Fraet Long Ded i Bigwan Tumas
San i godaon longtaem finis. Yu stap gobak long haos let lelebet. Taem yu go pas long beregraon, hat blong yu i stat pampam kwik lelebet. Ples i kwaet mo naet ya i tudak, mekem se yu harem evri smosmol noes. Wantaem nomo yu harem wan noes longwe, saon blong noes ya i antap mo i mekem yu yu fraet. Yu wokbaot kwik moa—hat blong yu i pam kwik tu—yu wokbaot blong go haed long haos.
?SAMTAEM yu yu bin gat filing blong fraet taem yu stap insaed no kolosap long beregraon? Sipos i olsem, maet wan tingting blong skul we i stap long olgeta ples long wol i bin gat paoa long yu—se speret blong ol dedman oli save halpem no spolem man we i laef.
Plante kastom we oli joen wetem ol gyaman tingting, oli kamaot from bilif ya se dedman i nidim man we i laef blong halpem hem mo se dedman i save spolem man we i laef sipos i no mekem hem i stap kwaet. Eksampel, long sam kantri blong Sentrol mo Saot Amerika, plante oli folem kastom blong bildim wan smol haos wetem wan kros, long ples we man we i akseden i ded long hem. Ol man oli laetem ol kandel mo putum ol flaoa long ples ya blong soem intres no blong halpem sol no speret blong dedman. Samtaem, oli mekem ol ripot se i gat “merikel” we i kamaot olsem ansa long ol prea we oli mekem, nao ol man oli stat kam oltaem long ples ya animita, smol haos ya blong sol no speret blong wan we i ded. Long ples ya oli mekem mandas, no ol promes, se sipos dedman bambae i halpem olgeta blong mekem no blong kasem samting—maet wan merikel blong winim sik—bambae oli soemaot fasin tangkyu blong olgeta long wan spesel rod. Be maet oli mekem wan defren ripot se sol blong man we i ded i stap kamaot long naet, i mekem olgeta we oli stap oli fraet. Long plante ples oli talem se ol sol olsem ya oli ol penando, oli stap mekem trabol long ol man we oli laef from ol samting we oli bin hapen bifo.
Long plante kantri, ol man oli mekem plante bigfala samting blong kwaetem “ol speret” blong dedman. Oli mekem ol bigfala lafet, givim sakrifaes, talem ol gudfala toktok—oli mekem ol samting ya blong blokem speret blong dedman blong i no panisim olgeta. Oli ting se sipos oli kwaetem speret ya, olgeta we oli stap laef yet bambae oli kasem ol blesing mo ol gudfala samting.
Wan ripot we i kamaot long Afrika i talem se, “Plante oli bilif se i no gat samting i kamaot ‘olbaot no olsem nomo.’ Eni samting we i kamaot—maet sik, disasta, no save karem pikinini, hadtaem long saed blong mane, tumas ren i foldaon no san i saen strong tumas, ol akseden, famle i seraot, ded—oli ting se ol speret we oli no save luk, we oli gat bigfala paoa bitim ol man, oli mekem ol trabol ya.” Wan narafala ripot i talem se: “Ol man oli bilif se speret blong ol olfala we oli ded oli stap long heven mo oli stap lukaotem ol famle blong olgeta we oli stap laef long wol. Oli bilif se ol olfala ya oli gat paoa blong ol speret man, we oli save yusum blong blesem mo blong lukaotgud long ol famle blong olgeta long wol no blong panisim olgeta, i dipen long fasin blong famle blong ona no blong no respektem dedman.”
?Be samting ya i laenap wetem Tok blong God? ?Wanem tingting blong yu?
[Tok blong pija long pej 4]
Wan “Animita” long Jili