?Wanem Gudfala Samting i Save Kamaot From Fasin Blong Tokbaot Skul?
OL PAPA MAMA oli wantem tumas blong harem faswan tok we bebi blong tufala bambae i talem. Taem oli harem wan smol tok we i kamaot long medel blong ol narafala noes we bebi i mekem, ating tok olsem “Mama” no “Papa,” hat blong tufala i kam fulap wetem glad. Kwiktaem oli wantem talemaot samting ya long wan fren no wan man we i stap kolosap. Ol fasfala toktok we bebi i talem, oli rili wan gudfala nyus we i mekem tufala i glad.
Ol samting we smol bebi ya i harem, lukluk, mo smelem, i pulum hem blong ansa. I tru, wan bebi i gat ol defren fasin blong ansa. Be, sipos afta we taem i pas, wan pikinini i no ansa long olgeta samting we i stap hapen raonabaot long hem, bambae papa mama oli wari se pikinini blong tufala i no stap gru gud.
Ol bebi oli ansa moa long olgeta we oli savegud olgeta. Taem mama i holem bebi long fasin we i soem lav, kolosap oltaem bebi i smael bigwan. Be, taem wan narafala memba blong famle i kam long haos, ale i tajem bebi ya, hem i save krae, mo hem i no wantem we man ya i holem hem tu. Be ating oli no stop blong toktok long bebi ya mo tajem hem. Nao taem bebi i savegud olgeta, sloslou hem i tekemaot fenis we i stap bitwin long hem mo olgeta, ale oli glad tumas taem bebi i smael long olgeta.
Long sem fasin, plante bigman oli no wantem tokbaot skul blong olgeta long eniman we oli no save hem longtaem finis. Maet oli no kasem save from wanem wan strenja i wantem tokbaot wan bisnes we i blong olgeta nomo—skul. From samting ya, oli putum wan fenis bitwin olgeta mo ol man we oli stap tokbaot Man we i Wokem olgeta samting. Antap long hemia, oli no wantem tokbaot samting we man i bon wetem, hemia fasin blong wantem wosip.
I stret we yumi intres blong lanem moa long saed blong Man ya we i Wokem olgeta samting. Sipos yumi storeyan wetem ol narafala, yumi save lanem moa. Samting ya i olsem, from we longtaem finis, God i joen long fasin blong toktokgud wetem narafala. Naoia yumi luk olsem wanem.
‘Lesin Mo Kasem Save’
Fastaem we God i toktok wetem wan man, hemia taem hem i toktok wetem Adam, long garen blong Iden. Be, afta we Adam mo Iv tufala i sin, tufala i laekem moa blong haed taem God i singaotem tufala blong storeyan moa wetem tufala. (Jenesis 3:8-13) Nating se tufala i olsem, Baebol i tokbaot sam narafala man mo woman we oli glad blong toktok wetem God.
God i toktok wetem Noa blong talem long hem se bambae Hem i spolem rabis wol long taem blong hem. Biaen, Noa i kam wan “man blong talemaot stret fasin.” (2 Pita 2:5) Noa, we i olsem man blong talemaot tok blong God long ol man long taem blong hem, hem i soemaot bilif long ol samting we God i talem se bambae hem i mekem long ol man. Mo antap long hemia, Noa i talemaot long olgeta man raonabaot se hem i stap long saed blong Jeova. ?Noa i kasem wanem ansa? Sore tumas, kolosap olgeta man long taem blong hem oli “no lesin, kamkam we wora i ron bigfala, i tekemaot olgeta.” (Matyu 24:37-39) Be yumi glad se seven memba blong famle blong Noa oli lesin, oli obei long ol tok blong God, mo oli sef tru long taem we wora i kavremap wol. Evri man we oli laef tede, oli kamaot long olgeta ya.
Biaen, God i toktok wetem wan ful nesen blong man, hemia Isrel blong bifo. Tru long Moses, God i givim ol Ten Komanmen long olgeta mo kolosap 600 narafala loa we oli impoten sem mak long Ten Komanmen. Jeova i wantem we ol man Isrel oli obei long olgeta loa ya. Moses i talem long olgeta se evri seven yia, long taem blong Lafet blong ol Wansaed Haos, oli mas ridimaot olgeta Loa blong God long ol man. Hem i talem se, “Yu mas hivimap olgeta, ol man, ol woman, mo ol smol pikinini, wetem ol strenja we oli stap long ol taon blong yu.” ?Blong mekem wanem? “Blong oli save lesingud mo oli save kasem save. From we oli mas fraetgud long Jeova, God blong yufala, mo oli mas lukaotgud blong obei long olgeta tok blong loa ya.” Oli mas lesin mo kasem save. !Tingbaot olsem wanem ating oli glad tumas blong tokbaot ol samting we oli bin harem!—Dutronome 31:10-12.
Bitim faef handred yia biaen, king blong Juda, Jeosafat, i singaot ol prins mo ol man Livae blong folem wan plan blong stanemap klin wosip blong Jeova bakegen. Ol man ya oli wokbaot tru long olgeta taon blong Juda, ale oli tijim ol loa blong Jeova long ol man ples. Taem king ya i mekem plan blong oli tokbaot ol loa ya long open ples, hem i soemaot se hem i stanap long saed blong tru wosip. Long saed blong ol man we oli stap aninit long rul blong hem, oli mas lesin mo kasem save.—2 Kronikel 17:1-6, 9.
