Glad Blong Stap Aniniat Long Olgeta We Oli Stap Rula
“Yufala i mas gat fasin obei we i kamaot long hat blong yufala.”—ROM 6:17, NW.
1, 2. (a) ?Wanem speret i stap wok long wol tede, mo hem i kamaot weples mo i stap mekem wanem samting? (b) ?Olsem wanem ol man blong Jeova we oli givim laef blong olgeta long hem oli soem se oli defren?
I TRU se tede, ‘speret we i stap wok insaed long ol man ya we oli no save obei long God,’ i kam antap bigwan tumas. Hemia speret blong no wantem stap aninit long olgeta we oli stap rul, wan tingting we i kamaot long Setan, ‘paoa blong win we i stap olbaot long wol.’ Speret ya, ‘win’ ya, no tingting we i fulap long fasin we man i tingbaot hem wan nomo mo fasin blong no wantem obei, i gat ‘paoa,’ no i bos long bighaf blong olgeta man. Hemia nao wan risen from wanem wol i stap fesem wan samting we oli kolem wan bigfala trabol long saed blong paoa blong rul.—Efesas 2:2.
2 I gud tumas blong save se ol man blong Jeova tede, oli no fulumap waet leva blong olgeta long saed blong speret wetem ‘win’ ya we i gat posen long hem, no tingting blong rebel. Oli save se “God i kros tumas finis long ol man ya we oli no save obei long hem, nao bambae hem i givim panis long olgeta.” Aposol Pol i gohed se: “Bambae yufala i no go kampani nating wetem ol man olsem.” (Efesas 5:6, 7) Be, ol trufala Kristin oli traehad blong “letem tabu speret [blong Jeova] i kam fulap” long olgeta, mo oli stap dring long ‘waes we i kamaot long heven,’ hemia ‘laef we i klingud, i gat pis, oli kwaet man, mo oli rere blong obei.’—Efesas 5:17, 18; Jemes 3:17.
Glad Blong Obei Long Hae Rul Blong Jeova
3. ?Wanem samting i stampa blong fasin glad blong obei, mo histri i tijim yumi long wanem bigfala lesen?
3 Stampa blong fasin glad blong obei, hemia se man i mas luksave raet blong hemia we i stap rul. Histri blong olgeta man i soem se fasin blong sakemaot hae rul blong Jeova i no karem fasin glad. Fasin ya we Adam mo Iv, tufala i sakemaot rul blong Jeova i no karem fasin glad long tufala, mo long Devel Setan, speret man ya we i pusum tufala blong gat fasin rebel. (Jenesis 3:16-19) Naoia we God i daonem Setan finis, Setan i “kros tumas” from we hem i save se i gat smol taem nomo blong hem i stap yet. (Revelesen 12:12) Pis mo fasin glad blong olgeta man, yes, blong olgeta man long heven mo long wol, i dipen long fasin blong olgeta evriwan blong luksave hae rul blong Jeova, we i stret.—Ol Sam 103:19-22.
4. (a) ?Jeova i wantem se ol man blong hem oli soemaot wanem kaen fasin blong stap aninit long narafala mo fasin obei? (b) ?Yumi mas savegud long wanem samting, mo olsem wanem man blong raetem Ol Sam i talem samting ya?
4 Be, from we Jeova i nambawan blong mekem olgeta fasin blong hem oli laenapgud, hem i no glad taem man i obei nomo, be i no gat filing we hem i wantem obei. !O yes, Hem i gat bigfala paoa! Be hem i no strong tumas long rul blong hem. Hem i wan God we i laekem tumas ol man, mo i wantem se olgeta man oli glad blong obei long hem, from we oli laekem hem tumas. Hem i wantem se oli stap aninit long hae rul blong hem, from we oli jusum wetem ful hat blong olgeta blong stap aninit long stret rul ya we God i gat raet long hem, oli savegud se i no gat wan samting nating we i moa gud long olgeta bitim fasin blong obei long hem blong olwe. Man we Jeova i wantem se hem i stap long heven mo wol blong hem, i mas gat sem filing olsem man ya blong raetem Ol Sam se: “Loa blong Hae God i stret gud, mo i stap givim nyufala paoa long man. Ol rul we Hae God i mekem, man i save bilif long hem, mo oli stap givim waes long olgeta we oli no gat waes. Ol loa we Hae God i stap tijim man long hem oli stret, mo olgeta we oli stap obei long ol loa ya oli stap harem gud. Ol tok we Hae God i putum oli stret gud, mo oli stap givim save long man. Fasin ya we man i ona long Hae God, hem i gud tumas, mo bambae i save stap oltaem nomo. Ol tingting blong Hae God oli stret gud, mo oli soemaot fasin blong jajem man we i stret long evri man.” (Ol Sam 19:7-9) Trastem fulwan raet blong Jeova blong rul mo stret fasin blong rul blong hem—hemia nao tingting we yumi mas gat sipos yumi wantem stap long nyufala wol blong Jeova.
