Fasin Blong Putumaot Man Long Kongregesen—?Wan Rod Blong Soemaot Lav?
‘JEOVA GOD, we i gat olgeta paoa, hem i tabu we i tabu we i tabu.’ (Revelesen 4:8) Folem ol tok blong vas ya, Jeova i Stampa blong olgeta rul, long saed blong ol fasin we oli tabu. Ol rul ya oli stap long ol ‘tabu tok blong Baebol,’ mo ol Kristin oli mas folem ol rul ya. Yes, oli mas stap longwe long eni samting we i doti long ae blong Jeova.—2 Timote 3:15; Aesea 52:11.
Baebol i klia taem hem i givim oda ya se: “God ya we i singaot yufala, hem i tabu, hem i klin gud. Oraet, long sem fasin, yufala tu i mas tabu, yufala tu i mas klin gud. Long Baebol God i talem finis se, ‘Yufala i mas tabu, yufala i mas klin gud, olsem we mi mi tabu, mi mi klin gud.’ ” (1 Pita 1:15, 16) Stat 1900 yia bifo, taem faswan Kristin kongregesen i stanap, ol trufala Kristin oli stap faet strong blong protektem kongregesen ya long olgeta doti long saed blong speret mo fasin.—Jud 3.
?From Wanem Kongregesen i Nidim We Oli Protektem?
Olgeta man blong God oli fesem traem ya, blong stap klin long olgeta fasin blong olgeta, mo long saed blong speret tu. Blong stap klin, yumi mas agensem tri enemi we oli gat bigfala paoa—Setan, wol blong hem, mo bodi blong yumi we i fulap long sin. (Rom 5:12; 2 Korin 2:11; 1 Jon 5:19) Wol blong Setan bambae i traem pulum yu blong mekem rabis fasin. Bambae hem i traem lidim yu blong folem ol fasin blong hem. Mo bambae hem i givim mane, haenem, gudfala wok, gudnem, mo paoa long yu. Be olgeta we oli gat strong tingting blong folem tru wosip, oli stap agensem olgeta samting we Setan i wantem givim, mo oli stap ‘holem laef blong olgeta i klin we ol rabis fasin blong wol i no save spolem.’ ?From wanem? From we oli wantem stap aninit long kea blong ogenaesesen blong Jeova we i klin, mo we i stap lukaotgud long olgeta wetem fasin lav.—Jemes 1:27; 1 Jon 2:15-17.
Jeova i mekemrere wan rod, blong halpem eni memba blong Kristin kongregesen we i foldaon long wan trap blong Setan, from slak fasin blong hem. Kongregesen i putumap ol elda we oli kasem ol hae mak long saed blong speret, blong lukaotgud long kongregesen. Mo tu, wetem fasin lav, oli save givhan long olgeta we oli mekem rong, blong oli tanem tingting blong olgeta long ol sin ya, mo jenisim ol fasin we oli mas jenisim blong folem stret rod bakegen. Wan Kristin we i joen long nogud fasin, i mas kasem help long wan man we i gat longfala tingting, blong givhan long hem blong tanem tingting blong hem mo jenisim fasin blong hem.—Galesia 6:1, 2; Jemes 5:13-16.
?From Wanem Fasin Blong Putumaot Wan Long Kongregesen i Soemaot Lav?
Taem wan man blong Jeova we i baptaes finis, i folem wan rod we hem i save se i nogud, mo i no wantem tanraon, hem i soem se hem i no tanem tingting blong hem from sin ya. Samting ya i mekem se i no stret we hem i stap joen wetem ol narafala Kristin. (Skelem 1 Jon 2:19.) Ol man olsem, oli no save stap insaed long Kristin kongregesen we i klin, from we bambae oli mekem i kam doti. Kongregesen i mas putumaot olgeta.
Blong soem se i stret blong putumaot wan man we i mekem rabis fasin, yumi save tingbaot eksampel ya: Wan nyuspepa long Toronto, Kanada, nem blong hem, The Globe and Mail, i talem se, raf fasin mo fasin we ol studen oli kilim ol narafala studen long skul, i stap kam antap tumas. From samting ya, long samfala skul, oli stanemap wan rul se, “eni studen we i yusum no we i talem se bambae hem i yusum masket no naef long narafala studen, bambae oli sakemaot hem long skul, we i no moa save skul bakegen long ful laef blong hem.” Fasin blong sakemaot ol studen ya, i blong lukaotgud long olgeta studen we oli rili wantem skulgud, blong oli save gohedgud we oli no fraet long ol raf fasin ya.
