Stap Wetnes Long “Olgeta Nesen”
“Gud nyus ya blong kingdom, bambae oli talemaot long olgeta ples long wol we i gat man long hem, blong oli wetnes long olgeta nesen. Nao biaen, en bambae i kam.”—MATYU 24:14, NW.
1. ?From wanem ol tok blong Jisas long Matyu 24:14 i bin mekem ol man blong hem oli sapraes?
!OL TOK ya blong Jisas antap oli mas mekem ol disaepol blong hem we oli man Jyu oli sapraes! Tingting ya se ol man Jyu we oli klin oli mas go toktok long ol hiten man ‘we oli no klin,’ ‘ol man blong ol nesen,’ i defren long tingting blong wan Jyu, oli no wantem nating.a !Yes, wan man Jyu we i stap traehad blong mekem i stret bambae i no tingting blong go long haos blong wan hiten man! Olgeta disaepol ya we oli man Jyu oli mas gohed yet blong lanem plante moa samting long saed blong Jisas, lav blong hem, mo wok blong hem. Mo oli mas gohed blong lanem moa long fasin blong Jeova we hem i stap mekem i sem mak nomo long olgeta man.—Ol Wok 10:28, 34, 35, 45.
2. (a) ?Ol Wetnes oli bin mekem minista wok blong olgeta i kam bigwan olsem wanem? (b) ?Wanem tri stampa samting we i mekem se ol Wetnes oli gohedgud?
2 Ol Wetnes blong Jeova oli talemaot gud nyus finis long medel blong ol nesen, wetem ol man Isrel blong tede, mo oli stap talemaot gud nyus ya naoia long plante nesen bitim bifo. Long 1994, bitim fo mo haf milyan Wetnes oli stap prij long kolosap 230 kantri. Oli stap mekem bitim fo mo haf milyan Baebol stadi long ol man we oli intres, long haos blong olgeta wanwan. Oli stap mekem samting ya long fored long ol man long olgeta ples long wol nating se plante oli agensem olgeta. Plante taem ol man oli agensem olgeta from we oli no save ol tijing mo tingting we i stap pusum ol Wetnes blong mekem wok ya. Ol man oli save talem sem samting long saed blong ol Wetnes tede olsem ol man oli talem long saed blong ol Kristin bifo, se: “Mifala i save we olbaot long evri ples, ol man oli stap tok nogud long kampani ya blong yu.” (Ol Wok 28:22) ?Taswe, wanem nao i mekem se oli stap karem frut long minista wok blong olgeta? I gat tri samting we oli givhan long olgeta blong gohedgud—oli folem rod we speret blong Jeova i lidim olgeta long hem, oli folem fasin blong Kraes blong mekem wok ya mo oli yusum ol stret tul blong toktokgud wetem ol man.
Speret Blong Jeova Mo Gud Nyus
3. ?From wanem yumi no save tok flas from wok blong yumi?
3 ?Ol Wetnes blong Jeova oli tok flas from frut blong wok blong olgeta, olsem we frut ya i kamaot from sam spesel paoa blong olgeta? No gat, from we ol tok ya blong Jisas i stret long olgeta se: “Taem yufala i mekem olgeta samting we hem i talem long yufala blong yufala i mekem, yufala i mas talem se ‘Be yumi ya, yumi man blong wok nomo blong hem. I stret nomo blong yumi mekem olsem.’ ” Taem oli givim laef blong olgeta long God, mo oli baptaes olsem ol Kristin, ol Wetnes blong Jeova oli wantem akseptem responsabiliti ya blong mekem wok blong God, nomata wanem kaen laef olgeta wanwan oli gat. Long samfala, samting ya i minim se oli mekem wok ya fultaem olsem ol misinari no ol man we oli wantem wok fri nomo long ol branj ofis mo ol ples blong prentem ol Kristin buk. Long sam narafala, Kristin fasin ya we oli wantem blong wok, i pulum olgeta blong joen long ol wok blong bildim ol haos wosip, blong kam ol man we oli prij fultaem olsem ol paenia, no ol man we oli prij haftaem olsem ol pablisa blong gud nyus long ol lokol kongregesen. I no gat wan long yumi i save tok flas long ol wok we yumi mas mekem, “i stret nomo blong yumi mekem olsem.”—Luk 17:10; 1 Korin 9:16.
4. ?Olsem wanem oli bin winim fasin blong ol man long olgeta ples long wol blong agensem Kristin minista wok ya?