Glad Blong Obei Long King Blong Yumi
5. ?Olsem wanem Jisas i kasem pei from fasin obei blong hem, mo yumi glad blong luksave wanem samting?
5 Jisas Kraes hem wan i wan nambawan eksampel long fasin ya blong obei long Papa blong hem long heven. Yumi ridim se hem ‘i mekem tingting blong hem i stap daon blong i obei long God, gogo i ded. Mo ded ya blong hem, ol man oli nilim hem long pos.’ Pol i gohed se: ‘From samting ya, God i leftemap nem blong hem i go antap olgeta, i givim nem long hem we i hae moa long ol narafala nem. Nao olgeta long heven, mo long wol, mo long ples blong ol dedman, bambae oli foldaon, oli ona long nem blong Jisas, mo evri tang i mas talemaot klia we Jisas Kraes i Masta, blong leftemap nem blong God, we i Papa blong yumi.’ (Filipae 2:8-11) Yes, yumi glad blong nildaon fored long Lida blong yumi, King ya we i stap rul, Jisas Kraes.—Matyu 23:10.
6. ?Olsem wanem Jisas i pruvum se hem i wan wetnes mo wan lida blong olgeta nesen, mo olsem wanem rul blong hem we i olsem “rul blong prins” bambae i gohed afta long bigfala trabol?
6 Jeova i talem wan profet tok blong tokbaot Kraes we i Lida blong yumi se: “!Yu luk! Mi mi putum hem i stap olsem wan wetnes blong ol nesen, wan lida mo wan kapten blong olgeta nesen.” (Aesea 55:4) From wok blong prij we Jisas i mekem taem hem i stap long wol, mo from fasin blong hem blong stap lidim wok blong prij afta we hem i ded, i laef bakegen mo i go antap long heven, hem i soemaot hem wan olsem ‘wan tru wetnes, we i no save tanem tok blong hem,’ mo i stap talemaot Papa blong hem long olgeta nesen. (Revelesen 3:14; Matyu 28:18-20) Naoia, ol nesen ya, oli mekemap “wan bigfala hif blong man” we namba blong olgeta i stap gru, ol man we bambae Kraes i lidim olgeta oli pastru long “bigfala trabol.” (Revelesen 7:9, 14) Be Kraes i no lidim ol man go kasem mak ya nomo. Rul blong hem we i olsem “rul blong prins” bambae i stap gohed blong wan taosen yia. Bambae hem i mekem mining blong nem blong hem i kamtru long olgeta we oli obei se, “Nambawan Man Blong Givim Advaes, Strong God, Papa Blong Olwe, Prins blong Pis.”—Aesea 9:6, 7; Revelesen 20:6.
7. Sipos yumi wantem se Jisas Kraes i lidim yumi i go long “springwora ya we i save givim laef,” ?yumi mas kwik blong mekem wanem samting, mo bambae wanem i mekem se Jisas mo Jeova tufala i laekem yumi?
7 Sipos yumi wantem kasem blesing from “springwora ya we i save givim laef” we Smol Sipsip, Jisas Kraes i stap lidim ol man we hat blong olgeta i stret i go long hem, yumi mas kwik blong soemaot long laef blong yumi se yumi glad blong stap aninit long rul blong hem olsem King. (Revelesen 7:17; 22:1, 2; lukluk Ol Sam 2:12.) Jisas i talem se: “Sipos yufala i laekem mi tumas, bambae yufala i save obei long ol loa blong mi. Man we i kasemgud ol loa blong mi, mo i stap obei long olgeta, hemia man we i laekem mi tumas. Mo man we i laekem mi tumas, Papa blong mi bambae i laekem hem tumas. Mo mi bambae mi laekem hem tumas.” (Jon 14:15, 21) ?Yu yu wantem se Jisas mo Papa blong hem, tufala i laekem yu? Sipos yes, ale yu mas stap aninit long rul blong tufala.
