Tingting Blong Kristin Long Ol Man We Oli Stap Rul
“I no gat man i save rul sipos God i no letem hem.”—ROM 13:1, NW.
1. ?From wanem yumi save talem se Jeova i Rula we i Hae Olgeta?
FASIN blong rul i joen long fasin blong wokem samting. Jeova God nao i Man ya we i Hae Olgeta we i wokem olgeta samting, ol samting we oli laef mo ol samting we oli no laef. I klia nomo se Hem i nambawan Hae Rula. Ol trufala Kristin oli gat sem filing olsem ol enjel long heven we oli talemaot se: “[Jeova], yu yu God blong mifala. Yu yu mekem olgeta samting blong wol fastaem, mo from we yu yu wantem olsem, yu holem olgeta samting ya oli stap, mo yu givim laef long olgeta. From samting ya, i stret nomo blong ol man oli leftemap nem blong yu, mo blong oli foldaon, oli ona long yu, oli stap aninit long paoa blong yu oltaem.”—Revelesen 4:11.
2. ?Olsem wanem ol rula blong bifo oli soem long wan rod se oli luksave we oli no gat raet blong rul long ol narafala man, mo Jisas i talem wanem long Ponjes Paelet?
2 Plante rula long taem bifo oli traem blong soemaot se oli gat raet blong rul taem oli talem se oli wan god no oli tekem ples blong wan god, be samting ya nomo i soem se oli luksave we i no gat wan man i gat ful raet blong rul antap long narafala man.a (Jeremaea 10:23) Jeova God nomo i trufala stampa blong paoa blong rul. Kraes i talem long Ponjes Paelet, hed gavman blong ol man Rom long Judia se: “Sipos God i no givim paoa ya long yu fastaem, bambae yu yu no gat paoa long mi nating.”—Jon 19:11.
“I No Gat Man i Save Rul Sipos God i No Letem Hem”
3. ?Aposol Pol i talem wanem long saed blong “ol haeman we oli stap rul,” mo wanem ol kwestin we oli kamaot from ol tok blong Jisas mo Pol?
3 Aposol Pol i raet i go long ol Kristin we oli stap aninit long gavman blong Rom se: “Olgeta sol oli mas stap aninit long ol haeman we oli stap rul, from we i no gat man i save rul sipos God i no letem hem. Ol haeman we oli stap, oli stap long prapa ples blong olgeta from God.” (Rom 13:1, NW) ?Jisas i minim wanem taem hem i talem se paoa blong rul we Paelet i kasem i kam ‘long God’? ?Mo long wanem rod Pol i luk se ol haeman blong politik long taem blong hem, oli stap long prapa ples blong olgeta from God? ?I min se i wok blong Jeova hem wan blong putumap wanwan long olgeta politik rula blong wol ya?
4. ?Jisas mo Pol tufala i singaot Setan olsem wanem, mo wanem samting Setan i talem we Jisas i no agensem hem from?
4 I no olsem, from we Jisas i singaot Setan se “masta blong wol ya,” mo aposol Pol i talem se Setan i “rabis god blong wol ya.” (Jon 12:31; 16:11; 2 Korin 4:4) Antap moa, taem Setan i traem Jisas, hem i wantem givim ‘paoa’ long hem blong rul long “olgeta kantri long wol ya,” mo Setan i talem se paoa ya i stap long han blong hem. Jisas i no wantem, be i no talem se Setan i no gat paoa olsem, we i save givim long narafala.—Luk 4:5-8.
5. (a) ?Yumi mas kasem wanem mining blong ol tok blong Jisas mo Pol long saed blong rul blong man? (b) ?Long wanem rod ol rula oli “stap long prapa ples blong olgeta from God”?
