Oli Lukaot Trufala Skul
SAMFALA man, stat taem oli pikinini nomo, oli bin lukaot ol stret ansa blong ol kwestin long saed blong laef. Taem oli yangfala, maet oli joen long ol sevis blong skul. Be plante long olgeta oli faenem se ol ansa we oli kasem, mo ol kastom blong jyos oli no rili halpem olgeta blong winim ol problem blong laef.
Maet oli talem se oli stap yet olsem memba blong skul blong papa mama blong olgeta, nating se wanwan taem nomo oli go long ol sevis blong skul. Wan bisop blong Anglikan Jyos i talem se, smol bilif we i stap yet long olgeta i gat smol paoa nomo long laef blong olgeta. Oli no moa tingbaot skul. Ol narafala, we oli taed long fasin tu fes we oli luk insaed long skul, oli lego skul olgeta. Nating se i olsem, be oli stap gohed blong askem ol kwestin long saed blong laef.
From Wanem Tingting Blong Samfala Man i Hafhaf
Bighaf blong ol man oli save se plante skul oli mekem rod blong halpem olgeta we oli no gat haos, givim kakae long ol pua man, mo mekem ol plan blong givhan long kastom mo fasin blong laef blong ol man. Be tu, kolosap evri dei, oli harem nyus blong faet mo fasin blong mekem blad i ron we ol skul oli stampa blong olgeta, i no long ol skul ya nomo we oli no Kristin, be long ol skul ya tu we oli talem se oli Kristin. ?Bambae yumi sapraes we ol man ya oli no bilif fulwan long ol grup ya we oli talem se oli trufala skul, be long semtaem, oli stap joen long ol faet?
Plante man we oli gruap long wan skul, fastaem oli ting se skul i mekem wan gudfala samting taem hem i stap bildim ol spesel haos blong ol pikinini we oli no gat papa mama. Be, long ol yia we oli jes pas, oli no glad nating taem oli harem se ol pris long plante kantri oli stap pas long kot, from we oli mekem nogud long saed blong seks long ol pikinini we ol pris ya oli stap lukaot long olgeta. Fastaem ol man oli ting se smol namba nomo blong ol pris oli stap mekem fasin nogud ya. Naoia, sam long ol man ya oli stap tingbaot sipos skul nao i bigfala samting we i rong.
Bifo, samfala, olsem Eugenia, oli bin joen plante wetem skul blong olgeta. Olsem wan yangfala long Ajentina, hem i wan long olgeta we oli stap mekem trep blong wosip long vegin blong Itate. Long 14 yia, woman ya i stap wok olsem wan sista long Katolik skul. Ale hem i aot long wok ya blong joen long wan intenasnal grup we i meksemap skul mo politik wantaem, wan grup we i stap leftemap fasin blong girap agens long gavman, olsem rod blong mekem ol bigfala jenis kwiktaem long fasin blong laef blong ol man mo fasin blong kasem mane. Samting we woman ya i luk mo i joen long hem i mekem se hem i no moa bilif long God mo trastem Hem. Hem i no rili stap lukaot wan skul we hem i save bilif long hem. Samting we hem i wantem, se wan rod blong mekem i stret long olgeta we oli pua—yes, mo wan fren we hem i save trastem.
Sam narafala oli luk ol samting we oli stap hapen insaed long ol jyos mo from samting ya, oli no moa joen nating long ol jyos. Wan man we i no bilif long God, we oli prentem ol tingting blong hem long 1991 long magasin ya Sputnik, i talem stret se: “Mi no save luk wan bigfala samting we i defren bitwin ol kastom store blong ol hiten mo ol kastom store blong ol Kristin.” Eksampel, hem i tokbaot ol pris we oli putum ol spesel klos we oli wokem long gol tred blong flasem, mo sloslou oli wokbaot long ol rod blong Mosko wetem wan bokis blong putum dedbodi we oli wokem long ston, mo wetem wan dedbodi we oli putum meresin long hem blong i stap longtaem. Hem i dedbodi blong “wan Kristin tabu man blong Otodoks” we oli karemaot long wan musium blong muvum i go long wan jyos, mo samting ya i mekem se man we i raetem buk ya i tingbaot ol pris long Ijip bifo mo ol dedbodi we oli putum meresin long olgeta blong oli stap longtaem. Mo tu, hem i tingbaot se ol man ya we oli joen long maj long Mosko oli bilif long “Kristin Triniti,” mo ol man Ijip tu oli bin wosip long wan god we i gat tri haf blong hem—Osiris, Aesis, mo Orus.
Long buk blong semfala man ya, hem i talem se tingting ya blong ol Kristin long saed blong fasin lav, hemia se—“God i stampa blong fasin lav,” mo “laekem ol man we oli stap raonabaot long yu”—i no stap nating long fasin blong ol hiten man Ijip. Be hem i talem se: “Fasin blong laekem man olsem wan brata nomo i no kam antap long wol, no long haf ya blong wol we oli stap talem se oli Kristin.” Mo hem i gohed blong tokbaot ol rabis frut we oli stap kamaot from fasin blong ol skul blong strong blong joen long ol bisnes blong Nesen. Samting we hem i luk i no pusum hem blong ting se ol skul blong Krisendom oli save givim samting we hem i stap lukaot.