Ol Elda Oli Glad Blong Obei
8, 9. (a) ?Kraes i givim wanem blong mekem kongregesen i strong, mo ol man ya oli mas soemaot wanem eksampel long ol sipsip? (b) ?Wanem saen we buk blong Revelesen i yusum blong soem fasin obei blong ol Kristin elda, mo olsem wanem oli save lukaot wan ‘hat we i save mekem olgeta oli obei,’ taem oli stap stretem sam bisnes long kot komiti?
8 ‘Kongregesen i stap ona long Kraes.’ Olsem Man blong Lukaot long kongregesen, hem i ‘givim sam man olsem presen’ blong oli mekem kongregesen ‘i strong moa.’ (Efesas 4:8, 11, 12; 5:24) Jeova i talem long ol man ya we oli olfala long saed blong speret, blong “lukaotgud long ol sipsip blong hem,” mo oli no mas “kam olsem bigfala masta blong olgeta ya we God i putum olgeta long han blong olgeta. Oli mas soemaot ol stret fasin long ol man blong olgeta blong oli save folem, olsem we ol sipsip oli folem man blong lukaot long olgeta.” (1 Pita 5:1-3) Ol sipsip oli blong Jeova, mo Kraes i “gudfala man ya blong lukaot long sipsip.” (Jon 10:14) From we ol elda oli wantem se ol sipsip we Jeova mo Jisas, tufala i putum long han blong olgeta blong lukaot, oli glad blong wokgud wetem olgeta, ol elda ya oli mas soem gudfala eksampel long fasin blong stap aninit long narafala.—Ol Wok 20:28.
9 Long faswan handred yia, ol elda we God i makemaot olgeta wetem tabu speret, i olsem oli stap “long,” no “antap,” long raethan blong Kraes, samting ya i soemaot se oli stap aninit long Jisas olsem Hed blong kongregesen. (Revelesen 1:16, 20; 2:1) I sem mak tede, ol elda long kongregesen blong ol Wetnes blong Jeova oli mas obei long rod we Kraes i stap yusum blong lidim olgeta mo oli mas ‘putum olgeta i stap daon, aninit long han blong God ya we i gat bigfala paoa.’ (1 Pita 5:6) Long taem we oli mas mekem wan kot komiti blong stretem sam bisnes, olsem Solomon long ol yia we hem i stap tru long God, oli mas prea long Jeova se: “Yu mas givim long man blong yu wan hat we i save mekem hem i obei, blong hem i save jajem ol man blong yu, mo blong hem i save luksave samting we i gud mo samting we i nogud.” (1 King 3:9) Wan hat we i mekem wan elda i obei, bambae i pusum hem blong traehad blong luk ol samting olsem Jeova mo Jisas Kraes tufala i luk, nao disisen we oli mekem long wol ya bambae i olsem disisen we oli mekem long heven.—Matyu 18:18-20.
10. ?Olsem wanem ol elda oli save traehad blong folem eksampel blong Jisas long fasin we hem i mekem long ol sipsip?
10 Long sem fasin, ol elda blong goraon mo ol elda long kongregesen, bambae oli traehad blong folem eksampel blong Kraes long fasin we hem i mekem long ol sipsip. Jisas i defren olgeta long ol Farisi, hem i no putumap tumas rul we i had blong folem. (Matyu 23:2-11) Hem i talem long ol man we oli olsem sipsip se: “Yufala evriwan we yufala i stap hadwok tumas, yufala i stap karem ol hevi samting, yufala i kam long mi. Bambae mi mi givim spel long yufala. Yufala i mas putum yok blong mi long solda blong yufala, blong yufala i mekem wok blong mi. Mo yufala i mas lan long mi, from we mi mi wan kwaet man, tingting blong mi i stap daon. Nao bambae yufala i faenem we tingting blong yufala i gat spel. From we yok ya we bambae mi putum long yufala, wok blong hem i isi. Mo ol samting we mi givim long yufala blong yufala i karem, oli no hevi.” (Matyu 11:28-30) Nating we i tru se wanwan Kristin i “gat basket blong hem blong karem,” ol elda oli mas tingbaot eksampel blong Jisas mo halpem ol brata sista blong olgeta blong harem se Kristin responsabiliti we oli stap karem, “wok blong hem i isi,” ‘i no hevi,’ mo i wan glad blong karem.—Galesia 6:5.