5 Jeova i givim rul blong wol ya long Setan taem i letem hem blong laef, afta we i agensem God mo afta we i traem Adam mo Iv mo i mekem tufala blong tufala i agensem nambawan rul blong Hem. (Jenesis 3:1-6; skelem wetem Eksodas 9:15, 16.) Taswe, tok blong Jisas mo Pol i mas minim se, afta we faswan man mo woman tufala i agensem rul we i tiokratik, no rul blong God, Jeova i letem ol man we oli gowe long hem, oli wokem ol fasin blong rul we bambae i letem olgeta blong laef long wan sosaeti we i gat oda long hem. Samtaem, blong mekem stampa tingting blong hem i kamtru, Jeova i mekem se sam rula no gavman oli foldaon. (Daniel 2:19-21) Hem i letem sam narafala blong oli stap rul. Long saed blong ol rula we Jeova i letem olgeta blong oli stap, yumi save talem se “oli stap long prapa ples blong olgeta from God.”
Ol Kristin Blong Bifo Mo Gavman Blong Rom
6. ?Ol Kristin blong bifo oli tingbaot gavman blong Rom olsem wanem, mo from wanem?
6 Ol Kristin bifo oli no joen wetem ol narakaen grup blong ol man Jyu we oli mekem rabis plan mo oli faet agensem ol man Rom we oli stap long graon blong ol man Isrel. Gavman blong Rom, wetem ol loa we i stanemap, i mekem se oda i stap long graon mo solwora; i putum plante paep blong karem wora saplae, i mekem ol rod, mo ol brij; mo i mekem plante samting blong givhan long ol man, taswe ol Kristin oli tingbaot gavman olsem ‘we i mekem wok blong God [no, “i man blong wok,” futnot] blong mekem i gud long olgeta.’ (Rom 13:3, 4) From we ol haeman oli mekem loa i stanap mo i gat oda long ol ples, ol Kristin oli save talemaot gud nyus long evri ples, olsem oda we Jisas i givim. (Matyu 28:19, 20) Wetem tingting we i no jajem olgeta, oli save pem takis we ol man Rom oli askem, nating sipos gavman i yusum sam long ol mane ya long wan rod we God i no glad long hem.—Rom 13:5-7.
7, 8. (a) ?Taem yumi ridimgud Rom 13:1-7, ol vas ya oli soemaot wanem, mo ol vas raonabaot oli soemaot wanem? (b) ?Wetaem gavman blong Rom i mekem samting we i no olsem “wok blong God” nating, mo long taem ya ol Kristin oli folem wanem tingting?
7 Taem yumi ridimgud vas 1 kasem 7 blong Rom japta 13, yumi luk se “ol haeman we oli stap rul” oli “mekem wok blong God” taem oli presem olgeta we oli mekem i gud mo panisim olgeta we oli mekem samting we i nogud. Ol vas raonabaot oli soemaot se God i talem wanem i gud mo wanem i nogud, i no ol rula. Taswe, sipos hed gavman blong Rom no ol narafala haeman blong politik oli askem ol man blong mekem samting we God i blokem no, long defren fasin, oli blokem olgeta blong oli no mekem samting we God i askem, nao ol haeman ya oli no moa mekem wok blong God. Jisas i talem se: “Samting we i blong Sisa, yufala i givimbak long Sisa. Samting we i blong God, yufala i givimbak long God.” (Matyu 22:21) Sipos Gavman blong Rom i askem samting we i blong God, olsem wosip no laef blong man, ol trufala Kristin oli mas folem advaes blong ol aposol se: “Mifala i mas obei long God, mifala i no save obei long ol man nomo.”—Ol Wok 5:29.
8 Fasin blong ol Kristin blong bifo blong no wantem mekem wosip long hed gavman mo long ol aedol, blong no lego ol Kristin miting blong olgeta, mo blong no stop long wok blong talemaot gud nyus, i mekem se oli kasem hadtaem. I luk olsem we oli kilim aposol Pol i ded folem oda blong Empera Nero. Sam narafala hed gavman, speseli Domitian, Marcus Aurelius, Septimius Severus, Decius, mo Diocletian, olgeta tu oli mekem trabol long ol Kristin blong bifo. Taem ol hed gavman ya mo ol haeman blong olgeta oli mekem trabol long ol Kristin, oli no mekem “wok blong God” nating.
