Talemaot Nem Blong Jeova Long Ol Man
“Oltaem yumi mas mekem wan sakrifaes long God, we i blong presem hem. Sakrifaes ya i olsem frut blong maot blong yumi we i talemaot nem blong hem long ol man.”—HIBRUS 13:15, NW.
1. ?Profet Hosea i talem long ol man Isrel blong mekem wanem?
PROFET blong Jeova, Hosea, i gat wan impoten mesej blong ol brata blong hem, ol man Isrel. Long ol yia seven handred bifo Kristin Taem, hem i talem strong long ol stronghed man we oli laef semtaem long hem blong tanem tingting blong olgeta. Hem i talem se: “Tekem ol tok wetem yu mo kambak long Jeova. Yufala evriwan, talem long hem, ‘Plis yu fogivim mastik blong mifala; mo akseptem wanem we i gud, mo from samting ya bambae mifala i givim long yu ol yangfala buluk long maot blong mifala.’ ” (Hosea 14:2) Taem profet tok blong Hosea i talem long ol man blong mekem sakrifaes blong ‘yangfala buluk long maot blong olgeta’ i go long Jeova, hem i stap traem blong pulum ol man Isrel blong tanem tingting blong olgeta mo mekem sakrifaes blong presem God wetem fulhat blong olgeta.
2. ?Aposol Pol i leftemap tingting blong ol Kristin blong mekem wanem sakrifaes?
2 Tede ol Wetnes blong Jeova oli givim ‘ol yangfala buluk long maot blong olgeta.’ Oli folem tu ol advaes blong aposol Pol, we i stret long profet tok ya blong Hosea, se: “Long rod blong hem [tru long Jisas Kraes], oltaem yumi mas mekem wan sakrifaes long God, we i blong presem hem. Sakrifaes ya i olsem frut blong maot blong yumi we i talemaot nem blong hem long ol man.” (Hibrus 13:15, NW) Taswe, ol man blong God oli presem Jeova wetem glad, olsem long wok blong olgeta blong talemaot Kingdom.—Matyu 24:14.
3. ?Olsem wanem yumi save givim ‘sakrifaes blong presem’ Jeova, mo naoia yumi mas skelemgud ol wok blong hu?
3 Stap talemaot nem blong Jeova long ol man i wan nambawan blesing we i bigwan tumas long ol man we oli no stretgud olgeta. !Yumi glad tumas blong talemaot God blong yumi long ol narafala, long rod ya yumi mekem ‘sakrifaes blong presem’ Jeova, olsem “ol yangfala buluk long maot blong yumi”! Blong leftemap tingting blong yumi blong talemaot gud nyus blong Kingdom long olgeta man tede, naoia yumi traem luklukgud wanem Baebol i talem long yumi long saed blong ol profet blong God mo ol narafala man blong Jeova. From laef blong olgeta, yumi save lanem plante samting we bambae i halpem yumi blong haremgud long wok blong prij.—Rom 15:4.
Wok Blong Ol Profet
4, 5. (a) Long ol stampa lanwis blong Baebol, ?wanem stret mining blong tok ya we oli tanem i kam “profet”? (b) ?Wanem i soem se ol profet oli gat wan impoten wok long plan blong God?
4 Ol profet blong Jeova oli kasem nambawan wok blong talemaot mesej blong hem long ol man. Stampa blong Hibru tok ya blong talem “profet” (na·viʼʹ) i no kliagud, be fasin blong Baebol blong yusum tok ya i soem se ol tru profet oli ol man we oli talemaot ol tok blong Jeova, ol man blong God wetem ol mesej we i kamaot long God. Grik tok ya blong talem “profet” (pro·pheʹtes) i minim “wan man we i talemaot,” i talem samting “long fored blong” no “long fes blong” wan man. Wan profet i wan man we i talemaot ol mesej we God i stampa blong olgeta. Plante taem, be i no oltaem, ol trufala profet blong God oli talemaot fyuja.
5 Long saed blong bigfala wok blong ol profet long plan blong God, M’Clintock and Strong’s Cyclopædia i talem se: “Samtaem ol man oli askem advaes long olgeta . . . Be plante taem olgeta nomo oli harem se oli mas talemaot long ol man, nating se ol man oli no bin askem advaes long olgeta, mo oli no fraet blong toktok long fored blong ol man long olgeta ples we, maet oli save mekem ol man ya oli kros mo oli fraet.” (Volyum 8, pej 640) Lukluk sam eksampel long wanem we i mekem ol profet oli gat tingting ya blong no fraet.
