Ol Man Blong Lukaot Sipsip Mo Ol Sipsip Long Wan Grup We God i Rul Long Hem
“Jeova i jaj blong yumi, Jeova i givim loa long yumi, Jeova i King blong yumi; hem wan bambae i sevem yumi.”—AESEA 33:22.
1. ?Olsem wanem yumi save talem se ol Kristin blong faswan handred yia mo ol Kristin blong tede oli olsem wan grup we God i rul long hem?
TIOKRATIK i minim se God i rulum. Hem i joen wetem fasin ya blong akseptem rul blong Jeova mo folem ol toktok blong hem we i soemaot rod mo ol advaes blong hem long ol bigfala mo ol smol disisen we yumi mekem long laef. Kongregesen blong faswan handred yia i rili wan grup we God i rul long hem. Ol Kristin long taem ya oli save talem stret se: “Jeova i jaj blong yumi, Jeova i givim loa long yumi, Jeova i king blong yumi.” (Aesea 33:22) Sem mak long ogenaesesen blong Jeova God tede we olgeta Kristin we tabu speret i makemaot olgeta oli nambawan haf blong hem, hem tu i olsem wan grup we God i rili rul long hem.
?Wanem Ol Tiokratik Rod We Yumi Folem Tede?
2. ?Wanem wan rod we ol Wetnes blong Jeova oli obei long rul blong Jeova?
2 ?Olsem wanem yumi save talem se ogenaesesen blong Jeova long wol tede i wan grup we God i rul long hem? From we olgeta we oli blong ogenaesesen ya olgeta tu oli obei long rul blong Jeova. Mo oli folem lida blong olgeta Jisas Kraes we Jeova i putumap hem olsem King. Eksampel, long taem blong en, loa ya we i kamaot stret long Bigfala Man we i rul i go long Jisas: “Yu tekem huknaef ya blong yu, yu go long garen blong tekem kakae i kam. From we naoia i stret taem blong tekem kakae. From we wol i olsem garen we kakae blong hem i rere finis.” (Revelesen 14:15) Jisas i obei mo i mekem wok ya blong hivimap ol man blong wol ya. Ol Kristin oli sapotem King blong olgeta long bigfala wok ya taem oli wok strong blong talemaot gud nyus mo mekem disaepol. (Matyu 28:19; Mak 13:10; Ol Wok 1:8) Taem oli mekem olsem oli olsem ol man blong wok wetem Jeova tu we hem i, Bigfala Man Ya Blong Rul.—1 Korin 3:9.
3. ?Olsem wanem ol Kristin oli mekem blong obei long rul blong God long saed blong ol fasin blong olgeta?
3 Long ol fasin blong olgeta tu, ol Kristin oli obei long rul blong God. Jisas i talem: “Be man we i stap mekem ol stret fasin nomo, hem i save kam long delaet, blong delaet ya i soemaot we ol fasin ya we hem i stap mekem, be God i bin givhan long hem blong i mekem olsem.” (Jon 3:21) Tede, i no gat en blong ol toktok blong rao we i kamaot long saed blong wanem ol fasin we oli gud mo wanem ol fasin we oli nogud, be rao olsem i no mas stap long medel blong ol Kristin. Oli agri se nogud fasin, hemia ol samting we Jeova i talem se i nogud fasin, !mo oli blokem olsem wan sik we i nogud! Oli lukaot gud tu long ol famle blong olgeta, oli obei long papa mama blong olgeta, mo oli stap ananit long rul blong ol gavman. (Efesas 5:3-5, 22-33; 6:1-4; 1 Timote 5:8; Taetas 3:1) Olsemia nao oli mekem tiokratik fasin we God i agri long hem.
4. ?Adam mo Iv mo Sol, oli gat wanem tingting we i no stret, mo olsem wanem ol Kristin oli mekem blong soemaot wan tingting we i defren?
