Laef Blong Yu—?Yu Givim Long Hu?
“Olgeta samting we Jeova i talem, mifala i glad blong mekem mo blong obei.”—EKSODAS 24:7, NW.
1, 2. (a) ?Sam man oli givim laef blong olgeta long wanem samting? (b) ?Ol man blong skul nomo oli save givim laef blong olgeta?
LONG Febuwari 1945, ol paelot blong ‘Yatabe Flying Corps’ (wan grup blong ol ami blong Japan), oli hivap wanples long wan bigfala rum. Oli givim pepa long wanwan long olgeta, blong oli fulumap sipos oli wantem kam memba blong kamikas ami, we oli rere blong lusum laef blong olgeta long faet. Wan haeman blong ami we i stap long taem ya i talem se: “Mi ting se oli singaot mi blong givim laef blong mi olsem sakrifaes long taem blong bigfala trabol blong nesen. Filing blong mi i pusum mi, nao mi givim laef blong mi long wok ya.” Hem i kasem trening blong go faet olsem wan paelot long wan Ohka (wan roket plen we hem i mas ded wetem) mo smasem plen ya long wan wosip blong ol enemi. Be, faet i finis bifo we hem i gat jans blong mekem samting ya, blong ded from kantri mo empera blong hem. Taem Japan i lus long faet, hem i lusum bilif long empera.
2 I gat wan taem, we plante man Japan oli givim laef blong olgeta long empera. Oli bilif se hem i wan god we i laef. Long ol narafala kantri, bifo mo naoia tu, ol man oli givim laef blong olgeta long ol narafala samting. Plante milyan man oli givim laef blong olgeta long Meri, Buda, no ol narafala god—plante taem, oli wokem ol aedol blong ol god ya. Sam man we fasin blong ol prija i gat paoa long filing blong olgeta, oli givim olgeta mane we oli traehad blong winim, long ol man blong prij long televisin. Oli sapotem ol prija ya wetem fulhat blong olgeta, i olsem we oli wosip long olgeta. Afta long faet, ol Japanis we tingting blong olgeta i foldaon, oli lukaot sam nyufala samting we oli save givim laef blong olgeta long hem. Nao, samfala, oli givim laef blong olgeta long wok. Long Is mo Wes, plante man oli givim laef blong olgeta blong hivimap ol rij samting. Ol yangfala oli mekem ol man blong plei myusek i kam nambawan long laef blong olgeta, mo oli folem laef stael blong ol man ya. Plante man tede, oli wosip long olgeta wanwan. Oli givim laef blong olgeta blong lukaot ol samting we olgeta nomo i wantem. (Filipae 3:19; 2 Timote 3:2) ?Be i stret we man i givim ful laef blong hem long ol man no ol samting olsem?
3. ?Olsem wanem sam samting we man i wosip long olgeta i no givhan nating long olgeta?
3 Taem ol man blong wosip long aedol oli fesem problem blong laef, plante taem, oli lusum bilif long ol aedol ya. From samting ya, oli harem nogud taem oli luksave se “ol man nomo oli wokem” ol aedol blong olgeta. (Ol Sam 115:4) Taem ol nogud fasin blong ol lida blong jyos i kam long klia ples, tingting blong ol man we hat blong olgeta i stret, i foldaon. Taem ekonomi i no moa rongud, ol wokman oli wari tumas taem oli luk se oli stap long lis blong ol man we oli lusum wok. Problem long saed blong ekonomi we i jes kamaot i no longtaem, i mekem se ol man blong wosip long Mamon oli rili fesem wan hadtaem. Bigfala kaon we oli mekem wetem tingting blong winim plante mane, i kam wan baden mo oli gat smol hop nomo blong pembak. (Matyu 6:24, futnot) Taem ol man blong rok myusek mo ol narafala pleplei oli ded, no oli lusum haenem blong olgeta, ol man we oli wosip long olgeta, oli stap olgeta nomo. Mo olgeta we oli stap mekem ol samting we olgeta nomo i wantem, plante taem, oli karem ol frut we oli konkon.—Galesia 6:7.
4. ?Wanem i pusum ol man blong givim laef blong olgeta long ol samting we oli no save givhan?