Ol Filing Mo Tingting We i Pusum Olgeta
6, 7. ?Jeova i mekem profet blong hem Esikel i kakae wanem, mo samting ya i mekem wanem long Esikel?
6 Bifo we ol ami oli spolem Jerusalem long 607 B.K.T., Jeova i toktok long ol man Jyu we oli kalabus long Babilon tru long profet blong hem Esikel. Jeova i talem long hem se: “Pikinini blong man, wanem we yu faenem, kakae. Kakae skrol ya, mo yu go, toktok long haos blong Isrel.” Esikel i obei. Hem i talem se: “Ale mi openem maot blong mi, mo sloslou hem i mekem mi kakae skrol ya. Mo hem i gohed blong talem long mi se: ‘Pikinini blong man, yu mas mekem bel blong yu i kakae, blong yu save fulumap ol gat blong yu wetem skrol ya we mi givim long yu.’ Mo mi stat blong kakae, mo i swit olsem hani long maot blong mi.”—Esikel 3:1-3.
7 Bodi blong yumi i kasem ol gudfala samting from ol kakae we yumi kakae, mo ol gudfala samting ya oli kam haf blong yumi. Sem mak, “skrol” ya we Esikel i kakae—mesej blong Jeova we profet ya i mas talemaot—i mas kam haf blong hem, i mas gat paoa long ol filing blong hem. Ol tok blong God oli tajem ol dip filing blong Esikel bigwan mekem se hem i harem i gud tumas long hem blong talemaot ol samting ya long ol man. ?Sipos yu yu wan Wetnes blong Jeova, yu yu haremgud tumas taem yu talemaot mesej blong God long ol man?
8, 9. ?Wanem i pusum Emos blong talemaot profet tok blong God?
8 Tingbaot profet Emos tu. Hem i stap laef long ol yia eit handred B.K.T., mo hem i wan long ol faswan Hibru profet blong raetem wan buk blong Baebol we i karem nem blong olgeta. Olsem Esikel, Emos i go stret blong talemaot tok blong Jeova. !Tingbaot, tok ya se “hemia nao wanem we Jeova i talem,” hem i talem bakegen 11 taem long buk ya we i karem nem blong hem! (Emos 1:3, 6, 9, 11, 13; 2:1, 4, 6; 3:12; 5:4; 7:17) Emos i harem se i gat nid blong talemaot tok blong God long ol man.
9 Profet blong God, Emos i kwik blong tekem aksin folem tok we i kamaot long God. Tru long Emos, God i talem se: “!I gat wan laeon i singaot! ?Hu bambae i no fraet? !Hae Masta Jeova hem wan i toktok! ?Hu bambae i no talemaot profet tok?” (Emos 3:8) I no gat samting i save blokem profet ya blong talemaot mesej blong Jeova.
10. ?Ol man blong Jeova tede oli mekem olsem wanem taem ol man oli agensem wok blong olgeta blong prij?
10 Long sem fasin olsem laeon, Jeova i talemaot strong ol mesej blong jajmen long rabis fasin blong wol blong naoia. Olsem Emos, ol man blong Jeova tede oli harem se oli mas go talemaot tok blong God long ol man. Mo tu, taem ol man oli agensem olgeta, oli folem eksampel blong aposol Pita mo Jon, we oli talemaot klia se: “Be mifala i no save stap kwaet. Mifala i mas gohed blong talemaot ol samting ya we mifala i luk long ae blong mifala, mo we mifala i harem long sora blong mifala.” Ol aposol tu oli talem strong se: “Mifala i mas obei long God, mifala i no save obei long ol man nomo.” (Ol Wok 4:20; 5:29) ?Olsem wanem long yumi? I gud yumi skelem filing blong yumi long wok ya blong talemaot nem blong Jeova long ol man.
“Ol Samting We Tingting Blong Hem i Fulap Long Hem”
11. ?Wanem i mas pusum yumi blong gohed blong talemaot nem blong Jeova long ol man?
