Folem Fasin Blong Ol Profet Blong God
‘Ol brata mo sista. I gud yufala i stap folem fasin blong ol profet ya bifo we oli stap tok long nem blong Jeova. Ol man oli mekem olgeta oli harem nogud tumas, be tingting blong olgeta i no foldaon. Long fasin ya olgeta oli soemaot wan gudfala rod long yumi.’—JEMES 5:10.
1. ?Wanem i halpem ol man blong Jeova blong stap glad nating se oli kasem trabol?
GLAD i stap saenaot long ol man blong Jeova nating se fasin blong harem nogud we i olsem tudak i kavremap olgeta ples long wol long ol lasdei ya. Oli glad olsem from we oli save se oli stap mekem God i glad. Ol Wetnes blong Jeova oli stap stanap strong tu nating se ol man oli mekem nogud mo agensem olgeta long minista wok blong olgeta, yes oli luksave se oli stap harem nogud from stret fasin. Jisas Kraes i talem long ol man blong hem se: “Olgeta we oli stap mekem ol stret fasin, be ol man oli stap ronem olgeta from, oli save haremgud, from we God i King blong olgeta. Yufala we ol man oli stap spolem nem blong yufala, oli stap ronem yufala, mo oli stap gyaman, oli stap talem ol rabis tok agens long yufala, from we yufala i man blong mi, yufala i save harem gud. Yufala i save hapi, yufala i save glad, from we i gat bigfala pei blong yufala i stap long heven. Olgeta bifo oli bin ronem ol profet ya we oli laef fastaem long yufala, long sem fasin nomo.” (Matyu 5:10-12) Yes, taem ol man blong God oli kasem ol traem from bilif, oli luk ol traem ya olsem samting blong haremgud from.—Jemes 1:2, 3.
2. Folem Jemes 5:10, ?wanem i save halpem yumi blong gat longfala tingting?
2 Disaepol Jemes i raetem se: ‘Ol brata mo sista. I gud yufala i stap folem fasin blong ol profet ya bifo we oli stap tok long nem blong Jeova. Ol man oli mekem olgeta oli harem nogud tumas, be tingting blong olgeta i no foldaon. Long fasin ya olgeta oli soemaot wan gudfala rod long yumi.’ (Jemes 5:10) W. F. Arndt mo F. W. Gingrich, tufala i talem mining blong Grik tok ya “fasin” (hy·poʹdeig·ma) olsem “eksampel, rod blong folem, fasin, olsem gudfala samt[ing] we i pusum no i mas pusum narafala blong folem.” Olsem we Jon 13:15 i soemaot, “hemia i moa long wan eksampel. I rili stampa rod blong folem.” (Theological Dictionary of the New Testament) Taswe, tede ol man blong Jeova oli save folem fasin blong ol profet ya long saed blong ‘harem nogud taem ol man oli agensem olgeta’ mo ‘tingting we i no foldaon.’ ?Yumi save kasem save long wanem narafala samting taem yumi stadi long laef blong olgeta? ?Mo olsem wanem samting ya i save halpem yumi long wok blong prij?
Oli Harem Nogud
3, 4. ?Profet Emos i mekem olsem wanem taem Amasaea i agensem hem?
3 Plante taem ol profet blong Jeova oli harem nogud taem ol man oli agensem olgeta no oli mekem i nogud long olgeta. Eksampel, long ol yia eit handred B.K.T., pris ya Amasaea we i stap wosip long aedol blong pikinini buluk, i yusum wan rabis rod blong agensem profet Emos. Amasaea i gyaman se Emos i mekem wan rabis plan agensem Jeroboam 2 taem i talemaot se king ya bambae i ded long naef blong faet mo se ol man Isrel bambae oli go kalabus. Wetem fasin we i no gat respek nating, Amasaea i talem long Emos se: “O man blong lukluk ol drim, yu go, yu ronwe i go long kantri blong Juda, mo long ples ya yu kakae bred, mo yu save talemaot profet tok long ples ya. Be yu mas no moa talemaot profet tok long Betel, from we i tabu ples blong wan king mo i haos blong wan kingdom.” Emos i no fraet long tok agens ya, hem i ansa se: “Bifo mi mi no wan profet, mo mi no pikinini blong wan profet tu; mi mi man blong lukaot ol anamol mo karem ol fig long tri ya sikamo. Mo Jeova i karemaot mi long wok ya blong lukaot long sipsip, mo Jeova i talem long mi se, ‘Go, talemaot profet tok long ol man blong mi Isrel.’ ”—Emos 7:10-15.