4 ?Wanem i pusum ol man blong givim laef blong olgeta long ol samting ya we oli no save givhan? Bigfala samting, hemia, speret blong wol we i stap long han blong Devel Setan. (Efesas 2:2, 3) Yumi save luk paoa blong speret ya long plante defren rod. Maet wan man i kam slef blong kastom blong famle we oli tekem long ol bubu blong olgeta. Maet edukesen mo trening we wan man i kasem taem hem i smol i gat bigfala paoa long tingting blong hem. Maet ol samting long ples blong wok oli pusum ol “koporet worios” (soldia blong wok) blong oli wok bitim mak. Samting ya i mekem se laef blong olgeta i stap long denja. Tingting blong wol long saed blong ol samting long laef i mekem se man i gat fasin blong wantem moa samting. Plante man, hat blong olgeta i nogud, mo i pusum olgeta blong givim laef blong olgeta blong lukaot ol samting we olgeta nomo i wantem. Oli no luklukgud sipos i stret we oli givim laef blong olgeta long ol samting olsem.
Wan Nesen We i Blong God
5. ?Bitim 3,500 yia bifo, olsem wanem sam man oli givim laef long Jeova?
5 Bitim 3,500 yia bifo, wan nesen i faenem wan fasin blong wosip we i moa gud. Oli givim laef blong olgeta long hae God, Jeova. Olsem wan grup, nesen blong Isrel i mekem samting ya long draeples blong Sinae.
6. ?Nem blong God i minim wanem long ol man Isrel?
6 ?Wanem i pusum ol man Isrel blong mekem olsem? Taem oli stap wok slef long Ijip, Jeova i talem long Moses blong lidim olgeta oli go fri. Moses i askem olsem wanem hem i save eksplenem God ya we i sanem hem. Mo God i talemaot hem wan olsem, “Mi Stap We Mi Stap.” Hem i askem long Moses blong talem long ol man Isrel se: “God ya we i sanem mi mi kam long yufala, nem blong hem ‘Mi Stap We Mi Stap.’ ” (Eksodas 3:13, 14) Tok ya i soem se Jeova i mekem eni samting we i nidim, blong ol stampa tingting blong hem oli kamtru. Hem i soem se hem i wan Man blong Fulumap ol promes long wan fasin we neva ol bubu blong ol man Isrel oli save.—Eksodas 6:2, 3.
7, 8. ?Wanem i pruvum long ol man Isrel se i stret blong oli wosip long Jeova God nomo?
7 Ol man Isrel oli luk ol Ten Trabol we i spolem kantri blong Ijip mo ol man blong hem. (Ol Sam 78:44-51) Biaen, long wan naet, ating bitim tri milyan man, ol woman mo ol pikinini tu, oli fulumap olting blong olgeta, mo oli aot long kantri blong Gosen. Wan bigfala samting ya. (Eksodas 12:37, 38) Afta, long Red Si, Jeova i soem se hem i “wan strong man blong faet” taem hem i sevem ol man blong hem long ol ami blong Fero. Ale, hem i seraotem wora, i letem ol man Isrel oli gokros, mo i mekem wora i kambak, i draonem ol man Ijip we oli stap biaenem olgeta. Olsemia nao, “ol man Isrel i luk strongfala han blong Jeova we i sevem olgeta long ol man Ijip; nao oli stat blong fraet long Jeova mo oli bilif long Jeova.”—Eksodas 14:31; 15:3; Ol Sam 136:10-15.
8 Olsem we ol man Isrel oli no gat inaf pruf long mining blong nem blong God, oli tok smosmol agens long Jeova mo we man blong wok blong Hem, Moses, taem oli sot long kakae mo wora. Jeova i sanem pijin blong oli kakae, i mekem mana i kamdaon olsem ren, mo i mekem wora i kamaot long ston long Meriba. (Eksodas 16:2-5, 12-15, 31; 17:2-7) Mo tu, Jeova i sevem ol man Isrel long ol man Amalek we oli kam faet agens long olgeta. (Eksodas 17:8-13) Olsem nao, ol man Isrel oli agri fulwan long tok we Jeova i talem long Moses, i se: “Jeova, Jeova, God we i gat sore mo gladhat, hem i slou blong kam kros, mo hem i fulap long kaengud fasin mo trutok, Hem i stap holem kaengud fasin long plante taosen man, mo i stap fogivim olgeta from ol mastik, ol rong, mo ol sin blong olgeta.” (Eksodas 34:6, 7) Tru ya, Jeova i pruvum se hem i wan God we oli mas wosip long hem.
9. ?From wanem Jeova i givim jans long ol man Isrel blong soemaot se oli givim laef blong olgeta blong mekem wok blong hem, mo oli mekem wanem?
