Wan Rod Blong Laef We i Rili Gat Mining
OLSEM MELVA A. WIELAND I TALEM
Long Maj 1940, sam manis nomo afta we mi baptaes, sista blong mi, Phyllis, hem i kam kolosap long mi mo i askem se: “?From wanem yu no wantem mekem wok blong paenia?” Mi askem se: “?Wok blong paenia? ?Yu minim wok blong prij fultaem, kolosap evri dei?”
MI STAP tingting se, ‘?Olsem wanem mi save kam wan paenia, we mi gat smol save nomo long Baebol mo tu mi gat smol mane nomo long bang?’ Nating se i olsem, kwestin blong Phyllis i mekem tingting blong mi i wok. Mi prea plante long saed blong wok blong paenia.
Biaen, mi stap tingting se, ‘?From wanem mi no save trastem God, taem hem i promes se bambae hem i lukaotgud long yumi sipos yumi lukaot Kingdom blong hem fastaem?’ (Matyu 6:33) Taswe, long Jun 1940, mi askem blong livim wok blong mi we mi stap somap dres. Ale mi raet long branj ofis blong Watch Tower Society long Ostrelya, blong askem blong wok olsem wan paenia.
Wok We Mi Mekem Long Ful Laef Blong Mi
Tu wik biaen, mi kasem ansa, mo oli talemaot long mi se bambae oli sanem mi long wan ples afta we mi go long asembli we bambae mifala i mekem long yad blong hedkwota blong ol Wetnes blong Jeova long Stratfil, wan eria long bigfala taon blong Ostrelya, Sidne. Long moning, afta long asembli, mi go long ofis blong oli talemaot long mi ples we bambae mi go wok long hem.
Man we i stap long ofis ya i eksplenem se: “Stret naoia, mifala i bisi tumas long ples blong wasem klos. ?Yu yu wantem stap mo halpem mifala blong tu wik?” !Hemia long Ogis 1940—mo naoia, mi stap wok yet long ples blong wasem klos! Long taem ya, i gat 35 brata mo sista nomo long famle blong hedkwota; naoia i gat 276.
Be maet yu wantem save from wanem mi tingbaot wok long ples blong wasem klos olsem “wan rod blong laef we i rili gat mining,” antap moa, from we mi mekem wok ya bitim 50 yia finis. Bifo we mi eksplenem, i gud mi talem long yu ol samting we mi intres long hem taem mi yangfala.
Spot i Kam Wan Rod Blong Laef
Mi bon long Melbon long Janewari 1, 1914, mi fasbon long faef pikinini. Papa mama blong mifala, tufala i gat lav long mifala, tufala i folem ol strong rul mo tufala i stretem mifala sipos i nidim. Mo tu, mifala i folem wan samting we maet yumi save kolem se wan olbaot plan blong tijim mifala long saed blong skul, from we papa mama blong mifala, tufala i no stap go oltaem long jyos. Nating se i olsem, tufala i wantem se mifala ol pikinini, mifala i mas go oltaem long Sande skul long Anglikan Jyos.
Taem mi finis long skul long 1928 mo mi stat blong wok olsem wan woman blong somap, mi mekem disisen blong spenem bighaf blong fri taem blong mi blong plei spot, mo mi bilif se maet samting ya bambae i halpem mi blong winim fasin sem we mi gat. Mi joen long wan tim blong plei tenis mo mi plei long ful yia. Long koltaem, mi plei basketbol mo besbol tu, mo long hot taem, mi plei long kriket tim blong ol woman. Mi laekem kriket tumas, mo mi traehad blong kam moa gud, long fasin blong sakem bol we i spid, nao mi save kam inaf blong plei wetem ol tim blong defren ples.
Wan Plan We i Defren Long Spot
Taem mi pikinini nomo, tingting blong mi i trabol tumas long tijing ya se wan God we i gat lav i mekem wan ples we oli kolem hel, mo se ol man we oli mekem ol rabis fasin, bambae oli go long ples ya blong harem nogud blong olwe. Long tingting blong mi, tijing ya i krangke. Taswe, tingbaot glad blong mi, taem mi sek se mi stap lanem trufala mining blong “hel” long Baebol. Samting ya i kamaot olsem:
Sista blong mi, Phyllis, we i faef yia moa yang long mi, hem tu i laekem tumas blong plei spot, mo mitufala i stap long sem tim blong ol woman blong plei kriket. Long 1936 wan fren we hem i blong sem tim blong mifala i talemaot Phyllis long wan yangfala man we nem blong hem Jim, we ol man oli savegud hem olsem wan man we i strong long skul. Smoltaem biaen, Jim i stat blong tokbaot ol tijing blong Baebol long Phyllis. Phyllis i intres tumas. Hem i talem long mi se: “Mi harem se tijing ya i tru mo i gat mining.”
