Bigfala Doa i Open Blong Mekem Moa Wok
1 Pol i wok strong blong talemaot gud nyus, mo hem i traehad blong faenem ol ples we oli nidim moa man blong prij, olsem taon ya Efesas. Long ples ya, hem i karem gudfala frut long wok blong prij, mekem se hem i raet i go long ol narafala Kristin, i se: “Long ples ya i gat olsem doa we i open finis long mi, blong mi mekem wan gudfala wok.” (1 Kor. 16:9) Pol i gohed blong wok long ples ya mo givhan long plante man Efesas, blong oli kasem bilif.—Wok 19:1-20, 26.
2 Tede, wan bigfala doa i open long yumi blong mekem moa wok. Yumi kasem tok we i singaot yumi blong givhan long ol aelan we oli no gat man blong prij long olgeta, no we oli gat smol man nomo blong prij. Long rod ya, yumi save givhan long ples we i gat nid.—Skelem wetem 2 Korin 8:13-15.
3 ?Yu Save Wok Long Ples We i Gat Moa Nid? ?Yu bin prea long Jeova mo tingtinggud, blong luk sipos yu save wok long prapa aelan blong yu no long wan narafala aelan, blong wan no tu wik long taem blong Memoriol? Plante pablisa we oli bin mekem olsemia long ol yia we oli pas, oli faenem se i gud tumas, mo oli bin kasem bigfala glad from. ?Yu save traehad blong sevem naf mane blong mekem trep ya? Mo bakegen, maet i gat wan smol grup kolosap long ples blong yu nomo we oli bin ‘askem strong long masta, blong hem i sanem sam moa man blong mekem wok blong Kingdom.’ (Mat. 9:37, 38) Sipos i olsem, ?yu yu naf blong givhan, mo maet yu save gohed blong givhan oltaem?
4 Long ol yia we oli pas finis, plante taosen Kristin famle oli bin muf i go long ol narafala ples, blong oli save joen moa long wok blong karem kakae long garen. Oli no go blong wan no tu wik nomo, be oli go blong stap. Wan hasban mo waef we tufala i mekem olsem, oli talem se: “Mitufala i bin wantem mekem wok blong Jeova long ples we mitufala i save givhan moa.” Be, blong tekem bigfala disisen ya blong aot long wan kongregesen we i strong long saed blong speret, i nidim we yumi prea mo tingtinggud fastaem. Mo tu, yumi mas “toktokgud” wetem ol elda we oli bigman long saed blong speret. (Prov. 15:22) Long ol yia we oli pas finis, sam pablisa we oli bin muf i go long aelan blong karem gud nyus i go long ol famle blong olgeta, oli bin kasem problem from we oli no bin ‘kaontem praes fastaem.’ (Luk 14:28) Taswe, sipos yu wantem mekem samting ya, no sipos yu gat rod blong muf i go long wan narafala ples long aelan we yu stap long hem naoia, fastaem yu mas tokbaot plan blong yu wetem ol elda long kongregesen.
5 Sipos yu wantem askem long Sosaeti wanem ples i nidim moa man blong prij, raetem wan leta blong eksplenem samting we yu wantem mekem, mo givim i go long Sevis Komiti long kongregesen blong yu. Bambae oli ademap tingting blong olgeta mo sanem leta ya i go long Sosaeti. Nating se i olsem wanem, be taem bigfala doa i open yet blong mekem moa wok, yumi mas stap bisi long wok blong Jeova.—1 Kor. 15:58.