?Yu Yu Save “Kamkros Long Masedonia”?
1. ?Wanem i mekem se Pol mo ol fren blong hem oli go long Masedonia?
1 Samwe long yia 49 K.T., aposol Pol i aot long taon ya Antiok long Siria, blong mekem nambatu misinari trip blong hem. Hem i wantem go visitim Efesas mo ol narafala taon long Esia Maena. Be hem i luk wan vison we i kamaot long tabu spirit, mo long vison ya, wan man i askem long hem blong i “kamkros long Masedonia.” Hem mo ol fren blong hem oli obei long tok ya, mo oli gat janis blong statem wan kongregesen long ples ya. (Wok 16:9, 10; 17:1, 2, 4) Tede, i gat sam ples long wol we i nidim moa man blong karem kakae long garen. (Mat. 9:37, 38) ?Olsem wanem? ?Yu yu naf blong givhan?
2. ?From wanem samfala oli no tingting blong muv i go long narafala kantri?
2 Maet yu yu laekem blong mekem wok blong misinari olsem Pol, be i gat sam samting we i blokem yu. Yu yu no go long skul blong Gilead from we yu olfala, yu yu wan sista we yu no mared, no yu gat ol smol pikinini. Maet yu ting se yu no naf blong lanem wan narafala lanwis. Sipos no, maet yu yu muvaot long kantri blong yu finis, blong yu gat wan laef we i moa gud long narafala kantri, mo yu no harem se yu wantem muv i go long wan defren kantri bakegen. Be i gud yu prea mo yu tingting gud long saed ya. Maet bambae yu luk se i no nid blong letem ol samting ya oli blokem yu. Maet yu save go yet long wan narafala kantri we i nidim moa man blong talemaot gud nius.
3. ?From wanem yu no nidim trening blong kam misinari, blong karem gudfala frut long wok blong prij long wan narafala kantri?
3 Yu No Nidim Trening Blong Kam Misinari: ?Wanem samting i givhan long Pol mo ol fren blong hem, blong oli mekem gud wok blong olgeta? Olgeta oli dipen long Jehova mo long tabu spirit blong hem. (2 Kor. 3:1-5) Taswe, nating sipos ol samting long laef blong yu oli mekem se yu no save kasem spesel trening, be yu save karem gudfala frut yet long wok blong prij long wan narafala kantri. Yu mas rimemba tu se yu stap kasem trening long Tiokratik Skul mo long Miting Blong Kingdom Wok. Sipos yu wantem go long skul blong Gilead no long wan narafala skul olsem, i gud yu muv i go long wan narafala kantri fastaem, nao bambae yu luk se wok blong misinari i olsem wanem. Nao sipos samtaem oli askem long yu blong yu kasem spesel trening, bambae yu rere finis.
4. ?From wanem ol olfala oli no mas ting se oli no save go long wan narafala kantri blong prij?
4 Ol Olfala: Ol olfala brata sista we oli bigman long ol Kristin fasin, mo we helt blong olgeta i gud, oli save givhan bigwan long ol kantri we i gat nid. ?Olsem wanem long yu? ?Yu yu ritae finis long wok blong yu? Samfala we oli gat naf mane, bambae oli save laef long ol pua kantri, from we praes blong hospital mo ol narafala samting long ol kantri ya, oli daon moa long hemia long prapa kantri blong olgeta.
5. Yu traem tokbaot stori blong wan brata we i ritae mo i muv i go long narafala kantri.
5 Wan elda we i paenia mo we i laef long wan kantri we ol man blong hem oli toktok Inglis, i ritae long wok blong hem, mo i muv i go long wan ples blong ol turis long Saotis Esia. Hem i go blong givhan long wan grup we i toktok Inglis, mo we i gat naen pablisa nomo long hem. Grup ya i prij long 30,000 man we oli kamaot long defdefren kantri. Afta tu yia nomo, i gat 50 man oli stap kam long ol miting. Brata ya i talem se: “Mi kasem ol nambawan blesing long ples ya we mi no bin kasem bifo. !Ol blesing ya oli plante tumas mo mi no save tokbaot olgeta evriwan!”