4 Olgeta gudfala frut we yumi kasem i stap kamaot long tabu speret, no paoa blong Jeova. I stret blong talem tede olsem long taem blong profet Sekaraea se: “Tok blong Jeova long Serubabel i olsem, se: ‘Hemia i no from ol ami, no from paoa blong man, be from speret blong mi nomo.’ Hemia nao tok blong Jeova blong ol ami.” Taswe, oli winim trabol we ol man long olgeta ples blong wol oli mekem agensem wok blong prij blong ol Wetnes, i no long paoa blong man, be from we Jeova i lidim mo i lukaotgud long olgeta.—Sekaraea 4:6.
5. ?Olsem wanem Jeova i stap joen long wok ya blong mekem mesej blong Kingdom i go long evri ples?
5 Long saed blong olgeta we oli wantem harem mesej blong Kingdom, Jisas i talem se: “Ol profet bifo oli bin raetem tok se ‘God ya bambae i tijim olgeta.’ Man we i harem tok blong Papa blong mi mo i lan long hem, hemia man we i save kam long mi. . . . I no gat man i save kam long mi, sipos Papa blong mi i no openem rod long hem.” (Jon 6:45, 65) Jeova i save skelem ol hat mo ol tingting, mo hem i save olgeta ya we bambae oli save gat tangkyu long lav blong hem nating se oli no save hem yet. Mo tu hem i stap yusum ol enjel blong hem blong lidim spesel wok ya. Hemia from wanem long vison, Jon i luk enjel i joen long wok ya mo i raetem se: “Nao mi luk i gat wan narafala enjel i stap flae antap long skae, i stap talemaot gud nyus ya we i blong oltaem nomo, i no save finis. Enjel ya i stap talemaot gud nyus ya long olgeta man long wol, long olgeta blong evri kala mo laen mo lanwis mo kantri.”—Revelesen 14:6.
Luksave Nid Long Saed Blong Speret
6. ?I nidim wanem stret tingting blong wan man i lesin long gud nyus?
6 Narafala risen from wanem Jeova i givim jans long ol man blong akseptem gud nyus, hemia we Jisas i talemaot se: “Olgeta we oli luksave se oli nidim ol samting long saed blong speret, oli save harem gud, from we kingdom blong heven i blong olgeta.” (Matyu 5:3, NW) Wan man we i haremgud long hem wan no i no stap lukaot trutok, bambae i no luksave nid long saed blong speret. Man no woman ya bambae i tingbaot ol samting blong laef nomo, ol samting we bodi i wantem. Fasin ya blong olgeta blong no kea long ol samting long saed blong speret i blokem olgeta. Taswe, taem yumi go long olgeta haos wanwan mo yumi mitim plante man we oli no laekem mesej ya, yumi mas luksave ol defren risen we oli stap biaen long fasin blong olgeta blong no wantem lesin.
7. ?From wanem plante man oli no lesin long trutok?
7 Plante man oli no wantem lesin from we oli strong blong holemtaet skul we ol famle blong olgeta oli stap long hem, mo oli no wantem blong storeyan. Sam narafala oli laekem skul we i stret long prapa fasin blong olgeta—sam oli wantem skul we mining blong ol toktok blong hem i no klia, i haed, sam narafala oli laekem skul we i pulum filing blong olgeta, mo sam narafala bakegen oli intres moa blong kampani wetem ol man blong jyos. Tede plante oli jusum wan fasin blong laef we i agensem ol rul blong God. Maet oli stap folem wan rabis laef, mo samting ya nao i risen blong olgeta blong talem se, “Mi no intres.” Sam narafala tu, oli save talem se oli skulgud mo oli gat save long saed blong sayens, taswe oli no wantem Baebol we i isi tumas long olgeta.—1 Korin 6:9-11; 2 Korin 4:3, 4.
8. ?From wanem fasin ya blong no wantem harem gud nyus i no mas daonem strong tingting blong yumi blong gohed? (Jon 15:18-20)
8 ?Fasin ya we bighaf blong ol man oli no wantem mesej blong gud nyus, i save daonem bilif blong yumi mo fasin blong yumi blong gohed strong long wok ya blong sevem laef blong ol man? Tok blong Pol long ol man Rom i save leftemap tingting blong yumi, i se: “Sipos sam man long mifala oli lego long tok ya, be hemia i no min se God i save lego long tok blong hem, no gat. Sipos olgeta man oli stap gyaman nomo, be God i no save gyaman, hem bambae i tru oltaem nomo. I olsem we Baebol i talem, we i tokbaot God, i se ‘Taem yu yu tok, tok blong yu i stap soemaot we yu yu stret. Taem oli jajem yu from sam poen, be oltaem yu yu win.’ ”—Rom 3:3, 4.
