blong Kraes, mo mekem wok blong God we i karem frut.
Jeova God i wan Fren we bambae i stap wetem yu oltaem, long wanem ples we yu stap long hem. (Ol Sam 94:14; 145:14, 18) Taswe stap kolosap long hem long prea. (Rom 12:12) Samting ya bambae i halpem yu blong tingbaot plan blong yu long laef olsem wan man blong God. Ebraham mo Sara i holemtaet plan blong tufala taem tufala i livim gudfala haos blong tufala long taon ya blong Uru. Blong obei long oda blong Jeova, oli livim biaen ol fren mo ol famle. (Ol Wok 7:2-4) Sipos oli bin gohed blong stap tingbaot mo wantem ol samting we oli livim biaen long ples blong olgeta, bambae oli gat tingting blong gobak. Be oli stap lukaot wan ples we i gud moa—hemia laef long wan paradaes long wol long fyuja aninit long Kingdom blong God long heven.—Hibrus 11:15, 16.
Wok blong prij long ol narafala ples no long kantri blong yu long ol ples we i nidim moa man blong talemaot gud nyus long hem, i save kam wan samting we i traem yu. Be wok ya i save karem frut tu mo mekem yu yu haremgud. (Jon 15:8) Mo sipos ol nogud tingting i winim yu smoltaem, yu save sakemaot olgeta taem yu stap tingting nomo long wan mak we yu wantem kasem mo stap lukluk i go long fored. Wan misinari sista we i no mared i talem se: “Taem mi stat blong harem nogud tumas, mi traem blong tingbaot nyufala wol mo olsem wanem olgeta man bambae oli kam wan famle nomo.” Ol gudfala tingting olsem oli save halpem yu blong stap glad mo no letem fasin blong sore long hom i winim yu.
[Tok blong pija long pej 29]
Fasin ya blong sore long hom i no nid blong blokem wok blong wan Kristin