?Yu Yu Gat Fasin Blong Fogivim Narafala?

BILL mo pikinini gel blong hem, Lisa we i gat 16 yia blong hem, oli faenem i had blong laef wanples. Plante taem ol smosmol samting nomo we tufala i no agri long olgeta oli mekem tufala i stap singaot bigwan long tufala. Biaen, kros ya i go kasem mak we hem i askem Lisa blong muvaot long haos.a

Afta we sam taem i pas, Lisa i luksave se i fol blong hem mo i askem papa blong hem blong fogivim hem. Be papa blong Lisa i no wantem fogetem ol mastik we Lisa i mekem bifo, mo fasin kros blong hem i mekem se hem i sakem fasin traehad blong Lisa blong mekem pis bakegen. !Tingbaot, hem i no wantem soem fasin sore long pikinini gel blong hem!

Plante handred yia bifo, oli jajem wan man we i no gat fol, se i mas ded from wan fasin blong brekem loa we hem i no mekem. Ol man we oli mekem wetnes oli talem gyaman toktok, mo ol bigman blong politik oli no wantem save, oli no wantem mekem se stret fasin i stanap. Man ya we i no gat fol, hem i Jisas Kraes. Smoltaem bifo we hem i ded, hem i prea mo i askem long God se: “Papa, plis yu fogivim olgeta ya, from we oli no save samting ya we oli stap mekem.”​—⁠Luk 23:⁠34.

Oltaem Jisas i soem fasin blong fogif, we i kamaot long hat blong hem, mo Baebol i leftemap tingting blong ol man blong hem blong mekem sem mak long saed ya. (Efesas 4:32) Be, olsem Bill, plante we oli no gat sore, oli no rere blong fogivim narafala. ?Wanem fasin blong yu long saed ya? ?Yu yu rere blong fogivim ol narafala taem oli mekem sin agensem yu? ?Mo olsem wanem long ol bigfala sin? ?Yumi mas fogivim olgeta ya tu?

Fasin Fogif i No Isi

Samtaem, i no isi blong fogivim narafala. Mo long taem ya we yumi laef long hem we i had tumas, i gat plante moa samting blong mekem i hadwok blong ol man oli joengud. Antap moa, plante taem laef blong famle i fulap long wari mo traem. Bifo finis Kristin aposol Pol i talem se fasin blong laef olsem bambae i kamaot long ‘taem blong lasdei blong wol.’ Hem i talem se: “Bambae ol man oli save tingbaot olgeta nomo, mo bambae oli wantem mane tumas. Bambae oli man blong tok flas, we tingting blong olgeta i go antap tumas, . . . Bambae oli no wantem ol fasin ya we i gud nomo, oli agens long hem. Bambae oli man blong spolem ol fren blong olgeta, oli man we oli no kea, we flas i mekem tingting blong olgeta i lus.”​—⁠2 Timote 3:​1-4.

Taswe, bambae yumi evriwan i mas fesem ol trabol we i traem fasin blong yumi blong fogivim ol narafala. Antap moa, yumi stap faet agensem paoa we i stap insaed long yumi. Pol i harem nogud blong talem se: “Oltaem mi no mekem ol gudgudfala fasin ya we mi wantem mekem, be mi stap mekem ol rabis fasin ya, we mi no wantem mekem nating. Sipos mi stap mekem ol samting we mi no wantem mekem nating, ating i no mi tru, we mi stap mekem ol samting ya. Hemia fasin blong sin ya we i stap oltaem long tingting blong mi, we i stap mekem.” (Rom 7:19, 20) From samting ya, plante long yumi, i no gat fasin fogif olsem we yumi wantem se bambae yumi gat. Nating se yumi wantem fogivim man, sin we yumi bon wetem we i mekem yumi no stretgud olgeta i gat bigfala paoa long yumi evriwan, mo samtaem i save tekemaot sore we yumi gat long ol narafala man.

Taem oli leftemap tingting blong wan woman blong fogivim narafala from wan smol samting we hem i mekem, hem i ansa se: “I no gat man i gud inaf blong kasem fasin fogif from we i had tumas blong fogif.” Sipos yumi no tingting dip long tok ya, yumi save ting se tok olsem i no soem filing nating, i strong tumas, mo i no soem tras long eni man. Be, taem yumi tingting dip long hem, yumi luk se tok ya i soemaot fasin kros we plante man oli gat taem oli fesem wan wol we oli luk se ol man blong hem oli tingbaot olgeta wanwan nomo, oli no kea, mo oli raf. Wan man i talem se: “Ol man oli ting nating long yu taem yu fogivim olgeta. I olsem we oli waepem leg blong olgeta long yu.”

Taswe, i no wan sapraes se i had blong gat fasin blong fogivim narafala long lasdei ya. Nating se i olsem, Baebol i leftemap tingting blong yumi blong fogivim narafala long kaen fasin. (Skelem wetem 2 Korin 2:7.) ?From wanem yumi mas gat fasin fogif?

[Futnot]