Tingting Blong Ol Kristin Long Ol Gavman

“Olgeta sol oli mas stap aninit long ol haeman we oli stap rul, from we i no gat man i save rul sipos God i no letem hem. Ol haeman we oli stap, oli stap long prapa ples blong olgeta from God.”​—⁠ROM 13:⁠1, “NW.”

1, 2. (a) ?From wanem Pol i stap long kalabus long Rom? (b) ?Wanem kwestin oli stanap taem Pol i talem long Festas se hem i wantem talemaot bisnes blong hem long Sisa?

LONG 56 K.T.,a aposol Pol i raetem ol tok ya long ol Kristin we oli stap long Rom. Be sam yia biaen, hem i stap long kalabus long Rom. ?From wanem? Taem hem i stap long Jerusalem, wan hif blong man i wantem kilim hem, nao ol soldia blong Rom oli sevem hem. Oli tekem hem i go long Sisaria, mo long ples ya, ol man oli mekem gyaman ripot long hem. Be long nambawan fasin, Pol hem wan i ansa long fes blong hed gavman blong Rom, Filiks. Man ya i wantem kasem sam mane long Pol blong letem hem i gofri. Nao hem i letem Pol i stap tu yia long kalabus. Biaen, Filiks i finis long wok blong hem, mo Festas i tekem ples blong hem. Long taem ya nao, Pol i talem long Festas se hem i wantem talemaot bisnes blong hem long fes blong Sisa.​—⁠Ol Wok 21:​27-32; 24:1 kasem 25:12.

² Pol i gat raet blong talemaot bisnes blong hem long fes blong Sisa from we hem i gat sitisen long Rom. Be Jisas i talem finis se Setan i “jif blong wol ya,” mo Pol tu i kolem Setan “rabis god blong wol ya.” (Jon 14:30; 2 Korin 4:⁠4) ?Olsem wanem nao? ?I stret we Pol i askem long gavman blong Rom, blong hem i stretem bisnes blong hem? ?No maet Pol i ting se gavman blong Rom i stap “long prapa ples” blong hem, nao Pol i save askem long gavman ya blong protektem ol raet blong hem? Bifo, ol aposol oli talem se: “Mifala i mas obei long God, mifala i no save obei long ol man nomo.” ?Olsem wanem blong folem tok ya? ?Ol Kristin oli save obei long gavman, taem gavman i no pulum olgeta blong brekem loa blong God?​—⁠Ol Wok 5:29.

3. ?Pol i talemaot wanem tingting we i stret nomo? ?Voes blong hat mo tingting i mas mekem wanem samting?

³ Pol i halpem yumi blong ansa long ol kwestin ya long leta we hem i raetem long ol man Rom. Pol i tokbaot stret tingting we ol Kristin oli mas gat long rul blong ol gavman. Long Rom 13:​1-7, Pol i soemaot klia se voes blong hat mo tingting blong ol Kristin i mas lidim olgeta. Nao oli save se oltaem oli mas obei long Hae Rula Jeova God, be samtaem oli no save obei long ol “haeman we oli stap rul.”

Ol Haeman We Oli Stap Rul

4. ?Long 1962, wanem tingting i jenis? ?From samting ya, wanem kwestin oli stanap?

⁴ Gogo kasem 1962, ol Wetnes blong Jeova oli ting se ol haeman ya oli Jeova God mo Jisas Kraes. Be, olsem Proveb 4:18 i talem, laet i kam bigwan moa, nao oli lego tingting ya. Be ating sam man oli askem sam kwestin olsem olgeta ya: ?Naoia i stret blong talem se ol haeman ya oli ol king, presiden, praem minista, mea, jaj, mo ol narafala man we oli mekem wok blong gavman mo politik? ?Mo i stret we samtaem yumi no save obei long olgeta?

5. ?Wanem tok i halpem yumi blong save hu ya ol haeman we Rom 13:1 i tokbaot? ?Mo olsem wanem sam translesen blong Baebol oli agri wetem tingting ya?