9 Jeova i gat raet blong tekem ol man Isrel oli blong hem, from we hem i tekemaot olgeta long Ijip. Be, God we i kaen mo i gat fasin sore, hem i no mekem olsem. Hem i givim jans long olgeta blong soem se oli rili wantem mekem wok blong hem. (Dutronome 7:7, 8; 30:15-20) Mo tu, hem i talemaot ol samting we oli stap insaed long kontrak we hem i mekem wetem olgeta. (Eksodas 19:3-8; 20:1–23:33) Taem Moses i talemaot ol samting ya, ol man Isrel oli talem se: “Olgeta samting we Jeova i talem, mifala i glad blong mekem mo blong obei.” (Eksodas 24:3-7) From prapa jus blong olgeta, oli kam wan nesen we i blong Haefala Masta, Jeova.
Fasin Tangkyu i Pusum Yumi Blong Givim Laef Blong Yumi
10. ?Taem yumi givim laef blong yumi long Jeova, samting ya i mas stanap long wanem?
10 Jeova, Man we i Wokem olgeta samting, i stap olsem hemia we yumi mas wosip long hem wetem ful laef blong yumi. (Malakae 3:6; Matyu 22:37; Revelesen 4:11) Be, yumi givim laef long Jeova, i no from gyaman bilif, from filing blong smoltaem nomo, no from ol narafala oli fosem yumi—maet papa no mama. Samting ya i mas stanap long stret save long trutok long saed blong Jeova mo fasin tangkyu we yumi gat long ol samting we hem i mekem long yumi. (Rom 10:2; Kolosi 1:9, 10; 1 Timote 2:4) Jeova i givim jans long ol man Isrel blong soemaot se oli givim laef blong olgeta long hem. Ale i sem mak, hem i givim jans long yumi blong mekem olsem mo blong soemaot samting ya long fes blong olgeta man.—1 Pita 3:21.
11. ?Taem yumi stadi Baebol, yumi lanem wanem long saed blong Jeova?
11 Tru long Baebol stadi, yumi kasem save long God olsem wan man. Tok blong hem i halpem yumi blong luksave ol fasin blong hem, olsem ol wok blong hem oli soem. (Ol Sam 19:1-4) Mo tu, Tok blong hem i soem long yumi se hem i no tok haed ya Triniti, we i had blong man i kasem save. Hem i no save lus long faet, taswe i hem i no save lego posisen blong hem olsem God. (Eksodas 15:11; 1 Korin 8:5, 6; Revelesen 11:17, 18) From we hem i bin fulumap ol promes blong hem, samting ya i mekem yumi tingbaot mining blong naesfala nem blong hem, Jeova. Hem i wan Bigfala Man blong Mekem Promes i kamtru. (Jenesis 2:4, futnot; Ol Sam 83:18; Aesea 46:9-11) Taem yumi stadi long Baebol, yumi kasem save klia se hem i wan God we i tok tru oltaem mo yumi save trastem hem.—Dutronome 7:9; Ol Sam 19:7, 9; 111:7.
12. (a) ?Wanem i pulum yumi i kam long Jeova? (b) ?Olsem wanem ol trufala ekspiryens long Baebol i pusum wan man blong wantem mekem wok blong Jeova? (c) ?Yu gat wanem filing long saed blong wok blong Jeova?
12 Bigfala samting we i pulum yumi i kam long Jeova, hemia stampa fasin blong hem we i gat lav. Baebol i soem olsem wanem hem i gat lav, fasin fogif, mo fasin sore taem hem i stap wok wetem ol man. Tingbaot olsem wanem hem i blesem Job afta we Job i holemstrong long hem. Ekspiryens blong Job i soem se “Jeova i kaen tumas, mo hem i gat sore long man.” (Jemes 5:11, NW; Job 42:12-17) Tingbaot olsem wanem Jeova i mekem long Deved taem Deved i slip wetem woman blong narafala man mo i kilim man i ded. Yes, Jeova i rere blong fogivim ol bigfala sin tu, sipos man we i mekem sin i kam long hem wetem “hat we i harem nogud mo i trabol.” (Ol Sam 51:3-11, 17) Tingbaot fasin we Jeova i mekem long Sol blong Tasas, we fastaem hem i wan man we i strong blong ronem mo mekem nogud long ol man blong God. Ol eksampel ya oli makem fasin sore blong God mo se hem i rere oltaem blong yusum ol man we oli tanem tingting from sin blong olgeta. (1 Korin 15:9; 1 Timote 1:15, 16) Pol i harem se hem i save givim prapa laef blong hem blong mekem wok blong God ya we i gat lav. (Rom 14:8) ?Yu yu gat sem filing olsem?
13. ?Jeova i soem wanem bigfala fasin lav we i pusum ol man we hat blong olgeta i stret blong givim laef blong olgeta long hem?