9, 10. ?Wanem i soemaot se yumi winim fasin agens long plante kantri?
9 Samting we i save leftemap tingting blong yumi, hemia eksampel blong plante kantri long wol we fastaem oli no wantem harem gud nyus, be naoia, i gat pruf we i soem se olgeta oli jenis. Jeova mo ol enjel oli save finis se i gat ol man we hat blong olgeta i gud we yumi mas faenem olgeta—be ol Wetnes blong Jeova oli mas gohed mo stanap strong longtaem long minista wok blong olgeta. Eksampel, yumi save tingbaot sam kantri we 50 yia bifo Katolik skul i olsem wan bigfala samting we i blokem rod—Aerlan, Ajentina, Brasil, Kolombia, Itali, Meksiko, Potugal, mo Spen. Ol Wetnes oli smol nomo. Long 1943, i gat 126,000 nomo long ful wol, mo 72,000 blong olgeta oli stap long Yunaeted Stet. Fasin we man i no save mo fasin agens i stap fesem ol Wetnes olsem wan stonwol we oli no save brekemdaon. Be, tede sam long ol nambawan frut long wok blong prij oli kamaot long ol kantri ya. Sem samting ya i tru long plante kantri we bifo oli aninit long rul blong Komunis. Long 1993, 7,402 man we oli baptaes long asembli blong Kiev, Ukren, oli givim pruf blong samting ya.
10 ?Ol Wetnes blong Jeova oli yusum wanem rod blong tokbaot gud nyus long ol man raonabaot long olgeta? ?Oli yusum ol samting long saed blong bodi blong pulum ol man oli kam long skul blong olgeta, olsem samfala oli stap talem? ?Oli stap visitim nomo ol man we oli pua mo olgeta we oli no skul, olsem sam narafala man oli stap talem?
Ol Gudfala Rod Blong Mekem Gud Nyus i Go Long Olgeta Ples
11. ?Wanem gudfala eksampel Jisas i soemaot long minista wok blong hem? (Luk long Jon 4:6-26.)
11 Jisas mo ol disaepol blong hem oli putumap rod ya we ol Wetnes oli bin folem kam kasem tede long wok blong olgeta blong mekem disaepol. Jisas i go long olgeta ples we i gat man long hem, ol rijman mo ol puaman—long ol haos, long fes blong ol man, kolosap long ol lugun blong wora, antap long ol hil, long ol haos prea tu.—Matyu 5:1, 2; 8:14; Mak 1:16; Luk 4:15.
12, 13. (a) ?Olsem wanem Pol i soemaot rod long ol Kristin? (b) ?Olsem wanem ol Wetnes blong Jeova oli bin folem eksampel blong Pol?
12 Long saed blong minista wok blong aposol Pol, hem wan i save talem stret se: “Yufala i save fasin blong mi finis, we mi stap mekem oltaem nomo taem mi stap wetem yufala, i stat long taem ya we mi kamtru long Esia fastaem. Mi stap mekem ol wok ya from we mi mi man blong wok nomo blong Masta blong yumi. . . , yufala i save we taem mi stap talemaot gud nyus, mo taem mi stap tijim yufala long fes blong ol man, mo long ol haos blong yufala, mi mi no haedem sam samting we i save givhan long yufala. Mi talemaot evri samting long yufala.”—Ol Wok 20:18-20.
13 Ol man oli savegud ol Wetnes blong Jeova long olgeta ples long wol from we oli folem rod ya blong ol aposol, wok blong prij long ol haos wanwan. Bitim we oli mekem minista wok blong olgeta long televisin, we i sas, i no save go dip, mo i no givim jans blong toktok wetem ol man wanwan, ol Wetnes oli go long ol man we oli rij mo pua, mo oli toktok stret long olgeta. Oli traehad blong tokbaot God mo Tok blong hem long ol man.b Oli no traem blong mekem ol man oli kam Kristin from raes nomo, we oli givim ol samting long saed bodi fri long ol man blong pulum olgeta oli joen long skul blong olgeta. Long olgeta we oli wantem storeyangud, oli soemaot se trufala rod ya nomo blong ol man blong winim ol problem blong olgeta hemia Kingdom rul blong God, we bambae i jenisim ol fasin blong wol blong yumi i kam moa gud.—Aesea 65:17, 21-25; 2 Pita 3:13; Revelesen 21:1-4.
