Ol Fren Mo Famle Blong Yu We Oli Ded—?Bambae Yu Luk Olgeta Bakegen?

JOHN i gat naen yia nomo taem mama blong hem i ded. Biaen, hem i tingbaot wanem i bin hapen long taem ya we oli mekemrere blong berem dedbodi blong mama blong hem: “Mi dro wan pija blong givim long mama blong mi mo mi raetem wan smol not long pija ya, mi askem hem blong wet long mifala evriwan long heven. Mi givim long Papa blong putum insaed long bokis kolosap long mama, mo nating se hem i ded, mi wantem blong bilif se hem i kasem laswan mesej ya blong mi.”​—⁠How It Feels When a Parent Dies, we Jill Krementz i raetem.

I klia se John i laekem mama blong hem tumas. Afta we hem i tokbaot ol gudfala fasin blong mama blong hem, hem i talem se: “Maet from we mi no wantem tingbaot ol nogud samting, be mi no save tingbaot wan samting we i nogud long hem. Hem i moa naes bitim ol narafala woman we mi luk long ful laef blong mi.”

Olsem John, plante man oli gat ol gudfala tingting long ol fren mo famle blong olgeta we oli ded, mo oli talemaot klia se oli nidim blong luk olgeta bakegen blong haremgud fulwan long filing blong olgeta. Edith, we boe blong hem i gat 26 yia taem i ded long kansa, i talem se: “Mi nidim blong bilif se boe blong mi i stap laef samples be mi no save wea. ?Bambae mi luk hem bakegen? Mi no save be mi hop se bambae mi luk hem.”

I tru, Man we i Wokem man mo i laekem ol man i tingbaot stret samting ya we ol man oli wantem. From samting ya nao, hem i promes se i gat taem bambae i kam we plante milyan man bambae oli joen bakegen wetem ol fren mo famle blong olgeta we oli ded. Tok blong God i fulap long ol vas long saed blong promes ya se ol dedman bambae oli laef bakegen.​—⁠Aesea 26:19; Daniel 12:​2, 13; Hosea 13:14; Jon 5:​28, 29; Revelesen 20:​12, 13.

?Hu Ya Olgeta We Oli Laef Bakegen Long Heven?

Yumi tingbaot hop blong John se mama blong hem we Jon i laekem hem tumas i stap wet long hem long heven. Plante man we oli stap go oltaem long jyos oli gat hop no bilif olsem. Blong sapotem ol tingting olsem, ol lida blong jyos mo sam man we oli wok blong givhan long ol man we oli gat trabol, oli givim rong mining long sam vas long Baebol.

Eksampel, Dokta Elisabeth Kübler-Ross, wan woman we i gat gudhan blong halpem ol man we oli harem nogud from oli lusum wan fren no famle, i talem long buk blong hem On Children and Death se: “Ded i minim nomo se yumi sakem bodi blong yumi olsem we yumi save sakem wan olfala klos we i brok, no olsem we yumi kamaot long wan rum yumi go long narafala rum. Long Eklesiastis 12:​7, yumi ridim: ‘Nao graon i gobak long graon olsem bifo, mo speret i gobak long God, we hem i bin givim speret ya fastaem.’ Jisas i talem se: ‘Mi mi go blong mekem wan ples i rere blong yufala, blong bambae yufala tu i save stap long ples ya we mi mi stap long hem.’ Mo hem i talem long stilman ya long ‘kros’: ‘Tede bambae yu stap wetem mi long paradaes.’ ”

?Ol vas ya antap oli rili minim se ol fren mo famle blong yumi we oli ded oli stap laef naoia mo oli stap wet long yumi long heven? Yumi luklukgud long ol vas ya, stat wetem Eklesiastis 12:⁠7. I klia se, waes man ya we i raetem ol tok ya i no wantem agensem samting we hem i bin raetem long sem buk ya blong Baebol se: “Ol man we oli laef oli save se bambae oli mas ded. Be ol dedman oli no save wan samting nating.” (Eklesiastis 9:⁠5) Hem i stap tokbaot ded blong olgeta man. ?I stret blong bilivim se olgeta ya we oli no bilif se i gat God mo ol man blong mekem raf mo rabis fasin oli gobak long God taem oli ded? No gat. Mo, yumi evriwan i no save gobak long God, nating sipos yumi ting se yumi ol gudfala man no ol nogud man. From we i no gat wan long yumi we i bin stap wetem God long heven, ?olsem wanem yumi save talem se yumi gobak long hem?