4 Speret blong Jeova i givim paoa long tingting blong Emos blong talemaot profet tok, we hem i no fraet. Tingbaot fasin blong Amasaea taem Emos i talem se: “Lesin long tok blong Jeova, ‘?Yu yu stap talem se: “Yu no mas talemaot tok blong God agens long ol man Isrel, mo yu no mas talem wan tok nating agens long haos blong Aesak”? From samting ya, hemia wanem we Jeova i talem: “Waef blong yu, bambae i kam woman blong rod long taon ya. Mo ol boe mo ol gel blong yu, bambae oli ded long naef blong faet. Mo yu luk graon blong yu, bambae oli yusum rop blong makem blong seraot i go long narafala. Mo long saed blong yu wan, bambae yu ded long doti graon; mo long saed blong Isrel, bambae oli aot long prapa graon blong olgeta blong oli go kalabus.” ’ ” Profet tok ya i kamtru. (Emos 7:16, 17) !Amasaea, man blong apostasi, i mas sek bigwan from!
5. ?Wanem samting i sem mak long ol man blong Jeova tede mo long taem blong profet Emos?
5 Samting ya i sem mak long ol man blong Jeova tede. Yumi harem nogud long plante fasin agens from we yumi talemaot ol mesej blong God, mo plante man oli tok nogud long saed blong wok blong yumi blong prij. I tru, wan kolej we i trenem ol man blong kam man blong skul i no givim pepa we i givim raet long yumi blong prij. Be, tabu speret blong Jeova i pusum yumi blong talemaot gud nyus blong Kingdom. Yumi no jenisim no daonem mesej blong God. Be, olsem Emos, yumi obei ale yumi talemaot mesej ya nating se ol man oli mekem olsem wanem long yumi.—2 Korin 2:15-17.
Tingting Blong Olgeta i No Foldaon
6, 7. (a) ?Wanem fasin Aesea i soemaot long wok blong hem olsem wan profet? (b) ?Olsem wanem ol man blong Jeova tede oli mekem olsem Aesea?
6 Ol profet blong God oli gat longfala tingting. Eksampel, Aesea i soemaot longfala tingting, hem i mekem wok olsem profet blong Jeova long ol yia 7 handred B.K.T. God i talem long hem se: “Yu go, mo yu mas talem long ol man ya se, ‘Lesin bakegen mo bakegen, yufala ol man, be yufala i no kasem save; mo lukluk bakegen mo bakegen, be yufala i no kasem save.’ Mekem hat blong ol man ya i no rere blong akseptem, mo mekem sora blong olgeta i no rere blong harem, mo blokem ae blong olgeta, blong oli no save lukluk wetem ae blong olgeta mo oli no save harem wetem sora blong olgeta, mo blong hat blong olgeta i no save kasem save mo blong oli no save tanraon blong kambak mo kasem help blong kamgud bakegen.” (Aesea 6:9, 10) I tru, ol man oli mekem olsem. ?Be samting ya i mekem Aesea i stop long wok blong hem? No gat, hem i gat longfala tingting mo i gohed blong wok strong blong talemaot ol woning long ol mesej blong Jeova. Fasin blong Hibru lanwis blong talem tok ya blong God we yumi jes ridim i sapotem tingting ya se ol profet oli “gohed longtaem” blong talemaot ol tok blong God, blong ol man oli harem “bakegen mo bakegen.”—Gesenius’ Hebrew Grammar.