Long taem ya, mi mo Phyllis, mitufala i slip long sem rum long haos blong mifala, mo hem i traem blong pulum mi blong intres long samting we Jim i stap talem long hem long saed blong Kingdom blong God. Hem i talem long mi wetem strong filing se: “Bambae Kingdom ya i mekem ol samting we ol gavman blong man oli no naf blong mekem.” Be, mi agyu wetem hem, mi talem se, hemia i jes wan narafala skul blong mekem tingting blong yumi i fasfas mo se i no gat man i rili save long saed blong fyuja. Be Phyllis i strong mo i putum ol buk oli stap long evri ples insaed long rum, hem i hop se bambae mi ridim wan.
Mi wantem save from wanem Phyllis i laekem tumas nyufala bilif ya, taswe wan dei mi tekem wan buklet. I gat wan taetel we mi intres tumas long hem, hemia Hereafter. Taem mi openem ol pej blong buk mo mi luk tok ya “hel,” samting ya i pulum intres blong mi. Mi sapraes tumas, taem mi lanem se long Baebol, tok ya “hel” i minim beregraon blong ol man mo se ol gudfala man mo ol rabis man, evriwan bambae oli go long ples ya. Mi lanem tu se hel i no wan ples blong harem nogud; ol dedman oli no gat tingting mo oli no save filim wan samting nating.—Eklesiastis 9:5, 10; Ol Sam 146:3, 4.
Samting ya i gat mining long mi, antap moa, taem buklet ya i eksplenem se wan God blong lav we i gat bigfala paoa i mekem wan promes se bambae hem i givim laef bakegen long ol dedman tru long wan merikel we yumi kolem laef bakegen long ded. (Jon 5:28, 29) Naoia mi tu mi wantem faenemaot moa long saed blong ol samting we Jim i bin talem long Phyllis. Mi faenem smol King James Version we papa blong mi i bin givim long mi taem mi pikinini nomo, mo mi jekemap ol vas blong Baebol we oli stap insaed long buklet ya. Baebol i pruvum se ol samting we mi bin harem long saed blong hel mo ol dedman, oli tru.
Wan narafala nambawan samting we mi sapraes tumas long hem, hemia taem mi lanem se God i gat wan prapa nem blong hem se, Jeova. (Ol Sam 83:18) Mi save luk tu se God i gat wan stampa tingting no risen blong evri samting we hem i mekem no ol samting we hem i letem oli hapen. Samting ya i mekem mi mi askem mi wan se, ‘?Wanem nao stret plan blong mi blong laef?’ Stat long taem ya, mi stat blong tingting sipos bambae i gud long mi blong mi gohed strong long spot—we kolosap mi lego olgeta narafala samting long laef from.
Mi Jenis Folem Ol Disisen Blong Mi
Jim mo Phyllis, tufala i no save nating se tingting blong mi long saed blong fyuja i jenis bigwan, be tufala i faenemaot samting ya taem wan fren i askem mifala blong go long wan pati. Long taem ya, long ol pati olsem, evriwan we oli kam oli stanap, mo oli givim ona long King blong Engglan, mo evriwan oli leftemap glas blong olgeta mo oli dring blong soem ona long king. Be, mi mekem disisen blong sidaon nomo wetem Jim mo Phyllis. !Tufala i sapraes taem tufala i luk we mi stap sidaon yet! Tru ya, mifala i no minim se mifala i no soem respek, be mifala olsem ol Kristin, mifala i harem se mifala i no save tekem saed mo joen long ol lafet blong leftemap wan kantri bitim narafala kantri.—Jon 17:16.
Nating se i olsem, papa mama blong mi mo ol narafala famle blong mi, oli no glad nating. !Oli talem se mifala i no sapotem kantri, no mifala i krangke—no tufala wantaem! Biaen, taem mi mo Phyllis, mitufala i go long wan lafet we oli mekem evri yia blong givimaot praes long ol tim blong kriket blong ol woman, sem samting i hapen, taem oli mekem wan seremoni blong leftemap kantri. Samting we i kamaot se, mitufala evriwan i risaen long tim. Samting ya i no had olsem mi stap tingbaot, from we naoia mi kasem save se mi mas stap tru mo holemstrong long Jisas Kraes, King blong Kingdom blong God long heven.