13 Long ol man Isrel, Jeova i sevem olgeta taem oli stap slef long Ijip. Mo hem i rerem finis wan rod—ransom sakrifaes blong Jisas Kraes—blong mekem yumi fri long sin mo ded. (Jon 3:16) Pol i talem se: “God i laekem yumi tumas, mo i soemaot samting ya long yumi long fasin ya we Kraes i ded blong sevem yumi, long taem ya we yumi stap mekem i nogud yet.” (Rom 5:8) Nambawan plan ya i pusum olgeta we hat blong olgeta i stret, blong oli givim laef blong olgeta long Jeova tru long Jisas Kraes. “From we Kraes i laekem mifala tumas, nao fasin ya i stap [pusum] mifala. Mifala i luksave se hemia we i wan nomo, hem i ded finis blong sevem olgeta man. Nao from samting ya i olsem we olgeta man oli ded finis wetem hem. Hem i ded finis blong sevem olgeta man, blong bambae ol man we oli laef wetem hem oli no moa laef blong wokem ol bisnes blong olgeta nomo. Oli laef blong mekem ol wok blong hemia we i ded finis, mo i laef bakegen long ded, blong i sevem olgeta.”—2 Korin 5:14, 15; Rom 8:35-39.
14. ?Save long ol wok blong Jeova i naf blong pusum yumi blong givim laef blong yumi long hem? Eksplenem.
14 Be, i no naf we yumi kasem save nomo long stampa fasin blong Jeova mo ol samting we hem i mekem long yumi. Yumi wanwan i mas wokem fasin tangkyu long Jeova. ?Olsem wanem blong wokem fasin ya? Hemia taem yumi mekem Tok blong God i wok long laef blong yumi, mo yumi nomo i luksave se ol rul blong Baebol oli rili wokgud. (Aesea 48:17) Yumi mas gat filing se Jeova i sevem yumi finis long ol nogud fasin blong rabis wol ya we i stap aninit long rul blong Setan. (Lukluk 1 Korin 6:11.) Taem yumi stap traehad blong mekem ol samting we oli stret, yumi lanem blong dipen long Jeova, mo yumi kasem save se Jeova i God ya we i laef, we i stap “Harem Prea.” (Ol Sam 62:8, NW; 65:2) Smoltaem biaen, yumi harem se yumi stap kolosap nomo long hem mo yumi save talemaot ol dip filing blong yumi long hem. Dip lav we yumi gat long Jeova i gru insaed long yumi. Yes, bambae samting ya nao i lidim yumi blong givim laef blong yumi long Jeova.
15. ?Wanem i pusum wan man, we fastaem i givim laef long wok blong hem, blong mekem wok blong Jeova?
15 Plante man finis oli kasem save long Jeova, God ya we i gat lav. Nao oli givim laef blong olgeta blong mekem wok blong hem. Tingbaot eksampel ya blong wan man blong mekem lektrik we bisnes blong hem i wokgud. Samtaem, hem i stat wok long moning, i go kasem naet, mo i kamhom long faef klok long nekis moning. Afta we hem i spel samwe long wan haoa, hem i go mekem narafala wok bakegen. Hem i talem se: “Mi givim laef blong mi long wok blong mi.” Taem waef blong hem i stat blong stadi long Baebol, hem i kam joen wetem hem. Man ya i talem se: “Kam kasem naoia, ol god we mi save olgeta, oli jes wet long man blong mekem wok blong olgeta. Oli no mekem wan samting nating blong givhan long yumi. Be Jeova i tekem faswan step, i sanem Pikinini blong hem, wan nomo we hem i gat, i kam long wol, we i rili wan bigfala sakrifaes blong God hem wan.” (1 Jon 4:10, 19) Long ten manis, man ya i givim laef blong hem long Jeova. Afta, hem i gat strong tingting blong mekem wok blong God ya we i laef. Hem i stat blong mekem fultaem Kristin minista wok mo i muf i go blong wok long ples we i gat bigfala nid long hem. Olsem ol aposol, ‘hem i livim evri samting mo i folem Jisas.’ (Matyu 19:27) Afta long tu manis, oli singaot hem mo waef blong hem blong go wok long branj blong Watch Tower Bible and Tract Society long kantri we tufala i stap long hem. Long ples ya, hem i save givhan blong mekem wok long saed blong lektrik. Bitim 20 yia finis, hem i stap wok long branj. Hem i stap mekem wok we hem i laekem tumas—i no blong hem wan, be i blong Jeova.