14. (a) ?Olsem wanem plante paenia mo misinari oli bin putum wan strong fandesen? (b) ?Yumi lanem wanem long ekspiryens blong ol Wetnes blong Jeova long Japan?
14 Blong mekem wok ya long plante moa kantri, ol misinari, mo ol paenia oli go fastaem long plante nesen. Oli putum fandesen, mo biaen ol lokol Wetnes oli lidim wok ya. Taswe, i no nidim plante Wetnes blong narafala ples blong mekem wok blong prij i gohed mo blong mekem i rongud. Wan nambawan eksampel hemia long saed blong Japan. Long 1949, ol misinari blong Ostrelya, sam narafala ples long Pasifik mo Engglan oli go long ples ya, oli lanem lanwis blong ples ya, oli jenisim sam tingting mo fasin blong olgeta blong oli save haremgud nating se oli no gat plante samting long ol yia jes biaen long bigfala faet, mo oli stat blong prij long ol haos wanwan. Long Namba Tu Bigfala Faet Blong Wol, gavman i blokem wok blong ol Wetnes long Japan mo oli mekem trabol long olgeta. Taswe taem ol misinari oli kam, oli faenem smol namba nomo blong Wetnes long Japan we oli strong. !Be tede oli kam antap bitim 187,000 long bitim 3,000 kongregesen! ?Wanem samting i mekem olgeta oli karem frut long ol faswan yia we oli wok long ples ya? Wan misinari we i wok long ples ya bitim 25 yia, i talem se: “I impoten tumas blong lanem blong toktok wetem ol man. Taem mifala i save lanwis blong olgeta, mifala i haremgud blong stap wetem olgeta, blong kasem save mo glad long fasin blong laef blong olgeta. Mifala i mas soemaot se mifala i laekem tumas ol man Japan. Wetem fasin daon mifala i traem blong joengud wetem ol manples, be blong mekem samting ya, mifala i no sakemaot ol Kristin fasin blong mifala.”
Fasin Blong Kristin Tu i Wan Wetnes
15. ?Olsem wanem ol Wetnes oli bin soemaot fasin blong ol tru Kristin?
15 Be, ol man oli no intres long mesej blong Baebol nomo. Oli bin luk wok mo fasin blong tru Kristin skul. Oli bin luklukgud lav, pis mo yuniti blong ol Wetnes long ol taem we oli kasem bigfala trabol, olsem long taem blong ol faet bitwin ol man long wan kantri, faet bitwin ol laen blong man, mo fasin ya blong no laekem ol man narafala kantri. Ol Wetnes oli holemtaet wan klia tingting long Kristin fasin ya blong no tekem saed long olgeta faet mo oli fulumap ol tok blong Jisas se: “Mi mi givim wan nyufala loa long yufala, se ‘Yufala i mas laeklaekem yufala.’ Olsem we mi mi laekem yufala, ale long sem fasin, yufala i mas laeklaekem yufala. Nao from we yufala i stap laeklaekem yufala, bambae olgeta man oli luksave se yufala i man blong mi.”—Jon 13:34, 35.
16. ?Wanem ekspiryens we i soemaot Kristin lav we i stap wokgud?
16 Wan eksampel long fasin blong laekem ol man raonabaot i kamaot long wan olfala man we i raet i go long wan lokol nyuspepa blong tokbaot tufala we yumi save kolem “Masta mo Misis Gudfala.” Hem i eksplenem se ol man we oli stap kolosap long hem oli bin kaen tumas long hem taem waef blong hem i sik tumas bifo we i ded. Hem i raetem se, “Stat long taem ya we waef blong mi i ded . . . oli bin mekem i gud tumas long mi. Biaen long taem ya oli ‘karemaot’ mi . . . , oli mekem olgeta defren kaen wok mo oli givhan blong stretem ol problem blong mi olsem wan olfala we i finis long wok mo i gat 74 yia. Wanem we i mekem samting ya i moa defren se oli blak, mi mi waet. Oli Wetnes blong Jeova, mi mi wan Katolik we mi lego skul blong mi finis.”