Samting we i defren se, sam narafala oli faenem ol ansa we i mekem olgeta oli haremgud, be i no long ol skul blong Krisendom.
Woman Ya i Lanem Trutok Long Saed Blong Ded
Magdalena, we naoia i gat 37 yia, i stap long Bulgaria. Afta we papa blong hasban blong hem i ded long 1991, tingting blong hem i foldaon bigwan. Plante taem bakegen, hem i askem hem wan se, ‘?Ol dedman oli stap wea? ?Papa blong hasban blong mi i stap wea?’ Woman ya i go long skul, mo hem i prea fored long wan aedol long haos, be hem i no kasem ansa.
Ale wan dei, wan man we i stap kolosap i telefon long woman ya, mo i askem hem blong kam long haos blong hem. Wan yangfala man we i stap stadi wetem ol Wetnes blong Jeova i stap visitim man ya we i stap kolosap. Woman ya i lesin taem yangfala man ya i tokbaot Kingdom blong God mo stampa tingting blong Hem blong mekem wol i kam wan paradaes we ol man oli save laef foreva long gladtaem. Long tebel, i gat buk ya Yu Save Laef Foreva Long Paradaes Long Wol. Yangfala man ya i yusum buk ya, blong pulum tingting blong woman ya i go long wan vas long Baebol, long Eklesiastis 9:5, we i talem se: “Ol dedman oli no save wan samting nating.” Long sapa ya, woman ya i ridim moa. Hem i lanem se ol dedman oli no go long wan narafala laef long heven no long hel; oli no save wan samting nating, olsem wan man we i slip we i slip ded olgeta. Hem i glad blong akseptem taem oli askem hem blong go long wan miting blong kongregesen blong ol Wetnes blong Jeova long ples blong hem. Afta long miting, hem i agri blong stadi Baebol. Taem hem i luk fasin blong prea long Jeova we oli mekem long miting, hem tu i stat blong prea long Jeova, i askem help long hem blong winim wan nogud fasin we i stap longtaem long hem. Taem hem i kasem ansa blong prea blong hem, hem i kasem save se hem i faenem trufala skul.
Oli Faenem Laef We i Gat Mining
Andre i gruap long wan famle long Beljiom we i strong long Katolik, mo hem i wok olsem nambawan man blong givhan long pris blong ples ya. Be, long taem ya, hem i luk plante samting we oli spolem respek we hem i gat long jyos. Risal blong samting ya se, hem i wan Katolik long nem nomo.
Long 15 yia, hem i bin stap olsem wan nambawan man blong plei futbol. Wan taem, tim blong hem i plei long wan maj long Itali, ale oli singaot olgeta blong kam toktok wetem pop. Long visit ya, i no gat wan samting nating we i leftemap tingting blong hem long saed blong speret, mo ol sas samting blong wol we oli stap raonabaot long pop, oli mekem Andre i harem nogud. Ol samting we hem i no sua long hem long saed blong jyos, oli kam plante moa. Hem i no glad long prapa laef blong hem wan from we hem i bin mared tu taem, mo i seraot bakegen. Ol samting we oli stap hapen long wol oli mekem hem i kros. Long 1989, hem i raetem long buk ya we hem i stap yusum blong raetemdaon ol samting we oli stap hapen long laef blong hem, se: ‘?Wanem mining blong ol krangke samting we oli stap hapen raon long yumi?’ Hem i no faenem ansa long skul blong hem.
Long 1990, taem Andre i stap wok olsem wan man blong trenem ol man blong futbol long Aeslan, Iiris, wan misinari blong ol Wetnes blong Jeova, i visitim hem. Andre i tekem buk mo i askem misinari ya blong kam visitim hem bakegen. Sista ya i gobak wetem hasban blong hem, Kjell. Biaen, tufala i save sidaon mo toktok wetem Andre, ale i klia se hem i intres tumas blong kasem save long Baebol. Waef blong hem Asta, hem tu i soem intres. Long medel dei, hem i gat tri haoa spel insaed long ol taem blong trenem ol man blong plei futbol, mo tufala i mekem disisen blong yusum ol haoa ya blong stadi Baebol. Andre i talem se: “Taem mi stadi long Baebol, mi haremgud moa bitim we mi stap spel nomo.” Sloslou Baebol i givim ansa long ol kwestin blong tufala, mo bilif blong tufala long Jeova mo Kingdom blong hem i stap kam strong moa. Ol nambawan promes blong Baebol long saed blong wan nyufala wol we i gat pis, wan wol we i no moa gat “ol krangke samting we oli stap hapen raon long yumi,” i kam wan trufala samting long tufala. Naoia, Andre mo Asta, tufala i stap serem nyufala bilif we tufala i faenem wetem ol narafala.
Magdalena, Andre, mo Asta, trifala i sua se naoia trifala i faenem trufala skul finis. Eugenia tu, we hem i joen long politik blong traem winim ol problem long wol, biaen hem i faenem skul blong ol Wetnes blong Jeova, we hem i ting se hemia nao trufala skul. ?Be wanem i rili makemaot se wan skul i tru no i no tru? Plis lukluk long haf we i kam biaen.
[Tok blong pija long pej 7]
Stadi Baebol wetem ol Wetnes blong Jeova i stap halpem bitim faef milyan man blong faenem ol stret ansa