11 I klia se ol profet blong Jeova oli gat tangkyu long nambawan wok ya blong olgeta. Sem mak, fasin tangkyu blong yumi long Jeova i mas pusum yumi blong talemaot nem blong hem long ol man. Ol Sam 145:1, 2 i talem se: “Hae God, yu yu God blong mi, mo yu yu king blong mi. Oltaem bambae mi stap talemaot hae nem blong yu, bambae mi stap talem tangkyu long yu oltaem, gogo i no save finis. Evri dei, bambae mi talem tangkyu long yu, bambae mi stap presem yu oltaem, gogo i no save finis.” ?Ol tok ya oli soemaot fasin blong yu? Baebol stadi we yumi mekem oltaem i givhan long yumi blong gat fasin tangkyu we i dip moa long wanem we Jeova i bin mekem, i stap mekem, mo bambae i mekem yet blong yumi. Mo taem yumi stadi Baebol wanples olsem wan famle, yumi faenem se Tok blong God i gat paoa, i stap mekem yumi wantem blong tokbaot hem mo ol stampa tingting blong hem, ?i tru? (Hibrus 4:12) Blong yumi mekemgud wok blong talemaot nem blong Jeova long ol man, yumi nidim tu blong yusum fulwan ol Kristin buk we Jeova God i givim long yumi tru long “slef ya we i stret mo waes.”—Matyu 24:45-47, NW.
12. ?Olsem wanem ol Kristin miting mo fasin blong tingting dip i save halpem yumi blong talemaot gud nyus long ol man?
12 Blong presem Jeova wetem fasin tangkyu we i kamaot long hat, yumi nidim blong go long ol Kristin miting oltaem. Olgeta man blong Jeova oli mas folem advaes blong aposol Pol se: ‘I gud yumi stap tingbaot yumi, blong yumi givgivhan long yumi blong mekem yumi strong blong laekem ol man, mo blong mekem ol gudfala fasin. I nogud yumi lego ol miting blong kongregesen, olsem we sam long yumi oli mekem finis. Oltaem yumi mas stap toktok long yumi blong mekem tingting blong yumi i kam strong moa, from we yumi luk we Dei ya we Masta blong yumi bambae i jajem olgeta man, hem i kam kolosap finis.’ (Hibrus 10:24, 25) ?Yu yu stap oltaem long ol Kristin miting? ?Plante taem yu tokbaot ol trutok blong Baebol, ol nambawan ekspiryens, mo ol nambawan nyus long saed blong ol tiokratik wok we i kam bigwan moa we yu harem long ol miting blong ol man blong God? Sipos yu no gat filing we yu wantem tokbaot Jeova mo ol stampa tingting blong hem, tekem taem blong tingting dip long Tok blong hem blong mekem se ol tingting blong hem i go dip insaed long hat blong yu. (Ol Sam 77:12; 143:5) Yes, ol Kristin miting mo fasin ya blong tingting dip oltaem long Tok blong God, tufala samting ya i mas halpem yu blong gat tangkyu long nambawan blesing we yu gat blong talemaot nem blong Jeova long ol man.
13. ?Olsem wanem yumi ‘mekem ol gudfala fasin oli kamaot’ long hat blong yumi?
13 Taem hat i fulap long fasin tangkyu long Jeova, yumi mekem ol gudfala fasin. Jisas i eksplenem se, “Gudfala man, we i fulap long ol gudfala tingting, hem i save mekem ol gudfala fasin, mo rabis man, we i fulap long rabis tingting, hem i save mekem ol rabis fasin. From we taem man i tok, hem i save talemaot ol samting we tingting blong hem i fulap long hem.” (Luk 6:45) ?Wanem gudfala rod we i save ‘mekem ol gudfala fasin oli kamaot’ bitim blong talemaot nem blong Jeova mo ol stampa tingting blong hem long ol man raonabaot long yumi, ol famle blong yumi—yes, long evriwan we yumi mitim olgeta?
Frut Blong Wok Ya Blong Talemaot Nem Blong God Long Ol Man
14. (a) ?Man we i talemaot mesej blong Kingdom mo man we i lesin oli save kasem wanem? (b) ?Wanem samting i stap kamaot from wok blong talemaot Kingdom?
14 Ol profet blong God oli faenem glad long wok blong olgeta, mo wanem we oli talem i givhan long olgeta we oli lesin. Sem mak, ol man we oli talemaot mesej blong Kingdom long ol man oli faenem bigfala glad long wok ya. (Ol Wok 20:35) !Mo i givhan bigwan long olgeta we oli glad blong lesin! Taem ol man oli akseptem gud nyus, i halpem olgeta blong agensem no winim tingting we i foldaon. Ol man we oli harem nogud long ol fren we oli ded, oli glad blong save se bambae oli laef bakegen long ded. Man we i dipen long nikotin, heroin, mo ol narafala samting, i no moa slef long ol samting ya. Plante oli mas kamaot long ol rabis fasin, mo olgeta we oli akseptem trutok blong Baebol oli kasem fasin fri long saed blong speret. (Jon 5:28, 29; 8:32) Wok blong talemaot Kingdom olsem hop ya nomo blong ol man i blong givim woning tu long ol rabis man, mo long semtaem i givim glad long olgeta we hat blong olgeta i stret. Taswe ol man oli stap seraot long wan blong tufala saed ya blong go ‘lus blong olwe’ no blong “kasem laef ya we i no save finis” taem jajmen blong God i kamtru long rabis wol ya. (Matyu 24:14; 25:31-46; Esikel 33:1-9; 1 Timote 2:3, 4) !Wok blong prij blong yumi i bigfala wok blong sevem man we i neva kamaot bifo, i go long plante moa ples mo i bigfala bitim eni narafala wok we i kamaot finis long wol ya!