6. Yu traem tokbaot stori blong wan sista we i no mared, mo i muv i go long kantri we i gat bigfala nid.
6 Ol Sista We Oli No Mared: Jehova i yusum ol sista plante, blong oli talemaot gud nius long ol kantri we i gat bigfala nid. (Sam 68:11) Wan yangfala sista we i no mared i wantem prij moa long narafala kantri. Be papa mama blong hem tufala i wari from we tufala i no wantem se wan trabol i kasem hem. Ale sista ya i jusum wan kantri we i no pua tumas mo i no gat tumas trabol long saed blong politik. Biaen, hem i raetem leta i go long branj ofis, mo olgeta oli givim plante save long saed blong kantri ya. Long ol sikis manis we sista ya i laef long kantri ya, hem i kasem plante blesing. Hem i talem se: “Long ples blong mi, mi no gat plante Baebol stadi. Be taem mi prij long ples we i gat bigfala nid, mi gat plante Baebol stadi mo mi kam gud moa long fasin blong tij.”
7. Yu traem tokbaot stori blong wan famle we i muv i go long narafala kantri.
7 Ol Famle: Sipos yu yu gat pikinini, ?hemia i blokem yu blong yu no go long wan narafala kantri? Wan papa mo mama we tufala i gat tu pikinini blong eit mo ten yia, oli go long narafala kantri. Mama ya i talem se: “Mitufala i glad tumas we tufala pikinini blong mitufala oli gruap long ples ya, from we oli joen plante wetem ol spesel paenia mo ol misinari. Mifala i glad moa long laef blong mifala taem mifala i wok long ples we i gat moa nid.”
8. ?I gat nid blong lanem narafala lanwis, blong yu save go prij long narafala kantri? Yu eksplenem.
8 Yu Ting Se Yu No Naf Blong Lanem Narafala Lanwis: ?Olsem wanem? ?Yu yu no go long narafala kantri from we yu ting se yu no naf blong lanem lanwis blong kantri ya? I gud yu traem tingbaot: Maet yu yu save wan lanwis we ol man long kantri we i gat nid, oli toktok long hem. Wan brata mo waef blong hem we tufala i toktok Inglis, tufala i muv i go long wan kantri we ol man oli toktok lanwis blong Spen. Be long ples ya, i gat plante man blong ol defdefren kantri tu we oli toktok Inglis. Brata mo sista ya, tufala i askem long branj ofis long kantri ya blong oli talem ol kongregesen we oli toktok Inglis mo we oli nidim help. Ale branj ofis i talem sam kongregesen, mo tufala i jusum wan long olgeta, nao tufala i go visitim kongregesen ya tu taem. Biaen, tufala i gobak long ples blong tufala, mo long wan yia, tufala i putum gud mane gogo tufala i gat naf. Taem tufala i rere, ol brata long kantri ya we tufala i wantem muv i go long hem, oli givhan long tufala blong faenem wan haos.
9, 10. ?Olgeta we oli muvaot long kantri blong olgeta finis, oli save tingbaot wanem samting? ?From wanem?
9 Olgeta We Oli Muvaot Long Kantri Blong Olgeta Finis: Maet yu yu muvaot long kantri blong yu bifo we yu lanem trutok. Be ating long prapa kantri blong yu, i nidim plante moa man blong talemaot gud nius. ?Olsem wanem? ?Yu yu save gobak long kantri blong yu blong givhan long wok ya? Ating bambae i moa isi blong yu yu faenem wok mo ples blong slip, i bitim man blong narafala kantri. Ating yu yu save finis lanwis blong ol man ples blong yu. Mo tu, taem yu talemaot ol tok blong Kingdom, maet ol man bambae oli glad moa blong lesin long yu i bitim wan man blong narafala kantri.
