Laef i Jenis Bigwan

!LONG Isrel bifo, ol man oli rili glad, blong laef aninit long gudfala rul blong King Solomon we i strong long bilif! Hem i wan taem blong pis, we ol man oli gat plante samting, mo oli gat gladtaem. Taem Solomon i stanap strong long saed blong tru wosip, Jeova i blesem nesen blong hem bigwan. God i mekem se King Solomon i rij we i rij. Be antap long hemia, hem i givim “wan hat we i waes mo we i kasem save” long Solomon, blong hem i save rul long stret fasin mo wetem lav. (1 King 3:12) Baebol i talem se: “Olgeta king blong wol ya, oli traem kam luk Solomon blong harem waes blong hem, we trufala God i putum long hat blong hem.”​—2 Kronikel 9:23.

Long taem blong Solomon, Jeova i givim seftaem, pis mo plante tumas gudfala samting long ol man. Tok blong God i talem se: “Juda mo Isrel oli plante, olsem sanbij we i stap kolosap long solwora. Oli stap kakae, oli stap dring mo oli glad tumas.” Tok we i kamtru long prapa laef blong olgeta, mo i olsem wan pijatok tu, se ol man ya oli “stap sefgud, wanwan long olgeta oli stap sidaon aninit long rop ya blong mekem waen blong olgeta mo aninit long prapa figtri blong olgeta, . . . long olgeta dei blong Solomon.”​—1 King 4:​20, 25.

Be ol taem oli jenis bigwan. Naoia, laef i defren olgeta long ol dei blong glad long taem bifo. Wan bigfala problem tede, hemia fasin pua. Long taem blong Solomon, i no gat problem ya. Tede, long ol kantri we oli rij tu, i gat fasin pua. Olsem wan eksampel, Yunaeted Nesen Developmen Program i talem se, long Yunaeted Stet mo long Yunion blong Yurop, kolosap 15 pesen blong ol man oli pua.

Long saed blong ful wol, wan ripot we UNICEF (United Nations Children’s Fund) i mekem, The State of the Worldˈs Children 1994, i talem se wan long evri faef man long wol, i pua tumas. Hem i ademap se, laef blong bighaf blong ol puaman long wol, “i stap kam strong moa mo oli no moa gat hop.”

Long sam kantri, praes blong ol samting i go antap bitim mak, mekem se laef i hadwok moa long ol puaman. Wan woman long wan kantri blong Afrika i talem se: “Yu luk wan samting long maket, mo yu talem se, ‘OKE, bambae mi go long haos mo karem mane blong pem samting ya.’ Yu kambak wan haoa biaen, mo oli talem long yu se yu no gat naf mane blong pem samting ya from we praes blong hem i jes go antap. ?Bambae yu mekem wanem? Hemia i rili mekem tingting i foldaon.”

Wan narafala woman i talem se: ‘Blong laef, mifala i traehad blong kasem kakae nomo, mifala i fogetem ol narafala nid. Faenem wan rod blong kasem kakae, hemia nao samting we i olsem bigfala wok long laef blong mifala.’

Folem toktok blong Yunaeted Nesen, i luk olsem se fyuja i nogud. UNICEF i ting se, sipos namba blong ol pikinini we oli bon i stap sem mak olsem naoia, namba blong ol puaman long wol bambae i kam antap fo taem moa, “long ol yia blong laef blong wan man nomo.”

Be, nating se trabol long saed blong mane, mo laef blong man, i kam moa nogud, ol man blong God oli gat wan hop we i mekem se oli glad. Nating se oli laef wetem olgeta we oli ting se fyuja bambae i nogud, ol man blong God oli lukluk i go long fyuja wetem glad mo strong tingting. Haf we i kam biaen i eksplenem from wanem.

[Foto Credit Line blong pija long pej 3]

De Grunne/Sipa Press