⁵ Biaen long yia 100 K.T., wan man, Irenaeus, i raetem se long taem blong hem, sam man oli bilif se long Rom 13:​1, Pol i tokbaot “rul blong ol enjel no ol rula we man i no save luk.” Be Irenaeus i no ting olsemia. Hem i bilif se ol haeman ya oli “man we i rul long wol.” Ol narafala tok blong Pol oli soemaot se Iranaeus i talem tru. Long ol laswan vas blong Rom 12, Pol i tokbaot ol fasin we ol Kristin oli mas soemaot long fes blong “olgeta man.” Yes, nating se sam man oli “enemi” blong ol, be oli mas soem lav long olgeta, mo oli mas ona long olgeta. (Rom 12:​17-21) Tok ya “olgeta man” i soem klia se hem i tokbaot ol man afsaed we oli no joen long Kristin kongregesen. Taswe, i stret blong talem se ol “haeman” we Pol i tokbaot, oli afsaed tu long Kristin kongregesen. Taswe sam translesen blong Baebol oli tanem fas haf blong Rom 13:​1, olsem: “Evriwan i mas obei long ol haeman we oli rul long kantri” (Today’s English Version). “Evriwan i mas putum hem wan i stap daon long ol haeman we oli stap rul” (New International Version). “Evriwan i mas obei long ol haeman blong gavman.”​—⁠Phillips’ New Testament in Modern English.

6. ?Olsem wanem ol tok blong Pol long saed blong takis mo kastom oli soemaot se ol haeman, hemia ol gavman?

⁶ Biaen long ol tok ya, Pol i talem se ol haeman ya oli tekem takis mo kastom. (Rom 13:​6, 7) Kristin kongregesen i no tekem takis mo kastom. Mo Jeova, Jisas mo ol ‘rula we man i no save luk’ oli no askem samting ya tu. (2 Korin 9:⁠7) Yumi pem ol takis long ol gavman nomo. Antap bakegen, long Grik lanwis, ol tok “takis” mo “kastom” we Pol i yusum long Rom 13:7 oli stret long mane we man i givim long gavman.b

7, 8. (a) ?Wanem vas blong Baebol oli soemaot gud se ol Kristin oli mas obei long ol gavman blong wol ya? (b) ?Wetaem nomo wan Kristin i no save obei long ol “haeman” ya?

⁷ Wan samting bakegen. Tok blong Pol we i talem se ol Kristin oli mas obei long ol haeman, i laenap wetem oda blong Jisas we i talem se “samting we i blong Sisa, yufala i givimbak long Sisa.” Long ples ya, Sisa i minim gavman. (Matyu 22:21) Mo tu, tok blong Pol i laenap wetem samting we biaen hem i talem long Taetas. Hem i talem se: “Yu mas stap talemgud long ol man blong yu blong oli ona long ol hae man mo gavman blong olgeta. Oli mas obei long olgeta, mo oli mas stap rere oltaem blong mekem ol gudfala wok.” (Taetas 3:⁠1) Olsemia nao, taem ol gavman oli askem long ol Kristin blong mekem sam pablik wok, oli mekem wok ya. Be sipos wok ya i tekem ples blong wan narafala wok we i stap agensem Baebol mo loa blong hem, olsem loa we i stap long Aesea 2:⁠4, oli no mekem.

⁸ Pita i talem tu se yumi mas obei long ol gavman. Hem i talem se: “From we yufala i man blong Masta blong yumi, yufala i mas obei long olgeta gavman we ol man oli putumap. Yufala i mas obei long hed gavman blong yufala we i hae moa long ol narafala gavman. Mo yufala i mas obei long ol gavman we hed gavman ya i sanem blong givim panis long ol man blong brekem loa, mo blong presem ol man blong folem stret fasin.” (1 Pita 2:​13, 14) Tok ya i joen wetem advaes blong Pol we evri Kristin i mas folem. Hem i talem long Timote, i se: “Fas tok blong mi, mi talem strong long yufala, se yufala i mas prea long God from olgeta man. Yufala i mas askem long hem blong i givim ol samting long yufala we yufala i wantem blong yufala mo blong ol narafala man. Mo yufala i mas talem tangkyu long hem tu from olgeta man. Mo yufala i mas stap prea from ol king, mo from ol narafala haeman. . . . Long fasin ya, bambae yumi gat kwaet laef, we i gat pis, we yumi save mekem ol fasin blong prea, mo yumi save folem ol stret fasin.”c​—⁠1 Timote 2:​1, 2.