7 Tede plante man taem oli harem gud nyus oli mekem sem mak olsem ol man oli mekem bifo, taem oli harem tok blong Jeova we Aesea i talemaot. Be yumi mekem sem mak olsem profet ya, yumi talemaot mesej blong Kingdom “bakegen mo bakegen.” Yumi wok strong long wok ya mo stap gohed long hem wetem longfala tingting from we hemia i wil blong Jeova.
‘Oli Mekem Stret Olsem God i Talem’
8, 9. ?Profet blong Jeova Moses i wan gudfala eksampel long wanem rod?
8 Profet Moses i wan gudfala eksampel long fasin ya blong gat longfala tingting mo fasin obei. Hem i jusum blong stanap long saed blong ol man Isrel we oli stap kalabus, be hem i mas wet wetem longfala tingting gogo kasem taem we oli kam fri. Ale, hem i laef long Midian blong 40 yia gogo kasem taem we God i yusum hem blong lidim ol man Isrel oli aot long ples ya blong wok slef. Taem Moses mo brata blong hem Eron tufala i stap fored long rula blong Ijip, oli obei long God, oli talemaot mo mekem wanem we God i talem. Yes, ‘oli mekem stret olsem God i talem.’—Eksodas 7:1-6; Hibrus 11:24-29.
9 Wetem longfala tingting, Moses i gohed blong stanap strong long ol 40 yia ya we laef i had, taem ol man Isrel oli stap long drae ples. Wetem fasin obei tu hem i folem oda blong God blong bildim haos tapolen blong Isrel mo mekem ol narafala samting we oli yusum blong wosip long Jeova. Profet ya i folemgud ol oda blong God, taswe yumi ridim se: “Moses i mekem evri samting ya, stret olsem we Hae God i talem.” (Eksodas 40:16) Taem yumi stap mekem minista wok blong yumi wetem ogenaesesen blong Jeova, i gud yumi tingbaot fasin obei blong Moses mo folem advaes blong Pol blong ‘obei long ol man we oli stap lidim yumi.’—Hibrus 13:17.
Oli Gat Gudfala Tingting
10, 11. (a) ?Wanem i soemaot se profet Hosea i gat gudfala tingting? (b) ?Olsem wanem yumi save gat gudfala tingting taem yumi mitim ol man long ol teritori blong yumi?
10 Ol profet ya oli nidim blong gat gudfala tingting taem oli talemaot ol mesej blong jajmen wetem ol profet tok we oli soemaot lav we God i gat long ol wanwan man blong bilif we oli stap olbaot long graon blong ol man Isrel. Samting ya i tru long Hosea, we i wan profet blong 59 yia. Wetem gudfala tingting, hem i stap gohed blong talemaot ol mesej blong Jeova mo i finisim buk blong ol profet tok blong hem wetem ol tok ya: “?Hu i waes, we i save kasem save ol samting ya? ?Hu i lukaotgud, blong hem i mas save olgeta? Ol rod blong Jeova oli stretgud, mo ol stret man oli ol man we bambae oli folem olgeta; be ol man we oli mekem sin oli ol man we bambae oli no folemgud olgeta.” (Hosea 14:9) Long ol taem ya we Jeova i letem yumi blong gohed blong givim wetnes, yumi mas gat wan gudfala tingting mo gohed blong stap lukaot olgeta we oli waes nao oli akseptem fasin kaengud blong God.