15. ?Yumi save mekem wanem blong halpem ol man we oli stret blong kasem gud nyus long ol teritori we yumi prij long hem?
15 Olsem ol Wetnes blong Jeova tede, yumi wok strong olsem slef wetem glad mo fasin obei long Papa blong yumi long heven. (Rom 12:11) From samting ya, yumi glad blong putum wan taem blong joen oltaem long wok blong talemaot gud nyus long ol man mo long ol haos wanwan. (Ol Wok 5:42; 20:20) Ol ripot blong ful wol oli soemaot se i gat sam man yet we oli stret blong kasem gud nyus we oli stap long ol teritori blong yumi. Taem ol samting blong wol ya oli stap jenis, laef blong ol man i stap jenis long ol defren rod. Plante oli sek se oli mas ronwe long ples blong olgeta from trabol, oli kam olsem ol strenja long narafala kantri. Maet i gat sam long olgeta oli stap long teritori blong prij blong yumi. Sipos i olsem, yumi mas mekem wanem we yumi save mekem blong halpem olgeta long saed blong speret taem yumi gohed long ‘tabu wok ya blong talemaot gud nyus.’ (Rom 15:16) Sam Kristin oli bin lanem narafala lanwis blong oli save talemaot gud nyus blong Kingdom long ol man olsem.
16. ?Wanem i save halpem yumi blong gohed strong blong talemaot nem blong Jeova?
16 Plante profet blong God oli bin kasem ol wok we i strong tumas we oli mas mekem. I no isi long olgeta blong talemaot ol mesej blong God long ol man we oli no wantem lesin. Sem mak, i no evri man we oli givim laef blong olgeta long Jeova oli faenem i isi blong talemaot nem blong Hem long ol man, speseli long ol teritori we bighaf blong ol man oli no wantem lesin. Be, taem yumi gat strong tingting, we i kamaot from prea mo stadi long Tok blong God wetem paoa we Jeova i givim, yumi save gohed blong talemaot mesej blong Kingdom. (Filipae 4:13; Revelesen 14:6) Long saed ya, ?yumi save lanem wanem moa long ol profet blong Jeova mo ol narafala man blong hem long taem bifo?
Joen Wetem Narafala Long Minista Wok
17. ?Wanem sam eksampel blong Baebol we oli haremgud long kampani blong narafala taem oli mekem wok blong God?
17 Blong lukaotgud long wok we hem i mas mekem, profet blong God Moses i kasem help fastaem long bigfala brata blong hem, Eron. Jeova i talem long Moses se: “[Eron] bambae i man blong talemaot toktok blong yu long ol man. . . . bambae yu talemaot ol tok blong yu long hem blong hem i talemaot.” (Eksodas 4:16) Tingbaot tu, taem blong profet Elaeja mo Elaesa, taem “ol pikinini blong ol profet” oli kam plante. I luk olsem se hemia ol grup blong ol man blong God we oli bin wok tugeta, yumi save se oli haremgud long gudfala fasin joen blong olgeta. (2 King 2:3-5; 4:38; skelem wetem 1 Samuel 10:5, 10.) Yes i tru, Moses, Eron mo “ol pikinini blong ol profet” oli no mekem wok blong talemaot gud nyus blong Kingdom. Be, fasin blong olgeta blong joengud i mekem olgeta evriwan ya oli haremgud. Plante handred yia biaen, Jisas Kraes i sanem 70 disaepol blong mekem wok blong prij, “oli go tutu,” mo oli haremgud long kampani ya blong olgeta.—Luk 10:1-16; skelem wetem Ol Wok 17:10, 11; 20:20.
18. ?Olsem wanem fasin blong gat kampani long minista wok i givhan bigwan tede?