4 Adam mo Iv i lusum paradaes from we tufala i wantem mekem prapa disisen blong tufala nomo long wanem we i stret mo wanem we i no stret. Jisas i no wantem mekem olsem. Hem i talem: “Mi no traem mekem olsem we mi nomo mi wantem, mi stap traem mekem olsem we Papa blong mi we i sanem mi, hem i wantem.” Ol Kristin tu oli wantem sem samting ya. (Jon 5:30; Luk 22:42; Rom 12:2; Hibrus 10:7) Sol, faswan king blong Isrel, i obei long Jeova—be i no fulwan. From samting ya God i no wantem hem. Samuel i talem long hem: “I gud moa blong obei bitim blong mekem wan sakrifaes, blong harem tok i bitim gris blong man sipsip.” (1 Samuel 15:22) ?I tiokratik blong folem wil blong Jeova go kasem wan mak, ating blong prij no go long ol miting oltaem, mo afta no moa folem ol stret rul long saed blong gudfala fasin no long sam narafala rod? !No i no olsem! Yumi traehad blong ‘mekem wil blong God long ful laef blong yumi.’ (Efesas 6:6; 1 Pita 4:1, 2) I no olsem Sol, yumi obei fulwan long rul blong God.
Grup We God i Rul Long Hem Tede
5, 6. ?Jeova i yusum wanem rod blong wok wetem ol man tede, mo fasin blong wok folem plan ya i mekem wanem risal i kamaot?
5 Long taem bifo, Jeova i rul mo i soemaot trutok tru long ol wanwan man, olsem ol profet, ol king, mo ol aposol. Tede, i no moa olsem; i no moa gat ol profet mo ol aposol we God i givim toktok stret long olgeta. Be, Jisas i talem se long taem we hem i stap rul olsem King, hem bambae i makemaot wan grup blong ol man blong hem we oli stap holem strong bilif, hem ya, “slef we i stret mo waes,” (NW) mo hem bambae i putumap olgeta blong lukaot long olgeta samting blong hem. (Matyu 24:45-47; Aesea 43:10) Long 1919 hem i soem aot se slef ya hem ya smol grup we oli stap long wol blong ol Kristin we tabu speret i makemaot olgeta. Afta long taem ya, grup ya i nambawan haf blong tiokratik rul long wol, mo Hed kampani blong ol Wetnes blong Jeova i mekem wok long nem blong grup ya. Raon long wol, ol Branj Komiti, ol elda we oli goraon, mo ol elda blong kongregesen oli mekem wok long nem blong Hed Kampani.
6 Fasin ya blong wok tugeta wetem tiokratik ogenaesesen i wan impoten haf blong obei long gavman blong God. Fasin blong wok tugeta olsem i mekem fasin joengud mo oda i kamaot long ful wol ‘long ful kampani blong ol brata blong olgeta ples long wol.’ (1 Pita 2:17) Antap moa, samting ya i mekem Jeova i glad, “God i no stampa blong fasin ya we olgeta samting oli paspas. Hem i stampa blong pis.”—1 Korin 14:33.
Ol Elda Long Wan Grup We God i Rul Long Hem
7. ?From wanem yumi save talem se oli stap yusum tiokratik rod nomo blong putumap ol Kristin elda?
7 Olgeta man we oli putumap olgeta olsem elda, nomata wanem kaen posisen we oli stap long hem, oli kasem ol mak ya we i stap long Baebol blong mekem wok blong ol man blong lukaot, no ol elda. (1 Timote 3:1-7; Taetas 1:5-9) Mo tu, Tok blong Pol long ol elda blong Efesas i go long olgeta elda tu: ‘Yufala i mas stap lukaotgud long yufala mo long ol man ya we Tabu Speret i putum olgeta oli stap finis long han blong yufala. Yufala i mas stap lukaot long ol man blong kongregesen blong God, olsem we man blong lukaot long sipsip i stap lukaot long ol sipsip blong hem. From we God i pemaot ol man ya finis long blad blong Pikinini blong hem.’ (Ol Wok 20:28) Yes, tabu speret i putumap ol elda, mo tabu speret i stap kamaot long Jeova God. (Jon 14:26) Fasin blong putum olgeta i tiokratik. Antap moa, oli lukaot long ol sipsip blong God. Ol sipsip ya oli blong Jeova, oli no blong ol elda. God nomo i rul long olgeta.
8. ?Wanem ol responsabiliti blong ol elda tede?
