“?Bambae Yumi Muf i Go Long Defren Ples?”

¹ Jisas i givim oda ya se “yufala i mas go long ol man long olgeta ples long wol, blong pulum olgeta oli kam man blong mi.” Folem oda ya, plante man blong Jeova we oli givim laef blong olgeta long hem finis, oli muf i go long ol ples we i nidim moa man blong talemaot gud nius. (Mat. 28⁠:19) Oli folem eksampol blong Pol, we i tekem aksin taem wan man i singaot se: “Plis yu kamkros long Masedonia, yu givhan long mifala.” (Wok 16⁠:⁠9) ?Olsem wanem yumi save mekem samting ya long wan fasin we i wokgud?

² Go Sloslou: ?Long kongregesen blong yu, i gat sam teritori we oli no prij long olgeta plante taem? Sipos yes, maet i gud yu traehad blong wok moa long ol eria ya. Bifo we yu mekemap tingting blong yu blong go long wan narafala ples, toktok wetem ol elda blong luk sipos olgeta oli ting se yu naf. Sipos yes, askem seket elda blong yu sipos hem i save wan kongregesen we i no longwe, we yu save go long hem blong mekem moa long minista wok blong yu. No afta we yu skelem gud ol samting, maet yu wantem givhan long wok blong prij long wan narafala ples long kantri blong yu no wan defren kantri olgeta. Sipos yu wantem mekem samting ya, yu wetem ol elda long kongregesen blong yu, yufala i mas raet i go long branj ofis blong kantri we yu wantem go long hem, mo talemaot ol tiokratik wok we yu bin mekem bifo. I waes blong visitim eria fastaem, bifo we yu mekemap tingting blong yu blong stap long hem longtaem.

³ Tingting Gud Bifo We Yu Muf i Go Long Wan Narafala Kantri: Namba blong ol brata blong yumi we oli muf i go long ol narafala kantri blong faenem wan laef we i gud moa no blong ronwe long fasin agens, i kam antap. Taem oli mekem samting ya, sam long olgeta oli foldaon from we sam man oli bin giaman mo promes blong givhan long olgeta long niufala kantri, be oli tekem mane blong olgeta nomo mo biaen oli lego olgeta. Samtaem ol man ya oli traem fosem olgeta we oli kam long narafala kantri blong mekem rabis fasin long saed blong seks olsem woman blong rod. Long fasin ya, laef blong ol man ya we oli bin aot long kantri blong olgeta, i kam moa nogud bitim bifo. Samtaem oli mas askem ol brata blong tekem olgeta i kam long haos blong olgeta mo givhan long olgeta. Long rod ya, oli kam wan baden long ol brata we oli gat ol problem mo trabol blong olgeta finis. Samtaem ol memba blong wan famle oli mas seraot mo ol famle oli kam slak long saed blong spirit, from we oli no tingting gud bifo we oli muf i kam.​—⁠1 Tim. 6:​8-​11.

⁴ Sipos yu wantem muf i go long wan narafala kantri blong mekem laef blong yu i kam gud moa, tingbaot se nomata weples yu laef long hem, bambae yu mas fesem ol problem. I isi moa blong winim ol problem long wan ples we yu savegud lanwis mo kastom blong hem, i bitim we yu traem statem wan niufala laef long wan ples we yu no save long hem.