9. ?From wanem taem yumi talem se ol gavman oli “haeman,” samting ya i no min se yumi daonem Jeova?

⁹ ?Be taem yumi talem se ol man blong gavman oli “haeman,” hemia i min se yumi daonem ona we yumi mas givim long Jeova? No gat. Tru, Jeova i hae moa long olgeta, hem i “Hae Masta,” “God ya We i Antap Olgeta.” (Ol Sam 73:28; Daniel 7:​18, 22, 25, 27; Revelesen 4:11; 6:10) Taem yumi obei long ol gavman, samting ya i no minim se yumi daonem wosip we yumi mekem long God We i Antap Olgeta, Hae Masta Jeova. ?Be ol gavman oli “hae” olsem wanem nao? Oli hae moa long ol narafala man from we oli mekem wan spesel wok. Yes, oli gat wok blong rulum mo protektem ol man. Blong mekem olsem, oli putum loa blong lidim ol man.

“Oli Stap Long Prapa Ples Blong Olgeta From God”

10. (a) Pol i talem se ol haeman “oli stap long prapa ples blong olgeta from God.” ?Samting ya i pruvum wanem long saed blong paoa blong Jeova? (b) ?Samtaem, Jeova i letem hu i rul? ?Ol man blong Jeova oli kasem wanem traem from?

¹⁰ Jeova God i hae moa long ol gavman, hem i antap olgeta. Yes, ol gavman “oli stap long ples blong olgeta from God.” Be wan kwestin i kamaot nao long tok ya. Sam yia biaen we Pol i raetem olgeta tok ya, hae king blong Rom, Nero, i ronem ol Kristin tumas. ?Olsem wanem? ?Long taem ya, God hem wan i putumap Nero olsem king? !No gat! Yumi no mas ting se God hem wan i putumap evri man we oli stap rul, mo olgeta ya oli no ‘stanap long God.’ Be samtaem, Setan i mekem sam rabis man oli rul. Jeova i letem Setan i mekem olsem, mo God i letem ol haeman ya oli traem ol stret man blong hem.​—⁠Skelem wetem Job 2:​2-10.

11, 12. ?Long Baebol, olsem wanem yumi luk we Jeova hem wan i putumap mo i tekemaot sam gavman?

¹¹ Be i tru we samtaem, Jeova hem wan i mekem sam samting blong putumap no tekemaot sam haeman no gavman. Be hem i mekem olsem blong bambae nambawan plan blong hem i kamtru. Hemia nao sam eksampel. Long taem blong Ebraham, God i letem ol man Kenan oli stap long Kenan. Be biaen, Jeova i ronemaot olgeta, from we hem i wantem we laen blong Ebraham i stap long kantri ya. Taem ol man Isrel oli stap wokbaot long drae ples, Jeova i no letem ol man Isrel oli ronemaot ol man Amon, ol man Moab mo ol man blong hil blong Seia. Be hem i givim oda long olgeta se oli mas spolem Kingdom blong Sihon mo Og.​—⁠Jenesis 15:​18-21; 24:37; Eksodas 34:11; Dutronome 2:​4, 5, 9, 19, 24; 3:​1, 2.

