Wan Kwestin

Mifala i glad blong stadi long ol profet tok blong Daniel olsem i stap long “Wajtaoa.” ?Be from wanem ol yia blong tri mo haf taem long Revelesen 11:3 oli defren long ol yia we buk “Revelation Climax” i talem?

Yes, Wajtaoa blong Novemba 1, 1993, i talem wan smol jenis long saed blong taem we Revelesen 11⁠:3 i kamtru long hem. ?From wanem?

I gud we fastaem, yumi luk long Revelesen 11:​2, we lashaf blong hem i tokbaot “fotetu manis.” Yumi gohed long vas 3: “Bambae mi mi sanem tufala wetnes blong mi, we klos blong tufala, oli wokem long bag nomo blong mekem saen blong ded. Nao long ol twelef handred sikiste dei ya, tufala wetnes ya blong mi bambae tufala i stap talemaot tok we mi bambae mi givim long tufala.” ?Vas ya i stap tokbaot wanem taem?

Longtaem finis, ol Wetnes blong Jeova oli luksave se profet tok ya i bin kamtru long ol Kristin we tabu speret i makemaot olgeta, afta long en blong “taem blong ol hiten man” (Taem blong ol Jentael) long 1914. (Luk 21:24; 2 Korin 1:​21, 22) Blong tokbaot taem ya, buk ya Revelation​—⁠Its Grand Climax At Hand!a (1988) i talem long pej 164 se: “I gat wan spesel taem, hemia tri yia haf, we ol man blong God oli kasem ol traem we oli stret long profet tok ya. Taem ya i stat long lashaf blong 1914, taem faswan bigfala faet blong wol i stat go kasem fashaf blong 1918.”

Makemgud taem ya we “i stat long lashaf blong 1914, taem faswan bigfala faet blong wol i stat go kasem fashaf blong 1918.” Plante taem, fasin blong kaontem olsem i kamaot, olsem i stap long buk ya “Then Is Finished the Mystery of God,” pej 261 kasem 264, (1969).*

Be Wajtaoa i tokbaot ol profet tok long Daniel, wan buk we tu taem, hem i tokbaot ol yia we oli stret wetem taem we biaen Revelesen i tokbaot​—⁠3 1/2 yia, no 42 manis. Blong mekem i klia, Daniel 7:25 i talem se bambae ol tabu man blong God oli kasem trabol “gogo wan taem, mo tu taem mo wan haf taem bakegen oli pas,” no 3 1/2 taem. Biaen, Daniel 12:7 i tokbaot “wan stret taem, ol stret taem mo wan haf taem,” no 3 1/2 taem, we bambae i finis wetem “en blong wok ya blong smasem paoa blong ol tabu man.”

Olsem nao, ol profet tok ya, Daniel 7:​25, Daniel 12:​7, mo Revelesen 11:​2, 3, mo tu Revelesen 13:⁠5, oli stap tokbaot ol sem yia nomo. Ol buk blong yumi oli soem se olgeta profet tok ya oli bin kamtru, stat long 1914 kasem 1918. Be taem yumi tokbaot wanwan long ol profet tok ya, stat mo en blong olgeta i defren lelebet.

Be Wajtaoa blong Novemba 1, 1993, i askem se: “?Olsem wanem ol sem kaen profet tok ya oli kamtru?” Yes, Wajtaoa ya i bin soem se ol profet tok long saed blong 3 1/2 taem we i stap long Daniel 7:​25, Daniel 12:​7, mo Revelesen 11:​3, oli “ol sem kaen profet tok.” Taswe, evriwan oli save stat long sem taem mo finis long sem taem.

Blong tokbaot en blong olgeta, sem magasin ya i soem olsem wanem trabol we ol tabu man blong God oli kasem (Daniel 7:​25), i kasem bigfala mak blong hem long Jun 1918, taem oli putum J. F. Rutherford mo sam narafala brata we oli lidim Watch Tower Bible and Tract Society, ‘blong stap plante yia long kalabus from gyaman toktok we ol man oli mekem agens long olgeta.’ I tru, samting ya i rili makem “en blong wok ya blong smasem paoa blong ol tabu man,” olsem Daniel 12:⁠7 i talem.

Taem yumi kaontem stat long Jun 1918 i gobak biaen, yumi kasem Desemba 1914 olsem stat blong 3 1/2 taem. Long laswan manis ya blong 1914, ol tabu man blong God long wol ya oli faenemaot stampa tok blong yia we i stap kam, se: “ ‘?Yufala i save dring long kap ya blong mi?’​—⁠Matyu 20:​20-23.” Haf we i tokbaot stampa tok ya i givim woning se: “!Hu i save, maet bambae i gat wan spesel traem, kap blong harem nogud no trabol blong mekem yumi sem, we ol man we oli holemstrong long Smol Sipsip oli save kasem long 1915!” Olsem Daniel 7:25 i talem blong tokbaot 3 1/2 taem ya, bambae ol man ‘oli mekem trabol mo oli gohed blong mekem trabol long ol tabu man blong Hemia we i Hae Olgeta.’ Long taem ya ol nesen oli stap faet long Faswan Bigfala Faet blong Wol, mekem se i moa isi long olgeta blong mekem trabol long ol tabu man from ol gyaman poen nomo. Blong eksplenemgud: Trifala profet tok ya we oli laenapgud​—⁠Daniel 7:​25, 12:​7, mo Revelesen 11:​3​—⁠evriwan oli kamtru long ol 3 1/2 yia, no 42 manis, stat long Desemba 1914 kasem Jun 1918.

Samting ya i eksplenem smol jenis ya long saed blong yia we Revelesen 11⁠:3 i kamtru long hem. Jenis ya i wan samting we yumi save tingbaot taem yumi stap stadi mo yusum buk Revelation Climax long fyuja.

[Futnot]