9. (a) ?Wanem samting i tru yet long saed blong ol politik rula, mo wael anamol ya we i minim politik i kasem paoa mo raet blong rul long hu? (b) ?I stret blong talem wanem long saed blong fasin blong ol Kristin blong ona long ol haeman blong gavman?
9 Olgeta samting ya oli soemaot klia se nating we long sam fasin ol politik rula oli olsem “plan blong God” blong holemtaet oda long sosaeti blong man, be oli stap yet olsem haf blong ol samting blong wol ya we Setan i god blong hem. (1 Jon 5:19) Oli haf blong politik ogenaesesen blong wol ya we “wael anamol” long Revelesen 13:1, 2, i pija blong hem. Anamol ya i kasem paoa mo haenem long “bigfala algita ya,” Devel Setan. (Revelesen 12:9) Taswe, i stret we ol Kristin oli obei long ol haeman olsem, long sam samting nomo, i no long olgeta samting.—Skelem Daniel 3:16-18.
Stret Fasin Blong Soem Respek Long Gavman
10, 11. (a) ?Olsem wanem Pol i soemaot se yumi mas respektem ol haeman? (b) ?Olsem wanem mo from wanem yumi save mekem prea ‘from ol king mo ol narafala haeman’?
10 Be, hemia i no min se, ol Kristin oli mas soem wan strong fasin, wan tingting we i agensem rul blong gavman. I tru, plante long ol haeman ya oli no mekem ol gudfala fasin long prapa laef blong olgeta, mo long fored blong ol man, we i pulum yumi blong respektem olgeta from. Be, eksampel blong ol aposol, mo advaes blong olgeta, i soemaot se i stret blong gat respek long ol haeman. Taem Pol i stanap fored long King Herod Agrippa 2 we i stap mekem rabis fasin ya blong slip wetem wan prapa famle blong hem bakegen, hem i soem stret respek taem hem toktok wetem hem.—Ol Wok 26:2, 3, 25.
11 Pol i talem tu se i stret we yumi prea from ol haeman blong wol, antap moa taem oli mekem ol disisen we oli save gat paoa long laef mo ol wok blong yumi ol Kristin. Hem i raetem se: “Fas tok blong mi, mi talem strong long yufala, se yufala i mas prea long God from olgeta man. Yufala i mas askem long hem blong i givim ol samting long yufala we yufala i wantem blong yufala mo blong ol narafala man. Mo yufala i mas talem tangkyu long hem tu from olgeta man. Mo yufala i mas stap prea from ol king, mo from ol narafala haeman blong yumi. Long fasin ya, bambae yumi gat kwaet laef, we i gat pis, we yumi save mekem ol fasin blong prea, mo yumi save folem ol stret fasin. Fasin blong prea olsem i gud tumas mo i save mekem God ya we i sevem yumi i harem gud. God ya, hem i wantem sevem olgeta man, mo i wantem olgeta man bambae oli faenem trutok.” (1 Timote 2:1-4) Fasin blong yumi blong gat respek long ol haeman olsem, i save mekem se oli letem yumi blong yumi fri moa blong gohed long wok blong yumi blong traem sevem “olgeta man.”
12, 13. (a) ?Pita i givim wanem stret advaes long saed blong ol man blong rul? (b) ?Olsem wanem yumi save winim “ol krangke tok blong ol man we oli no gat save” we oli pulum ol narafala man blong agensem ol Wetnes blong Jeova?
12 Aposol Pita i raetem se: “From yufala i man blong Masta blong yumi, yufala i mas obei long olgeta gavman we ol man oli putumap. Yufala i mas obei long hed gavman blong yufala we i hae moa long ol narafala gavman. Mo yufala i mas obei long ol gavman we hed gavman ya i sanem blong givim panis long ol man blong brekem loa, mo blong presem ol man blong folem stret fasin. From we hemia wan samting we God i wantem, se long ol stret fasin blong yufala bambae yufala i blokem ol krangke tok blong ol man we oli no gat save. Yufala i friman finis, mo fasin blong yufala i mas soemaot samting ya. Be i nogud yufala i yusum fasin ya we yufala i friman, blong haedem sam fasin we i no stret, from we yufala i man blong wok blong God, mo fasin blong yufala i mas soemaot samting ya tu. Yufala i mas ona long olgeta man. Yufala i mas laekem tumas olgeta Kristin man. Yufala i mas onagud long God. Mo yufala i mas ona long hed gavman blong yufala.” (1 Pita 2:13-17) !Advaes ya i stretgud! I stret blong yumi obei fulwan long God olsem ol slef blong hem, mo yumi obei wetem respek, be i no fulwan, long ol rula we oli blong panisim ol man we oli mekem rabis fasin.