?Oraet, man blong raetem Baebol i minim wanem taem hem i talem samting ya long saed blong ded se, ‘speret i gobak long tru God’? Taem hem i yusum Hibru tok ya we oli tanem i kam “speret,” hem i no stap tingbaot wan spesel samting we i mekem se wan man i defren long narafala man. Be, long Eklesiastis 3:​19, semfala man ya we i raetemdaon tok we God i givim long Baebol, i eksplenem se ol man mo ol anamol, “olgeta evriwan oli gat wan speret we i sem mak nomo.” I klia se hem i minim we “speret” i paoa blong laef we i stap long ol sela we oli mekemap bodi blong ol man mo ol anamol. Yumi no kasem speret ya stret long God. Ol papa mo mama blong yumi oli pasem samting ya long yumi taem ol mama blong yumi oli gat bel long yumi mo biaen taem yumi bon. Antap moa, speret ya i no flae i go antap long skae blong gobak long God taem yumi ded. Tok ya, ‘speret i gobak long tru God,’ i wan tok we i stap minim se fyuja laef blong wan man we i ded naoia i stap long han blong God. Hem nomo i jusum hu bambae hem i tingbaot bakegen mo mekem olgeta oli laef bakegen long ded long fyuja. Yu wan yu save luk olsem wanem Baebol i soemaot samting ya i klia nomo long Ol Sam 104:​29, 30.

Tingting blong Jeova God se, wan stret namba blong ol trufala man blong Kraes, we oli 144,000 nomo, bambae oli laef bakegen blong kasem laef long heven olsem ol speret pikinini blong God. (Revelesen 14:​1, 3) Olgeta ya wetem Kraes oli mekemap wan gavman long heven we bambae i givim blesing long ol man long wol.

Ol faswan man blong kasem save long samting ya, hemia ol trufala aposol blong Jisas, we i talem long olgeta se: “Long haos blong Papa blong mi, i gat plante rum i stap. Sipos tok ya i no tru, bambae mi mi talemaot long yufala, be tok ya i tru nomo. Naoia bambae mi go mekem ples i stap rere blong yufala. Mo from we mi go blong mekem ples i rere blong yufala, bambae mi save kambak blong tekem yufala i kam stap wetem mi, blong bambae yufala i save stap long ples ya we mi bambae mi stap long hem.” (Jon 14:​2, 3) Ol aposol ya mo ol narafala Kristin blong bifo we oli ded, oli mas wet long ded olsem we oli no gat tingting nating, kasem we Jisas i kam blong givim pei long olgeta, hemia laef bakegen long heven. From samting ya yumi ridim se Steven, faswan Kristin we i ded from hem i holemtaet bilif blong hem, ‘i slip long ded.’​—⁠Ol Wok 7:60; 1 Tesalonaeka 4:⁠13.

Laef Bakegen Blong Laef Long Wol

?Olsem wanem long promes blong Jisas long saed blong rabis man ya we hem i ded kolosap long hem? Olsem plante man Jyu long taem ya, man ya i bilif se God bambae i sanem wan Mesaea we bambae i putumap wan kingdom mo stanemap bakegen pis mo seftaem long nesen blong ol man Jyu long wol. (Skelem 1 King 4:​20-25 wetem Luk 19:11; 24:21 mo Ol Wok 1:⁠6.) Antap moa, rabis man ya i soemaot bilif se Jisas nao i stret Man ya we God i jusum hem blong kam King. Be, i luk olsem we samting ya i no save hapen long taem ya, from we oli jajem Jisas finis, nao ­kolosap hem i ded. Hemia nao from wanem Jisas i mekem tingting blong rabis man ya i strong taem i statem promes blong Hem wetem ol tok ya se: “Tru mi talem long yu tede, se bambae yu yu stap wetem mi long Paradaes.”​—⁠Luk 23:​42, 43, NW.