?Fasin ya blong putumaot wan man long kongregesen taem hem i no tanem tingting blong hem from rong we hem i mekem, from wanem i soemaot lav? Fasin ya i soemaot se yumi laekem tumas Jeova mo ol rod blong hem. (Ol Sam 97:10) Fasin ya i soemaot lav long olgeta we oli stap folem rod we i stret, from we i karemaot ol man, we ol nogud fasin blong olgeta i save spolem olgeta we oli gat stret fasin. Mo tu, hem i mekem se kongregesen i stap klin. (1 Korin 5:1-13) Sipos kongregesen i letem ol rabis fasin mo ol doti long saed blong speret i stap insaed, bambae kongregesen ya i kam doti, mo bambae hem i no naf blong mekem tabu wok blong Jeova, we i gat ol tabu fasin. Antap moa, taem kongregesen i putumaot man we i mekem nogud fasin, samting ya i save givhan long hem blong luksave se hem i stap folem wan rod we i nogud tumas. Mo tu, i save halpem hem blong tanem tingting blong hem from sin ya, mo mekem ol jenis long laef blong hem, nao kongregesen i save agri we hem i kambak insaed long hem.
?Hem i Mekem Wanem Long Ol Narafala?
Taem wan memba blong kongregesen i mekem wan bigfala sin, olsem fasin blong slip wetem wan man no woman we i no hasban no waef blong hem, hem i no mekem hat blong Jeova i glad. (Proveb 27:11) Eni Kristin we i foldaon long nogud fasin long saed blong seks, i no gat sem tingting olsem Josef, taem woman blong Potifa i traem blong pulum hem blong mekem nogud fasin long saed blong seks wetem hem. Josef i talem long hem i se: “?Weswe mi mi save mekem rabis samting ya we i sin agens long God?” (Jenesis 39:6-12, NW) Josef i respektem ol rul blong Jeova long saed blong ol fasin we oli tabu long ae blong hem, nao hem i girap i ronwe. Defren olgeta, wan man no woman we i slip wetem narafala we i no man no woman blong hem, i no gat naf lav long God blong mekem se hem i save blokem samting we bodi blong hem nomo i wantem.—Galesia 5:19-21.
Wan man we i baptaes be i brekem loa blong God, i no stap tingbaot se fasin blong hem i save mekem ol famle blong hem, we oli bilif, oli harem nogud tumas. Long sam famle, fasin ya blong harem nogud i hevi tumas blong karem. Wan Kristin woman we i faenemaot se pikinini boe i bin mekem rabis fasin long saed blong seks, i harem nogud tumas, i talem se: “I gat smol namba nomo blong ol brata mo sista, we oli naf blong kasem save olsem wanem mifala i harem nogud, mo olsem wanem samting ya i spolem mifala. . . . Hat blong mifala i brok.” Rabis fasin olsem i save sakem doti long gudnem blong fulwan famle. Tingting we i foldaon mo fasin blong sem, i save kamaot long olgeta memba blong famle we oli gat bilif. Taswe, fasin blong hemia we i mekem nogud, i save brekem hat blong famle blong hem.
Halpem Ol Memba Blong Famle Wetem Fasin Lav
Olgeta memba blong famle blong hemia we i mekem sin, we oli Kristin wetem strong bilif, oli mas rimemba se fasin blong putumaot wan man long kongregesen, i soemaot lav, mo i lukaotgud long kongregesen. Man ya we i mekem sin, i bin kasem olgeta kaen help. Be sipos hem i no wantem obei long God, mo hem i stronghed we i no wantem tanem tingting blong hem from sin, kongregesen i mas tekem aksin blong stap klin. Hem i no gat narafala rod, be hemia we Tok blong God i talem: “Yufala i mas putumaot man ya we i stap mekem sin oltaem, bambae hem i no moa stap wetem yufala.” (1 Korin 5:13) Olsem wan Wetnes i talem, “fasin blong putumaot wan memba blong kongregesen, hem i joen wetem fasin blong yumi blong stap tru long Jeova.”
Taem kongregesen i putumaot wan man, ol memba blong famle blong man ya we oli Kristin, oli harem i soa long hat blong olgeta. Taswe, ol elda oli mas traehad fulwan blong mekem olgeta oli haremgud long saed blong speret. (1 Tesalonaeka 5:14) Ol elda oli save prea from olgeta, mo oli save prea wetem olgeta tu. Plante taem, oli save faenem rod blong visitim olgeta Kristin ya we oli stap holemtaet bilif, mo storeyan wetem olgeta long sam vas blong Baebol, we i save leftemap tingting blong olgeta. Ol man blong lukaot long sipsip, oli mas yusum olgeta jans we oli gat bifo mo afta long ol Kristin miting, blong mekem ol gudfala brata mo sista ya oli strong long saed blong speret. Oli save leftemap tingting blong olgeta moa, sipos oli joen wetem olgeta long wok blong prij. (Rom 1:11, 12) Ol man blong lukaot long ol sipsip long saed blong speret, oli nidim blong soem long ol man blong Jeova ya we oli stap stanap strong, lav mo fasin blong tingbaot olgeta, we i stret blong oli kasem.—1 Tesalonaeka 2:7, 8.
