?Yu Save Prij Long Wan Narafala Kantri?

MI GAT tingting ya longtaem, se mi wantem mekem wok blong misinari. Taem mi no mared yet, mi mekem wok blong prij long Texas, Yunaeted Stet, long ples we oli nidim moa man blong prij. Afta we mi mared, mi gohed blong wok long ples ya wetem waef blong mi. Taem pikinini gel blong mitufala i bon, mi tingting se, ‘Hemia en blong misinari wok blong mi.’ Be Jeova i save mekem wanem we man i wantem, i kamtru, antap moa sipos samting ya i laenap wetem wanem we hem i wantem.”​—Jesse, we naoia i stap long Ekwado wetem waef blong hem mo trifala pikinini blong hem.

“Mi neva ting se bambae mi save mekem wok olsem, nating se mi no kasem trening long misinari skul blong Gilead. Taem mi luk wan long ol Baebol studen blong mi i givim wan tok no i prij, samting ya i mekem mi mi glad bigwan, mo mi tangkiu long Jeova blong givim jans ya long mi.”​—Karen, wan sista we i no mared yet, mo we i paenia eit yia finis long Saot Amerika.

“Afta we mi prij fultaem blong 13 yia long Yunaeted Stet, mi mo waef blong mi, mitufala i wantem wok long ples we i defren. Mitufala i glad moa bitim bifo; hem i rili wan nambawan rod blong laef.”​—Tom, we i paenia wetem waef blong hem, Linda, long eria blong Amason.

Hemia toktok blong sam man we laef blong olgeta i mekem se oli no save kasem trening olsem misinari long Watchtower Bible School blong Gilead. Nating se i olsem, oli kasem glad from wok ya blong prij long wan narafala kantri. ?Olsem wanem samting ya i kamtru? ?Yu yu save mekem wok ya tu?

Yu Nidim Stret Tingting

Man we i go long narafala kantri blong prij, jes from we hem i wantem traem samting we i defren, bambae i no save kasem frut. Olgeta we oli bin gohed strong long wok ya, oli mekem olsem wetem stret tingting. Olsem aposol Pol, oli tingbaot se oli gat kaon blong pembak long God, be i no long God nomo, long ol man tu. (Rom 1:​14) Oli save folem oda blong God taem oli prij long ples blong olgeta nomo. (Matiu 24:14) Be oli tingbaot kaon ya we oli mas pem, taem oli wantem halpem ol narafala man we maet oli neva gat jans blong harem gud nius.

Wan narafala samting we i pusum plante man blong go prij long narafala kantri, hemia se oli wantem wok long wan teritori we i karem moa frut. I stret nomo blong wantem wok long wan ples olsem. ?Hu long yumi, taem hem i luk wan narafala man we i kasem plante gudfala fis, i no wantem kam long semfala ples ya blong kasem gudfala fis tu? Long sem fasin, gudfala ripot we i soemaot olsem wanem wok i stap gohed bigwan long ol narafala kantri, i leftemap tingting blong plante man blong go long ol ples ya we i gat “plante fis ya blong kasem.”​—Luk 5:​4-​10.

Kaontem Praes

Plante kantri oli no letem ol man we oli kam mekem wok blong skul long kantri blong olgeta, blong wok blong winim mane. Taswe, olgeta we oli wantem wok long wan narafala kantri oli mas kasem prapa mane blong olgeta. ?Olsem wanem samfala oli kasem mane ya we oli nidim? Plante oli salem no rentem haos blong olgeta long narafala man, blong kasem mane we oli nidim. Sam narafala oli salem bisnes blong olgeta. Sam narafala bakegen oli stat longtaem finis blong sevem mane blong kasem mak ya. Samfala oli prij wan no tu yia long narafala kantri, ale oli gobak long kantri blong olgeta blong wok mo winim moa mane mo biaen oli gobak bakegen blong wok long narafala kantri.

Wan samting we i gud long saed blong ol kantri we oli pua hemia se plante taem, laef i no sas tumas olsem laef long ol rij kantri. Hemia i mekem se plante man oli save pem evri samting we oli nidim, wetem smol pei nomo we oli kasem. Be, i tru se, mane we man bambae i westem i dipen bigwan long wanem kaen laef hem i jusum. Long ol kantri we oli pua, maet i gat jans blong faenem ol gudfala haos, be man i mas pem sas blong laef long ol haos olsem.