8 Long leta blong hem i go long ol man Efesas, aposol Pol i soemaot olgeta responsabiliti blong ol elda, i talem se: ‘Long sam man, hem i givim paoa blong oli aposol. Long sam narafala man, hem i givim paoa blong oli profet. Long sam narafala man, hem i givim paoa blong oli talemaot gud nyus blong Kraes. Mo long sam narafala man bakegen, hem i givim paoa blong oli pasta mo tija insaed long kongregesen. Kraes i mekem olsem blong bambae ol man blong hem oli rere blong mekem ol wok blong hem, blong bambae olgeta ya we oli olsem bodi blong hem, oli strong moa.’ (Efesas 4:11, 12) I no moa gat aposol mo profet afta long taem ya we “ol man blong kraes we oli olsem bodi blong hem,” oli jes stat i no long taem. (Skelem 1 Korin 13:8.) Be, ol elda oli gohed strong yet blong talemaot gud nyus, lukaot long ol sipsip, mo tij.—2 Timote 4:2; Taetas 1:9.
9. ?Olsem wanem ol elda oli mas mekem olgeta i rere blong soemaot wil blong God long kongregesen?
9 From we tiokratik i minim se God i rulum, ol elda we oli karem gudfala frut oli savegud wil blong God. Josua i mas folem oda ya blong ridim Loa evri dei. Ol elda tu oli nidim blong stadi mo lukaot advaes long Baebol oltaem mo blong savegud ol buk we slef we i stret mo waes i wokem, we Baebol i stampa blong olgeta. (2 Timote 3:14, 15) Hem ya i joen wetem ol magasin blong Wajtaoa mo Wekap! mo ol narafala buk we oli soemaot olsem wanem ol advaes blong Baebol i stret long ol defren samting we i stap hapen long laef blong yumi naoia.a I tru se i impoten we wan elda i mas save mo folem ol advaes we i kamaot long ol buk blong Watch Tower Society, be tu hem i mas save gud ol tok blong Baebol we ol advaes ya oli stanap long hem. Olsemia nao, bambae hem i save olsem wanem blong folem tok ya blong Baebol wetem fasin ya blong tingbaot narafala mo fasin sore.—Skelem Maeka 6:8.
Wok Wetem Tingting Blong Kristin
10. ?Wanem rabis tingting ol elda oli mas lukaotgud blong agensem, mo olsem wanem?
10 Samwe long yia 55 K.T., aposol Pol i raetem faswan leta blong hem i go long kongregesen blong Korin. Wan long ol problem we hem i stretem se sam man oli wantem kam we oli hae moa long ol narafala long kongregesen. Pol i raetem: “Olgeta samting we yufala i wantem, ating yufala i kasem finis. Ating yufala i kam rijman finis. Ating yufala i kam haeman finis, olsem we yufala i king, be mifala i no yet, mifala i stap daon. Man, sipos i tru we yufala i king, bambae mi mi glad tumas. Sipos i olsem, bambae mifala tu i king wetem yufala.” (1 Korin 4:8) Long faswan handred yia K.T., olgeta Kristin oli gat hop blong rul olsem ol king mo ol pris wetem Jisas long heven. (Revelesen 20:4, 6) Be i klia se sam man long Korin oli fogetem se i no gat ol king long ol grup blong ol Kristin long wol we God i rul long olgeta. Ol Kristin man blong lukaot sipsip oli no mekem olsem ol king blong wol ya, oli wokem fasin ya blong gat tingting daon, we Jeova i glad long hem.—Ol Sam 138:6; Luk 22:25-27.
11. (a) ?Wanem samfala bigfala eksampel blong fasin blong gat tingting daon? (b) ?Wanem tingting long saed blong olgeta wanwan we ol elda mo ol narafala Kristin oli mas gat?
11 ?Fasin daon i wan slak fasin? !I no minim olsem! Jeova hem wan i gat fasin daon. (Ol Sam 18:35) Ol king blong Isrel oli lidim ol ami oli go long faet mo oli rulum nesen ya aninit long Jeova. Be, evriwan long olgeta i mas lukaotgud ‘se hat blong hem i no leftemap hem wan i go antap long ol brata blong hem.’ (Dutronome 17:20) Jisas ya we i laef bakegen long ded finis i King long heven. Be, taem hem i stap long wol ya, hem i wasem leg blong olgeta disaepol blong hem. !Hemia nao fasin daon ya! Mo hem i soemaot se hem i wantem ol aposol blong hem oli gat fasin daon olsem tu, hem i talem: “From we mi, mi Masta mo Tija blong yufala, mi wasem leg blong yufala, yufala tu i mas waswasem leg blong yufala.” (Jon 13:14; Filipae 2:5-8) Olgeta ona mo fasin blong leftemap narafala i mas go long Jeova, i no long wan narafala man. (Revelesen 4:11) Nating sipos oli elda no oli no elda, olgeta Kristin oli mas tingbaot olgeta olsem tok blong Jisas i soemaot se: “Be yumi ya, yumi man blong wok nomo blong hem. I stret nomo blong yumi mekem olsem.” (Luk 17:10) Ol narafala tingting i no tiokratik.