17. ?Yumi mas blokem wanem fasin?
17 Ekspiryens ya i soemaot se yumi save givim wetnes long plante rod, wetem ol fasin blong yumi evri dei. Tru ya, sipos fasin blong yumi i no olsem Kraes, bambae minista wok blong yumi i no gat paoa, be bambae i olsem wok blong ol Farisi bifo we oli gat tu fes. Yumi no wantem kam olsem olgeta ya we Jisas i tokbaot olgeta se: “Yufala i mas harem olgeta tok blong olgeta, mo yufala i mas mekem olgeta samting we oli talem. Be i nogud yufala i folem fasin blong olgeta, from we olgeta oli no mekem fasin blong olgeta i stret long tok blong olgeta.”—Matyu 22:37-39; 23:3.
Grup Ya We i Olsem Slef i Givim Ol Stret Tul
18. ?Olsem wanem ol buk we oli tokbaot Baebol oli givhan long yumi blong halpem ol man we oli rili wantem trutok?
18 Narafala samting we i givhan long wok blong talemaot gud nyus long olgeta nesen se, Watch Tower Bible and Tract Society i wokem ol buk we i tokbaot Baebol we ol man long olgeta ples oli save kasem. Yumi gat ol buk, ol buklet, ol traket, mo ol magasin we i save givim stret ansa long ol man we oli rili wantem save ansa long wan kwestin. Sipos yumi mitim wan Muslim, Hindu, Budis, Taois, no wan Jyu, yumi save yusum buk ya Mankind’s Search for God no wan long ol traket no ol buklet blong statem toktok, mo maet yumi save statem wan Baebol stadi. Sipos wan man we i bilif long evolusen i askem kwestin long saed blong ol samting we God i wokem, yumi save yusum buk ya Life—How Did It Get Here? By Evolution or by Creation? Sipos wan yangfala i askem se, ‘?Wanem mining blong laef?’ yumi save pulum tingting blong hem i go long buk ya Questions Young People Ask—Answers That Work. Sipos wan man i harem nogud from ol problem blong hem—tingting i foldaon, i taed, man i fosem woman, i divos—yumi gat ol magasin we oli bin tokbaot ol fasin olsem wetem plante gudfala advaes. I tru tumas, grup we i olsem gudfala slef ya we Jisas i talemaot se bambae i stap givim “kakae long stret taem blong hem,” i stap mekemgud ol wok blong hem.—Matyu 24:45-47.
19, 20. ?Olsem wanem wok blong Kingdom i spid moa naoia long Albania?
19 Be blong kasem ol nesen, i bin impoten blong wokem ol buk ya long plante lanwis. ?Olsem wanem oli save tanem Baebol mo ol buk we oli tokbaot Baebol i go long bitim 200 lanwis? Sipos yumi lukluk smoltaem long wan eksampel, Albania, yumi luk olsem wanem slef we i stret mo waes i bin faenem rod blong talemaot gud nyus ya, nating se i gat ol bigfala hadtaem mo i no gat dei blong Pentekos naoia blong mekem ol lanwis oli kamaot wantaem.—Ol Wok 2:1-11.
20 Kam kasem sam yia nomo bifo, ol man oli holem tingting ya se Albania nomo i stap olsem trufala Komunis kantri we i no bilif long God. Magasin blong National Geographic i talem long 1980 se: “Albania i putum tabu long [skul], i talemaot hem wan long 1967 se ‘faswan kantri long wol we i no bilif long God.’ . . . Ol man Albania we oli stap naoia oli save nomo tingting ya se i no gat wan God.” Naoia we Komunis i foldaon, ol man Albania we oli luksave nid blong olgeta long saed blong speret, oli stap lesin taem ol Wetnes blong Jeova oli prij long olgeta. Long 1992, oli stanemap wan smol translesen tim long Tirane mo ol yangfala Wetnes we oli joen long hem oli save lanwis Itali mo Engglis. Ol brata we oli savegud wok ya oli kam long narafala kantri, ale oli tijim olgeta blong yusum ol laptop kompyuta blong putum ol tok we oli tanem long lanwis blong Albania i go insaed. Oli tanem ol traket mo Wajtaoa magasin fastaem. Taem oli kasem moa ekspiryens, ale oli tanem ol narafala impoten buk we oli tokbaot Baebol. Naoia i gat moa long 200 Wetnes we oli stap wok strong long smol kantri ya (we i gat 3,262,000 man long hem), mo 1,984 oli kam long Memoriol long 1994.