Soemaot Se Yu Givim Laef Blong Yu Long Jeova
16. ?Wanem sam samting we man i mas mekem bifo we hem i givim laef blong hem long Jeova?
16 Afta we oli stadi long Baebol, ol yangfala mo ol olfala, bambae oli laekem Jeova mo ol samting we hem i mekem long olgeta. Samting ya i mas pusum olgeta blong givim laef blong olgeta long God. Maet yu yu wan long olgeta ya. ?Olsem wanem yu save givim laef blong yu long Jeova? Afta we yu lanem ol stret save long Baebol, yu mas mekem ol save ya oli wok mo soemaot bilif long Jeova mo Jisas Kraes. (Jon 17:3) Yu mas tanem tingting from sin blong yu mo tanem baksaed long eni fasin nogud we yu bin mekem bifo. (Ol Wok 3:19) Nao bambae yu kasem mak blong givim laef blong yu long Jeova, tru long ol tabu wod blong prea. Yes, prea ya bambae i gat paoa long tingting blong yu blong olwe. From we hem i makem stat blong wan nyufala fasin fren wetem Jeova.
17. (a) ?From wanem ol elda oli askem bakegen sam kwestin long olgeta we oli jes givim laef blong olgeta long Jeova? (b) ?Wanem impoten samting we wan man i mas mekem smoltaem afta we hem i givim laef blong hem long Jeova, mo from wanem?
17 Moses i eksplenem long ol man Isrel ol samting we oli stap insaed long kontrak blong frengud wetem Jeova. Long sem fasin, ol elda long ol kongregesen blong ol Wetnes blong Jeova, oli halpem olgeta we oli jes givim laef blong olgeta long Jeova, blong luksave ol samting we oli joen wetem fasin ya. Oli askem sam kwestin we oli rerem finis blong mekem sua se evri man oli savegud ol stampa tijing blong Baebol mo ol samting we wan Wetnes blong Jeova i mas mekem. Biaen, i stret blong mekem wan spesel miting blong oli soemaot se oli givim laef blong olgeta long Jeova. Hemia we i jes givim laef blong hem long God i wantem tumas blong soemaot long ol narafala se naoia hem i gat nambawan fasin fren wetem Jeova. (Lukluk Jeremaea 9:24.) Blong mekem olsem, hem i mas tekem baptaes long wora. Taem hem i go aninit long wora mo i kamaot bakegen, samting ya i blong soem se hem i ded long olfala fasin blong hem mo i girap long wan nyufala fasin blong laef. Hemia blong mekem wil blong God. Seremoni ya i no wan tabu samting, no wan kastom blong skul olsem hemia blong ol Sinto we oli kolem misogi we oli yusum wora blong wasemaot doti long man.a Be, baptaes i blong soem long ol man se yumi givim laef blong yumi finis long God tru long prea.
18. ?From wanem yumi sua se taem yumi givim laef blong yumi long Jeova, samting ya i no blong nating nomo?
18 Spesel taem ya i wan ekspiryens we nyufala man blong wok blong God i no save fogetem. Samting ya i mekem hem i tingbaot fasin fren blong hem wetem Jeova we i blong olwe. I defren long fasin blong givim laef, we wan kamikas paelot i mekem, from kantri mo empera blong hem. Fasin blong givim laef long Jeova bambae i no blong nating nomo. From we Jeova, hem i itenel God mo i gat olgeta paoa. Hem i mekem olgeta samting we hem i plan blong mekem. Hem nomo, yumi mas wosip long hem wetem ful laef blong yumi.—Aesea 55:9-11.
19. ?Bambae yumi tokbaot wanem poen long nekis haf?
19 Be, i gat plante samting yet we oli joen wetem fasin blong givim laef long God. Eksampel, ?olsem wanem fasin ya i save gat paoa long evri dei laef blong yumi? Bambae yumi tokbaot poen ya long nekis haf.
[Futnot]
a Lukluk Mankind’s Search for God, we Watchtower Bible and Tract Society of New York, Inc. i prentem, long pej 194 kasem 195.
?Yu Yu Tingbaot?
◻ ?From wanem fasin blong givim laef, we HS.1yumi luk long ol man long wol i mekem se oli harem nogud?
◻ ?Wanem i pusum ol man Isrel blong givim laef blong olgeta long Jeova?
◻ ?Wanem i pusum yumi tede blong givim laef blong yumi long Jeova?
◻ ?Olsem wanem yumi save givim laef blong yumi long God?
◻ ?Wanem mining blong baptaes long wora?
[Tok blong pija long pej 10]
Long Sinae, ol man Isrel oli givim laef blong olgeta long Jeova