18 Long yia 1953, ol Wetnes blong Jeova oli stat folem plan ya we ol man blong talemaot Kingdom oli wok tugeta long minista wok. Oli no mekem olsem blong gat kampani nomo. Program ya blong trenem ol man blong God i blong mekem olgeta oli kamgud moa long fasin blong tij mo talemaot gud nyus. Wetem tingting long mak ya we oli wantem kasem, plante pablisa blong Kingdom we oli gat ekspiryens oli wok wetem ol nyuwan long minista wok. Program ya blong trenem olgeta long wok ya blong go long ol haos wanwan i bin mekem olgeta oli haremgud tumas, mo i bin halpem ol man blong Jeova blong kamgud moa blong talemaot nem blong hem long ol man. (1 Timote 4:16) Tede, fasin ya blong stap sef i wan narafala samting we i mekem se i waes blong ol Kristin oli “go tutu” long minista wok, speseli long sam eria.
19. ?Wanem tingting yumi mas gat long ol mak blong yumi long saed blong minista wok?
19 Nating se yu stap wok wetem wan narafala man blong bilif long minista wok no yu stap go yu wan long wan haos, traehad blong kasem wan mak we yu putum no mekem wan samting we yu tingting long hem finis. Mak ya i no mas hae tumas, we yu no save kasem. ?Yu nidim help blong jenisim fastok blong yu blong mekem se i pulum intres blong ol man long teritori blong yu? Sipos i olsem, maet yu save kampani wetem wan paenia, wan man we i talemaot Kingdom fultaem, no wan pablisa we maet hem i gat gudhan blong yusum ol gudfala fastok. Man we i kampani wetem yu i save halpem yu blong rere mo yusum ol fastok we i stap long Kingdom Wok Blong Yumi no buk ya Reasoning From the Scriptures. Samtaem, taem yutufala i prij tugeta long ol haos wanwan, lesingud olsem wanem fren blong yu i toktok. Biaen yu wan yu traem mekem i sem mak kasem we yu kamgud long haf ya blong minista wok blong yu.
20, 21. ?Olsem wanem fasin blong gat wan fren we yu wok wetem long minista wok i save givhan moa long yumi?
20 ?Olsem wanem sipos yu nidim help blong gat gudhan blong mekem ol visit bakegen wetem tingting blong statem wan Baebol stadi? Maet man we i stap lidim Buk Stadi blong yu, i save mekem plan blong yu prij wetem wan pablisa blong Kingdom we i gat gudhan blong statem ol Baebol stadi. Yu no mas stap kwaet nomo taem yutufala tugeta i mekem visit bakegen. Be, afta we fren blong yu i soem olsem wanem hem i mekem long wan visit, maet yu faenem se i gud blong mekem sem mak taem yu gobak long wan visit blong yu. Fren blong yu bambae i stap wetem yu blong givhan long yu mo givim advaes biaen.—Skelem wetem Galesia 6:6.
21 Lav mo help olsem we i kamaot long fren blong yu long wok blong prij i save halpem yu blong kasem mak we yu wantem kasem long minista wok. Help ya mo dip fasin tangkyu blong yu long kaengud fasin blong Jeova we i letem yu blong mekem nambawan wok ya, bambae i givhan long yu blong kam moa gud long wok blong yu blong prij long saed blong Kingdom. Mo i gud sipos oltaem yu tokbaot ol gudfala samting long saed blong Jeova mo talemaot nem blong hem long ol man, blong soem se yu tinghae tumas long nambawan blesing we yu gat blong presem hem.—Ol Sam 145:1, 2, 9-13.
22. ?Wanem ol kwestin we bambae i gat ansa blong hem long nekis stadi blong yumi?
22 Olsem ol Wetnes blong Jeova, yumi visitim ol man plante taem long wok ya blong yumi blong go long ol haos wanwan. Plante oli stap lesin long gud nyus wetem fasin tangkyu we i dip. Be, maet samfala oli no wantem lesin long mesej blong Kingdom. ?Yumi save mekem wanem taem i olsem? ?Olsem wanem yumi save gohed long wok ya we Jeova i givim long ol man blong hem blong mekem? ?Wanem ol eksampel blong Baebol we i save halpem mo lidim yumi? Nekis haf blong magasin ya bambae i ansa long ol kwestin ya.
?Yu Yu Kasem Ol Poen Ya?
◻ ?Hosea mo aposol Pol tufala i talem wanem long saed blong sakrifaes we i go long God?
◻ ?Wanem i pusum Esikel mo Emos blong talemaot profet tok we God i givim?
◻ ?Olsem wanem yumi mas tingbaot wok blong yumi blong talemaot Kingdom?
◻ ?Wanem gudfala samting i save kamaot taem yu gat wan fren wetem yu long minista wok?
[Tok blong pija long pej 13]
Kampani tugeta folem wan plan i save halpem yumi blong kamgud moa long minista wok