Yumi Evriwan i Gat Wan Responsabiliti
21. ?Yumi stap laef long wanem kaen taem?
21 Ol samting we oli stap kamaot long wol naoia oli stap kam kasem en blong hem. Ol fasin blong brekem loa, raf fasin we i stap kam antap, ded mo fasin blong fosem woman we i stap kamaot long ol faet long ol wanwan ples, fasin olbaot long saed blong seks mo frut we i kamaot hemia ol sik long saed blong seks, fasin ya blong no respektem ol man we oli gat raet blong rul long narafala, ol fasin ya we oli stap kam antap oli mekem wol ya we kolosap i no moa gat loa i stanap, ol haeman oli no moa save rul long hem. Yumi stap long wan taem we i sem mak long taem bifo long Bigfala Wora we Jenesis i tokbaot: “Nao Jeova i luk we rabis fasin blong man i fulap long wol, mo oltaem hat blong olgeta i stap tingbaot blong mekem ol rabis fasin nomo. Nao Jeova i sore we hem i bin mekem ol man, mo i bin putum olgeta long wol ya. Hem i stap harem nogud long hat blong hem.”—Jenesis 6:5, 6, NW; Matyu 24:37-39.
22. ?Olgeta Wetnes blong Jeova oli gat wanem responsabiliti?
22 Olsem long taem blong Noa, Jeova bambae i mekem wan samting blong stretem. Be from we hem i gat lav mo i stap jajem man long stret fasin, hem i wantem se gud nyus mo mesej blong givim woning long ol man i mas go fastaem long olgeta nesen. (Mak 13:10) Long saed ya, ol Wetnes blong Jeova oli gat wan responsabiliti—blong faenem olgeta we oli stret blong kasem pis blong God mo blong tijim olgeta long ol rod blong hem long saed blong pis. I no longtaem, long stret taem blong God, impoten wok blong prij bambae i finis we bambae ol gudfala frut blong hem i stap. “Biaen, en bambae i kam.”—Matyu 10:12, 13; 24:14, NW; 28:19, 20.
[Ol futnot]
a Blong kasem moa save long ol hiten man, luk long stampa tok ya “Nations” long buk ya Insight on the Scriptures, Volyum 2, pej 472-474, we Watchtower Bible and Tract Society of New York, Inc. i wokem.
b Blong kasem moa advaes we i save wokgud long minista wok blong ol Kristin, lukluk Wajtaoa (Engglis), Ogis 15, 1984, pej 15, “Olsem Wanem Blong Kam Ol Minista We Oli Karem Frut,” mo pej 21, “Minista Wok We i Karem Frut i Stap Mekem Moa Man i Kam Disaepol.”
?Yu Yu Save Tingbaot?
◻ ?Wanem frut i bin kamaot long minista wok blong ol Wetnes tede?
◻ ?From wanem plante man oli no wantem lesin long Kristin mesej ya?
◻ ?Wanem fasin blong prij blong ol aposol we ol Wetnes oli stap yusum?
◻ ?Wanem ol tul we yumi gat blong mekemgud minista wok ya?
◻ ?Yumi evriwan i mas mekem wanem folem tok blong Mak 13:10?
[Bokis blong pija long pej 19]
KANTRI OL WETNES WE OLI STAP LONG 1993
WOK LONG 1943
Aerlan 150? 4,224
Ajentina 374 102,043
Brasil 430 366,297
Filipin Wol Wo 2—i no gat ripot 116,576
Franis Wol Wo 2—i no gat ripot 122,25
Itali Wol Wo 2—i no gat ripot 201,440
Jili 72 44,668
Kolombia ?? 60,854
Meksiko 1,565 380,201
Peru I no gat ripot blong wok 45,363
Polan Wol Wo 2—i no gat ripot 113,551
Potugal I no gat ripot blong wok 41,842
Spen I no gat ripot blong wok 97,595
Urugwae 22 9,144
Veneswela I no gat ripot blong wok 64,081
[Tok blong pija long pej 17]
Ol Wetnes blong Jeova oli stap kam plante long plante kantri olsem Spen we Katolik i bigfala skul blong hem
[Tok blong pija long pej 18]
Ol Wetnes blong Jeova oli wok strong long medel blong ol nesen raon long wol