10 Wan man Albania we i laef long Itali olsem wan refuji, i kasem wan gudfala wok mo i stap sanem mane i gobak long famle blong hem long Albania. Taem hem i kasem trutok, hem i tijim wan grup blong ol spesel paenia blong Itali blong oli toktok lanwis blong Albania. Grup ya bambae i go long Albania blong prij, from we i nidim moa man blong talemaot gud nius. Brata ya i raetem se: “Olgeta ya oli stap go long kantri we mi mi kamaot long hem finis. Oli glad blong go, nating se oli no save lanwis blong ples ya. Be mi mi save finis lanwis mo kalja blong Albania. ?Mi mi stap mekem wanem long Itali?” Ale, brata ya i gobak long Albania blong givhan blong talemaot gud nius. Hem i talem se: “?Olsem wanem? ?Mi mi sore from we mi lego wok blong mi long Itali, mo mi no moa winim mane? !Nogat! Mi mi faenem wan gudfala wok. !Long tingting blong mi, wok ya we i moa impoten mo i givim glad blong olwe, hemia taem yumi mekem wok blong Jehova wetem fulhat blong yumi!”
11, 12. ?Olgeta we oli wantem muv i go long narafala kantri, oli mas mekem wanem?
11 ?Yu Mas Mekem Wanem?: Bifo we Pol mo ol fren blong hem oli go long Masedonia, oli wantem wokbaot i go long wes. Be ‘tabu spirit i no letem’ olgeta oli go long ples ya, ale oli tanem i go long not. (Wok 16:6) Taem oli kam klosap long Bitinia, Jisas i blokem olgeta blong oli no go long ples ya. (Wok 16:7) Jehova i gohed yet blong yusum Jisas blong lukaot long wok blong prij. (Mat. 28:20) Taswe, sipos yu wantem muv i go long narafala kantri, i gud yu prea long Jehova blong hem i lidim yu.—Luk 14:28-30; Jem. 1:5; lukluk bokis ya “?Bambae Yu Save Olsem Wanem Sipos Wan Kantri i Nidim Moa Man Blong Prij?”
12 I gud yu askem long ol elda mo ol brata we oli bigman long ol Kristin fasin, blong oli talemaot sipos yu yu naf blong muv i go long wan narafala kantri. (Prov. 11:14; 15:22) Yu save ridim ol buk mo magasin we oli tokbaot ol brata sista we oli prij long ol narafala ples. Mo tu, yu save lukaot moa save long saed blong kantri ya we yu tingting blong go long hem. ?Olsem wanem? ?Yu yu save go visitim kantri ya mo stap sam wik long ples ya? Sipos yu wantem muv i go long kantri ya, yu save raet i go long branj ofis long kantri ya blong faenemaot moa save. Yu save yusum adres we i stap long Yearbook. Be yu no mas sanem leta blong yu i go stret long branj ofis. I moa gud yu givim leta ya long ol elda long kongregesen blong yu, blong oli ademap sam moa save bifo we oli sanem i go.—Lukluk buk ya, Organized to Do Jehovah’s Will, pej 111-112.
13. ?Branj ofis bambae i givhan long yu long wanem samting? ?Wanem samting we yu nao yu mas mekem?
13 Blong givhan long yu blong mekem wan desisen, branj ofis bambae i sanem sam save long yu long saed blong kantri ya. Be branj ofis bambae i no raetem wan leta blong sponsarem yu blong go long narafala kantri. Bambae hem i no mekem pepa blong yu yu save kam residen blong kantri ya, mo visa blong yu, mo ol narafala impoten pepa we yu nidim blong stap long kantri ya. Bambae hem i no faenem ples blong slip blong yu tu. Hemia ol samting we yu nao yu mas faenemaot mo tingting gud long hem bifo we yu muv i go. Mo tu, yu nao yu mas toktok wetem ol man long embasi, blong faenemaot samting we yu mas mekem blong kasem visa mo pepa blong wok. Olgeta we oli muv i go long narafala kantri, olgeta nao oli mas lukaot long ol samting we olgeta wanwan oli nidim, mo long ol pepa we loa blong kantri ya i askem.—Gal. 6:5.
14. ?Wanem samting we yu mas lukaot gud long hem, taem yu visitim no yu muv i go long wan kantri we i putum tabu long wok blong prij?