Stap Aninit Long Tiokratik Rul
11. (a) ?Olsem wanem wan man i save soem se hem i respektem fasin blong rul, be hem i no rili obei long tiokratik rul? Givim eksampel. (b) ?I minim wanem blong gat trufala fasin blong obei long tiokratik rul?
11 Tiokratik rul i min se God i rulum. Hem i joen wetem fasin blong rul we 1 Korin 11:3 i tokbaot. Be tu i minim moa. Maet i luk olsem se wan man i respektem fasin blong rul we i stap, be maet hem i no stap obei long tiokratik rul yet, folem ful mining blong tok ya tiokratik. ?Olsem wanem i save hapen olsem? Eksampel, demokratik gavman i minim gavman we ol man nomo oli rul long hem, mo oli bin eksplenem wan demokrat olsem “wan man we i bilif long ol tingting blong demokratik gavman.” Maet wan man i talem se hem i obei long demokratik rul, hem i joen long ol eleksen, mo maet hem i wan bigman blong politik. Be sipos, long ol fasin blong hem oltaem, hem i stap sakemaot tingting blong demokratik mo olgeta loa we oli joen long demokratik gavman, ?yumi save talem se hem i rili folem demokratik fasin? I sem mak, wan man we i rili obei long tiokratik rul, hem i mas mekem moa bitim we hem i obei nomo long olgeta we oli stap rul. Hem i mas folem ol rod mo fasin blong Jeova. Hem i mas wan man we Jeova i rili rul long hem long evri samting. Mo blong obei long tiokratik rul i minim tu se man i mas folem eksampel blong Jisas, from we Jeova i givim ful paoa long Pikinini blong hem finis.
12, 13. (a) ?Fasin blong obei long tiokratik rul i joen wetem wanem spesel samting? (b) ?Fasin blong obei long tiokratik rul i min se yumi mas folem plante rul? Givim eksampel.
12 Tingbaot, Jeova i wantem se lav i mas pusum man blong glad blong obei long hem. Hemia nao rod blong hem blong rulum olgeta samting long heven mo wol. Hem i stampa blong lav. (1 Jon 4:8) Jisas Kraes i “olsem wan stret pija blong God, we i stap soemaot prapa fasin blong hem.” (Hibrus 1:3) Hem i askem ol trufala disaepol blong hem blong laeklaekem olgeta. (Jon 15:17) Olsem nao, fasin blong obei long tiokratik rul i minim fasin blong obei, be i no hemia nomo, i minim fasin blong laekem tumas ol man tu. Yumi save ademap ol samting ya olsem: tiokratik rul i min se God i rul; God i laekem tumas ol man; from samting ya, tiokratik rul i minim fasin blong rul wetem lav.
13 Maet wan elda i save ting se blong stap aninit long tiokratik rul, ol brata sista oli mas obei long ol kaen rul. Sam elda oli bin mekem sam advaes we “slef ya we i stret mo waes” i bin givim i kam olsem ol rul. (Matyu 24:45) Eksampel, wan taem, wan Wajtaoa i bin talem se, blong mekem i moa isi blong savegud ol brata sista long kongregesen, maet i gud blong no sidaon oltaem long sem jea long Haos Kingdom. Hemia i wan advaes we maet i wokgud, i no wan strong rul we i stap oltaem. Be maet sam elda oli save jenisim i kam wan rul mo maet oli harem se olgeta we oli no folem rul ya oli no stap obei long tiokratik rul. Be, maet i gat plante gudfala risen we i mekem se wan brata no wan sista i wantem sidaon long wan ples. Sipos wan elda i no gat fasin lav blong tingbaot ol samting ya, ?olsem wanem long hem wan, hem i rili stap obei long tiokratik rul? Blong stap obei long tiokratik rul, “long olgeta samting we yufala i mekem, be yufala i mas laekem ol man tumas.”—1 Korin 16:14.
Mekem Wok Wetem Fasin Glad
14, 15. (a) ?Olsem wanem wan elda i save tekemaot glad we wan brata no wan sista i stap kasem long wok blong Jeova, mo from wanem fasin ya i no tiokratik? (b) ?Olsem wanem Jisas i soem se hem i gat fasin tangkyu long lav we yumi soemaot long wok blong yumi, bitim hamas wok we yumi mekem? (c) ?Ol elda oli mas tingbaot wanem samting?