13 Plante haeman oli bin soemaot se oli gat ol narakaen mo rong tingting long saed blong ol Wetnes blong Jeova. Plante taem hemia from we ol enemi blong ol man blong God we oli wantem spolem olgeta, oli talem ol gyaman toktok long saed blong olgeta. No maet olgeta samting we oli save long saed blong yumi, oli kasem nomo long nyuspepa, radyo, televisin, we plante taem oli tekem saed we i agens long ol Wetnes. Samtaem yumi save jenisim nogud tingting ya from fasin respek blong yumi mo, taem yumi soemaot stret wok mo bilif blong ol Wetnes blong Jeova long ol haeman, sipos yumi gat jans blong mekem olsem. Buklet ya Jehovah’s Witnesses in the Twentieth Century i eksplenem klia ol poen mo i no bigwan tumas, taswe i gud long ol man blong gavman we oli bisi. Blong kasem save moa, oli save karem buk ya Jehovah’s Witnesses—Proclaimers of God’s Kingdom, wan nambawan tul we i stret blong i stap long ples blong ol buk long ol lokol mo ol nasnal laebri.
Rul Insaed Long Haos Blong Ol Kristin
14, 15. (a) ?Wanem i stampa blong fasin blong rul we i stap insaed long Kristin famle? (b) ?Wanem fasin we ol Kristin waef oli mas gat long hasban blong olgeta, mo from wanem?
14 I klia se sipos God i askem ol Kristin blong soemaot stret respek long ol rula blong wol, oli mas respektem tu fasin blong rul we God i putumap insaed long ol Kristin famle. Aposol Pol i talemaot klia, fasin blong rul we i stap long medel blong ol man blong Jeova. Hem i raetem se: “Mi wantem yufala i savegud long tok ya. Kraes i olsem hed blong olgeta man, mo man i olsem hed blong woman blong hem, mo God i olsem hed blong Kraes.” (1 Korin 11:3) Hemia nao fasin blong tiokratik, no rul blong God. ?I minim wanem?
15 Respek long tiokratik fasin i stat long haos. Wan Kristin waef we i no soemaot stret respek long rul blong hasban blong hem—nating se hasban blong hem i man blong bilif no i no man blong bilif—i no folem tiokratik rod. Pol i givim advaes long ol Kristin se: ‘Yufala Kristin man mo woman, yufala i mas ona long yufala, from we yufala i stap onagud long Kraes. Yufala woman we i mared, yufala i mas ona long man blong yufala, olsem we yufala i stap ona long Masta blong yumi. From we man i hed blong woman blong hem, olsem we Kraes i hed blong kongregesen. Kraes i sevem kongregesen ya finis, we kongregesen ya i bodi blong hem. From samting ya, ol woman oli mas ona long man blong olgeta, long evri samting, olsem we kongregesen ya i stap ona long Kraes.’ (Efesas 5:21-24) Olsem we ol Kristin man oli mas obei long hed blong olgeta Kraes, ol Kristin woman oli mas luksave se i waes blong obei long rul blong hasban blong olgeta, we God i putum long han blong olgeta. Samting ya bambae i mekem ol waef oli haremgud tumas mo, samting we i moa impoten, bambae i givim blesing blong Jeova long olgeta.
16, 17. (a) ?Olsem wanem ol pikinini we oli gruap long Kristin famle oli save soemaot se oli defren long plante yangfala tede, mo wanem samting i save pusum olgeta blong mekem olsem? (b) ?Olsem wanem Jisas i soem nambawan eksampel long ol yangfala tede, mo ol advaes i leftemap tingting blong ol yangfala blong mekem wanem?