Phyllis i eksplenem long mi se naoia, mi mas go long ol miting blong ol Wetnes blong Jeova oltaem blong mekem bilif blong mi i kam moa strong from ol save blong Baebol we mi save kasem. Long taem ya, i gat wan kongregesen nomo long Melbon, ale mi stat blong go long ol miting long evri Sande aftenun. Smoltaem biaen, mi bilif strong se hemia nao trufala ogenaesesen blong God long wol.
I no longtaem biaen, oli askem mi blong joen long wok blong kongregesen blong prij long ol haos wanwan. Fastaem, mi mi fraet, be long wan Sande moning, mi mekem disisen blong joen long wok ya jes blong luk olsem wanem oli mekem. Mi glad tumas taem oli askem mi blong go wetem wan Wetnes we i gat ekspiryens, we i toktok wetem strong bilif long faswan doa, mo man blong haos i glad tumas blong lesin long hem. Mi stap tingting se, ‘Yes, samting ya i no had tumas, be mi nidim plante trening bifo we mi save mekem i gud olsem.’ Ale tingbaot olsem wanem mi sapraes tumas, afta long faswan doa ya, taem Wetnes ya i talem long mi se, “Naoia, yu save prij yu wan.”
Mi askem we mi seksek se: “?Mi wan nomo? !Yu no tru! ?Bambae mi talem wanem sipos wan man i askem wan kwestin long mi mo mi no save ansa blong hem?” Be fren blong mi i no jenisim tingting. Taswe, mi prij mi wan we mi seksek tumas, mo hem i gohed blong prij long ol man long narasaed rod. Mi no save olsem wanem mi winim faswan moning ya.
Stat long taem ya, mi joen long wok blong prij long evri Sande moning. Taem wan man blong haos i askem kwestin long mi we mi no save givim ansa, mi talem long hem se, “Bambae mi go jekemap ansa blong hem mo kambak blong luk yu.” I gud tumas, Jeova i gohed blong givim paoa mo strong tingting long mi blong gohed long nyufala laef blong mi we i rili gat mining. Mi givim laef blong mi long hem, mo long Oktoba 1939, mi baptaes long wan pablik swiming pul long Melbon. Smoltaem biaen, Phyllis, we long taem ya i mared finis long Jim, i askem from wanem mi no stat blong mekem wok blong paenia.
Wok Long Branj
Long Janewari 1941, smoltaem afta we mi stat wok long branj ofis we mifala i kolem Betel, oli putum tabu long wok blong ol Wetnes blong Jeova long Ostrelya. Biaen, ol ami oli kontrolem Haos Betel blong mifala long Stratfil, mo mi go wok long plantesin blong Sosaeti long Ingelbon, samwe long 48 kilomita afsaed long Sidne. Long Jun 1943, kot i talem se Watch Tower Society i no gat fol, mo i tekemaot tabu we i stap. Long en blong sem yia ya, oli askem 25 long mifala blong gobak long Betel long Stratfil. Long Betel, mi gohed blong wok long ples blong wasem klos, mo blong mekem sam narafala wok blong haos.
I luk olsem se ten yia we i kam biaen i pas kwik nomo. Ale long 1956, mi maredem Ted Wieland, wan brata we i wok long Betel. Ted i wan man we i kwaet we i kwaet, i gat longfala tingting, mo mitufala i glad tumas taem oli askem mitufala blong gohed blong stap long Betel olsem hasban mo waef. Mitufala i tinghae long rod blong laef blong mitufala we i rili gat mining, mo mitufala i glad from jans blong wok long branj blong Ostrelya. Tru ya, antap long wok we mitufala i mekem long Betel, mitufala i glad blong wok tugeta blong halpem ol narafala blong kam disaepol blong Kraes. Wan eksampel, hemia famle Weekes we yu save ridim store blong olgeta long Wekap! blong Oktoba 22, 1993 (Engglis).
Wok blong talemaot Kingdom we i stap gru i mekem se 10 no 12 man nomo oli joen blong wok wetem mifala long faswan 30 yia we mi stap blong Betel. Be ol samting oli jenis kwiktaem long ol yia stat long 1970, taem mifala i stat blong prentem Wajtaoa mo Wekap! magasin long Ostrelya. Long Janewari 1972, oli stat blong bildim nyufala haos blong prentem buk. I no longtaem biaen, mifala i kasem wan mesin blong prentem buk we hevi blong hem i kasem 40 tan, we oli sanem i kam long Japan, mo long 1973, mifala i stap prentem kolosap 700,000 magasin long wan manis. Long taem ya, famle blong mifala long Betel i rili stat blong kam bigwan.