I klia se, man i mas kaontem praes bifo we hem i muf i go long narafala kantri. Be, i nidim moa i bitim we yumi kaontem praes nomo. Toktok blong sam long olgeta we oli muf i go long Saot Amerika blong prij, maet i save givhan long yumi blong luksave narafala samting.

Traem We i Bigwan Moa

Markku, blong Finlan, i talem se: “Samting we i hadwok long mi hemia blong lanem lanwis blong Spen. Mi ting se, from we mi no savegud lanwis ya yet, bambae mi wet longtaem bifo we oli givim wok long mi olsem man blong givhan. !Be mi sapraes bigwan taem oli askem mi blong lidim wan buk stadi afta tu manis nomo we mi kam long ples ya! Tru ya, i gat sam taem we mi sem bigwan. Bigfala trabol long mi hemia blong talem nem blong ol man. Wan dei mi singaot Brata Sancho se ‘Brata Chancho (we i minim pig),’ mo bambae mi neva fogetem taem we mi singaot Sista Salamea se ‘Malasea (we i minim rabis).’ Mi laki se ol brata mo sista oli rili gat longfala tingting.” Markku i stap eit yia long kantri ya blong mekem wok blong seket elda wetem waef blong hem, Celine.

Chris, waef blong Jesse we yumi tokbaot finis, i talem se: “Mi rimemba faswan taem we seket elda i visitim mifala, afta tri manis we mifala i stap long ples ya. Mi save se brata ya i stap yusum sam naesfala pijatok mo i stap talem sam naesfala tok blong tajem hat blong mifala, be mi no kasem save long samting we hem i talem. Stret long miting ya, mi krae. I no wota blong ae nomo we i ron long fes blong mi, be mi krae bigwan. Afta long miting ya, mi traem eksplenem long seket elda from wanem samting olsem i hapen. Hem i kaengud long mi mo i talem long mi wanem we ol narafala man raonabaot long mi oli stap talem tu, se, ‘Ten paciencia, hermana’ (we i minim se ‘Yu mas gat longfala tingting, sista’). Tu no tri yia biaen, mifala i mitim seket elda ya bakegen. Mi glad tumas from we naoia mi save storeyan wetem hem blong 45 menet, long prapa lanwis blong hem.”

Wan narafala brata i makem se: “Stadi i impoten tumas. Sipos mifala i traehad moa blong stadi long lanwis blong kantri ya, moa mifala i save storeyan gud wetem ol man.”

Evriwan i agri se ol traehad olsem oli karem blesing. Tingting daon, longfala tingting, mo fasin blong gohed oltaem, oli save kamaot taem wan man i traehad blong lanem wan niufala lanwis. Rod i open blong talemaot gud nius long man. Eksampel, wan man we i lanem lanwis blong Spen hem i toktok long wan lanwis we bitim 400 milyan man raon long wol oli yusum blong toktok. Plante long olgeta we biaen oli mas gobak long kantri blong olgeta, oli gohed yet blong yusum ol lanwis ya we oli bin lanem, blong halpem ol man we oli toktok lanwis blong Spen.

?Olsem Wanem Long Sik Long Hom?

Deborah we i mekem wok blong prij long Amason wetem man blong hem Gary, i tingtingbak se: “Taem mifala i kam fastaem long Ekwado long 1989, mi stap sik bigwan from we mi tingbaot hom blong mi. Mi lanem blong dipen moa long ol brata mo sista long kongregesen. Oli kam olsem famle blong mi.”

Karen, we yumi tokbaot fastaem, i talem se: “Mi go prij evri dei blong traem winim sik long hom. Long rod ya mi no gat taem blong tingbaot hom blong mi. Mi tingbaot oltaem se papa mama blong mi oli glad from wok ya we mi stap mekem long kantri ya. Oltaem Mama i bin leftemap tingting blong mi wetem tok ya se: ‘Jeova i save lukaot gud long yu moa i bitim mi.’ ”

Makiko, blong Japan, i laf taem hem i talem se: “Afta we mi spenem wan ful dei long wok blong prij, mi taed. Taswe, taem mi kambak long haos mo mi stat tingbaot hom, mi slip. From samting ya, filing blong harem nogud i no stap longtaem.”

?Olsem Wanem Long Pikinini?