From we wan man long famle i folem rod blong sin, samting ya i no minim se kongregesen i mas tanem baksaed long ol narafala memba blong famle ya we oli stap holemstrong long Jeova. God i sakemaot rabis king blong ol man Isrel, hemia Sol. Be Deved i no letem samting ya i spolem gudfala fasin fren we hem i gat wetem pikinini boe blong Sol, Jonatan. Yes, fasin fren blong Deved mo Jonatan i kam strong we i strong. (1 Samuel 15:22, 23; 18:1-3; 20:41) Taswe olgeta long kongregesen oli mas givhan mo soem lav long olgeta Kristin we wan memba blong famle blong olgeta i sin agensem Jeova.
!Sipos yumi no wantem toktok long olgeta we oli stanap strong long bilif, no yumi soem fasin we i no kaen nating long olgeta, yumi no stap soemaot lav nating! Olgeta memba blong famle we oli stap tru long God, oli gat wan spesel nid, blong yumi leftemap tingting blong olgeta. Maet oli harem se oli stap olgeta nomo, mo maet oli stap fesem wan taem long laef blong olgeta we i had tumas. Maet yu save toktok wetem olgeta long telefon, mo serem wan sas samting long saed blong speret wetem olgeta, no wan ekspiryens we i save leftemap tingting blong olgeta. Sipos man we kongregesen i putumaot hem i holem telefon, askem nomo blong toktok wetem Kristin memba blong famle ya we yu wantem toktok wetem. Maet yu save singaotem ol memba blong famle ya we oli stanap strong long bilif, blong oli kam kakae long haos blong yu, no kam joen wanples wetem sam narafala brata mo sista. Sipos yu mitim olgeta long taon, maet yu save yusum jans ya blong joen smoltaem wetem olgeta, blong leftemap tingting blong olgeta. Rimemba se, olgeta Kristin we oli holemstrong long Jeova, we kongregesen i putumaot wan memba blong famle blong olgeta, oli stap yet olsem wan haf blong klin ogenaesesen blong Jeova. I isi nomo blong oli karem fasin ya blong stap olgeta nomo, mo blong tingting blong olgeta i foldaon. Taswe, yumi mas stap rere oltaem blong soemaot kaen fasin mo lav long olgeta. Gohed blong mekem i gud ‘long olgeta ya we oli bilif long Kraes, nao oli brata blong yu.’—Galesia 6:10.
Gat Tangkyu From Rod Ya We Jeova i Mekem
Yumi talem bigfala tangkyu long Jeova God, we hem i tingbaot ol wanwan memba blong bigfala famle we oli stap wosipim hem long ful wol. Wetem fasin lav, hem i stanemap wan plan tru long ogenaesesen blong hem, we i save givhan long yumi blong wokbaot long stret fasin long fored blong hem. Sipos wan memba blong famle i wantem folem rod blong sin mo kongregesen i mas putumaot hem, i gat wan rod blong hem i save kambak bakegen, sipos hem i rili tanem tingting blong hem from sin ya we hem i mekem. Eksampel ya i soemaot samting ya:
Ol elda oli bin traehad blong halpem wan woman, we yumi save kolem hem Anna, be hem i stat blong smok, dring, mo tekem drag. Hem i no wantem tanem tingting blong hem from ol sin blong hem, nao hem i aot long kongregesen. Be, i no longtaem biaen, Anna i sore from we hem i no moa save joen wetem klin kongregesen blong Jeova we i gat lav, nao hem i prea long God blong i givhan long hem. Hem i talemaot tu, se hem i no bin gat fasin tangkyu fulwan, long bigfala fasin keagud we ol elda oli stap soemaot long olgeta we oli lego stret rod. Anna i stat blong kam long ol miting bakegen. Samting ya i lidim hem blong tanem tingting blong hem from sin we hem i mekem. Biaen, kongregesen we i stap lukaotgud mo soemaot lav long ol memba blong hem, i agri se hem i save kambak insaed. Bakegen, Anna i stap folem ol stret loa blong Jeova long saed blong klin fasin. Hem i gat fasin tangkyu long ol elda from lav we oli soemaot long hem, mo hem i talem tu se: “Yu no save olsem wanem ol Kristin buk oli givhan bigwan long mi. Jeova i rili lukaotgud long ol nid blong yumi.”
Yes, olgeta we oli aot long kongregesen, we biaen oli tanem tingting blong olgeta, God i stanemap wan rod blong oli save kambak. Yumi luk se fasin ya blong putumaot wan man long kongregesen, i wan rod blong soemaot lav. !Be i moagud we oltaem yumi fasgud long ol stretfala rod blong tabu God blong yumi, nao yumi blokem fasin ya blong harem nogud olsem! Yumi save gat bigfala tangkyu olwe, from jans we yumi gat blong presem Jeova olsem wan memba blong ogenaesesen blong hem we i klin, i gat bigfala lav, mo i lukaotgud long yumi.
[Tok blong pija long pej 26]
?Yu yu stap soemaot lav long olgeta memba blong famle we oli holemstrong long bilif, nating se kongregesen i putumaot wan memba blong olgeta?