¹² Taem Isrel i stap finis long Kenan, Jeova i intres long ol nesen we oli stap raonabaot long ol man blong hem. Taem ol man Isrel oli mekem sin, Jeova i letem ol hiten nesen oli rulum strong olgeta. Be taem ol man Isrel oli tanem tingting blong olgeta blong obei long God, ale hem i ronemaot ol nesen ya, nao ol man Isrel oli fri. (Jajes 2:​11-23) Biaen, hem i letem Juda wetem plante narafala nesen oli kam aninit long rul blong Babilon. (Aesea 14:28 kasem 19:17; 23:​1-12; 39:​5-7) Afta we Isrel i go kalabus long Babilon, Jeova i mekem sam profet tok. Hem i talemaot ol bigfala nesen blong wol we bambae oli mas gat paoa long nesen blong hem, i stat long taem blong Babilon, kam kasem tede.​—⁠Daniel japta 2, 7, 8 mo 11.

13. (a) ?Sing blong Moses i talem se Jeova i makem graon blong olgeta nesen olsem wanem? (b) ?From wanem God i putumbak bakegen Isrel long prapa graon blong hem?

¹³ Bifo, Moses i mekem wan sing long Jeova, i se: “Taem bifo Hae God i givim wan ples long ol nesen blong oli stap long hem, taem hem i seraot ol pikinini blong Adam wan long narawan, ale hem i stat blong makem graon blong ol nesen. Be hem i tingbaot namba blong ol pikinini blong Isrel fastaem. From we haf blong Jeova, hemia nao ol man blong hem. Jekob i haf ya we i blong hem.” (Dutronome 32:​8, 9; skelem wetem Ol Wok 17:26.) Yes, blong mekem ol plan blong hem oli kamtru, God i talem wanem gavman bambae oli save stanap mo wanem gavman bambae oli mas lus. Taswe hem i givim wan graon long ol pikinini blong Ebraham. Mo biaen, taem oli lusum graon ya, hem i givimbak bakegen graon ya long olgeta. Nao, olsem ol profet oli talemaot, laen we hem i promes bifo i save kamaot long ples ya.​—⁠Daniel 9:​25, 26; Maeka 5:⁠2.

14. ?Plante moa taem, olsem wanem Jeova i putum ol gavman oli stap long prapa ples blong olgeta?

¹⁴ Be plante moa taem, Jeova i letem ol gavman oli stap long prapa ples blong olgeta. Tok ya i min se hem i letem samfala gavman oli kam hae moa long sam narafala. Be oltaem olgeta gavman oli stap daon long Jeova. From samting ya, taem Jisas i stap long fes blong Ponjes Paelat, hem i talem se: “Sipos God i no givim paoa long yu fastaem, bambae yu yu no gat paoa long mi nating, be hem i givim paoa ya long yu.” (Jon 19:11) Samting ya i no min se God hem wan i putumap Paelat. No gat. Be Jisas i min se Paelat i save mekem hem i ded no hem i laef, from we God i letem hem olsem.

“God Blong Wol Ya”

15. ?Setan i gat wanem paoa long wol ya?

¹⁵ Baebol i talem se Setan i god no jif blong wol ya. ?Tok ya i minim wanem? (Jon 12:31; 2 Korin 4:⁠4) Mo tu, Setan i soemaot long Jisas olgeta kingdom blong wol, mo hem i talem long hem se: “Bambae mi mi putum olgeta kantri ya . . . oli stap long han blong yu. From we olgeta oli stap long han blong mi finis, mo mi mi save givim long hu man we mi wantem givim long hem.” ?Nao, flas tok blong Setan i minim wanem? (Luk 4:⁠6) Jisas i no talem long Setan se hem i gyaman. Yes, tok blong Setan i laenap nomo wetem tok we Pol i raetem long ol man Efesas. Pol i talem se: “Olgeta ya we yumi stap faet agens long olgeta, long laef ya blong yumi, oli no man. Yumi stap faet agens long ol haeman, mo ol lida blong ol devel, ol jif blong ol devel we oli stampa blong ol tudak long wol ya, mo ol rabis devel we oli stap olbaot long wol.” (Efesas 6:12) Mo tu, buk blong Revelesen i tokbaot Setan olsem wan bigfala algita. Hem i givim ‘paoa blong hem, bigfala jea blong king blong hem mo bigfala paoa blong hem’ long wan anamol we i pija blong olgeta politik ogenaesesen blong wol.​—⁠Revelesen 13:⁠2.