Sipos yu gat pikinini, yu mas tingbaot nid blong olgeta tu, olsem edukesen. Long saed ya, samfala oli jusum blong pikinini i kasem edukesen long haos nomo, mo sam narafala oli jusum blong putum pikinini blong olgeta long ol skul blong kantri ya we oli go stap long hem.

Al i muf i go long Saot Amerika wetem waef blong hem, tu pikinini blong hem, mo mama blong hem. Hem i se: “Mifala i faenem se taem mifala i putum ol pikinini long skul, samting ya i halpem olgeta blong lanem lanwis blong kantri ya kwiktaem. Long tri manis nomo, tufala i save toktok long lanwis ya finis.” Defren olgeta long Mike mo Carrie we tufala i jusum blong putum tufala yang boe blong tufala blong stadi long haos nomo. Papa mama ya tufala i talem se: “Mitufala i luksave se fasin ya blong skul long haos i no wan samting we tufala pikinini blong mitufala bambae oli naf blong mekem olgeta wan nomo. Mitufala i mas joen long kos ya tu, mo meksua se tufala i no let tumas blong sanem ol wok blong olgeta stret long taem.”

David mo Janita, blong Ostrelya, tufala i talemaot filing blong tufala long saed blong tufala boe blong tufala: “Mitufala i wantem se pikinini blong mitufala oli luk olsem wanem long laef blong narafala man. I isi blong ting se laef blong yumi i sem mak long laef blong plante narafala man, be rili, i no gat plante man long wol we i gat wan laef olsemia. Ol pikinini blong mitufala oli luksave tu, olsem wanem ol tiokratik rul oli wok long olgeta ples blong wol, nomata wanem kantri no kastom blong man.”

Ken i tingtingbak se: “Mi mi gat fo yia nomo taem famle blong mi i muvaot long Engglan long 1969. Mi gat tingting se bambae mifala i stap long wan haos we oli wokem long graon wetem wan gras ruf, be mifala i no laef long wan haos olsem mo mi mi harem nogud lelebet. Nating se i olsem, mi save talem se laef blong mi taem mi yangfala i nambawan tumas. !Mi sore long ol narafala pikinini we oli no gat jans blong gruap long wan laef olsemia! From gudfala kampani blong ol misinari mo ol spesel paenia, mi statem wok blong haftaem paenia taem mi gat naen yia nomo.” Tede, Ken i mekem wok blong elda we i goraon blong visitim ol kongregesen.

Gabriella, gel blong Jesse, i agri se: “Ekwado i rili stap olsem hom blong mi nao. Mi glad tumas se papa mama blong mi tufala i bin tekem disisen blong kam long ples ya.”

Be, i gat sam pikinini we oli no naf blong lan long niufala kantri ya we oli go long hem. Sam samting i kamaot we i mekem se ol famle ya oli mas gobak long kantri blong olgeta. Taswe wan gudfala advaes blong tingbaot hemia se, yu mas visitim wan kantri bifo we yu muf i go blong laef long hem. Long rod ya ol disisen we yu mekem bambae oli stanap long samting we yu wan yu bin luk.

Blesing We i Kamaot

Yes, taem yu muf i go blong stap long narafala kantri, bambae yu fesem sam hadtaem mo bambae yu mas lego sam samting we yu laekem tumas. Be, ?olgeta ya we oli bin muf i go stap long narafala kantri, oli bin kasem blesing? I gud yumi letem sam long olgeta ya oli talem long yumi.

Jesse: “Long olgeta ten yia we mifala i stap long taon blong Ambato, mifala i gat jans blong luk namba blong ol kongregesen i gru, stat long 2 i go kasem 11 evriwan. Mifala i gat jans blong givhan long ol brata blong statem faef long ol kongregesen ya, mo mifala i wok wetem olgeta blong bildim tu Haos Kingdom. Mo tu, mifala i glad bigwan blong halpem samwe long tu Baebol studen evri yia blong go kasem baptaes. Mi sore nomo se mi no bin kam long ples ya ten yia bifo.”

Linda: “Samting we i rili leftemap tingting blong mifala hemia taem we ol man oli soemaot se oli laekem gud nius mo oli luksave traehad blong mifala. Eksampel, long wan smol taon long bus, wan Baebol studen we nem blong hem Alfonso, i luksave se gudfala frut i save kamaot sipos sam brata oli kam mekem pablik tok long ples blong hem. Hem i jes muf i kam insaed long niufala haos blong hem we oli wokem long wud, i no gat plante haos olsem long vilej blong hem. Alfonso i tingting se haos blong hem nao i stret ples we oli save yusum blong wosipim Jeova, ale, hem i muf i gobak long smol haos gras blong hem mo i givim naesfala haos blong hem long ol brata blong oli yusum olsem wan Haos Kingdom.”