14 Fasin blong stap obei long tiokratik rul, i minim tu se mekem wok blong Jeova wetem fasin glad. Jeova i God ya we “i stap haremgud oltaem.” (1 Timote 1:11) Hem i wantem se ol man we oli stap mekem wosip long hem, oli mekem wok blong hem wetem fasin glad. Olgeta we oli wantem ol strong rul oltaem oli mas tingbaot se, long ol loa we ol man Isrel oli mas “lukaotgud blong folem,” i gat hemia se: “Yufala i mas glad tumas fored long Jeova, God blong yufala, long evri samting we yufala i mekem.” (Dutronome 12:1, 18) Yumi mas glad long eni samting we yumi mekem long wok blong Jeova, be yumi no mas tingbaot olsem we i wan baden long yumi. Ol elda oli save mekem plante samting blong mekem ol brata sista oli glad blong mekem samting we oli save mekem long wok blong Jeova. Be tu, sipos ol elda oli no lukaotgud, oli save tekemaot glad we ol brata sista oli save kasem. Eksampel, long kongregesen, sipos oli stap skelem ol wok blong samfala wetem sam narafala, ale, oli leftemap olgeta we oli kasem medel namba blong haoa blong ful kongregesen no olgeta we oli bitim medel namba ya long wok blong prij, mo oli givim tingting se oli agens long olgeta we oli no kasem sem namba ya, ?olsem wanem long filing blong olgeta we maet oli gat gudfala risen blong spenem smol taem nomo long wok blong prij? Samting ya i save mekem olgeta oli sem, nating se oli no mekem wan samting we i rong, mo i save blokem olgeta long fasin glad we oli save kasem.
15 Maet i had long samfala blong spenem smol haoa nomo blong prij, be i isi long sam narafala blong spenem plante haoa, from we oli yangfala moa, oli gat gudfala helt, mo i no gat ol narafala samting long laef blong blokem olgeta. From samting ya, ol elda oli no mas jajem olgeta. Yes, Jisas nao, we Papa i givim paoa long hem “blong jajem ol man.” (Jon 5:27) ?Jisas i toktok smol agens long pua wido from we presen mane blong hem i daon moa long presen mane we ol narafala oli givim? No gat, hem i kasem save se tufala smol mane ya i rili sas long wido ya. Hemia “olgeta mane blong hem, mane ya we i blong pem kakae blong hem long hem.” !Ol smol mane ya oli olsem saen we i soemaot dip lav we hem i gat long Jeova! (Mak 12:41-44) ?Ol elda oli no mas gat sem filing long olgeta we oli traehad wetem fasin lav blong givim olgeta fulwan, nating se haoa blong olgeta i no kasem “mak” blong ol narafala? Si oli mas gat. !Taem yumi tingbaot lav we ol man we oli traehad olsem oli gat long Jeova, maet wok blong olgeta i bitim mak blong ol narafala!
16. (a) ?Sipos ol elda oli stap talem ol namba long saed blong wok blong prij long ol tok we oli stap givim long miting, from wanem oli nidim fasin luksave mo fasin blong no bitim mak? (b) ?Wanem beswan rod we ol elda oli save folem blong halpemgud ol brata blong mekem moa long wok blong prij?
16 ?Nao yumi mas jenisim advaes ya i kam wan nyufala “rul” se ol namba—ol medel namba tu—neva yumi mas tokbaot? !No gat! Bigfala samting se ol elda oli mas skelemgud fasin blong leftemap tingting blong ol brata sista blong mekem moa long wok blong prij, wetem fasin blong givhan long olgeta blong mekem wanem we oli save mekem wetem fasin glad. (Galesia 6:4) Long parabol blong Jisas long saed blong ol selva mane, masta i putum ol samting blong hem long han blong ol slef blong hem “stret olsem wanwan long olgeta i naf blong lukaot long hem.” (Matyu 25:14, 15, NW) Long sem fasin, ol elda oli mas tingbaot wanem we wanwan pablisa blong Kingdom i naf blong mekem. Samting ya i nidim fasin luksave. Maet i tru se samfala oli nidim wan elda blong leftemap tingting blong olgeta blong mekem moa. Maet oli glad sipos hem i givhan long olgeta blong mekem plan blong wok blong olgeta i kam moa gud. Nating se i olsem wanem, sipos hem i save givhan long olgeta blong mekem wanem we oli save mekem wetem fasin glad, bambae glad ya i mekem tingting blong olgeta i strong blong mekem moa long Kristin wok blong olgeta, sipos oli save mekem.—Nehemaea 8:10; Ol Sam 59:16; Jeremaea 20:9.