Ol yia stat long 1970, i wan taem tu we mi harem nogud tumas long hem. Fastaem, gudfala hasban blong mi, Ted, i ded long 1975, taem hem i gat 80 yia. Ale, i no wan yia biaen, olfala papa blong mi tu i ded. Jeova mo Tok blong hem, Baebol, mo ol brata sista blong mi long saed blong speret, oli mekem mi haremgud bigwan. Long sad taem ya, fasin blong mi blong stap bisi long ol wok long Betel, wok we i rili gat mining, i givhan bigwan long mi tu.
Nating se mi kasem ol trabol ya, laef i stap gohed nomo, mo bakegen, mi stat blong haremgud mo blong kasem blesing, olsem wan wido. Long 1978, mi go long wan asembli long London, Engglan, mo afta mi visitim wol hedkwota blong Watch Tower Society long Bruklin, Nyu Yok. Mi luk plante handred brata sista blong mi we oli stap wok wetem fasin glad long Betel long Bruklin, mo samting ya i stap oltaem long tingting blong mi blong givim paoa long mi kasem tede.
Kolosap long 1980, mifala i harem nyus se oli plan blong mekem Betel blong Ostrelya i kam bigwan moa. Be, wok ya bambae oli no mekem long Stratfil, from i no gat inaf ples blong mekem. Be, oli wokem wan nyufala haos, we i moa bigfala long graon blong Sosaeti long Ingelbon, ples ya we mi bin wok long hem taem oli putum tabu long wok blong mifala long ol yia stat long 1940.
Mi No Stop Blong Folem Rod Blong Laef We i Rili Gat Mining
!Long Janewari 1982, mifala i haremgud tumas taem mifala i muf i go long nyufala Betel blong mifala! Tru ya, fastaem mifala i sore lelebet taem mifala i livim ol gudfala garen we i stap raon long Betel, be smoltaem biaen, mifala i haremgud tumas long nyufala haos blong mifala we i gat 73 nambawan rum blong slip. Naoia, taem mifala i lukluk i go afsaed, mifala i no moa luk ol wol brikis mo ol rod blong taon, be mifala i luk ol garen we i grin mo ol tri, ol buluk, mo san we i girap mo i godaon we i naes tumas—ol nambawan samting we oli mekem mifala i haremgud tumas.
Long Maj 19, 1983, mifala i glad tumas blong dediketem nyufala bilding ya long wan naesfala dei, we i gat gudfala san long hem, hemia taem we ol lif blong tri oli stat folfoldaon. Lloyd Barry blong Hed Kampani blong ol Wetnes blong Jeova i givim tok blong dedikesen we i tajem hat blong mifala. Mi glad tumas blong luk hem mo waef blong hem we tufala i stap long program blong dedikesen, from we mi bin wok wetem tufala long Betel long Stratfil, taem we mifala i yangfala nomo.
Wok blong talemaot Kingdom we i stap gru, i mekem se oli mekem Betel long Ingelbon i kam bigfala moa bakegen. Long 1987, oli mekem ofis i kam bigfala moa. Biaen, long Novemba 25, 1989, mifala i dediketem wan nyufala haos blong slip we i gat faef store mo wan nyufala faktri we i gat tri store. !Namba blong ol pablisa long Ostrelya i kam antap bigwan tumas—taem mi jes statem Kristin minista wok blong mi, namba blong ol pablisa i no bitim 4,000, mo naoia i kasem 59,000!
I no longtaem i pas, oli mekem branj ofis long Ostrelya i kam wan long ol tri ‘Regional Engineering Offices’ blong Sosaeti, wetem Japan mo Jemani. Samting ya i mekem se oli mas wokem haos Betel i kam bigfala moa bakegen. Naoia oli jes finisim wan narafala bilding blong ol ofis we i gat tri store, mo kolosap oli finisim haos blong slip we i gat faef store, we bambae i gat 80 moa rum blong famle blong mifala we i stap gohed blong gru.
Long ples blong wasem klos, mifala i gat plante man blong mekem bigfala wok ya, be plante taem, mi tingbaot dei ya long Ogis long 1940, taem oli askem mi blong givhan blong mekem wok ya blong tu wik. Mi glad tumas se tufala wik ya i mekem se mi gohed blong bitim 50 yia mo se Jeova God i lidim ol trak blong leg blong mi long rod blong laef we i rili gat mining.
[Tok blong pija long pej 21]
Taem mi mi gat 25 yia
[Tok blong pija long pej 23]
Mared blong mitufala long 1956
[Tok blong pija long pej 24]
Long 1938 mi mo sista blong mi, mitufala i joen bigwan long spot, be naoia laef blong mi i karem moa frut