Jim: “Mifala i spenem moa taem blong storeyan wetem ol man long teritori i bitim Yunaeted Stet. Antap moa, laef long ples ya i no spid tumas. Mifala i gat moa taem blong stadi mo joen long wok blong prij long ples ya.”

Sandra: “Taem mi luk olsem wanem trutok blong Baebol i save jenisim laef blong man, samting ya i karem bigfala glad long mi. Wan taem mi bin stadi Baebol wetem Amada, wan woman blong 69 yia we i stap wok long wan smol stoa. Woman ya i stap ademap tu lita wota long evri ten lita melek we hem i salem. Ale, hem i stilim ol kastoma blong hem taem hem i no fulumap gud ol botel melek ya we i meks wetem wota. Be, afta we hem i stadi long haf ya ‘Fasin Blong No Gyaman Mo No Stil i Mekem Man i Glad’ long japta 13 blong buk ya Save Blong Lidim Yu Long Laef We i No Save Finis, Amada i stopem ol fasin ya. !Mi glad bigwan blong luk hem i tekem baptaes sam taem biaen!”

Karen: “Mi mas dipen moa long Jeova i bitim bifo, mo hem i yusum mi moa naoia i bitim bifo. Fasin fren blong mi wetem Jeova i gru bigwan mo i kam strong moa.”

?Olsem Wanem Long Yu?

Long ol yia we oli pas, plante handred Witnes oli go long narafala kantri blong mekem wok blong prij. Sam oli stap wan no tu yia, sam narafala oli stap olwe. Oli yusum ekspiryens blong olgeta, save we oli gat long saed blong spirit, mo mane blong olgeta, blong mekem wok blong Kingdom i gohed moa long ol narafala kantri. Olgeta ya oli wok long ol ples we ol pablisa blong Kingdom oli no naf blong prij plante from we oli no save faenem wok blong winim smol mane. Plante long olgeta ya we oli kam stap long narafala kantri oli bin pem sam bigfala trak blong go long ol ples longwe, we ol pablisa maet oli neva kasem. Sam narafala, we maet oli laekem moa laef long taon, oli givhan bigwan long ol bigfala kongregesen we i no gat plante elda long hem. Be, olgeta evriwan oli talem se, long tingting blong olgeta, i luk olsem se namba blong ol blesing we oli kasem long saed blong spirit i bigwan moa i bitim ol samting we olgeta oli bin givim.

?Yu yu save tekem jans ya blong givhan long wok blong prij long wan narafala kantri? ?Sipos ol samting long laef blong yu oli givim jans long yu blong go long narafala ples, i gud yu traem faenemaot sipos i gat rod blong yu mekem olsem? Faswan mo impoten step hemia blong raet i go long branj ofis blong Sosaeti, we i lukaot long kantri we yu wantem go long hem. Ol advaes we bambae yu kasem, oli save halpem yu blong luksave sipos disisen blong yu i save karem frut no nogat. Mo tu, yu save faenem plante gudfala advaes long haf ya “Lego Kantri Blong Yu Mo Famle Blong Yu,” long Wajtaoa blong Ogis 15, 1988 (long Engglis mo Franis). Wetem gudfala plan, mo blesing blong Jeova, maet yu tu yu save kasem glad ya we i kamaot taem yumi givhan long wok blong prij long narafala kantri.

[Tok Blong Pija Long Pej 24]

TOM MO LINDA I FOLEM ROD YA BLONG GO LONG VILEJ BLONG OL INDIAN MAN WE NEM BLONG OLGETA SHUAR

[Tok Blong Pija Long Pej 25]

PLANTE BRATA SISTA OLI GO WOK LONG QUITO, BIGFALA TAON BLONG EKWADO

[Tok Blong Pija Long Pej 25]

MAKIKO I STAP PRIJ LONG OL BIGFALA HIL BLONG ANDES

[Tok Blong Pija Long Pej 26]

FAMLE HILBIG I STAP LONG EKWADO BLONG FAEF YIA FINIS