16 Ol pikinini we oli folem tiokratik fasin oli glad blong soemaot respek we i stret long papa mama blong olgeta. Long saed blong ol yangfala blong ol lasdei ya, Baebol i talem se bambae oli “no ona long papa mo mama blong olgeta.” (2 Timote 3:1, 2) Be Tok blong God i talem long ol Kristin pikinini se: “Yufala pikinini, oltaem yufala i mas obei long ol papa mo mama blong yufala, from we fasin ya i save mekem Masta blong yumi i glad long yufala.” (Kolosi 3:20) Respek long rul blong ol papa mama i mekem Jeova i glad mo i karem ol blesing blong hem.
17 Jisas i soemaot samting ya i klia nomo. Luk i talem se: ‘Nao Jisas i go wetem tufala [papa mo mama blong hem], oli gobak long Nasaret, mo hem i gohed blong ona long tufala. . . . Nao Jisas i stap gruap moa long bodi blong hem mo long waes blong hem tu. Mo oltaem God i glad moa long hem, mo ol man tu oli glad moa long hem.’ (Luk 2:51, 52) Long taem ya Jisas i gat 12 yia blong hem, mo Grik veb we oli yusum long ples ya i soemaot se hem i ‘gohed blong ona’ long papa mo mama blong hem. Taswe fasin ona we hem i gat i no finis taem hem i kasem 13 no 14 yia. Sipos yufala ol yangfala i wantem kamgud moa long saed blong speret mo long ae blong Jeova mo ol man blong hem, bambae yufala i soemaot respek long olgeta we oli rul insaed mo afsaed long haos blong yufala.
Rul Insaed Long Kongregesen
18. ?Hu i Hed blong Kristin kongregesen, mo hem i givim paoa blong rul long hu?
18 Pol i tokbaot se i nidim oda insaed long Kristin kongregesen, i raetem se: “God i no stampa blong fasin ya we olgeta samting oli paspas. Hem i stampa blong pis ya. . . . Yufala i mas mekem olgeta samting long fasin we i stret gud, we ol man oli glad long hem [no, “long stret oda,” futnot].” (1 Korin 14:33, 40) Blong olgeta samting oli stap long stret oda, Kraes, we i Hed blong Kristin kongregesen, i givim paoa blong rul long sam man we oli stap holemstrong bilif blong olgeta. Yumi ridim se: ‘Long sam man, hem i givim paoa blong oli aposol. Long sam narafala hem i givim paoa blong oli profet. Long sam narafala man, hem i givim paoa blong oli talemaot gud nyus blong Kraes. Mo long sam narafala man bakegen, hem i givim paoa blong oli kam man blong lukaot ol narafala man mo tija insaed long kongregesen. Kraes i mekem olsem blong bambae ol man blong hem oli rere blong mekem ol wok blong hem . . . Yumi mas talem trutok, long fasin ya we yumi laekem ol man tumas. Nao long olgeta fasin blong yumi, bambae yumi save gru blong kam bigman, blong joen long Kraes ya, we hem i olsem hed blong yumi.’—Efesas 4:11, 12, 15.
19. (a) ?Kraes i putumap hu blong lukaot long olgeta samting blong hem long wol, mo hem i givim spesel raet blong rul long hu? (b) ?Wanem fasin blong givim paoa blong rul long narafala i stap long Kristin kongregesen, mo samting ya i minim se yumi mas mekem wanem?
19 Long taem ya blong en, Kraes i putumap grup ya “slef we i stret mo waes” (NW) blong lukaot long “olgeta samting blong hem,” hemia ol samting blong hem long saed blong Kingdom long wol ya. (Matyu 24:45-47) Olsem long faswan handred yia, hed kampani blong ol tabu Kristin man we Kraes i givim paoa long olgeta blong mekem ol disisen mo putumap ol elda, oli mekem wok ya long nem blong slef ya. (Ol Wok 6:2, 3; 15:2) Mo bakegen, Hed Kampani i givim paoa blong rul long ol Branj Komiti, ol distrik elda mo ol seket elda, mo ol elda we oli stap long ol wanwan kongregesen long bitim 73,000 kongregesen blong ol Wetnes blong Jeova long olgeta ples long wol. I stret we yumi givim sapot mo respek blong yumi long ol Kristin man ya we oli stap onagud long God.—1 Timote 5:17.