Toktok Blong Givim Wetnes
God i sanem stret Pikinini blong hem, Jisas, long wol, blong mekem wok olsem Man blong talemaot Tok blong Hem. (Jon 1:14) Taem trifala disaepol blong Jisas oli luk we bodi blong hem i jenis long fored blong olgeta, oli harem prapa voes blong God we i talemaot se: “Hemia Pikinini blong mi, we mi laekem hem tumas, tingting blong mi i harem gud tumas long hem. Yufala i mas lesingud long hem.” (Matyu 17:5) Olgeta ya oli obei kwiktaem.
Long sem fasin, Jisas i talem long ol aposol blong hem, blong go talemaot ol stampa tingting blong God long ol narafala man. Be taem kolosap sikis manis nomo i stap blong Jisas i mekem wok blong prij long wol, hem i talemaot se wok blong prij long saed blong Kingdom blong heven i bigwan tumas, mekem se i nidim plante moa disaepol. Nao hem i tijim 70 man olsem wanem blong tokbaot Kingdom blong God wetem ol strenja, mo biaen hem i sanem olgeta blong oli talemaot mesej ya long ol man. (Luk 10:1, 2, 9) Smoltaem bifo we hem i gobak long Papa blong hem long heven, Jisas i pulum ol man blong hem blong traehad blong faenem ol man we oli save tokbaot mesej ya long olgeta. Hem i givim oda ya long olgeta se: “Yufala i mas go long ol man long olgeta ples long wol, blong pulum olgeta oli kam man blong mi. . . . tijim olgeta blong oli folem olgeta tok ya we mi mi givim finis long yufala.” (Matyu 28:19, 20) Tede, long olgeta ples blong wol, ol trufala Kristin oli folem oda ya taem oli talemaot gud nyus blong Kingdom blong God long olgeta man raonabaot. Ol storeyan olsem oli mekem se oli gat jans blong wetnes long ol trutok long saed blong Man we i Wokem olgeta samting, Jeova.—Matyu 24:14.
Ol Kwaet Storeyan We Oli Leftemap Tingting Blong Man
?Ol disaepol blong Jisas oli mas gat wanem fasin taem oli tokbaot bilif blong olgeta long ol narafala? Oli no mas mekem ol man we oli agens oli kam kros moa, mo oli no mas rao wetem olgeta. Long defren fasin, oli mas faenem olgeta we oli wantem harem gud nyus, nao biaen oli save yusum ol tok blong Baebol blong sapotem gud nyus ya. God i luk wanem we ol man oli mekem taem oli mitim ol disaepol blong Pikinini blong hem, olsem Jisas i talemaot se: “Man we i tekem yufala i go insaed long haos blong hem, i olsem we hem i tekem mi mi go insaed. Mo man we i tekem mi mi go insaed long haos blong hem i olsem we hem i tekem hemia tu we i sanem mi, i go insaed.” (Matyu 10:40) !Taem bighaf blong ol man long taem blong Jisas oli sakemaot mesej blong hem, hemia i wan strong fasin blong sakemaot God!
Kristin aposol Pol i givim advaes ya se, “Man blong wok blong Masta blong yumi, hem bambae i no man blong faet.” Defren olgeta, “hem i mas wan man blong mekem i gud long olgeta man, wan gudfala man blong tij, we tingting blong hem i longfala. Hem i mas wan man we i save stretem ol man we oli agens long hem, long fasin we i kwaet nomo. Maet God bambae i givim jans long ol man ya, blong oli tanem tingting blong olgeta from ol sin blong olgeta, blong kam we oli save ol trutok.” (2 Timote 2:24, 25) Fasin we Pol i soem taem hem i talemaot gud nyus long ol man Atens, long Gris, i wan nambawan eksampel. Long haos prea blong olgeta, hem i pulum tingting blong ol man Jyu taem hem i eksplenemgud ol samting. Evri dei long ples blong maket hem i toktok wetem “ol man olbaot.” Nating se samfala oli jes wantem lesin nomo long ol nyufala tingting, Pol i tok stret mo wetem kaen fasin. Hem i storeyan wetem ol man we oli lesin, long saed blong mesej blong God, we i givim woning long olgeta blong tanem tingting blong olgeta from ol sin blong olgeta. Fasin we ol man ya oli mekem long hem i sem mak olsem fasin blong ol man tede. “Sam man oli laf nomo long hem. Be sam man oli talem se, ‘Bambae mifala i harem tok blong yu nekis taem long bisnes ya.’ ” Ale Pol i no traem gohed blong storeyan wetem olgeta ya. Taem hem i talemaot mesej blong hem finis, hem i “goaot long miting ya.”—Ol Wok 17:16-34.