16. (a) ?Olsem wanem yumi save se Setan i no gat olgeta paoa blong rul? (b) ?From wanem Jeova i letem Setan i rulum ol man?

¹⁶ Setan i talem long Jisas se “olgeta kantri ya . . . oli stap long han blong mi finis.” Wan samting i klia. Setan i save gud se God i letem hem i rul. ?From wanem God i letem hem i rul? Setan i kam jif blong wol taem hem i agensem God long Iden. Mo hem i talem long fes blong ol enjel se God i gyaman, mo i no stret, i no save rulum ol man. (Jenesis 3:​1-6) Adam mo Iv tufala i folem hem, nao oli no moa obei long Jeova God. Long taem ya nao, Jeova i save kilim i ded Setan wetem tufala ya we oli jes kam man blong Setan. Sipos God i mekem olsem, hem i stret nomo. (Jenesis 2:​16, 17) Be hem i no mekem olsem. Ol tok blong Setan oli agensem Jeova hem wan stret. God i waes, taswe hem i letem Setan i stap blong sam taem mo hem i letem Adam mo Iv oli gat pikinini bifo we oli ded. Ale, God i letem taem i pas mo plante samting oli kamtru, blong soemaotgud se Setan i gyaman nomo.​—⁠Jenesis 3:​15-19.

17, 18. (a) ?From wanem yumi save talem se Setan i god blong wol ya? (b) ?Olsem wanem “i no gat man i save rul sipos God i no letem hem”?

¹⁷ I stat long Iden kam kasem tede, ol samting we oli kamaot long wol oli soemaot finis we ol tok blong Setan oli gyaman nomo. Ol pikinini blong Adam oli no hapi aninit long rul blong Setan mo ol man. (Eklesiastis 8:⁠9) Be ol wok we God i mekem blong halpem ol man blong hem, oli soemaot se rul blong hem i nambawan, i bitim rul blong ol narafala. (Aesea 33:22) Wan samting bakegen. Taem ol pikinini blong Adam oli no wantem stap aninit long rul blong Jeova, oli mekem Setan i kam god blong olgeta. Hemia i tru, nating se oli save samting ya, no no gat.​—⁠Ol Sam 14:1; 1 Jon 5:19.

¹⁸ Kolosap nao, bambae God i ansa long olgeta kwestin we oli kamaot long Iden. Bambae Kingdom blong God i mas rulum olgeta samting long wol, mo bambae Setan i mas go stap long bigfala hol. (Aesea 11:​1-5; Revelesen 20:​1-6) Be bifo we samting ya i hapen, i stret nomo we ol man oli gat sam gavman blong lukaot long laef blong ol, blong oli save laef tugeta. Jeova i “no stampa blong fasin ya we olgeta samting oli paspas. Hem i stampa blong pis ya.” (1 Korin 14:33) From samting ya, afsaed long Iden, hem i letem ol man oli putumap ol ogenaesesen no gavman. Mo tu, hem i letem ol haeman oli rul long ol gavman ya. Long fasin ya nao, “i no gat man i save rul sipos God i no letem hem.”

Ol Haeman We Oli Stret

19. ?Setan i stap kontrolem fulwan evri haeman we i rul?