20. ?Wanem eksampel i soemaot se Jeova i no glad long olgeta we oli no gat respek long ol Kristin brata blong olgeta we oli stap rul long olgeta?
20 Long saed blong respek we yumi mas soem long ol man we oli gat paoa blong rul insaed long Kristin kongregesen, i gud blong laenemap samting ya wetem fasin obei we yumi mas givim long ol haeman blong wol. Taem wan man i brekem wan loa blong gavman, mo God i agri long loa ya, “olgeta we oli stap rul” oli panisim hem, ale panis ya, i rili olsem wan rod blong kros blong God i kam agens ‘long man we i stap mekem i nogud.’ (Rom 13:3, 4) !Sipos Jeova i kros taem wan man i brekem loa blong gavman mo i no soem respek we i stret long ol haeman blong wol, hem i mas harem nogud moa sipos wan Kristin we i givim laef blong hem finis i go long Hem, i sakem ol loa blong Baebol mo i no soem respek long ol Kristin brata blong hem we oli gat paoa blong rul!
21. ?Bambae yumi glad blong folem wanem advaes blong Baebol, mo bambae yumi tokbaot wanem long haf we i kam biaen?
21 Bitim we yumi kasem kros blong God from yumi soem fasin agens no yumi gat fasin ya blong folem prapa rod blong yumi nomo, i moagud yumi folem advaes blong Pol long ol Kristin long Filipae se: “Ol fren blong mi. Olsem we yufala i stap obei long mi bifo, long taem ya we mi stap yet wetem yufala, ale, naoia we mi no stap wetem yufala, i gud moa blong yufala i obei long mi. Yufala i mas stap hadwok yet, olsem we yufala i fraet long God, yufala i stap seksek from, blong yufala i finisim wok ya we hem i stap mekem blong sevem yufala. From we God i stap wok oltaem, insaed long yufala, blong mekem yufala i glad blong obei long hem mo blong givim paoa long yufala blong yufala i save mekem ol samting we hem i wantem. Yufala i mas mekem olgeta samting, be long fasin ya we yufala i no moa tok, yufala i no tok agens long ol samting ya. Nao long fasin ya, bambae tingting blong yufala i klin gud, mo i no gat man we i gat poen long yufala. Bambae yufala i olsem ol pikinini blong God we yufala i stret gud olgeta, be yufala i stap long medel blong ol man we oli gat ol krangke fasin, mo oli agens long evri samting. Long medel blong olgeta ya, bambae yufala i saenaot olsem ol sta we oli stap saenaot long skae.” (Filipae 2:12-15) Ol man blong Jeova oli rere blong obei long olgeta we oli stap rul long olgeta, mo from samting ya oli no olsem ol man blong wol ya we tingting mo fasin blong olgeta i no stret mo i krangke, we olgeta nomo oli mekem bigfala trabol i kamaot long olgeta bakegen, from fasin blong no obei long ol man we oli stap rul long olgeta. Taswe ol man blong Jeova oli kasem gudfala frut, olsem we yumi save luk long haf we i kam biaen.
[Futnot]
a Lukluk haf blong magasin ya we i kamaot fastaem long hemia.
Rod Blong Tingtingbak
◻ ?Hu i Rula we i Hae Olgeta, mo from wanem hem i gat raet blong rul?
◻ ?Long wanem rod ol gavman blong wol “oli stap long prapa ples blong olgeta from God”?
◻ ?Wetaem ol haenem blong gavman oli no moa “mekem wok blong God”?
◻ ?Wanem fasin blong rul i stap insaed long ol Kristin famle?
◻ ?Wanem fasin blong givim paoa blong rul long narafala i stap long Kristin kongregesen?
[Tok blong pija long pej 18]
Jisas i talem se: “Samting we i blong Sisa yufala i givimbak long Sisa.”