12. ?From wanem lav i wan impoten fasin blong ol Kristin elda blong mekem?
12 Blong joen wetem fasin daon, ol Kristin elda oli mekem lav blong olgeta i kam bigwan. Aposol Jon i soemaot se lav i impoten, i se: “Man we i no laekem ol man, hem i no save God, from God i stampa blong fasin ya blong laekem tumas ol man.” (1 Jon 4:8) Ol wanwan man we oli no gat lav oli no tiokratik. Oli no save Jeova. Long saed blong Pikinini blong God, Baebol i talem se: “Oltaem hem i stap laekem tumas ol man blong hem, we olgeta oli stap long wol ya, mo hem i stap laekem olgeta olwe, gogo hem i givim laef blong hem from olgeta.” (Jon 13:1) Jisas i toktok wetem ol 11 man we bambae oli haf blong hed kampani long Kristin kongregesen, i talem se: “Yufala i mas laeklaekem yufala, olsem we mi mi laekem yufala.” (Jon 15:12) Lav i wan fasin we i soemaot ol trufala Kristin. Lav ya i pulum ol man we oli harem nogud tumas long hat blong olgeta, ol man we oli sore, mo ol man we oli kalabus long saed blong speret we oli wantem kam fri man. (Aesea 61:1, 2; Jon 13:35) Ol elda oli mas givim eksampel olsem wanem blong soemaot lav.
13. ?Nating se tede ol trabol i had tumas, olsem wanem wan elda i save mekem gudfala filing i kamaot, long olgeta samting we i hapen?
13 Tede, plante taem ol elda oli mas givhan blong stretem ol bigfala problem. Ol trabol insaed long mared, maet stampa blong hem i no klia mo i save stap longtaem. Ol yangfala oli save kasem ol trabol we ol bigman oli faenem se i had blong kasemsave long hem. Ol sik blong tingting tu plante taem oli hadwok blong kasemsave long olgeta. Wan elda we i fesem ol samting ya, maet i no sua long wanem blong mekem. Be hem i save trastem se sipos hem i prea mo dipen long waes blong Jeova, mo hem i lukluk long Baebol mo lukaot ol advaes we slef we i stret mo waes i givim long ol buk we oli prentem, mo sipos hem i gat fasin daon mo lav long ol sipsip, bambae hem i mekem gudfala filing i kamaot, nating se trabol we i stap i bigwan.
14, 15. ?Wanem sam toktok we i soemaot se Jeova i blesem ol man blong hem wetem ol gudfala elda?
14 Jeova i blesem ogenaesesen blong hem bigwan wetem ol man we oli olsem ‘ol presen we oli go nomo long ol man.’ (Efesas 4:8) Oltaem, Watch Tower Society i glad tumas blong kasem ol leta we i talemaot lav blong ol elda we oli gat tingting daon we oli lukaotgud long ol sipsip blong God wetem fasin sore. Eksampel, wan elda long kongregesen i raetem: “Mi no save tingbaot visit blong wan seket elda we i tajem mi moa no we olgeta long kongregesen oli stap tokbaot moa. Seket elda ya i halpem mi blong luksave se i impoten blong gat wan positif tingting taem mi stap givhan long ol brata, wetem bigfala tingting blong talem toktok we i leftemap tingting blong olgeta.”