11 Blong ‘faenem ol gudfala man we oli stret blong harem mesej blong yumi,’ yumi nidim blong gohed long wok ya mo blong gat gudfala tingting long hem. (Matyu 10:11) Eksampel, sipos yumi lusum ki blong yumi, maet yumi folem bakegen rod blong yumi mo lukaotem long ol defren ples we yumi bin go long hem. Maet yumi save faenem nomo afta we yumi mekem olsem bakegen mo bakegen. Long sem fasin, yumi mas gohed blong lukaot olgeta we oli olsem sipsip. !Yumi glad tumas taem ol man oli lesin long gud nyus long teritori we yumi wok long hem plante taem! !Mo yumi glad tumas se God i stap blesem wok blong yumi long ol kantri we bifo oli putum tabu long minista wok blong yumi!—Galesia 6:10.
Oli Leftemap Tingting Blong Yumi
12. ?Wanem profet tok blong Joel i stap kamtru long ol yia biaen long 19 handred, mo olsem wanem?
12 Ol tok blong ol profet blong Jeova oli save leftemap tingting blong yumi bigwan long minista wok blong yumi. Eksampel, tingbaot profet tok blong Joel. Profet tok ya i fulap long ol mesej blong jajmen agensem ol man Isrel we oli mekem apostasi mo ol narafala long ol yia 8 handred B.K.T. Be, God i givim profet tok ya tu long Joel se: “Mo afta, bambae i mas hapen olsemia: Bambae mi mi kafsaedem speret blong mi long olkaen man, mo ol boe mo gel blong yufala bambae oli talemaot profet tok. Mo ol olfala man blong yufala, bambae oli drim long ol drim. Mo ol yang man blong yufala, bambae oli lukluk ol vison. Mo long taem ya, bambae mi kafsaedem speret blong mi long ol man blong wok mo ol gel blong wok tu.” (Joel 2:28, 29) Samting ya i kamtru long ol man blong Jisas stat long Pentekos 33 K.T. i go. !Mo long ol yia biaen long 19 handred yumi luk profet tok ya i kamtru long nambawan fasin! Tede yumi gat plante milyan we oli “talemaot profet tok,” no oli talemaot mesej blong Jeova—long olgeta ya i gat bitim 600,000 we oli mekem wok blong fultaem paenia.
13, 14. ?Wanem i save halpem ol yangfala Kristin blong faenem glad long wok blong prij?
13 Plante man we oli talemaot Kingdom oli ol yangfala. I no isi long olgeta blong tokbaot Baebol long ol olfala. Samtaem ol man oli talem long ol yangfala man blong Jeova se: ‘Yufala i stap westem taem blong yufala blong prij,’ no ‘I moa gud yufala i mekem wan narafala wok.’ Maet ol yangfala Wetnes blong Jeova oli save ansa wetem kaen fasin se oli sore we man ya i tingting olsem. Wan yangfala we i stap talemaot gud nyus i faenem se i gud blong ademap se: “Mi harem se i rili givhan long mi blong toktok long ol olfala olsem yu, mo mi laekem.” I tru ya, wok blong talemaot gud nyus i no wan wok we i westem taem. No gat. Laef blong ol man i stap long denja, i save lus. Tru long Joel, God i go moa blong talemaot se: “Mo tru, olgeta we oli singaot long nem blong Jeova bambae oli stap sef.”—Joel 2:32.
14 Ol pikinini we oli kampani wetem papa mama blong olgeta long wok blong talemaot Kingdom, oli glad taem papa mama i halpem olgeta blong putum ol mak blong olgeta wanwan. Sloslou ol yangfala ya oli kam moa gud stat taem oli save ridim wan vas long Baebol, go kasem we oli save eksplenem hop blong olgeta we i stanap long Baebol mo givimaot stret buk long ol man we oli intres. Taem oli luk se oli stap kamgud mo Jeova i blesem olgeta, ol yangfala pablisa blong Kingdom oli faenem bigfala glad long wok blong talemaot gud nyus.—Ol Sam 110:3; 148:12, 13.
Wok Strong Mo Tingting Blong Stap Wet
15. ?Olsem wanem eksampel blong Esikel i save halpem yumi blong wokem bakegen fasin ya blong wok strong long wok blong talemaot Kingdom?