Biaen, Pol i talem long ol memba blong Kristin kongregesen long Efesas se ‘taem hem i stap talemaot gud nyus long fes blong ol man, hem i no haedem sam samting we i save givhan long olgeta. Hem i talemaot evri samting long olgeta.’ Antap long samting ya, ‘long fes blong ol man Isrel mo ol hiten man tu, mi talem stret se oli mas tanem tingting blong olgeta from ol sin blong olgeta blong kam long God, mo oli mas bilif long Jisas, Masta blong yumi.’—Ol Wok 20:20, 21.
Ol eksampel ya long Baebol, oli soemaot olsem wanem ol man blong wok blong God we oli gat strong bilif, oli tokbaot skul long taem bifo. Taswe tede tu, Ol Wetnes blong Jeova oli obei long God, oli tokbaot skul wetem ol man raonabaot long olgeta.
Ol Storeyan We Oli Karem Frut
‘Harem ol Tok blong God.’ ‘Lesin long ol oda blong hem.’ !Plante taem ol tok ya oli kamaot long Baebol! Yu save ansa long ol tok ya blong Baebol nekis taem Ol Wetnes blong Jeova oli toktok wetem yu. Lesin long mesej blong Baebol we oli stap talemaot long yu. Mesej ya i no long saed blong politik, be hem i talemaot wan gavman blong God long heven, Kingdom blong hem. Hemia nao rod blong God blong finisim ol samting we oli mekem faet i kamaot tede. (Daniel 2:44) Biaen, gavman ya blong God long heven, bambae i lidim wok blong mekem ful wol i kam wan paradaes, olsem garen blong Iden.
Wan man we bifo i wan polis, plante taem i tanem baksaed long Ol Wetnes blong Jeova taem oli wantem tokbaot Baebol wetem hem. Biaen, taem hem i luk we ol fasin blong brekem loa oli kam antap, hem i harem nogud long laef blong hem. Nekis taem wan Wetnes i kam long haos blong hem, hem i talem se hem i glad blong lukluk moa long ol pruf long saed blong mesej blong Baebol. Biaen, oli storeyan plante taem. Nating se polisman ya i jenisim haos we hem i stap long hem plante taem, be ol Wetnes oli traehad blong faenem hem evri taem, mo oli gohed blong storeyan wetem hem. Afta we sam taem i pas, polisman ya i luksave, i se: “Olgeta pruf we mi bin traehad blong faenem, oli stap long Baebol longtaem finis. Sipos ol Wetnes ya oli no bin gohed blong toktok wetem mi, ating mi stap traem blong faenem yet, mining blong laef. Naoia mi kasem save long trutok, mo bambae mi yusum olgeta yia blong laef blong mi we oli stap yet, blong traem lukaotem ol narafala man we oli stap traem blong faenem God, olsem we mi bin mekem.”
Ol man we oli intres long wanem we oli harem, oli rili wantem save moa. I stret nomo we oli wantem pruf blong ol bilif we oli harem. (1 Pita 3:15) Olsem wan pikinini we i askem plante kwestin long papa mama blong hem mo i wantem se oli ansarem olgeta, i stret we yu tu yu wantem se ol Wetnes oli givim ol stret ansa long yu. Yu save sua se bambae oli glad blong kambak mo gohed blong storeyan wetem yu long mesej blong Baebol.
Maet yu gat sam save finis long saed blong Baebol. Maet yu luksave se yu nidim blong jenisim sam fasin long laef blong yu, blong mekem samting we God i wantem. Yu no mas tekem taem tumas, from we yu fraet long ol samting ya we yu mas mekem blong folem ol loa blong God. Bambae oli karem trufala fasin glad long yu. Bambae yu luksave samting ya taem yu gohed sloslou blong mekem ol samting ya.
Fastaem, tingbaot hu ya Jeova, wanem ol samting we hem i wantem se yu mas mekem, mo wanem samting hem i promes blong givim. Askem ol Wetnes blong soem long yu wanem we Baebol i talem long saed ya. Jekem ol tok blong olgeta long prapa Baebol blong yu. Taem yu haremsave se ol Wetnes oli stap talem trutok long saed blong skul, bambae yu wantem tumas blong save moa long ol nambawan samting we oli save serem wetem yu long Baebol.—Proveb 27:17.
Yu yu welkam blong kam luk ol Wetnes long ol ples blong miting blong olgeta, Haos Kingdom. Long ples ya, bambae yu harem plante toktok we i kamaot long Tok blong God, we i save givhan long yu. Bambae yu luk olsem wanem ol man we oli stap, oli glad blong toktok tugeta long ol stampa tingting blong God. Letem ol Wetnes ya oli halpem yu blong lanem trutok long saed blong ol samting we God i wantem yumi blong mekem tede. Ansa long tok blong God we i singaotem yu blong tokbaot tru wosip, ale haremgud long smael blong hem we i soem se hem i glad long yu, mo kasem laef we i no save finis long Paradaes tu.—Malakae 3:16; Jon 17:3.
[Tok blong pija long pej 5]
Noa i no fraet blong tokbaot ol stampa tingting blong God long olgeta man
[Tok blong pija long pej 7]
Olsem Pol i mekem long Atens bifo, Ol Wetnes blong Jeova oli tijim ol trutok blong Baebol long ol narafala man