15 Wan sista we i mas wokbaot i go longwe long wan klinik blong kasem help blong winim sik blong hem i raetem: “!Mi haremgud tumas blong mitim wan elda long faswan naet we tingting blong mi i trabol tumas long hospetal we i longwe tumas long ples blong mi! Hem mo ol narafala brata oli spenem plante taem wetem mi. Mo tu ol man blong wol we oli savegud long sik we mi kasem oli harem olsem we mi mas ded sipos ol brata ya we oli gat lav mo strong bilif oli no bin leftemap tingting blong mi, kea long mi, mo prea from mi.” Narafala sista i raetem: “Mi mi laef tede from we bodi blong ol elda i gat longfala tingting blong lukaotgud mi taem mi stap traehad blong winim tingting blong mi we i foldaon bigwan. . . . Wan brata mo woman blong hem oli no save wanem blong talem long mi. . . . Be wanem i tajem mi moa se nating we oli no kasemsave fulwan long wanem we mi stap gotru long hem, oli keagud long mi wetem lav.”
16. ?Wanem advaes we Pita i givim long ol elda?
16 Yes, plante elda oli mekem advaes blong aposol Pita i wok: “Yufala i mas lukaotgud long ol man we God i givim long yufala, olsem we man blong lukaot long sipsip i stap lukaotgud long ol sipsip blong hem. Yufala i mas lukaotgud long olgeta, we tingting blong yufala i glad blong mekem, olsem we God i wantem. I nogud yufala i mekem wok ya we tingting blong yufala i no glad. Mo i nogud yufala i mekem blong kasem pei long hem. Yufala i mas mekem from we tingting blong yufala i glad long hem. Bambae yufala i no kam olsem bigfala masta blong olgeta ya we God i putum olgeta long han blong yufala. Yufala i mas soemaot ol stret fasin long ol man blong yufala blong oli save folem, olsem we ol sipsip oli folem man blong lukaot long olgeta.” (1 Pita 5:1-3) !Ol tiokratik elda ya oli wan blesing!
Ol Sipsip Long Wan Grup We God i Rul Long Hem
17. Talem sam fasin we olgeta memba evriwan long kongregesen oli mas mekem.
17 Be, i no ol elda nomo we oli mekemap grup we God i rul long hem. Sipos ol man blong lukaot sipsip oli mas stap folem ol tiokratik fasin, ol sipsip oli mas tu. ?Long wanem rod? Yes, ol semfala advaes we oli stap lidim ol man blong lukaot long sipsip i mas lidim tu ol sipsip. Olgeta Kristin, i no ol elda nomo, oli mas gat tingting daon blong oli kasem blesing blong Jeova. (Jemes 4:6) Evriwan i mas traehad blong mekem lav blong olgeta i kam bigwan moa from we sipos yumi no gat lav, Jeova i no save glad long ol sakrifaes we yumi mekem i go long hem. (1 Korin 13:1-3) Mo yumi evriwan, i no ol elda nomo, yumi mas ‘waes, man blong luksave, blong bambae yumi savegud olgeta samting we Jeova i wantem.’—Kolosi 1:9.
18. (a) ?From wanem smol save nomo blong trutok i no naf? (b) ?Olsem wanem yumi evriwan i save kam fulap long stret save?
18 Ol yangfala mo ol olfala oli sem mak, oltaem oli fesem ol disisen we i strong taem oli traem blong stap strong long bilif, long wol ya blong Setan. Fasin blong wol long ol klos, myusek, ol video, mo ol buk i traem sam man long saed blong speret. Smol save nomo blong trutok i no naf blong givhan long yumi blong stanap strong. Blong mekem sua se yumi stap strong long bilif, yumi mas fulap long stret save. Yumi nidim fasin luksave mo waes we Tok blong God nomo i save givim long yumi. (Proveb 2:1-5) Hem ya i minim se yumi mas gat gudfala fasin blong stadi oltaem, tingting dip long wanem we yumi lanem, mo mekem i wok. (Ol Sam 1:1-3; Revelesen 1:3) Pol i raet i go long olgeta Kristin, i no ol elda nomo, i se: “Strong kakae i blong olgeta we oli kam bigman finis, we oli stap traehad longtaem finis, nao oli kam we oli naf blong jusumaot wanem fasin i gud mo wanem fasin i nogud.”—Hibrus 5:14.
Ol Man Blong Lukaot Sipsip Mo Ol Sipsip Oli Wok Wanples
19, 20. ?Wanem advaes i go long yumi evriwan blong yumi wokgud tugeta wetem ol elda, mo from wanem?