14 Ol Kantri We Oli Putum Tabu Long Wok Blong Prij: Long sam kantri, ol brata sista oli mas lukaot gud taem oli prij mo oli go long miting. (Mat. 10:16) Ol pablisa we oli visitim ol kantri olsem, no oli muv i go long olgeta, oli save pulum ae blong ol man i kam long wok blong yumi. Mo samting ya i save karem trabol i kam long ol brata sista long kongregesen. Sipos yu yu stap tingting blong go long ol kantri olsem, plis yu mas raetem leta fastaem i go long branj ofis we i lukaot long kantri blong yu, mo yu givim leta ya long ol elda.
15. ?Olgeta we oli no save go long narafala kantri, oli save mekem wanem blong prij moa long kantri blong olgeta?
15 Sipos Yu No Save Muv i Go Long Narafala Kantri: Sipos i gat sam samting long laef blong yu we i mekem se yu no save muv i go long narafala kantri, yu no mas harem nogud. Maet i gat wan narafala ‘doa i open, blong yu mekem wan gudfala wok.’ (1 Kor. 16:8, 9) Maet seket elda i save sam eria long ples blong yu we i nidim moa man blong prij. Maet i gat wan ples we i klosap nomo long haos blong yu. Sipos no, yu save givhan long wan kongregesen no wan grup long ples blong yu, we i toktok narafala lanwis. No maet yu save prij moa long kongregesen blong yu. Nomata se i olsem wanem, be impoten samting se yu mekem wosip long Jehova wetem olgeta laef blong yu.—Kol. 3:23.
16. ?Yumi mas mekem wanem taem samfala oli wantem muv i go long narafala kantri?
16 ?Olsem wanem? ?Yu yu save wan pablisa we i bigman long ol Kristin fasin, mo we i wantem muv i go long narafala kantri blong prij? !Ale i gud yu givhan long hem mo yu leftemap tingting blong hem! Taem Pol i lego Antiok long Siria, taon ya i namba tri bigfala taon long ples we gavman blong Rom i rul long hem (Rom i faswan mo Aleksandria i sekenwan). Teritori blong kongregesen blong Antiok i bigwan, taswe i klia se ol brata long ples ya oli nidim Pol blong givhan long olgeta. Mo bambae oli sore tumas long Pol sipos hem i lego olgeta. Be Baebol i no tokbaot se ol brata oli traem blokem Pol mo pulum hem i stap wetem olgeta. Olgeta oli no tingbaot ples blong olgeta nomo, be oli tingbaot se “garen ya, hemia wol ya.”—Mat. 13:38.
17. ?Wanem ol risen we i mekem se yumi wantem “kamkros long Masedonia”?
17 Pol mo ol fren blong hem oli kasem plante blesing from we oli obei long tok ya se oli mas kamkros long Masedonia. Taem oli stap long taon blong Filipae long Masedonia, oli faenem Lidia, mo Jehova “i openem tingting blong hem blong i bilif long tok blong Pol.” (Wok 16:14) Biaen Lidia, famle blong hem, mo ol man blong wok blong hem, oli baptaes. !Yu traem tingbaot bigfala glad we Pol mo ol fren blong hem oli kasem! Long plante kantri, i gat ol man we hat blong olgeta i stret olsem Lidia, we oli no harem gud nius blong Kingdom yet. Sipos yu “kamkros long Masedonia,” yu save faenem ol man ya mo givhan long olgeta, nao yu tu yu save kasem bigfala glad.
[Bokis blong pija long pej 5]
?Bambae Yu Save Olsem Wanem Sipos Wan Kantri i Nidim Moa Man Blong Prij?
• Yu lukluk long Yearbook. Yu jekem gud hamas man i stap long kantri ya, mo hamas pablisa i stap.
• Yu yusum buk ya Index, blong lukaot moa save long saed blong kantri ya, mo ol stori long saed blong kantri ya.
• Yu toktok long ol pablisa we oli go visitim kantri ya, no we oli laef long ples ya.
• Yu lukluk long ol buk blong wol mo long Intenet. Sipos yu wantem go long wan kantri we yu save prij long ol man long lanwis we yu yu save, yu traem faenemaot hamas man long ples ya oli toktok lanwis ya.