Ol Baebol we oli gat koma bifo long tok ya “tede,” oli mekem wan problem long ol man we oli wantem kasem save long ol tok blong Jisas. Long sem dei ya Jisas i no go long wan paradaes. Be, hem i ded we i no save wan samting blong tri dei, kasem we God i mekem hem i laef bakegen. Mo tu afta we Jisas i laef bakegen mo i go long heven, hem i mas wet long raetsaed blong Papa blong hem kasem stret taem blong hem i rul long ol man olsem King. (Hibrus 10:​12, 13) I no longtaem, rul blong kingdom blong Jisas bambae i mekem ol man oli haremgud mo bambae i mekem ful wol ya i kam wan paradaes. (Luk 21:​10, 11, 25-31) Long taem ya bambae hem i mekem promes blong hem i kamtru long rabis man ya, taem Hem i mekem hem i laef bakegen long wol. Mo i olsem we Jisas bambae i stap wetem man ya taem bambae Hem i givhan long man ya long ol samting we hem i nidim, wetem nid ya blong mekem fasin blong laef blong hem i joen wetem ol stret loa blong God.

Plante Man Bambae Oli Laef Bakegen

Sem mak long rabis man ya we i tanem tingting blong hem, plante man bambae oli laef bakegen long wol. Samting ya i laenapgud wetem stampa tingting blong God taem hem i wokem man. Faswan man mo woman tufala i stap long wan paradaes garen mo God i talem long tufala blong wokem ful wol ya i kam wan paradaes. Sipos tufala i obei long God, bambae tufala i neva kam olfala mo ded. Long stret taem blong God, bambae Adam mo ol stret man we oli kamaot biaen long hem oli kontrolem ful wol ya, mo mekem paradaes long hem.​—⁠Jenesis 1:28; 2:​8, 9.

Be, from we Adam mo Iv tufala i no wantem obei, tufala i mekem se tufala i ded mo ol man we oli kamaot biaen long tufala tu, oli ded. (Jenesis 2:​16, 17; 3:​17-19) From samting ya, Baebol i talem se: “Bifo, fastaem olgeta, wan man nomo i statem fasin blong sin long wol ya. Mo from we hem i mekem sin, hem i ded. Be frut blong samting ya, hemia we ol man oli stap ded, from we olgeta oli mekem sin.”​—⁠Rom 5:⁠12.

I bin gat wan man nomo i bon we i no gat sin. Hemia stret Pikinini blong God, Jisas Kraes, we laef blong hem i aot long heven i kam insaed long bel blong gel Jyu ya, Meri. Jisas i no mekem sin nating, taswe i no stret we oli kilim hem i ded. From samting ya, ded blong hem i wan sas samting we i naf blong “tekemaot sin blong olgeta man long wol.” (Jon 1:29; Matyu 20:28) Hemia from wanem Jisas i talem se: “Stampa blong laef bakegen long ded, mi ya. Stampa blong laef, mi ya. Man we i bilif long mi, nating we bambae i ded, hem bambae i mas laef.”​—⁠Jon 11:⁠25.

Yes, taswe yu yu save tingbaot taem ya we bambae yu joen bakegen wetem ol fren mo famle blong yu we oli ded, be blong mekem olsem, yu mas soemaot bilif long Jisas olsem Man blong Pemaot yu mo obei long hem olsem King we God i putumap. I no longtaem, Kingdom blong God bambae i karemaot olgeta rabis fasin blong wol ya. Olgeta man we oli no wantem obei long rul blong hem bambae oli lus. Be, ol man we oli stap aninit long Kingdom blong God bambae oli stap laef mo bambae oli bisi long wok blong mekem wol ya i kam wan paradaes.​—⁠Ol Sam 37:​10, 11; Revelesen 21:​3-5.

Biaen, bambae nambawan taem ya i kamaot we ol dedman oli stat laef bakegen. ?Bambae yu yu stap blong mekem welkam long ol dedman we oli girap? Samting ya i dipen nomo long wanem we yu stap mekem naoia. Ol nambawan blesing oli stap wet long ol man we oli stap obei long Kingdom blong Jeova, we Pikinini blong hem, Jisas Kraes i rul long hem.

[Futnot]