Pis We i Kamaot From Fasin Glad Blong Obei
17, 18. (a) ?Olsem wanem fasin glad blong obei i save karem pis mo stret fasin long yumi? (b) ?Yumi save kasem wanem samting sipos yumi rili lesingud long ol oda blong God?
17 Fasin glad blong obei long rul blong Jeova we hem i gat raet long hem, i givim plante pis long yumi. Man blong raetem Ol Sam i talem long prea we hem i mekem long Jeova se: ‘Olgeta we oli laekem tumas loa blong yu, oli gat plante pis, mo i no gat wan samting i save mekem olgeta oli foldaon.’ (Ol Sam 119:165, NW) Taem yumi obei long loa blong God, yumi mekem i gud long yumi bakegen. Jeova i talem long ol man Isrel se: “Jeova, Tabu Man ya blong Isrel, hem i Sevya blong yu. Hem i talem se: ‘Mi, Jeova, mi mi God blong yu, God ya we i stap tijim yu blong givhangud long yu. Mi mi stap mekem yu yu wokbaot long rod ya we yu yu mas wokbaot long hem. !Mi mi wantem tumas we yu lesingud long ol oda blong mi! Sipos yu mekem olsem, bambae pis blong yu i kam olsem wan bigfala reva, mo stret fasin blong yu bambae oli kam olsem ol wef blong solwora.’ ”—Aesea 48:17, 18.
18 Ransom sakrifaes blong Kraes i mekem se yumi gat pis wetem God. (2 Korin 5:18, 19) Sipos yumi bilif long blad blong Kraes we i pemaot yumi mo yumi traehad wetem fulhat blong yumi blong faet agensem ol slak fasin blong yumi mo blong mekem wil blong God, bambae yumi no moa gat ol filing blong sem. (1 Jon 3:19-23) Bilif olsem, we i joen wetem wok, i mekem se yumi kam stret man long fes blong Jeova, mo i givim nambawan hop long yumi blong pastru long “bigfala trabol” mo blong laef foreva long nyufala wol blong Jeova. (Revelesen 7:14-17; Jon 3:36; Jemes 2:22, 23) Yumi save kasem ol samting ya ‘sipos yumi lesin gud long ol oda blong God.’
19. ?Fasin glad blong yumi naoia mo hop blong yumi blong kasem laef we i no save finis i dipen long wanem samting, mo olsem wanem Deved i talemaot strong bilif we i mas stap long hat blong yumi?
19 Yes, fasin glad blong yumi naoia mo hop blong yumi blong kasem laef blong olwe long wan paradaes wol, i stanap long fasin blong yumi blong glad blong obei long rul blong Jeova, olsem Hae Masta blong heven mo wol. I gud we oltaem yumi gat sem filing olsem Deved, we i talem se: “Jeova, yu yu bigfala tumas mo yu yu gat paoa mo yu yu gud tumas mo yu yu hae mo yu yu gat nem. Evri samting long heven mo long wol oli blong yu. O Jeova, kingdom hem i blong yu, mo yu yu Man we yu stap leftemap yu olsem hed blong olgeta samting. Mo naoia, O God blong mifala, mifala i stap talem tangkyu long yu mo mifala i stap presem nambawan nem blong yu.”—1 Kronikel 29:11, 13.
Ol Poen Blong Tingtingbak
◻ ?Jeova i wantem se ol man blong hem oli soemaot wanem kaen fasin blong stap aninit long narafala mo fasin obei?
◻ ?Olsem wanem Jisas i kasem pei from fasin obei blong hem, mo yumi mas soemaot wanem from fasin we yumi folem?
◻ ?Olsem wanem ol elda oli save folem eksampel blong Jisas long fasin we hem i mekem long ol sipsip?
◻ ?Fasin blong obei long tiokratik rul i joen wetem wanem?
◻ ?Fasin blong stap glad blong obei i save karem wanem blesing long yumi?
[Tok blong pija long pej 24]
Ol elda oli leftemap tingting blong ol sipsip blong mekem wetem fasin glad wanem wok we oli save mekem
[Tok blong pija long pej 26]
Jeova i glad long olgeta we oli obei long hem wetem hat blong olgeta