15 Ol profet blong God oli soemaot gudfala eksampel blong wok strong mo tingting blong stap wet—ol fasin we yumi nidim long minista wok blong yumi tede. Taem yumi jes kasem save long trutok blong Baebol, ating yumi wok strong olsem we faea i laet long yumi blong talemaot trutok ya wetem strong tingting. Be stat long taem ya ating plante yia oli pas finis, mo maet yumi bin kavremap ol teritori we yumi stap prij long hem plante taem. Ating naoia smol namba blong man nomo i stap akseptem mesej blong Kingdom. ?Samting ya i daonem fasin blong yumi blong wok strong? Sipos i olsem, tingbaot profet Esikel, we nem blong hem i minim “God i Mekem Man i Kam Strong.” Nating se Esikel i fesem ol stronghed man blong Isrel bifo, God i mekem hem i kam strong mo i olsem we i mekem hed blong hem i strong bitim aean. Taswe, Esikel i save mekem minista wok blong hem long plante, plante yia nating se ol man oli lesin no oli no lesin. Eksampel blong hem i soem se yumi save mekem i sem mak, mo i save halpem yumi blong wokem bakegen fasin ya blong wok strong long wok blong prij.—Esikel 3:8, 9; 2 Timote 4:5.
16. ?Wanem tingting blong Maeka we yumi mas wokem?
16 I gud blong makem fasin ya blong gat longfala tingting, olsem Maeka, we i stap talemaot tok blong God long ol yia seven handred B.K.T. Hem i raetem se, “Mi, mi mas gohed blong lukaot Jeova. Bambae mi soemaot fasin blong stap wet long God ya we i save sevem mi. God blong mi bambae i harem mi.” (Maeka 7:7) Tras blong Maeka i kamaot from strong bilif blong hem. Olsem profet Aesea, Maeka i save se wanem we Jeova i tingting long hem, Hem bambae i mas mekem. Yumi save samting ya tu. (Aesea 55:11) From samting ya, yumi mas wokem fasin blong wet go kasem we God i mekem ol promes blong hem oli kamtru. Mo yumi mas wok strong long wok blong talemaot gud nyus, long ol ples tu we ol man oli no intres long mesej blong Kingdom.—Taetas 2:14; Jemes 5:7-10.
Stap Gat Longfala Tingting Tede
17, 18. ?Wanem eksampel blong bifo mo tede we i save halpem yumi blong gat longfala tingting?
17 Sam profet blong Jeova oli gat longfala tingting blong gohed long ol wok blong olgeta long plante yia be oli no luk ol profet tok blong olgeta i kamtru. Fasin ya blong olgeta blong stap gohed wetem longfala tingting, nating se plante taem oli harem nogud from ol man oli mekem nogud long olgeta, i halpem yumi blong luksave se yumi save gohed gogo yumi finisim minista wok blong yumi. Mo tu yumi save haremgud long eksampel blong ol man blong bilif we tabu speret i makemaot olgeta, long ol yia jes biaen long 19 handred. Nating se hop blong olgeta blong go long heven i no kamtru kwiktaem olsem we oli tingbaot, oli no letem tingting blong olgeta i foldaon from i luk olsem hop blong olgeta bambae i kamtru let, ale oli no tekem fasin blong no moa wok strong blong mekem wil blong God olsem we Hem i soemaot long olgeta.
18 Long plante yia, oltaem plante long ol Kristin ya oli seremaot Wajtaoa mo magasin we i joen wetem hem, Wekap! (fastaem nem blong hem The Golden Age mo biaen Consolation). Oli wok strong blong seremaot ol nambawan magasin ya long ol man long ol rod mo long haos blong olgeta wanwan olsem we yumi kolem tede se ol magasin rod. Wan olfala sista we i finisim laef blong hem long wol ya, ol man oli mestem hem kwiktaem from we oltaem oli luk hem i stap prij long rod. !Long plante yia we hem i holemstrong long wok ya hem i givim wan gudfala wetnes, taswe ol man we oli bin luk hem long minista wok blong hem, oli talem toktok blong soemaot fasin tangkyu blong olgeta! Olsem wan man blong talemaot Kingdom, ?yu yu givimaot Wajtaoa mo Wekap! oltaem long ol man we yu mitim olgeta long wok blong prij?