19 Blong finisim, i gud blong talem se olgeta we oli wok gud tugeta wetem ol elda oli soemaot wan trufala tingting blong tiokratik. Pol i raet i go long Timote: ‘Ol elda we oli stap wok strong long wok blong lidim ol man, kongregesen i mas tingbaot blong givim dabol ona long olgeta. Tok ya i stret long olgeta we oli stap hadwok long prij mo tij.’ (1 Timote 5:17; 1 Pita 5:5, 6) Fasin blong kam elda hem i wan nambawan samting, be plante elda oli ol man we oli gat famle we oli go long prapa wok blong olgeta evri dei mo oli mas lukaot long woman mo ol pikinini blong olgeta. Oli glad blong wok, be wok blong olgeta i kam moa isi mo oli kasem moa frut taem kongregesen i sapotem olgeta, oli no lukaot tumas mastik blong olgeta, mo oli no ting se elda i mas mekem moa bitim we hem i naf blong mekem.—Hibrus 13:17.
20 Aposol Pol i talem: “Bambae yufala i no fogetem ol man ya we bifo oli stap lidim yufala, we oli talemaot tok blong God long yufala. Yufala i mas stap tingbaot fasin blong olgeta, we laef blong olgeta i olsem wanem, mo olgeta oli ded olsem wanem. Nao yufala i mas biaen long olgeta, long fasin blong bilif blong olgeta.” (Hibrus 13:7) Pol i no pulum ol brata blong folem ol elda, no gat. (1 Korin 1:12) I no tiokratik blong folem wan man. Be i rili waes blong folem bilif we i stanap strong longtaem blong wan tiokratik elda we i stap wok strong long wok blong prij, we i go long ol miting oltaem, mo hem i soemaot fasin daon mo lav long kongregesen.
I Soemaot Bilif
21. ?Olsem wanem ol Kristin oli soemaot strongfala bilif olsem we Moses i gat?
21 Tru ya, wan tiokratik ogenaesesen we i stap stanap strong long taem ya we ol fasin blong laef oli moa nogud bitim ol narafala taem long histri blong ol man, i pruvum paoa blong Bigfala Man Blong Rul. (Aesea 2:2-5) Mo tu i soemaot bilif blong kolosap faef milyan Kristin man, woman, mo ol pikinini, we oli stap traehad blong winim ol trabol blong olgeta evri dei long laef be oli no fogetem se Jeova i Rula blong olgeta. Olsem Moses we i gat strong bilif “i stap gohed olwe nomo olsem we i stap luk God ya we man i no save luk long ae blong hem,” olgeta Kristin tede oli gat semfala bilif we i strong. (Hibrus 11:27) Olgeta oli gat blesing blong stap laef long medel blong wan grup we God i rul long hem, mo evri dei oli talem tangkyu long Jeova from. (Ol Sam 100:4, 5) Oli stap haremsave paoa blong Jeova blong sevem olgeta, ale, oli glad blong talemaot se: “Jeova i jaj blong yumi, Jeova i givim loa long yumi, Jeova i king blong yumi; hem wan bambae i sevem yumi.”—Aesea 33:22.
[Futnot]
a Long ol buk ya i gat wan buk “Pay Attention to Yourselves and to All the Flock,” we i gat insaed long hem ol advaes blong Baebol we i blong givhan long ol man we oli putumap olgeta blong lukaot long kongregesen, no ol elda.
?Baebol i Soemaot Wanem?
◻ ?Long wanem rod ol Kristin oli obei long rul blong God?
◻ ?Olsem wanem grup we God i rul long hem i wok tede?
◻ ?Long wanem rod ol elda wanwan oli mas rere blong fulumap responsabiliti blong olgeta?
◻ ?Wanem ol fasin blong ol Kristin we ol elda oli mas mekem i kam gud mo soemaot?
◻ ?Long grup ya we God i rul long hem, wanem fasin fren i mas kamaot long medel blong ol sipsip mo ol man blong lukaot long ol sipsip?
[Tok blong pija long pej 16]
Adam mo Iv i lusum paradaes from we tufala i wantem mekem prapa disisen blong olgeta long ol samting we i stret mo ol samting we i no stret
[Tok blong pija long pej 18]
Sipos wan elda i soemaot fasin daon mo lav long ol sipsip, oltaem bambae hem i mekem gud falafiling i kamaot