Baebol—?I Impoten Olsem Wanem?

WAN man i talem se: “Baebol i wan tok haed, wan buk we oli no mekem blong yumi kasem save long hem.” Wan narafala man i talem se: “Mi mi save se Baebol i wan impoten buk, be mi no save plante samting we i stap insaed. I had blong kasem save long hem.”

The Toronto Star i talem se: “Plante Kristin oli save . . . smol nomo long saed blong Baebol.” Wan woman Katolik i talem se: “Mi haremgud from mi gat wan Baebol. Hem i mekem se mi gat pis insaed long mi.” Wan man blong kasem fis i talem se: “Baebol i olsem wan kampas we i save lidim man tru long laef, we i olsem solwora we i raf tumas, blong go long ples we i sefgud.” Wan man we bifo i wan Hindu, i talem se, “Baebol i Tok blong God, wan presen we Hem i givim long olgeta man, mo i mekem man we i harem nogud long saed blong speret i haremgud bakegen.”

Long plante ples ol man oli gat ol defren tingting long saed blong wok blong Baebol blong giv­han long yumi. ?Nating se i olsem, Baebol i impoten olsem wanem?

Baebol i wan buk we i moa impoten mo raonabaot long wol, oli seremaot hem moa bitim ol narafala buk long histri. Hem i givim ansa long ol bigfala problem we ol man oli stap fesem finis mo we bambae oli fesem yet. I no gat wan narafala buk we advaes blong hem i save wokgud olsem Baebol. I no gat sam rul we oli moa gud long saed blong stret fasin bitim ol rul blong Baebol. Mesej blong hem i gat bigfala paoa mo i mekem man i haremgud. Buk ya we i impoten moa long ol narafala buk, i gud yumi tekemaot long bokis blong yumi, tingtinggud mo stadigud long hem.

Yumi save openem Baebol wetem strong tingting se hem i stret olgeta, se yumi save trastem tok blong hem, mo hem i karem trutok. Ol man blong histri oli pruvum se ol store we Baebol i talem long saed blong ol samting we oli hapen long histri, oli tru. Bakegen mo bakegen, ol samting we ol akeolojisa oli faenem oli soem se Baebol i gat pruf mo hem i talem trutok. Ol 40 man no moa, we oli raetem Baebol, fasin blong olgeta blong talem ol tok we oli tru mo oli klia i makem se oli gat stret fasin mo oli fasgud long God. Ol tok blong Baebol we oli laenapgud oli soem se i no ol man nomo we oli stampa blong Baebol. Ol store we oli stap long hem, oli ol trufala store. Ol man we hem i tokbaot olgeta, oli tru. Ol ples mo ol taon we hem i tokbaot, oli tru. Antap moa, Baebol i gat ol nambawan profet tok we oli makemaot klia Jeova God olsem Hemia we i Raetem Baebol.​—⁠2 Pita 1:⁠21.

Bigfala Tija blong yumi i mekem sua se ol man we oli wantem kasem save long wil mo stampa tingting blong hem, oli mas kasem. Tru ya, Jeova i talemaot klia long yumi se hem i wantem se olgeta man oli stadi long Tok blong hem mo “kasem stret save long trutok.” (1 Timote 2:​3, 4, NW; Proveb 1:​5, 20-33) Hemia wan samting we i impoten moa bitim ol narafala samting we yumi save mekem long laef blong yumi. Fasin blong kasem stret save i wan responsabiliti we yumi mas fesem. Ol faswan Kristin oli save samting ya. Tabu speret i pusum wan long olgeta blong talem se: “Mi mi stap prea we oltaem bambae yufala i save kam we yufala i stap laeklaekem yufala moa. Mo mi prea we long fasin ya, oltaem bambae yufala i save kam waes moa, yufala i save haremsave moa. Nao bambae yufala i save jusumaot wanem fasin i stretgud olgeta.”​—⁠Filipae 1:​9, 10; Kolosi 1:​9, 10.

Baebol i bigfala rod we Man we i Wokem Olgeta Samting i yusum blong talemaot wil mo stampa tingting blong hem long famle blong olgeta man, mo Baebol i eksplenem olsem wanem yumi wanwan i save mekem laef blong yumi i laenap wetem stampa tingting ya. Hem i gat ol store blong ol samting we oli hapen bifo, mo i givim wan klia tingting long saed blong fyuja. Baebol i givim stret tijing mo i stretem tingting blong yumi long ol samting we yumi mas bilivim mo ol samting we yumi no mas bilivim. (Ol Wok 17:11; 2 Timote 3:​16, 17) Hem i givim ol rul long saed blong fasin we ol man oli mas folem, mo i soem rod we i save mekem ol man oli gohedgud mo oli glad. (Matyu, japta 5 kasem 7) Hem i soem se Kingdom blong God nomo i olsem hop blong olgeta man mo i soem olsem wanem gavman ya blong hem i wan tul blong mekem nem blong hem i tabu mo blong leftemap hae rul blong hem. Baebol i eksplenem rod we yumi mas folem blong gat gudfala fasin fren mo lav long Jeova, Man we i Givim Laef long yumi.

Antap long ol samting ya, Baebol nomo i buk ya we bambae i lidim yu blong kasem praes we i bigfala moa bitim ol narafala praes we ol man oli save kasem​—⁠laef we i no save finis long wan paradaes wol olsem ol man we oli stretgud olgeta. (Rom 6:23) Stret Pikinini blong Jeova, wan nomo we hem i gat, i talem long yumi se: “Hemia laef ya we i no save finis, we man i save yu, we yu nomo yu God tru, mo we man i save mi ya, Jisas Kraes, we yu yu sanem mi mi kam.” (Jon 17:⁠3) Tru ya, wan buk we i gat bigfala praes olsem i mas pusum yumi blong lanem samting we yumi mas mekem blong kasem presen ya blong laef we i no save finis. Baebol i wan buk we oli raetem blong yumi kasem save long hem, olsem nekis haf bambae i soem.

[Futnot]