19. ?Hibrus 6:10-12 i talem wanem blong leftemap tingting blong yumi?
19 Tingbaot tu, longfala tingting mo fasin blong holemstrong long wok ya, blong ol brata we oli wok olsem ol memba blong Hed Kampani blong ol Wetnes blong Jeova. Naoia, sam long olgeta oli gat 90 no 100 yia, be oli gohed yet blong talemaot Kingdom mo oli wok strong blong lukaot long ol wok we oli mas mekem. (Hibrus 13:7) ?Mo olsem wanem long ol narafala olfala we oli gat hop blong go long heven mo samfala tu blong ol “narafala sipsip” we oli stap kam olfala nao? (Jon 10:16) Oli save sua se God i no wan rabis man we i save fogetem wok blong olgeta mo lav we oli bin soemaot long nem blong hem. Wetem ol yangfala brata sista blong olgeta, ol olfala Wetnes blong Jeova oli save gohed blong mekem wanem we oli save mekem, blong gat strong bilif mo soemaot longfala tingting long wok blong God. (Hibrus 6:10-12) Biaen, bambae oli kasem rij blesing ya blong laef we i no save finis, nating se long fasin blong laef bakegen, olsem ol profet blong bifo, no long fasin we bambae oli laef tru long “bigfala trabol,” we i kolosap nomo.—Matyu 24:21.
20. (a) ?Yu yu lanem wanem long “fasin” blong ol profet? (b) ?Olsem wanem longfala tingting olsem ol profet i save halpem yumi?
20 !Ol profet blong God oli soem nambawan fasin blong yumi folem! Oli stap stanap strong taem ol man oli mekem olgeta oli harem nogud, oli gat longfala tingting, mo oli soemaot ol narafala fasin blong God, from samting ya nao oli kasem nambawan wok ya blong talemaot tok long nem blong Jeova. Olsem ol Wetnes blong hem tede, yumi mas kam olsem olgeta mo soem strong tingting olsem profet Habakuk, we i talemaot se: “Long wok blong mi olsem wan gad bambae mi stap stanap, mo bambae mi gohed blong stanap antap long stonwol; bambae mi stap lukluk, blong luk wanem we [God] bambae i talem long mi.” (Habakuk 2:1) !Yumi mas gat semfala strong tingting taem yumi stap gat longfala tingting mo glad fulwan blong gohed blong talemaot nambawan nem blong Bigfala Man we i Wokem yumi, Jeova!—Nehemaea 8:10; Rom 10:10.
?Yu Yu Kasem Ol Poen Ya?
◻ ?Profet Emos i soemaot wanem eksampel we i soem se hem i no fraet nating?
◻ ?Profet Moses i wan gudfala eksampel long wanem rod?
◻ ?Olsem wanem ol man blong Jeova tede oli save mekem olsem Emos mo Aesea?
◻ ?Ol Kristin man blong talemaot tok blong God oli save lanem wanem long fasin blong Hosea mo Joel?
◻ ?Olsem wanem eksampel blong Esikel mo Maeka i save givhan long yumi?
[Tok blong pija long pej 16]
Nating se Amasaea i agensem Emos tumas, speret blong Jeova i givim paoa long hem blong talemaot profet tok we hem i no fraet
[Tok blong pija long pej 18]
Ol man blong bilif we tabu speret i makemaot olgeta oli bin soemaot gudfala eksampel blong gat longfala tingting long wok blong Jeova