¹⁹ I stat long Iden, Setan i fri blong mekem ol samting we hem i wantem long olgeta man. Olsem ya nao, hem i lidim evri samting blong wol. Fasin ya i laenap wetem ol flas tok we hem i talem long Jisas bifo. (Job 1:7; Matyu 4:​1-10) Be samting ya i no min se Setan i stap kontrolem fulwan evri rula blong wol ya. Sam man​—⁠olsem Nero bifo, mo Adolf Hitler long taem blong yumi​—⁠oli rili soemaot se oli gat fasin mo tingting blong Setan. Be sam narafala man oli no olsem olgeta ya. Wan hed gavman blong aelan blong Saepras, Sejas Polas, i “gat gud hed,” mo hem i “wantem harem tok blong God.” (Ol Wok 13:⁠7) Taem ol man Jyu oli tok agens long Pol, hed gavman blong Akaea, Galio, i no lesin long olgeta. (Ol Wok 18:​12-17) Sam narafala haeman oli traehad blong rul long fasin we i gud, oli no wantem we tingting blong olgeta i jajem olgeta from.​—⁠Skelem wetem Rom 2:15.

20, 21. ?Wanem samting we oli kamtru long taem blong yumi oli soemaot we ol rula oli no mekem oltaem ol samting we Setan i wantem?

²⁰ Buk blong Revelesen i talemaot finis se long “dei blong Masta,” we i stat long 1914, Jeova i yusum sam gavman blong spolem ol plan blong Setan. Revelesen i talem se bambae Setan i ronem tumas ol Kristin we God i makemaot. Ol trabol we bambae Setan i mekem long ol tru Kristin, oli olsem bigfala wora we hem i traot long maot blong hem. Be “graon” i solemdaon wora ya. (Revelesen 1:​10, NW; 12:16) Nao, ol samting blong “graon” no sosaete blong man we i stap long wol tede, oli protektem ol man blong Jeova taem Setan i traem ronem olgeta.

²¹ ?Olsem wanem? ?Samting ya i kamtru finis no no gat? !Yes! Hemia nao sam eksampel. Long Yunaeted Stet long 1930-1940 mo biaen, plante man oli agensem tumas ol Wetnes blong Jeova. Sam hif blong man oli kilim plante Wetnes mo polis tu i no mekem i stret from we hem i holem olgeta. Ol trabol blong olgeta oli finis taem Suprem Kot blong Yunaeted Stet i tekem sam disisin mo hem i givim raet long olgeta blong oli save prij. Long sam narafala ples tu, gavman i halpem ol man blong God. I gat fote yia finis, long wan taon, Cork, we i stap long Aealan, wan hif blong man Katolik i stap kilim tu Wetnes. Wan polis i kam blong halpem tufala, mo wan kot i panisim ol man Katolik ya. Las yia nomo, long Fiji, ol hae jif oli mekem wan miting. Long taem ya, sam long olgeta oli wantem putum tabu long wok blong prij blong ol Wetnes blong Jeova. Be wan jif i tok mo hem i no fraet blong leftemap ol Wetnes. Ale, ol jif oli no blokem ol Wetnes.

22. ?Bambae magasin ya i ansa long wanem kwestin long nekis haf blong hem?

²² Ol gavman oli no mekem oltaem ol samting we Setan i wantem. Ol Kristin oli save obei long olgeta, mo samting ya i no min se oli stap obei long Setan hem wan. Tru ya, bambae oli obei long ol gavman ya, gogo kasem God bambae i no moa letem olgeta oli stap rul. Yes, ol Kristin oli mas obei. ?Be samting ya i minim wanem? ?Mo sipos oli obei, bambae ol gavman oli save mekem wanem long olgeta? Bambae magasin ya i ansa long ol kwestin ya long ol pej biaen.

[Ol futnot]

?Bambae Yu Yu Ansa Wanem?

◻ ?Ol haeman we oli stap rul, oli hu?

◻ ?From wanem yumi save talem se “i no gat man i save rul sipos God i no letem hem”?

◻ ?From wanem Jeova i letem wol i stap aninit long paoa blong Setan?

◻ ?Olsem wanem Jeova i putum ol haeman “oli stap long prapa ples blong olgeta”?

[Tok Blong Pija Long Pej 21]

Afta we faea i kakae plante haos long Rom, Nero i soemaot se hem i gat tingting blong Setan stret

[Tok Blong Pija Long Pej 23]

Sejas Polas, hed gavman blong aelan blong Saepras i wantem harem tok blong God